الموضوع: محتار مابين نيسان قشقاي وكيا سبورتاج

المشاركة الأصلية كتبت بواسطة scobedo

الغلطة بتاعت نيسان انها نزلتها مانيوال فقط ولم تطرح الأوتوماتك الا بضغط من الزبائن لعدم رواج الفئة المانيوال تماما ويا عالم الأوتوماتك هتبيع كويس ولا نص ونص هنشوف .

أولا : ألف مبروك يا بشمهندس/ إسلام وربنا يعطيك خيرها دائما ويكفيك شرها.
ثانيا : بالنسبة لموضوع القاشقاي الأوتوماتيك ، فتوكيل نيسان في مصر أعلن عنها بمجرد طرحها في انجلترا يا هندسة .. مش بضغط من الزبائن لعدم رواج الفئة المانيوال!!
- أما بخصوص هتبيع كويس ولا لأ ... فده بيرجع لثقافة المستهلك وسياسات التوكيل ، و ده حال فورد وفولفو وسوزوكي وغيرهم
- القاشقاي أول مرة تنزل بفتيس أوتوماتيك CVT .(طبعا كلامنا عال 1600).. وده مش أوتوماتيك عااااااااااااااااادي .... وصدقني الفرق كبير جدا جدا.
- كفاية أقولك إن طلعة العربية هتكون بنسبة تخفيض 7.3 وده في نظري إسمه إبتكااار
غير إن الفتيس ده هيكون من أفضل فتايس ال CVT في العالم .. ده حتى أحسن في أدائه من فتيس ال 7Gtronic السبع سرعات الأوتوماتيك ..
وأقل في وزنه وحجمه والمقاومة الداخلية .. ده غير إمكانيات تانية كتير أول مرة يتم طرحها في فتيس CVT
- ده فضلا عن فرق استهلاك البنزين طبعا لصالح ال CVT عن الأوتوماتيك العادي
أنا شايف (نوعية البنزين ، ومعدل إستهلاك البنزين ) من أهم الحاجات اللي المفروض تكون في المقارنة
- Kia motors Egypt في صفحتهم عالفيسبوك قالوا إن معدل إستهلاك البنزين من 160 كيلو في الصفيحة إلى 200 كيلو في الصفيحة في أحسن حالاتها .. وبصراحة ده يخلي ناس كتييير تعيد تفكيرها !!
- الكنترولر بتاع الباور ستيرينج الكهربا بتاع النيسان حاجة بجد محترمة جدا.
وأعتقد اللي ساق تيدا وساق إلنترا الموديل السابق عارف الكلام ده كويس.
(الكنترولر ده بيعمل تشيك عالسرعة كل 40 مللي ثانية ، وحساس جدا لأقل تغير في السرعة حتى ولو كان بسيط لدرجة 0.01 كم/ساعة)
وبناءاً على ذلك متحسش إن الدركسيون خفيف في إيديك على سرعة عالية ، وعالأقل تبقى سايق وانت مطمن.

دي الحاجات اللي المفروض تدخل في المقارنة .. مش شكل التابلوه ومثبت السرعة وفتحة USB وفتحة سقف !!
-لكن طبعا وجود نظام الثبات الإلكتروني للفئة العالية من السبورتاج فدي ميزة .. لكن برضو إحنا معندناش كم الأمطار والثلوج اللي بتغطي طرقهم في أوروربا معظم فصول السنة.
- أما بخصوص باقي الأمثلة اللي حضرتك سردتها فكلها أوبشنز .. ومينفعش أقول إن العربية أم 175 ألف مفيهاش الكماليات الكتيرة الموجودة في العربية المنافسة لها أم 210 ألف + over price .
- ولو نيسان أعلنت عن فئة جديدة من القاشقاي بنفس السعر بتاع أعلى فئة من السبورتاج (210+أوفر برايس) فصدقني حتلاقي كل الأوبشنز الجميلة دي وأكتر من كده كمان.

