الموضوع: تجربتي مع اللوجان

المشاركة الأصلية كتبت بواسطة lion98

معلش يا جماعة بعد إذنكم في كلمتين محشورين في حلقي من امبارح و استنيت لما أكون فكرة عامة بخصوص الموضوع علشان ردي يكون بقدر الإمكان موضوعي . بداية ياشكر صاحب الموضوع على نصيحته لأي واحد يشتري العربية بعدم الانبهار بها و اعتبارها اعجوبة عصرها و أوانها . وهي بالفعل مجرد عربية بس اللي مش فاهمه إزاي فيها كم العيوب دي و بعدين حضرتك بتقول عليها حلوة. رغم إن من كلام حضرتك حسيت إنها لحد ما سعادتك تخلصت منها كانت منغصة حياتك ؟ و ده يقودني لسؤال ..بافتراض واحد بني آدم عادي شاف عربية و عجبته و حب يعرف معلومات عنها يروح لمين و يسألهم ؟ بالتأكيد هيسال ملاك العربية و يعرف منهم أولها و آخرها . وطبيعي كل واحد هيحاول يبرز مميزاتها بقدر المستطاع و هيحاول يقلل من عيوبها اللي برضه بتعتبر نسبية و بتختلف درجة تقبلها أو المعاناة منها من شخص لآخر . و ده مش في منتدى لوجان ولا غيرها من السيارات ده في كل سلعة أو خدمة أو حتة فرقة كورة تروح مثلا منتدى مانشستر تلاقي تفخيم و تعظيم في النادي و قليل جدا بيتكلم عن عيوبه و ممكن تلاقي صفحات كاملة بتهاجم منافسيه مثل ليفربول أو أرسنال أو تشيلسي مثلا . و ده برضه مش عندنا في مصر ولا العالم العربي ده طبع و حال البشر في كل مكان و زمان كل واحد بيحاول يبين حسن اختياره و طريقته و معتقده و بيدافع عنها بكل ما أوتي من قوة و قليل من يواجه نفسه بصدق و إن فعل فلن يكون ذلك على الملآ مطلقا . نحن بشر ولسنا أنبياء . لو كنا بندافع عن أمور غير موجودة أو مبالغ فيها فيما يخص السيارة لكان من حق أي شخص الهجوم علينا و اتهامنا بالمبالغة و محاولة وضع السيارة في حجم أكبر بكتير من حقيقتها لكن اللي مريت بيه أنا و مر بيه كل من كان له النصيب باقتناء هذه السيارة هو البحث و السؤال و استخلاص الخبرات و اللي عمر ما حد من أصحابها الأوائل بخل علينا بها . سيارة مجهولة غامر البعض باقتنائها منذ 3 سنوات و نقلوا خبراتهم لمن بعدهم و هو ما كان ليه الأثر في قرار اقتنائها لكن من امتلكها من بعد و لله الحمد و من واقع خبرتي وجدت كل ما قيل من مميزات و عانيت من بعض ما قيل عليه من عيوب سواء سوء تقفيل أو عدم توافق و اكتشفت بمنتهى الصراحة أن كفة المزايا أرجح بكثير من عيوبها و معظم الإخوة و لله الحمد مرتاحين و مقتنعين بشكل ربما يكون قد فاق توقعاتهم من السيارة ولا ضير من الحديث عن اعتماديتها (و دي بشهادة الناس برة و جوة مش شهادتي لوحدي) و قوة أدائها و اتزانها العالي على السرعات العالية (و ليس 120 إلا لو كانت سيارة سعادتك السابقة حالة شاذة) ولم أهمل كذلك علو صوتها على 3000 - 3500 أر بي إم (بس مش لدرجة إني ما اسمعش اللي جنبي) و متضايق من مكان مفاتيح الزجاج الكهربي الخلفي اللي إبني الصغير دايما يفتحهم لما يدوس عليهم أثناء حركته في السيارة بس عموما الحاجات مش خانقاني لدرجة إني أدوش دماغي و اعمل موضوع اطلع في القطط الفطسانة في العربية بالشكل ده . مفيش عربية ولا أي حاجة كاملة من مجاميعه كلنا عارفين و مقتنعين إن الكمال لله وحده عز و جل لكن اللي بيشيل بيشيل الشيلة على بعضها طالما الأمور ككل مقبولة و بعدين الواحد ركب عربيات كتير في كل منها مميزات و عيوب , طيب ليه مثلا لما بعت الأكسنت 1999 اللي كانت معايا ماروحتش منتدى هيونداي و عملت موضوع شرحت فيه عيوبها (رغم كثرتها) لكن كل اللي فاكره إنها كانت خفيفة و تكييفها ممتاز جدا و لم أتحدث باستفاضة عن عيوب سيارات عديدة مرت علي قبلها مثل ال128
وهي بالمناسبة أوروبية أيضا (حتى لو كانت تجمع بشركة النصر رحمها الله) ولا اللادا 2105 ولا الشاهين 1300 ولا الجولف 1980 و لا اللانسر كريستالة 1998 كل سيارة لها مميزاتها و لها عيوبها و كل واحد له احتيجاته مقولناش إن لوجان هي الأفضل إطلاقا لكنها بمنتهى الواقعية الأفضل في فئتها مع كل اعترافنا بأن موتورها موضة قديمة و 8 صبابات و صوته خشن و شكلها مش عاطفي شوية و معمولة لبلاد كانت بتركب الجمال قبل كدة بس الحمد لله برغم كل ده ثابتة و جودها و بتنجح يوم بعد يوم و بتنتشر بشكل واضح و توكيلها بيعاملها معاملة التوكيلات المحترمة لأنه عارف يعني إيه علامة رينو حتى لو كانت في الأصل داتشا و أخيرا لو العربية فيها ده كله ماكانتش دولة زي ألمانيا (قلعة صناعة السيارات أوروبيا و عالميا) استورتها للغلابة محدودي الدخل اللي عندها و يبقى دائما ان الخلاف في الرأي لا يفسد للود قضية

