الموضوع: البـــــرد و السفـــــر

المشاركة الأصلية كتبت بواسطة omar_fekry

ولا حاجه :) يا ما جريت بالعربيه و هى لسه بارده . و زى الفل

لا غلط يا فكرى كدة لو انت قصدك المشى والجرى وهى لسة باردة من التوقف ... اللى انا بتكلم عليه لو سخنت كويس بس لما بدأت اشد وأجرى فوق الـ 130 بدأت تبرد وتنزل وخصوصا مع جو امبارح الى كان تلج .

المشاركة الأصلية كتبت بواسطة hugan

العاشر من رمضان سفر ازاي
والمؤشر بينزل في الايام شديده البروده عن المنتصف لكن العربيه بتكون سخنه مش تلاجه علشان تخاف تجري بيها
لو فتحت الكبوت ووضعت ايدك علي الردياتير ها تلاقيه سخن
مفيش مشكله

العاشر سفر بالنسبة لواحد حركته اليومية من الشغل للبيت رايح جاى 30 كيلوههههههه .
والمؤشر المفروض مينزلشى لان ترموستات الكوعة هى المسئولة عن احتفاظ الماتور بالحرارة المناسبة للتشغيل وخصوصاً فى درجات الحرارة المنخفضة .

المشاركة الأصلية كتبت بواسطة lad

دوس عادى

لا غلط .

المشاركة الأصلية كتبت بواسطة hugan

بيعملوا ايه في اوروبا لما درجه الحراره بتنزل تحت الصفر
اكيد العربيات في اوروبا فيها سخان عند البدء فقط
لكن مافيهاش سخان والعربيه ماشيه
خلاص طالما انت تحركت بالعربيه الزيت بيكون وصل لكل اجزاء المحرك ومع السرعه الاكبر الطلمبه بتضخ بكثافه اكبر

آه الطرمبة بتضخ لاكن الماتور بيكون بارد وهو ده السؤال أيه اللى هيحصل .

المشاركة الأصلية كتبت بواسطة semsem kane

حمد لله على السلامة يابو احمد

دلوقتى اولا نزول المؤشر مع السرعة العالية دة بسبب ثرموستات الكوعة

خطر جدا انك تجرى بالعربية وهية كدة وكان ممكن تجيب سبيكة طبعا دة لو كنت قرصت لكن كمشى عادى بدون قرص يعمة بتوصل بسرعات عالية بس مع عدم الضغط الزائد عمر المحرك هيقل

فكويس انك عملت كدة وحاول تركب ثرموستات الكوعة

الله يسلمك يا سامح .
هو ده اللى بقول عليه حسيت ان فيه حاجة غلط وعلشان كدة نزلت بالسرعة من 140 لـ 100 ومزودتش عن 110 بس كنت بتخنق لان الجو كان فاضى ومشجع فكنت ارجع تانى اعلى بالسرعة لـ 120 الاقيها تنزل لدرجة انها سبتت شوية على الـ c .
طيب سؤال مش ممكن تكون السقيع الزيادة اوى ده هو السبب حتى لو ترموستات الكوعة شغالة ولما تبوظ الترموستات بيحصل ايه ؟

المشاركة الأصلية كتبت بواسطة ahmed_nubira

هيا العربيه نوعها ايه
انا اول مره اسمع ان فى عربيه تبرد وتوقف من البرد
مؤشر الحراره ثابت دايما سواء ساقعه او حر ( فى العربيه الجديده بدون مشاكل فى دورات التبريد)

العربية هوندا ومفيش عربية بتوقف من البرد ... الكلام على المشى بسرعة فى البرد فى طريق سفر مفتوح أدى الى نزول مؤشر الحرارة .
المفروض ان المؤشر يبقى ثابت زى ما حضرتك قولت ده الطبيعى عندنا فى الهوندا .

المشاركة الأصلية كتبت بواسطة mazagngi2010

عربيتى فى الطوالى ساعات بتنزل عن c وقشطه يعنى
مش طالبه قلق ياجدعان

فعلا كانت بتحصل فى المازدا اثناء السفر شتاءً(لعدم وجود ترموستات كوعة) ... لاكن فى الهوندا المفروض متحصلشى لوجودها .

المشاركة الأصلية كتبت بواسطة juventus

بص يا باشا هو غلط طبعا ان انت تمشي و الموتور بارد كده و ليه تأثير سلبي بس على المدى الطويل
و هقولك ليه :
الموتور لازم يوصل لدرجه الحراره المثاليه اللي بتتظبت عن طريق ترموستات الكوعه و ميكونش بارد و المؤشر ينزل عند c
و ده عشان لزوجه زيت الموتور بتكون مثاليه عند درجه الحراره دي و بالتالي الزيت هيقدر يطلع لاعلى نقطه عند البساتم و يغطي كل الموتور من جوه عشان يقلل الاحتكاك بين الاجزاء المتحركه
انما لو الموتور بارد فالزيت مش هعمل بكامل كفاءته بسبب عدم وصوله لدرجه اللزوجه المناسبه بسبب بروده حراره الموتور

المشاركة الأصلية كتبت بواسطة juventus

ما هي دي فايده ترموستات الكوعه يا فندم انها بتخلي الموتور محتفظ بدرجه الحراره المثاليه بتاعته
ففي دول اوروبا العربيه هتدور و بعدين السخان هيقوم بدوره لحد ما العربيه تسخن و بعدبن ترموستات الكوع تقوم بدورها و تحتفظ بدرجه حراره الموتور سخن و ما يبردش
انا معاك انه مع السرعه الطلمبه بتاعت الزيت هتضخ الزيت اكتر بس هتضخ زيت مش لزج كفايه عشان يحمي الموتور لانه الموتور نفسه بارد و لازم الموتور يبقى سخن كفايه عشان الزيت يوصل لافضل درجه لزوجه يعمل عندها بكامل كفاءته

الله ينور عليك يا يوفينتوس صح كلامك ... كنت قريت قبل كدة تفصيل موضوع أهمية الحرارة المناسبة للتشغيل والاضرار اللى ممكن تحصل بالتفصيل لو الحرارة انخفضت بس نسيت التفاصيل .
ـ ـ ـ ـ ـ
دلوقتى انا عاوز اتناقش معاكم عن الأضرار بجد الحقيقية اللى ممكن تحصل لو زودت وعديت الـ 150 وطالع لحد الـ 200 وحرارة الماتور مش فى المعدل الأمثل الطبيعى بتاعها للتشغيل .
هل يا ترى هيكون تأثيرها هيبقى على السبايك فقط زى ما سامح قال ولا ايه تانى هيحصل وهيتأثر .