الموضوع: موضوع تجميعى لمعظم مشكلات الجين2 من تجارب الملاك

فكرت فى الفكرة دى من كام يوم ولكن نظرا للاحداث اللى مخلية الواحد ملوش نفس يكتب اى حاجة بمزاج وتنظيم فكنت كل يوم ااجلة لحد النهاردة حسيت انى محتاج اخرج من المود شوية من كتر ما الواحد ممكن يجرالة حاجة من اللى بيحصل واللى بنسمعة

المهم الموضوع باختصار دة موضوع مشترك فية كل ملاك الجين2 وحيناقش تجارب ومواقف وحالات حصلتلهم مع عربياتهم وحلوها ازاى او اكتشفوها ازاى
طبعا حبدا بنفسى اولا ومش لازم كل اللى حقوم بسردة يكون حصل فى العربية
وكمان الموضوع دة حيكون مفيد جدا جدا لكل ملاك الجين2 الجدد او اللى حيكون ليهم نصيب فيها باذن الله

نبدأ على بركه الله

الحالة الاولى
1-احيانا وانت بتدور العربية سواء بعد مشوار او فى الصباح الباكر تاخد مشوار طويل شوية فى الدوارة وكانها قاطعة بنزين
الحل : البوجيهات مرطبة او هناك بواقى بنزين غير محترق فى غرف الاحتراق وبردة ناتج عن ضعف فى البوجيهات وبالتالى احرق شوية على الغيارات بين الحين والاخر لضمان حرق البنزين بالكامل وتغيير البوجيهات فى ميعاد الصيانة وافضل نوع للبوجيهات عن تجربة ال ngk iridium ix

الحالة الثانية
2-عند السير على الطرق الغير ممهدة احيانا مع لف الدريكسيون (ملف غير ممهد ) تسمع صوت خبط بسيط فى الجزء الايسر من التابلوة
الحل: هذا عيب شائع فى تصميم علبة الدريكسيون للسيارة ظهر مع اغلب الملاك ويقتضى حجز تعديل علبة الدريكسيون من التوكيل وتركيبة فى اقرب وقت
للعلم : العيب عيب تصميم وليس عيب فى العلبة والعيب عبارة عن الصوت المذكور اعلاة دون ضرر للعلبة او شىء (يعنى ممكن تركبة وممكن متركبوش انت ومزاجك فى ناس كتير مبتسمعش الصوت دة وهوة عندهم واصوات تانية كتير علشان بيستخدم الكاسيت طول الوقت )

الحالة الثالثة
3-اذا صادفك بعد مشوار طويل بالسيارة او فى ظروف قيادة صعبة (زحمة مثلا لفترة طويلة ) عند لف الدريكسيون يمين او يسار (وانت بتركن مثلا ) وسمعت صوت صفير خفيف من الدريكسيون نفسة
الحل : مطلوب تغيير طرمبة الباور فى السيارة حتى مع ثبات منسوب الزيت فى القربة فهذا عيب ميكانيكى فى الطرمبة ومع الوقت الدريكسيون بيتقل وكفاءة ومتعة القيادة تقل

الحالة الرابعة
4-اثناء السير وعند لف الدريكسيون فى اى اتجاة وباى مقدار اذا سمع صوت من الدريكسيون عبارة عن تكتكة خفيفة جدا (لا تسمع الا وانت قافل الازاز ومش مشغل الكاسيت)
الحل : تغيير الكلوك سبرينج الموجود فى الدريكسيون

الحالة الخامسة
5-اذا تعطل المالتى فنكشن او اصبحت الازرار لا تؤدى المطلوب منها
(مثال عايز توطى تدوس على -vol تلاقية عمل mute او غير الاغنية او اى حاجة تانية)
الحل : تغير الكلوك سبرنج بردة

الحالة السادسة
6-لمية الايرباج لو نورت اثناء السير او بعد التدوير باستمرار (المفروض انك اول ما تدور اللمبة بتنور وبتفصل لو نورت باستمرار !!)
الحل : تغيير الكلوك سبرنج بردة مع التاكد من سلامة الفيوز الخاص بلمبة الايرباج ولو انة احتمال ضعيف لان مش علية حمل اصلا ولكن للتاكيد مكانة فى اسفل الجزء الايمن من التابلوة (جنب الدرج اللى فى التابلوة)

الحالة السابعة
7-عند الضغط على الفرامل وتشعر باستجابة ضعيفة وعند ترك الضغط والضغط مرة اخرى (تكارك يعنى باللغة الدارجة ) تجد الاستجابة تحسنت بفارق ملحوظ
الحل : يجب اخذ هواء من دورة الفرامل عند اقرب مركز صيانة للسلامة (مهم جدا )