فعلا أحسن رد

لا حول ولا قوة الا بالله العلى العظيم ...
الموضوع قلب خناق .
بس هو فعلا الكلام مش منطقى خالص يعنى واحد معاه ياريس و بيقول ان ثبات اللوجان وحش و بيقول ان تكيف اللوجان ثلاجة !
واحد معاه كابرس و بيقول ان اللوجان سفاحة بنزين و ايضا تكيفها ثلاجة !
بجد والله ( لا تعليـــــــــق )
مع احترامى الكامل لحضرتك .
كلام حضرتك يدل على انك مركبتش اللوجان و لا تعرف شكلها حتى والله اعلم .
عامة اختلاف الرأى لا يفسد للود قضية و لو اتفقت الأذواق لبارت السلع و انا متفق مع حضرتك على حاجتين .
1- السقف فعلا بيتوسخ بسرعة و دة لأن لونه فاتح ( سكر فاتح ) شبيه بالأبيض فابالتالى مع عوادم السيارات و الأجواء المصرية لازم يتوشخ بسرعة .
2- فعلا اماكن ازرار الزجاج و الكلاكس مش مريحة و فعلا مكينة الزجاج اللى بتاعة باب السائق هى الوحيدة اللى بطيقة نسبيا و انا ناوى اقولهم عليها فى التوكيل فى صيانة ال 10 الاف كيلو .
انما استهلاك البنزين فالعربية اقتصادية جدا فى البنزين .
و معايا بقلها 11 شهر و الحمد لله مريحة جدا و ربنا يحفظهالى و يباركلى فيها .
انما من حيث التوكيل فأنا من محافظة الأسكندرية و بتعامل مع فرع العامرية و هناك ناس محترمين و متخصصين و متمكنين و ذوق جدا و استراحة مكيفة و فيها كافية و حاجة مزيكــــــــا من الأخر .
انما حتة ان رينو بتصنع عربيات علشان تقعد 4 سنوات فقط فدى حاجة جديدة شوية .
لما رينو بتصنع عربيات علشان تقعد 4 سنين فقط يبقى الصين بتصفع عربيات من الأساس ليه " مع احترامى للعربيات الصينى يعنى و لكل ملاكها "
بص يا باشا انا والدى اشترى عربية بولونيز و انا عندى 7 سنوات و كنت دائما بروح معاه للميكانيكى و انا بعشق العربيات جدا و بعشق كمان الحديث عنها تقدر تقول موهبة كدة و بعنها بعد 12 سنة و اشترينا هيونداى اكسنت و بعنا الأكسنت بعد 6 شهور و قررنا منركبش كورى تانى و خاصة ماركة هيوندا و الأغرب من ذلك بعد مبعنا الأكسنت اشترينا عربيا اسمها ( زوتى اكسبلوجن ) اللى منزلها المسلى و قعدت معانا 5 سنوات من غير منغيرلها بجيهات اساسا و لا حتى تيل فرامل و ركبت عربيات كتير زى الياريس و الألنترا و الأبترا و الريو و النوبارا و السينا ... الخ
و بصراحة اكتر عربية استريحت فيها اللوجان .
انت عارف عيبنا ايه اننا بنقارن اللوجان بعربيات من فئة اعلى من فئة 90-120 الف جنيه و دة بيظلم اللوجان بجد مع العلم ان المفروض ان سعر اللوجان الأصلى ميقلش عن 85000 جنيه هى رخيصة علشان اتفاقية اغادير مش اكتر و عامة هى سعرها فى السعودية من 36-48الف ريال .