الموضوع: يا شعب فيات العظيم-اجيب قطع غيار فيورا اصلية منين

شكراً يا رجالة ..
طيب زيادة فى الطمع .. هل فيه حل لصوت الشكمان العالى بتاع الـ 127؟

المشاركة الأصلية كتبت بواسطة heshamzaky

يا رااجل يا طيب بالذمة دة كلام ههههههه طبعا براحتك كل الى عندة معلومة يقولها يا باشا دة حقة الدستورى هههههههههههههه
===========
انت عارف يا باشا انا كنت عامل اية لموضوع العزل حا اقولك ههههههه
بص يا سيدى أنا اشتريت عازل لباد فرخ كدة و روحت لللراجل فكيت الموكيت بتاع الارضية من عند صدر العربية من الداخل و ركبت اللباد دة و قفلت تانى
السبب ان عزل العربية ال 127 مش حلو حا تحس بصهد شوية من الموتور داخل الكابينة بتاعت الصالون فالافضل تزود العزل
و اللباد دة نوعين نوع رخيص نسبيا و دة لباد عادى و بيتلزق ب كولة و نوع اخر من ناحية لباد و الناحية التانية علية عازل فضى اللون دة افضل لان اللباد العادى ممكن يكلكع لو مش ملزوق حلو النوع التانى بيتسخن و يتلزق يبقى هو و الصاج ماسكين كويس جدا فى بعض
==============
و فكرتنى بحاجة ال 127 دايما العرس بتدخل فيها ساعات و السبب بيبقى ان فى حوض الموتور عند صدر العربية مكان ما السلك بتاع عداد السرعة راكب فية خرم كبير شوية معدى منة السلك و مفروض بيبقى علية كاوتشة زى كافر لو مقطوعة العرس بتدخل منة
الحل سهل حتت لباد تتلزق بكولة و تغطى مكان دخول سلك السرعة و انسى دخول العرس و فى نفس الوقت يتمنع الهواء الساخن بتاع مروحة الرادياتير انة يدخل فى الصالون من خلف التابلوة

حقه الدستورى ههههههههههههه ده قسم الفيات مش القسم السياسى هههههههههههههههه

انا كنت عامل العازل اللى فيه المونيوم ده كنت عامله من تحت الازاز الامامى والتابلوه لحد الكنبه اللى ورا
ومكلفنيش غير 33 جنيه تقريبا حق ال 3 فروخ وكده كده كانت العربيه مفكوكه والازاز والصالون متشال عشان كنت بعملها عمره كامله

بالنسبه للعرس فحدث ولا حرج العازل عمل شغل ومنع العرس فلا لمده 5 او 6 شهور ولاكن فيه عرس بنت لزينه اكلت اللباد وعملت فيه فتحه وبقت تدخل عشان كنت بركن العربيه ب ال 3 ايام مش بتتحرك
ومره فتحت العربيه لقيت واحده جوه وعينك ما تشوف الا النور كانت عامله العربيه بيتها من جوه مخلتش حته الا لما بهدلتها وعملت فى كل حته بى بى حتى الرف بتاع السماعات هههههههههههه
روحت اليوم ده فكيت الفرش والصالون كله وطلعته غسلته حته حته عند مغسله عربيات جنبى وطلعت رف السماعات وفضيت الشنطه لقيتها عامله بى بى تحت الاستبن وطبعا جايبه اكل عشان تاكل وتعمل براحتها

وجيبت بعد 5 او 6 سعات غسيل فى العربيه الحمد لله انها كلها من جوه جلد جبت ازازه ديتول وفضلت انضف حته حته وخصوصا عشان ابنى لسه صغير وكان بيمسك كل حاجه ويحط ايه فى بقه
وطبعا خلصت ازازه الديتول وبقت العربيه ريحتها مستشفى ههههههههههه
جبت بعد كده ازازه معطر وفضيتها فى العربيه وكام عود بخور وولعتهم وقفلت العربيه وكنت خلاص اتهديت طبعا

يوميها دفعت بتاع 50 جنيه تنضيف غير الهده
وطبعا صممت انى اعرف دخلت منين لحت ملقيتها قطعت الحته اللى جنب كابل السرعه فيه فتحه بيضاوى كده مش عرف بتاعه ايه رحت سديتها بجلد وقماش جامد

بعديها بأسبوع جيت اركب العربيه حسيت بحركه غريبه جوه التابلوه خبطت عليه لقيت حاجه بتجرى وطلعت للحوض وجريت من تحت العربيه
نزلت ادور دخلت منين لقيتها دخلت من فتحه تانيه الجنب التانى برضه اكلت حته ودخلت كالعاده سديتها بقماش

وبعديها بشهر او 2 بعت العربيه

ال 128 وال 127 لو استلمتها عرسه مش حتسيبها مهما عملت بس انا كانت مشكلتى انى بركن العربيه كام يوم مركبهاش فكانت بتستقل بيها وتعمل اللى هى عاوزاه لما تحس بالامان وان مفيش حد بيجى جنبها

لكن لو بتستخدم العربيه كل يوم مش حتديها فرصه انها تعمل كل ده

المشاركة الأصلية كتبت بواسطة egyzizo

يا ريت توضيح للنقطة دى ..
أنا مسكت فى كلمة (عزل) لأن العربية صوتها جراااار .. فايه عزل الصدر ده؟ وهل بيخفض الصوت؟

