الموضوع: كيف تصنع ايفو 1000 حصان ؟

فات اسبوعين ومحدش علق علي الموضوع .. فين ايفو ؟؟

أولا اعذروني يا شباب على التأخير كنت مشغول الفترة اللي فاتت مع كذا عربية بالاضافة لشغلي فمكانش عندي وقت


نرجع نكمل كلام

وقفنا المرة اللي فاتت عند ال Fuel System اللازم لعربية Evo 1000 حصان .


أي Fuel system بيتكون من الآتي رشاشات راكبين على مسطرة وعليها Regulator و Fuel pump بتسحب أو تضخ من التنك و خراطيم أو مواسير بنزين وفلتر بنزين


في مشروعنا احنا هنغير كل ده ( مبلغ كبير على فكرة )


الايفو الستوك بتنزل برشاشات 610 CC و طرومبة بنزين 190 LPH أو يعني liter per hour وفلتر بنزين عادي و منظم بنزين بيركب على المسطره بيدي ضغط بنزين ثابت 43 PSI


أولا الرشاشات :

بما إن مشروع زي ده عليه بوست ضخم وكمية شرارة مهولة إذًا لازم يقابل بنفس المستوى من البنزين وهنا حجم الرشاشات الجديدة بيعتمد على نوع البنزين المستخدم هل هو بنزين عادي ولا Race Gas ... لو بنزين عادي ( 95-101) هيكون رشاشات 1000-1200 CC مناسبين
أما لو هيتم استخدام Race Gas فلازم يكون حجم الرشاشات الجديدة من 1600 إلى 2200 CC . انواع الرشاشات كتير جدا واشهرها Bosch و Fuel lab و PTE غير HKS و greddy وغيرهم ....متوسط سعر الرشاش الواحد 1000 CC حوالي 120 دولار وكل مايكبر ال CC السعر بيكبر


بالنسبه للمسطره اللي بيركب عليها الرشاشات كمان بتتغير علشان تناسب حجم ال flow العالي جدا وميكونش ضغط البنزين خارج علي من الرشاش ويتخنق في المسطرة قبل مايوصل على ال Pistons . من أشهَر انواع المساطر AMS و HKS و Magnus ودول سعرهم المتوسط حوالي 150-200 دولار


المنظم : طبعا لازم يتبدل بواحد تاني لأن الستوك ثابت على 43 PSI ضغط والبروجكت ده بيتطلب ضغط أعلى من كده إذًا عاوزين واحد نقدر نتحكم فيه وفي نفس الوقت يستحمل ضغط عالي داخل عليه و '' لازم '' يكون نوع كويس جدا لأن ده لو باظ أو خرف و هو جيله ضغط من الطرمبات اللي هنتكلم عليها دلوقتي ضغط البنزين ممكن يوصل 100+ PSI مرة واحده ويمكن أكتر

إذًا الانواع الصيني بلاش منها في الحاجات اللي زي دي وبلاش منها أصلا في أي حاجة .

فيه انواع كتير ومعظم الشركات اللي بتنتج رشاشات بتعمل منظمات وسعره حوالي 200-300 دولار وبييجي كت كامل معاه العداد ,الخراطيم وصواميل التثبيت في المسطرة وده طبعا مبيركبش على المسطرة بيركب بعيد ويتوصل بخرطوم ضغط عالي .


الطرومبه ..... زي ماقلنا الايفو فيها طرومبه واحده 190 LPH راكبة جوه التانك في مشروعنا ده احنا عاوزين 2 وأحيانا 3 . بيركبوا إزاي ده اللي هنعرفه