يا هندسة الحاجات دي بره بيقولوا عليها TOYS !! مبيبنوش عليها رأيهم في المقارنات.

المشاركة الأصلية كتبت بواسطة scobedo

السلام عليكم جميعا ً ........ احب اني اشارك معاكوا في الموضوع الجميل و المشوق بدرجه كبيرة تحث على عدم السكوت وضرورة المشاركة معكم لأني عندي ردود كثيرة جدا واسئلة ايضا على بعض التعليقات والأراء الهامة لأكثر من نقطة واكثر من مشاركة من كل الأعضاء او الزوار المشتركين في هذا الموضوع .

طبعا هاتقولوا ايه المقدمة الجامده دي والكلام الكبير ده بس معلش اعذروني واستحملوني شوية ادينا بنفيد بعض ورجاء خاص للجميع محدش يسيئ الفهم او يتضايق من اي كلمة لأنها في الأول والأخر اراء و وجهات نظر تختلف من شخص الى اخر طالما في نطاق الأحترام واظن اني مش هتجاوز حدودي واللي زهق بسرعة من الكلمتين اللي في الأول دول ميكملش المشاركة بس هيندم انه ماكملهاش للأخر.

احب اعرفكم بنفسي لكي تكونوا ولو فكرة بسيطة عني عندكم .

انا اسمي اسلام عندي 32 سنة متزوج وعندي بنوته اربع سنوات وحاصل على بكالوريوس هندسة جامعة القاهرة قسم ميكانيكا وساكن في مدينة 6 اكتوبر ( محافظة الجيزة ) .

الحمد لله ربنا وفقني واشتريت كيا سبورتاج في شهر 11/ 2011 وطبعا بعد حيرة شديدة ودراسة متأنيه للموديلات الموجودة بالسوق المصري منذ منتصف 2010 يعني حوالي سنة ونصف . وكنت من اول الناس اللي سمعوا عن القشقاي وكنت منبهر بيها فعلا وقررت اشتريها واول مانزلت في المعرض بتاع 2010 شوفتها وكانت لم تسعر بعد , بس مسئولي المبيعات كانو بيقولوا حوالي 155 الف تقريبا طبعا سعر مناسب بشكل وهمي لهذه السيارة الجميلة ( نوعية , شكل , ماركة , بلد منشأ ) من كله يعني وكمان انا بحب المانيوال في القيادة فكانت بالنسبة لي ممتازة بمعنى الكلمة .

في ناس بتقول انهم اول ناس ساقوها في مصر ؟ اسف ... لأنها لما كانت في المعرض كان في حوال 5 عربيات فقط في مصر كلها اول عن اخر للعرض والتجربة وربنا وفقني وجربتها عن طريق المعارف ( واسطة يعني ) وبصراحة لم ترضينى او لم تكن على مستوى توقعاتي ( مش هاخش في تفاصيل ) بس قولت يمكن مش متزبطة او لسة بتلين او او او .... لأني كنت مقتنع بيها جدا جدا جدا وكنت بدي اعذار لنفسي واقول لما اجيبها هتتظبت وكده يعني وخاصة مبيعاتها في اوروبا فاقت كل التوقعات وكذلك كل ريفيوهاتها في كل المواقع كانت ممتازة وعلى فكرة الفئة اللي في مصر دي هجين من كل الفئات اللي موجودة في اوروبا يعني مثلا السقف البانوراما موجود في الهاي لاين بس وكذا حاجة بنفس الشكل كده حاجات متشالة وحاجات محطوطة زيادة وده طلب الوكيل في مصر ليرضي معظم اذواق محبي هذة الفئة في مصر مع تقليل السعر . ما علينا ..