صدر العربية اقصد بيه الجزء اللى تحت البربيز انتهاء بالدوسات

بص انا روحت لسروجى فكيت الفرش كله بالتابلوه بكل الحبشتكانات و جبت فراغ لباد تخين و خلى بالك علشان فيه تخين و فيه رفيع و فرشته حتة واحدة من تحت البربيز انتهاء باول الكنبة هيقلل الصوت اه بس هيقلل الحرارة اكتر

المشاركة الأصلية كتبت بواسطة karim_monir

متشكر لكل مشاركاتكم وفعلا بفكر اجيب اللباد العازل يتحط والعربية بتتنجد
طيب دلوقتي الموكيت مهري
اخليه يفصل موكيت تاني ليها ولا اغطي الموكيت بالجلد بتاع الارضيه وخلاص
زيت 140 وحش قوي يا خميس افتكر مرة حطيتة بالغلط في ال 128
يا نهار اسود كان الفتيس مكلبش وخصوصا في الشتاء
وروحت نزلتة وغساتة من جوة وحوار
ال 90 احسن
المشكلة في التاني مش فيا
في اللي بيتعلم :-)
هاشوف حوار الكراسي بكرة لو لقيتها غالية هانجد الحاليين
صحيح
ناقص عندي مخدع بتاع الفيورا
كرسي ليه مسند راس بلاستيك وكرسي لا
بيتباع لوحدة ولا لا وجدي ولا مستعمل
ولا انجدها مسندرين راس وخلاص

يا باشا متشكر على ايه دا احنا اللى متشكرين على استضافتك لينا

لازم تركب اللباد مش بتفكر تركبه اللباد ده شيئ اساسى على فكره بغض النظر عن انه بيمنع الصوت بتاع الموتور انه يصدع اللى راكب جوه (على فكره هو بينزل فابريكه بس النوع الصوف الزجاجى ) وطبعا الصنايعيه الشاطرين بيشيلوه يرموه او هو بيبوظ بعامل الزمن

اللباد ده بيمنع دخول الحراره بتاعه الموتور والجكمان لان عندك الفرن ورا التابلوه فى الصدر بتاع العربيه يعنى اللى سايق حلاقى سخونه فظعه فى الصيف داخله من كل حته فى التابلوه وتحت التابلوه عند الدواسات
واللى سايق حيكره اليوم اللى ركب فيه العربيه دى بسبب الحراره
تانى حاجه بيمنع الروائح اللى بتطلع من الموتور زى ريحه العادم وبخار الزيت لو طالع من العمه او خرطوم الفايظ
واحيانا رائحه البنزين اللى بتطلع من الكاربراتير
شوفت حاجه تافهه بس مهمه ازاى انا محستش بأهميته غير بعد معملته وربنا رزقنى بسروجى نضيف هو اللى عمله صح وعملهولى من تحت البربريز (تحت التابلوه ) لحد تحت الفرش والكراسى

ونصيحه من اخ اعمل الفرش بتاع الارضيه جلد والافضل يبقى فوق العازل والموكيت القديم عشان يبقى تحتيه بطانه متخلهوش يتقطع اكيد السروجى فاهم الكلام ده

والمخادع بتاعه الراس بتاعه الفيورا بتتباع جديده الجوز فى حدود 40 او 50 جنيه بس مش اصلى بس حلوين يعنى مش وحشين وحتلاقيها عند بتوع حاجه السروجى بتوع الجلد وكده
لو عاوز الاصلى عليك وعلى الاستعمال بس متتخضش لما تسمع فى الواحد بس 90 جنيه واكتر يعنى بتمن الجوز تكمل وتجيب كراسى لانوس بمخادعهم

وموضوع الزيت ال 140 ده انا نسيت اوضح ان انا حطيت كيلو واحد فقط فوق اللى كان موجود وده عوض اللزوجه وخلاه تمام
لكن الصراحه عمرى مجربت احط الزيت كله 140 انا نسيت اوضح معلش

المشاركة الأصلية كتبت بواسطة heshamzaky

خميس باشا استاذ و ربنا بجد عشرة على عشرة بجد
=========================
أوعى طبعا تشيل فرش الارضية الاصلى انا ركبت موكيت جديد فوق الموكيت الاصلى لان الفرش بتاع الارضية الاصلى مش حا تلاقية على فكرة و لو حصل و لقيتة ممكن تسمع ارقام عجيبة بجد
===
بالنسبة لمخدع الراس بتاع السوبر فيورا دة خامة ممتازة مش حا تلاقى نفس الخامة الا لو جبت الاصلى و لو لقيت الاصلى سعر فى العالى
امامك حلين يا تجيب زى الى خميس باش قالك علية
يا اما تجيب 2 اصلى بس بتوع الانو أو التيبو خامتهم مش وحشة بس علشان اكون صريح مش نفس خامة بتاع السوبر فيورا اقل شوية بس افضل بكتير من الى فى السوق جديد

الفرق فى الشكل بتوع السوبر فيورا زى اول صورة كدة
بتوع الفيورا فيهم شريط زيادة فى النص
بتوع الانو و التيبو زى الى فى الصورة التانية و دول لو عاوزهم موجودين و سعرهم ممتاز جدا استيراد

ربنا يخليك يا استاز هشام دى حاجه صغيره بالنسبه لخبره حضرتك
اصلى انا اتمرمطت شويه فى العربيات القديمه ههههههههههههههه
من اول السيات ال 133 هههههههههههه وشديت كذا عربيه على ايدى