أولا اللي في التنك دي بتتغير بـواحده اكبر وفي العادة بتكون Walbro ( من أشهَر ماركات مصنعه لل Race hi flow pumps ) بتدي 256 LPH ....دي وظيفتها إنها تطلع البنزين و''تضخ'' لحد تنك صغير راكب في شنطة العربية بالعربي كده اسمه تنك تحضير راكب عليه طرومبه '' سحب '' تسحب منه لحد نص العربية تقريبا وفي نص المسافة راكب طرومبه تالتة وظيفتها '' ضخ '' البنزين للرشاشات إذًا واحدة في التنك بتضخ تقبلها واحدة تانية تسحب وتضخ تقبلها واحدة تالتة تسحب وتضخ للرشاشات .. الأولى اسمها Intank Fuel pump ودي سعرها بيتراوح من 120-150 دولار الاتنين التانيين اسمهم Inline Fuel pumps ودول أشهَر أنواعهم ال Bosch 044 motorsport و walbro و sard وسعرهم بيتراوح من 450 - 500 دولار للواحده . بيطلع flow من كل واحدة بس 340 LPH وبتدي ضغط لحد 200 PSI .


يعني مجموع ال Fuel flow اللي في عربية زي دي 986 LPH أو لتر في الساعة .و لو أي حد من الشباب شاف الايفو المعمولة في مصر هيسمع صوت الطرومبات بتاعتها واضح عبارة عن زنه عاليه مميزه ...


بعد كل ده أكيد خراطيم البنزين هتتغير لانواع ذات ضغط عالي جدا والخرطوم الرئيسي بيتغير لماسوره من آخر العربية لأولها .


كملحق للكلام على ال Fuel سيستم عربية 1000 حصان في الاغلب مش هتمشي بالبنزين اللي عندنا ( 95 ) وهتحتاج يا إما race gas يا إما Methanol injection ودي هيستخدم فيها 100 % ميثانول لأن في بعضهم بيخلط 50% ميثانول و 50% مياه . ده كفيل بأنه يبرد ال intake Air ويعلي نسبه الاوكتان للبنزين اللي داخل بحوالي 10-15 نقطة .


نيجي لل Intak Mnifold .. بما إن احنا عندنا boost عالي وبنزين عالي وشرارة عالية إذن لازم ليهم كمية هوا تدخل بشكل عالي وكافي وموزع بشكل صحيح . وكلامي عن شكل صحيح هنا إن فيه بعض الانواع ( رديئة الصنع ) ماهي اللي حجم أكبر على الفاضي بمعنى إنها هتدخل كمية هوا أكبر طبعا لكبر حجمها لكن تصميمها مبيوزعش كمية الهوا بالتساوي على ال 4 غرف أو إنها ( ودي مصيبه ) بتدخل Turbulence Flow غير منظم .

أما الانواع الجيدة بتدخَل Linear Flow وده بيكون flow عالي ومنظم طبعا لتصميم المانيفولد

وكفاية نعرف بس إن فيه انواع ال Evo بتزيد بعد تركيبها 50 حصان .


هناك نوعين من Intake manifold ....الاول Race Manifold وده بيكون Short Runner و في الاغلب واخد الشكل المستطيل وبيستخدم في عربيات التراكات وبس اللي بيتطلب فيها اداء عالي على RPM قليل

التاني Street Race وده الغالب في الاستخدام وفي الاغلب بياخد الشكل المسلوب

من أشهَر الانواع .AMS , Magnus و السعر حوالي 1000 دولار للمانيفولد بس بدون البوابة .


البوابه أو Throttel body ..... بيتم تغيرها مع Manifold بواحدة أكبر في الاغلب 64 أو 70 مم وطبعا مش محتاج أقول إن ال TPS كمان بيتغير بواحد جديد

تمن البوابة حوالي 400-500 دولار

ال TPS مع ال idle sensor بـحوالي 450 دولار يعني الintake manifold مع كمالياته بيتكلف حوالي 1900-2000 دولار .

وكفايه كده النهارده :)

تابعوا المرات اللي جاية هنتكلم إن شاء الله عن

ال ignition System اللازم ل 1000 حصان

وال Turbo kit وأنواع ال exhaust manifold وال Turbos اللازمه ل 1000 حصان

التيوننج و هنحاول نحط Dyno Graph ونبين إزاي بيتقرا...

المشاركة الأصلية كتبت بواسطة moha4tec

موضوع هايل بس يا ريت لو كنا نقدر نعمله فى مصر

اتعمل في مصر

متابع جدا و موضوع هايل يا باشا