اول ما ابتدى الحجز واحد جاري وصاحبى جدا ( كان معاه شيروكي 2003 ليبرتي وباعها عشان يجيب القشقاي عشان كانت معذباه قطع غيار غالية وبنزين وكده يعني مش عيب فيها ولا حاجة وكانت فابريكة ) اشتراها وجابها ب 160 الف بدون حجز او انتظار ( واسطة برضو ) وقبل ما يعلنوا عن التيست درايف بتاعها كمان لما كانت في داندي مول وانا قريت وتابعت كل التقارير بتاعت الناس اللي جربتها في الفترة دي بس معملتش التست درايف لأني تقريبا كنت سوقتها عشرات المرات مع صاحبي .

اقولوكوا رأي بأختصار فيها و بمنتهى الصراحة ودي وجهة نظري انا ..وهتكلم عن العيوب فقط لأن مميزاتها كلكم حافظنها وعارفينها ( رغم ان العفشة الخلفية مالتي لنك بس خشنة وبتدب جامد اوي ودي اول و اكتر حاجة خلتني اكش منها , الموتور يدوبك على ادها بالعافية عشان كدة نزلت بفتيس مانيول يساعد مع الموتور اللي الجروس بتاعاه 118 حصان فقط مع ان وزنها معدي 1300 كجم , السقف البانوراما لا يفتح يعني اضاءة ومنظر فقط , الكراسي غير مريحة وخاصة الكنبة الخلفية , الكاسيت مفيهوش يو اس بي ودي حاجة غريبة جدا فيه وصلة اوكس و اي بود بس, لا يوجد عزل للموتور في الكبوت وان كان بعض الأخوة قالوا انه نازل في الأوتوماتيك الجديدة , لا يوجد حساسات ركن لسيارة بالعلو ده عن الأرض , لا يوجد اشارات في المرايات ودي تقريبا بقت موجودة في كل العربيات مش اوبشن يعني و مش ضم . التابلوه ( الخامات جيدة جدا ) ولكن فقير كمنظر زي فتحات التكييف الدائرية تحس انه شبه تابلوه الداستر مع الفارق مثلا الزرار بتاع البلوتوث الملغي معمول عشان يطفي الكاسيت ويشغلة ده كلام برضوا والمالتي فنكشن لتعلية الصوت فقط . زجاج خلفي وان كان هينزل في الأوتوماتك زي كل العربيات الكروس اوفر وال اس يو في . هكرر تاني دي وجهة نظري

عشان كده صرفت نظر عمه وكنت خلاص ناوي على الفانتازيا عشان فتيسها لسة بينزل اوتوماتك عادي مش دي اس جي وانتو عارفين مشاكلة كويس رغم ان ماتورها 107 حصان بس حاجة الماني /تشيكي محترمة ومنتشرة زي الرز وكنت تعبت من التدوير والحيرة .

نيجي للسبورتاج اللي هي واخدة احسن تصميم في المانيا لعام 2011 هي والريو كلا في فئته ومسالة التصميم برضوا ازواق . انا كنت في الأول شفتها في المعرض بتاع اخبار اليوم وكنت مستغليها زيكوا بالظبط وكيا ايه دي اللي بـ 173 و 186 و 210 واوفر برايس كمان لا ده تهريج وعربية 1600 وكمان ال 2000 سي سي منها ب 330 الف بس شوفوا الريفيوهات بتاعتها على النت بتتقارن مع ايه ومين بيكسب وقريت عنها ودرستها كويس وبدات تزغلل في عيني.

بالصدفة كنت في معرض الطارق اللي في مول العرب ولقيتها واقفا شوفتها بصراحة انبهرت بيها وبوسعها والأوبشن اللي فيها وكانت اللي واقفة الفئة الثانية اللي ب 186 .
الموتور 1600 جي دي اي بنزين 95 اه بس هتاخد عزم وقوة موتور الفين سي سي فتيس اوتوماتيك يشتغل مانويوال للعايز زي حالاتي واعتقد اللي يقدر يجيب عربية ب 175 ( قاشقاي اوتوماتيك ) او 173 ( سبورتاج اول فئة ) مش هتفرق معاة حوالي 50 جم في التفويلة ( تنك السبورتاج 55 لتر واحسبوها ) مقابل قوة موتور 2000 سي سي وهيوفر معاه في الأستهلاك ويحافظ على الموتور وكمان هتمشي مسافة اكبر بس مش ببفرق كتير . صاحبي اللي معاة القشقاي بيحط 95 عشان يحسن اداء الموتور ولو بدرجة بسيطة رغم انها مش هتفرق وانتوا عارفين اكتر مني ان نسبة الأنضغاط وعوامل اخرى هي اللي بتحدد كفاءة العربية واداءها .

