الموضوع: من واقع خبرتكم اعمل ايه؟!

المشاركة الأصلية كتبت بواسطة Ashraf_Ibrahim

ازيكم يا شباب اخباركم ايه؟
يارب جميعا تكونوا بخير واللي مش متجوز يتجوز ان شاء الله وتبنوا بيوت مسلمة طيبة صالحة يا رب
دلوقتي انا بفكر اني اخد خطوة واخطب ان شاء الله وابتدي امشي في حكاية بناء البيت دي
طيب ايه الموقف؟!
انا بالفعل عندي شقة -ودي المشكلة اللي محتاج رايكم فيها -
الشقة دي ساكنة -والدي مسكنها- وهتفضى الشهر دا ان شاء الله ... هي كان المفروض يخلص عقدها كمان سنتين والمفروض انها هتتسكن تاني لنفس المدة
والدي بيسألني هل انا هعد في الشقة دي واللا اعد معاهم في الشقة ؟!
احنا قاعدين في شقة مكونة من 4 غرف وريسيبشن كبير و 2 مطبخ و 2 حمام
فدلوقتي قدامي خيار من 4 خيارات:-
الخيار الاول اني اقبل اني اعد معاهم في الشقة وهيكون نصيبي مطبخ وحمام وغرفتين وصالة !
الخيار التاني اني انتظر لما المدة تنتهي -سنتين على اعتبار انها هتتسكن سنتين كمان -
الخيار التالت اني اسيب الشقة فاضية وادفع انا ايجار الشقة لحد ما اتجوز
الخيار الرابع اني اعد معاهم لحد ما الشقة تفضى وبعدين اجهزها وانقل فيها
انتوا ايه رايكم في الخيارات دي؟!
النقطة التانية:-
بالنسبة لفترة الخطوبة هل كتير ان فترة الخطوبة تكون سنتين؟!
لأني اعتقد اني هحتاج فترة خطوبة لن تقل عن سنتين عشان أقدر اجهز نفسي
فهل اخطب واعد سنتين خاطب واللا انتظر اجهز نفسي وبعد كدة اخطب واتجوز على طول واللا اعمل ايه بالظبط؟!
بصراحة انا مليت وزهقت من اني مخدتش خطوة فعلية في الموضوع دا واحساس انك لوحدك دا احساس مش حلو برده -بغض النظر عن اهلي بس احساس من نوع تاني يعني
النقطة التالتة:-
بالنسبة للاتفاق مع اهل العروسة هو الشائع عندنا في البلد ان العريس يتحمل الغرف كلها كخشب وتنجيد وان العروسة تتحمل ما تبقا من اجهزة وما شابه فهل دا كدة كويس واللا لا؟!
انتوا ايه رأيكم؟!
النقطة الأخيرة انا تعبت دماغكم معلش:-
بالنسبة للشبكة ايه النظام دلوقتي ايه الحاجة المقبولة مع اسعار الذهب الحالية ؟!

الله الله,, طب كنت استشيرني وانا أقولك الزتونه .. يلا بقى نقول ايه هههههههههه

بص يا أشرف باشا, بالنسبه للنقطه الاولى من رأيي انك تقعد مع والديك السنتين دول لغاية لما الشقه تفضى. اديك هتكون في فتره خطوبه (وده جواب للنقطه التانيه) وفي نفس الوقت الدخل بتاع الايجار هتجهز بيه نفسك. (مجرد اقتراح)
اصل العروسه الجديده تحب يبقى عندها بيتها الخاص وكمان مهما كانت العروسه كويسه برضه ممكن تلاقي خلاف بينها وبين والدتك.

النقطه التانيه انا جاوبتها في وسط الكلام, اما بقى النقطه التالته معاك حق فيها. العريس عليه الخشب والتنجيد والباقي على العروسه. واوقات الاجهزه الكهربائيه بتبقى على العريس. على حسب الاتفاق بس خلي بالك ان الاتفاق يكون واضح وشامل في البدايه عشان مايبقاش في خلاف بعد كده ويكون في شهود على الكلام ده.

بالنسبه للدهب بقى اصبر شوية يمكن ربنا يكرمك واسعار الدهب تخف على حظك.
والف مبرووووووك مقدما يا جميل

المشاركة الأصلية كتبت بواسطة ahmed_mido1889

الجواز بيضيع الدين كله

او بيعمل زي جحا بيبيع نص البيت علشان يشتري النص التاني

ههههههههههههههههههههههههه ه .. أجل الكلام ده ياعم ميدو لما يتدبس
كده هتخليه يغير رأيه