الحالة الثامنة
8-عند الضغط على الفرامل وسماع صوت صررررريخ حديد واحتكاك شديد (صوت غير مسبوق )
الحل : يجب تغيير تيل الفرامل باسرع وقت والصوت ناتج من احتكاك الحديدة او (الصاجة ) اللى موجودة فى اخر التيل مع الطنبورة والتى تبين او تنزر بقرب انتهاء التيل

الحالة التاسعة
9-عند الضغط على الفرامل اثناء الرجوع الى الخلف وسماع صوت احتكاك عالى جدا ولكن اقل كثيرا من الصوت فى الحالة الثامنة
الحل: انت مركب التيل المصرى يا معلم للاسف مفيش حل عيش لحد ما يخلص واوعى تركبة تانى :)

الحالة العاشرة
10-لو فى مرة جيت تشغل الكاسيت واشتغل وعلق وحاولت تقفلة بكل الطرق ولقيتة بردة شاشتة منورة حتى لو شيلت المفتاح من الكونتاكت
الحل : شيل القطب السالب من البطارية وركبة تانى ومش حتتكرر الحركة دى الا كل فين وفين وممكن جدا متحصلش بردة
ملحوظة (اوعى تسيب العربية كدة وتنزل من غير ما تفصل الكاسيت لا ترجع وتحتاج تشترى بطارية انا قلت اهوة مليش دعوة :) )

الحالة الحادية عشر
11-عربيتك اوتو ؟؟ وانت ماشى حسيت ان فى عضة فى الغيار التانى او التالت وانت ماشى فى شارع زحمة جدا ( ماشى واحدة واحدة وهى بتنقل غصب عنك وعنها )
الحل : الاول اتاكد من منسوب الزيت فى الفتيس وغالبا حتلاقية مظبوط وطبعا لو ملقتوش مظبوط تزودة وتروح تكشف النقص جاى منين بس متقلقش حتلاقية مظبوط
وبالتالى الحل الفعلى انك تشيل كابل البطارية السالب عشر دقايق تقريبا وتركبة تانى الكمبيوتر يعمل ريسيت ويظبط العربية من اول وجديد من الاخر (تهييسة كمبيوتر يا معلم اللى بيحصل دة نتيجة لانك بتكون ماشى فى طرق سريعة كتير والعربية فايقة والهوا اللى داخل اكبر وبالتالى الحرق اعلى ولما بتدخل فى طرق زحمة جدا مرة واحدة ممكن ممكن تعمل معاك كدة وحلها بسيط وسهل جدا وبردة ممكن جدا متعملش كدة نهائى ولو عملتها حتبقى مرة بالكتير

الحالة الثانية عشر
12-بطاريتك عدى عليها سنة ونص ؟؟؟؟
اى حاجة غير مالوفة حصلت فى العربية سواء فى الكهرباء او فى الغيارات وانت سايق !!!!
الحل : اعمل تشيك عند اى كهربائى على البطارية لانها بتودع

الحالة الثالثة عشر
13-صوت تزييق حاسس انة من البيبان مع المطبات
الحل : كريم فازلين او مية سخنة مع تفضيلى للاول (كريم مش الفازلين الطبى اللى بيبقى عامل زى الشمع دة ) ومررة على كل الكوتشات بتاعة الباب داير ميدور ومتبخلش على الكاوتش من الكريم :) وكمان كاوتش الشنطة مهم جدا حيطرى الكاوتش جدا وحيعيش فترة اطول وكمان حيخلية يسد الخلوص بتاعة كويس ودة حيحقق عزل افضل(لو فى صوت هوا او حاجة ) ومنع تزييق اللى بيجى من اى باب ووقاية كمان للكاوتش مش لازم يكون عامل مشكلة علشان تعمل الحالة دى

الحالة الرابعة عشر
14-وانت ماشى فى طريق سريع والجو لطيف وساقع ولقيت عداد الحرارة بينزل (بيقل عن المعدل الطبيعى اللى هوة قبل ال90 بسيكة )
الحل :اجرى على اخر مركز عملت فية صيانة (التوكيل او غيرة) وعلم اللى شالك ترموثتات الكوعة الادب وخليهم يركبولك واحد جديد ومتحاولش تسمع كلمة (مفيش منة ضرر احنا بنشيلة لكل الناس فى الصيف ) علمهم الادب على طول

الحالة الخامسة عشر
15-لو لاحظت فى يوم من الايام ان مروحة الردياتير مبتفصلش خالص حتى لو وصلت من مشوار سريع ووقفت ومورت واستنيت اكتر من 5 دقايق والمروحة بردة مفصلتش
الحل : دوس سنة بنزين لحد ار بى ام 4 بالكتير وكررها مرتين تلاتة لو بردة مفصلتش (دة بعد ال 5 دقايق) تطلع على التوكيل تانى يوم وتطالب بتغيير ترموستات الكوعة لانة بااااايظ