القشقاي ياباني تقفيل انجليزي على عينى وراسي الكيا كوري اه بس موضوع كوري وياباني ده بالنسبالي راحت عليه خلاص ومن زمان كمان ( احسن عربية في امريكا لسنتيين متتاليتين هي الألنترا الكوري ) هتقولي مواصفات خاصة ماشي بس ده في عوامل الأمان زي الايرباج وخلافة لكن الخامات واحدة والشاسية واحد بس الوكلاء المش محترمين بتوعنا هم من يحددوا المواصفات المطلوبة .

طب اسأل سؤال فين الألماني في مصر الجيتا والباسات والجولف اللي كانت مغرقة شوارعنا من ساعة ما عملوا الفتيس الدي اس جي ومبيعاتهم في العالم كله في النازل , فين الكورولا اللي كانت ملكة كلها عيوب ومرتجع وكان منها جنوب افريقي مش ياباني كانت ممتازة (اللي مش فتيس ام ام تي ) جابولنا الياباني منها غلوها وقللوا الاوبشن وماباعتش برضوا للأسف لشكلها العقيم وكماليتها الفقيرة يعني اسم وبس .

شوفوا الكيا السيفيا والسبكترا الهيونداي الأكسنت الأكسيل بقالهم كام سنة في شوارع المحروسة وماشيين زي الفل وماسكبن نفسهم والكلام ده من حوالي 20 سنة يعني عربيات يعتمد عليها اما سعرها اللي ماسك نفسه ( اغلى من لما كانت زيرو ده نتيجة السوق بتاعنا ) لكنها اثبتتت كفاءة و الدايو برضوا وشغالين تاكسي يعني فحت وردم ليل نهار .

النيسان الصني ياباني اه بس دى حالة خاصة لأنها تجمع في مصر و 40% منها مكون محلي ضفيرتها ضعيفة جدا ولا تحتمل اي اضافة اوتعديل واسالوا ملاكها وبتبيع عشان رخيصة خامات من الأخر رديئة يا راجل ده الأرضية والسقف غير معزولة ضد الصوت والحرارة . بلاش دي الهوندا السيفيك عربية ممتازة شوف بكام فوق ال 180 وبقالها سنتين مفيش الا موديل 2010 و الشكل الجديد منها نزل شوفتوا منها كام عربية في الشارع انا مشفتش ولا واحدة ايوه ولا واحدة رغم اني بتحرك في مناطق راقية سكانها اغنياء ولا يفرق معهم السعر المهم ياباني ولا الماني كده يعني ( الزمالك مكان شغلي وجنبي المهندسين والعجوزة والدقي وبروح مدينة نصر ومصر الجديدة عشان محدش يقول مبمشيش عشان كده مابشوفهاش ) من الأخر شكلها وحش ومعتمدين على الأسم وبرضوا مفيش مبيعات رغم انها ياباني 100 في ال 100 .وغيرها من الأمثلة كثير . محدش بقى يقول ياباني وكوري

نرجع لموضوعنا السبورتاج والقشقاي كاتيجوري تاني خالص اعلى من السيارات اللي انا ذكرتها . ولو هنقارن من ناحية الأنتشار في عضو كريم قال انهم نفس المبيعات تقريبا اسف جدا . الدفعة الأولى من السبورتاج بيعت تماما وأغلبها بأوفر برايس يتراوح مابين 15 ال 25 الف انا دفعت 18 الف الدفعة الثانية محجوزة بالكامل و ما جاء منها بيع بالكامل وباوفر برايس الدفعة الثالثة اللي محدش استلم منها حاجة محجوزة بالكامل انا حواليا بس في اكتوبر وانا رايح وجاي من الشغل بشوف حوالي 20 عربيىة الوان وفئات مختلفة يوميا ده غير اللي في وسط البلد والزمالك بالأضافة ان مفيش اي معرض عندوا عربية واحدة او اثنين الا نادرا وللعرض او يبيعها بأوفر برايس كبير جدا وهو الكسبان .

القشقاي من ساعت ما نزلت من اكثر من سنة ونصف والله ماشفتش منها غير اثنين واحدة في اكتوبر والثانية في مدينة نصر والثالثة مع صاحبي ان لم تخونني الذاكرة اكيد في اكتر بس بنسبة لا تقارن مع السبورتاج والأيام هتثبتلكوا .

تفتكروا ليه الكيا باعت وبأوفر برايس كمان ده غير اللي محجوز لمدة 6 اشهر قادمة هل عشان اوتوماتك بس ولا عشان كووري ؟ والقشقاي لسة مابعتش اعتقد ان الأجابة واضحة والغلطة بتاعت نيسان انها نزلتها مانيوال فقط ولم تطرح الأوتوماتك الا بضغط من الزبائن لعدم رواج الفئة المانيوال تماما ويا عالم الأوتوماتك هتبيع كويس ولا نص ونص هنشوف .

اخر حاجة واسف للأطالة فرق الكماليات الي الناس بتقول لا يساوي 35 الف انا عامل تقرير مفصل و موضوع عن عربيتي في قسم الكيا اسمة ( تقرير مفصل بالصور كيا سبورتاج هاي لاين 2012 ) يا ريت الناس تخش وتشوف الصور والتفاصيل وساعتها تقدروا تحكموا تستاهل ولا لأ ؟ وفي موضوع مثبت في قسم كيا عن الفئة الثانية وصاحبها جابها بأوفر برايس برضوا بس تقريبا كان مستعجل يعني مش حارمين اي حد محتار ما بين القشقاي والسبورتاج .

وانا هدي مثال لبعض الحاجات

1- برنامج الثبات الألكتروني ومانع الأنزلاق وجهاز المساعدة في المنحدرات يساوي كام ؟ بيتهيألي في العربيات الأوروبي والياباني المحترمة بيفرق مش اقل من 15ال 20 الف على الأقل .
2- فرش جلد طبيعي يتراوح سعره مابين 5 ال 7 الاف جنيه في نفس العربية من فئة الى الفئة الأعلى .
3- فتحة السقف الكهرباء في اي عربية بتعمل فرق سعر من 5 ال 10 الف في نفس العربية من فئة لفئة اعلى حسب ماركة العربية .ده بخلاف ان الجزء الخلفى من السقف زجاج بانوراما يعني 2*1 .
4- المرايات الضم و المرأة الداخلية بتعتيم ذاتي تعمل كشاشة في حالة الرجوع للخلف مع الكاميرا الخلفية .
5- مثبت سرعة متطور وقيادة اوتوماتيكية
6- مالتي فانكشن متطور يجرى يأخر يغير من راديو لسي دي ليو اس بي يكتم الصوت وبيعلي ويوطي كمان ودي المفاجئة بقى.
7-بلوتوث اوتوماتك من الطارة الجلد الطبيعي شغال مع كاسيت العربية لعرض اسم المتصل .
8- تكييف اوتوماتيك منفصل الجهتين مع تكييف للركاب بالخلف من تحت الكراسي و ثلاجة بالتابلوه .
9- ستارت ستوب انجن بوتوم + سمارت كي دخول بدون مفتاح .
10-كرسي السائق تحكم كهربائي مع مساعد لأسفل الظهر .
11- حساسات ركن خلفية صوت تحذيري وصورة تقريبية في كمبيوتر التابلوه و مع الكاميرا الخلفية كمان .