بيتهيالى دى معظم الحالات اللى انا فاكرها ولو فى حاجة تانية اكيد حقولها واتمنى الناس تشارك بس يكون بنفس التسلس يعنى اللى حيشارك يشوف رقم الحالة اللى انتهينا منها ويكتب الحالة بالرقم اللى بعدها حتى يظل الموضوع منسق ولا ينهك القارىء فى البحث لانة معمول اساسا للناس اللى اشترت ولسة جديدة او الناس اللى بتتخض ومبتعرفش تتصرف او الناس اللى لسة خبرتها قليلة بوجة عام فى السيارة واسمحولى اقولكم على نصائح عامة بردة من واقع تجربتى

نصائح عامة (هامة جدا)
1-ياريت ياريت ياريت اول ما تدور (اول تكة) تستنى لحد ما لمبة الايرباج تطفى ولمبة ABS ولمبة الحزام وبعد كدة تدور براحتك (الموضوع مش حياخد 5 ثوانى بس على الاقل حتدى فرصة لطرمبة البنزين للتحضير لانها كهربا ودة مهم جدا لاطالة عمر الطرمبة )
2-ياريت كل فترة والتانية تستخدم الكريم الفازلين لكل كاوتش العربية (مش مهم تغسل العربية كل فترة على فكرة قد موضوع الكريم دة )
3-ياريت كل فترة ترش WD40 على كل مفصلات الباب والشنطة (مساعدين الشنطة ومكان القفل ومفصلات الابواب واقفالهم ) وابعد عن الكاوتش مترشش علية دة بيخلى دايما قفل وفتح الابواب سهل نتيجة للمادة الزيتية اللى موجودة فى ال WD40
4-ياريت كل فترة (3000 كيلو مثلا ) تحط منظف رشاشات محترم مع تفويلة للعربية حلوة كدة وتانى بقول منظف رشاشات مش منظف دورة وقود وعن نفسى انصح ب LIQUI MOLY اكتر من ممتاز وبردة STP كويس وطبعا دة بينضف رشاشات عربيتك باستمرار من البنزين الجميل اللى عندنا وتفضل العربية فايقة ومتتكتمش
5-ياريت مترزعش باب شنطة العربية ولا البيبان وحتى لو داخل على مول او حتى خارج من التوكيل وحيفتحوا يبصوا فى الشنطة وانت بتفتحها من جوة نبة علية ينزلها براحة علشان متتهبدش منة ولو هبدها بردة يبقى غبى لاااااااااااازم تنزل تضربة
علشان هبد الشنطة دة كل شوية دة مش كويس على ازاز العربية الخلفى ولا على
قفل الشنطة ولا على صحتك وقلبك اللى حيتوجع مع الهبدة
6-كل فترة قبل ما تخرج الصبح بالسلامة افتح كابوتك وقبل ما تدور هات فوطة صغيرة لطيفة كدة وقيس منسوب زيت الموتور واتاكد انة مظبوط (امسح المقاس بالفوطة مرة واتنين وقيس على مهلك واتاكد )بعد كدة بص من برة بس على علبة زيت الفرامل واتاكد ان منسوب الزيت مظبوط وزيها بالظبط علبة زيت الباور واتاكد انة مظبوط حيبان من برة فى العلبتين دول مش لازم تفتح غطاهم بعد كدة شيل الغطا بتاع قربة المساحات وشيك على المية من الشريطة اللى بتبقى فى الغطا ولو ناقصة زودها مية وممكن مية مع جلانس بتاع الازاز (تملى ربع الازازة اللتر ونص بتاعة البيبسى جلانس وباقى القزازة مية وحطها فى القربة وعيش ولا احسن منظف زجاج حتشترية وطبعا كرر العملية لحد ما توصل للمقاس المظبوط اللى انت عايزة) بعد كدة بسم الله دور العربية وانت فاتح كبوتك انا مقلتش تقفلة لسة واستنى لحد ما عداد الحرارة يوصل للشرطة اللى بعد الصفر وهات مرشدير(لو عربيتك اوتو بس المانوال ملوش فية :) ) وانت رافع هاندك طبعا وقيس منسوب زيت الفتيس لو بين الهوت والكولد مور وبطل عربيتك وانت كدة تمام
ناقص نشيك على مية الردياتير ودى مهمة جدا ومهم تشيك ازاى
لا انصح اطلاقا بفتح غطا الردياتير لاى سبب كان وللتاكد من المنسوب عليك الاتى
قربة المية بتاعة الردياتير جنب الردياتير طبعا وطالع منها خرطوم لو معرفتش تفهم منة حاجة ودة غالبا حتشيل العلبة لفوق (هى كبس اساسا ودى معلومة جديدة ) تمسكها من زورها كدة وترفعها لفوق وتشوف المية فى القربة لو المنسوب تمام رجعها تانى واكبسها لتحت علشان تبات مكانها كويس
اقفل كبوتك وتوكل على الله ومش عايز اشوفك هنا تانى