طبعا في حاجات من دي في القشقاي ويزيد فيها كمان الزينون مع البخاخات . بس برضوا في حاجات كتيرة مش موجودة وده عيب الفئة الوحيدة انها لا ترضي جميع المتطلبات والأذواق .

اخر حاجة برضوا ياريت محدش يقول ان اللي اشتروا السبورتاج جابوها مضطرين عشان مفيش قشقاي اوتوماتك ... وده اللي خلاني اشارك في الموضوع ده لأني كنت هجيبب القشقاي مانيوال وجربتها ومعجبتنيش وكنت عارف انها هتنزل اوتوماتك وماستانتهاش وربنا وفقني الحمد لله و جبت السبورتاج عشان هي احسن من القشقاي بكتيييير من وجهة نظري المتواضعة . وانا عارف ان ناس هترد وتقول ده متحيز لعربيته عشان كدة ماكنتش بشارك في نقاشات عن العربيتين

لأ وايه كمان جبتها هاي لاين لأنها تستااااااااااااااااااااهل بجد وشكرررررررررررررررررررررر رررررررررراَ

على فكره يا scobedo بيه انا كنت متابع الموضوع اللى حضرتك عملته عن الاسبورتيج اول لما أستلمتها و شكرتك عليه زى ناس كتير كمان علشان الوصف الدقيق و الحياديه و الرد على كل الاستفسارات لكن لما قريت ردك ده حسيت بغياب الحياديه و انك بتدافع عن اختيارك و علشان كده حبيت انبهك و فى نقطتين عايز الفت نظرك ليهم و هى ان الاستاذ Sehsss اول واحد عمل تست درايف للقاشقاى اول ما نزلت و كمان عامل عنها تقرير مفصل بالصور و الفيديو فى قسم نيسان و ده من فتره طويله وياريت حضرتك تبقى تطلع على المواضيع المتعلقه قبل ما تشكك فى كلام الناس و تانى حاجه مين اللى قال لحضرتك ان ضفيره الصنى ضعيفه و الكلام ده؟ هل حضرتك جربتها بنفسك و لا سمعت؟ و نفس الكلام طبعا للعربيات التانيه اللى حضرتك ذكرتها . كمان بالنسبه للمقارنه حضرتك عربيتك هاى لاين اللى هى فى رينج سعر اعلى من القاشقاى الاتوماتيك ب ٣٥ الف جنيه بدون اوفربرايس لسه كمان يعنى المفروض تقارنها بحاجه فى سعرها و بالنسبة للقاشقاى الاتوماتيك هى بسعر الفئه الاولى من الاسبورتيج فلو عملنا مقارنه على اساس السعر تبقى بين العربيتين دول علشان يبقى كلامنا منطقى .و نقدر نفيد اللى سأل بامانه و لمعلوماتك انا معنديش العربيتين و مش متحيز بواحده فيهم و لا أؤمن بحكايه يابانى و لا كورى و هدفى ان الناس تستفيد فقط لا غير

المشاركة الأصلية كتبت بواسطة Hegazio

والله حاسس الموضوع حيقلب بخناقة...خلاص ياجماعة ..صاحب الموضوع استقر علي كيا سبورتاج...يبقي نقول مبروك وإختيار موفق

تنويه صغير الاخ. Mmbadroo مش صاحب الموضوع يا فندم. صاحب الموضوع منعرفش راح فين و الاخ mmbadroo اللى بيرد ده بيقول حجز الاسبورتيج خلاص مش عارف بصراحه احنا بننصح مين دلوقتى

المشاركة الأصلية كتبت بواسطة hegazio

والله حاسس الموضوع حيقلب بخناقة...خلاص ياجماعة ..صاحب الموضوع استقر علي كيا سبورتاج...يبقي نقول مبروك وإختيار موفق

بالعكس يا باشا .. كل االمشاركات في الموضوع ده في منتهى الذوق والأدب.
وفيها معلومات جديدة ومهمة عن العربيتين .. ومفيش أي حاجة هتقلبها لخناقة.