الموضوع: هوندا سيفيك 2012 شاركنا برأيك

المشاركة الأصلية كتبت بواسطة Unendlich

أستاذ سمسم, الكلام مش على المشاركة دي بعينها, الكلام عام, يعني غالبية الوقت بيبقى كلامك عن الهوندا علي إنها العربية الكاملة اللي مستحيل تلاقي فيها غلطة. تأكد إننا كلنا هنا بنحب الهوندا و الا مكناش اشترينها و بالأخص اللي بيشتريها زيرو مش مستعملة بيبقى دافع مبلغ و قدره عشان يركب. بس الفكرة إن الواحد بيشتريها عشان هي انسب واحدة لاحتياجاته الشخصية و بيحبها في نفس الوقت (بس الحب مش شرط دايما, يعني ممكن أركب كارينز مثلا عشان عندي عيلة كبيرة و أنا مش بحبها) انما مش بالضرورة عشان هي العربية ال ultimate. لاحظ مثلا إن الكورولا افضل مبيعا منها, هل ده معناه إن السيفيك وحشة ؟ و الكامري بتبيع أكتر من الاكورد, هل معني كده إن الأكورد وحشة ؟ بالتأكيد لأ لكن المسألة مسألة تلبية احتياجات مش أكتر.
لو أنا جيت سألتك إيه عيوب ال SIR, ممكن دلوقتي تجتهد إنك تطلع أي حاجة كده انما في الظروف العادية كان هيبقى ردك إنها ملهاش حل و بتجيب 280 و إنها بتعلم على ال BMW والمرسيدس والميني كوبر بكل فئاتهم و شكلها أحلى منهم كلهم و اللي راكبين العربيات ام 400-500 ألف دي بتبقى عينهم هطلع على ال SIR اللي بـ 1/10 من ثمنهم.
على فكرة أنا مش ضد ال SIR في حاجة, أنا بعشق العربية دي عشان كانت مع واحد صاحبي 97 original مش متسقطلها و كانت فعلا حلوة بس كان ليها عيوبها و هو كان معترف بـكده عادي جدا و ده مكانش يقلل منه أو من العربية في أي حاجة.
و برده أنا مش ضد الهوندا في حاجة, أنا راكبها زيرو عشان بحبها و في نفس الوقت معترف إن فيها عيوب عااادي جدا مفيش مشاكل.
في النهاية أحب اقولك إن أنت ما شاء الله دايس في الهوندا والناس دايما بتاخد رأيك فيها, خد بالك إنك تكون أمين مع الناس لما تيجي تقول عيوب و مميزات كل عربية عشان دي أمانة هتتحاسب عليها سواء نفعت حد أو لبسته في الحيط.

أرجو إنك تتقبل كلامي بصدر رحب و لك كل احترامي و تقديري.

ياباشا مافيش مشاكل احنا كلنا اخوات بس حضرتك جاى عليا كتير فى موضوع انى بعلى فى الهوندا او بديها اكتر من حقها وزى ماقولت لحضرتك ( اية الفايدة من انى اعلى فى عربية وهية مافيهاش الحاجات دية هل مثلا الناس هيقتنعوا بكلامى ولا شركة هوندا هتدينى فلوس او عربية هدية ) اكيد لأ طبعا حضرتك انا جيبت مشاركة وبتكلم فيها ان الفلوانس احسن من السيفيك الجيل الثامن اللى هو افضل من الجيل التاسع وشوف فرق الفلوس قد اية يعنى الموضوع مش موضوع تحيز

- بالنسبة لل SiR الموضوع مش موضوع اجتهاد عشان اجيبلك عيوبها انا عيوبها قايلها قبل كدة من زمان ومعلش انا مش شايف فيها اى تغيرات عن عيوب الهوندا المعتادة

وبالنسبة بقى ان بتقطع المرسيدس والبى ام حضرتك ممكن تشوف واحد فى المنتدى اسمة MINI COOPER الراجل دة معاة 523 موديل 2003 او 2002 وكان بيشد مع مرسيدس C200 موديل 2010 وكان معاهم هوندا SiR موديل 1993 طيب تخيل كدة لما يقولك هو عدانا فى التوب سبيد وبهدل المرسيدس او سبق المرسيدس على حد تعبيرة وانة كان ماشى مش اقل من 240 واكتر والعربية ثباتها غريب والراجل بيتكلم عنها لمجرد بس انة شافها بتجرى معاة كأنة بيحبها
والراجل معاة 523 يعنى لو باعها هيجيبلة عربيتين SiR ويفيض معاة فلوس كمان
يعنى الراجل اللى مش مالك اصلا للعربية شكر فيها وقال كدة تخيل بقى اللى معاة العربية وبيسوقها يقول اية وهو بيشوف كل يوم دة بيتكرر قدام عينة واى عربية بتتظبط فى كل حاجة ثبات ومحركات

* اى عربية فى الدنيا ليها عيوب ( الكمال لله وحدة ) بس لما تبقى راكب عربية سعرها لا يتعدى ال 60 الف جنية ومحركها ممتاز + شكلها + ثباتها عالى جدا + قطع غيارها فى متناول ايدك مش غالية ومش رخيصة + موفرة فى البنزين زيها زى اى عربية 1600 حديثة + محتفظة بقوتها رغم مرور مايقارب ال 20 عام + عزل جيد جدا + اوبشن كتير + عوامل امان فى بعض الموديلات وبالسعر دة طيب انت كدة محتاج اية كل اللى احنا محتاجينة اننا نقول ( الحمد لله على النعمة اللى انعم بيها علينا )

ياباشا انا عملت موضوع قبل كدة بقول فية هو انا مبالغ فى تقييمى للهوندا لفيت ردود مبالغة اكتر من ردودى بكتير يعنى مش لوحدى

انا عارف كويس ان فية ناس كتير بتاخد بكلامى عشان كدة مش هضرهم مش هقول لواحد خد العربية دية مافيهاش عيوب وتتطلع فيها عيوب الدنيا كلها يبقى انا اللى لبستة وانا اللى هشيل زنبة

وعلى فكرة ناس كتير بتقولى انا عايز اسقط SIR بقولهم على عيوبة عادى جدا ويايقبلوا او لأ

ومافيش حد بيختار عربية اقولة هات سيفيك بقولة هات عربية تانية احسن لانى عارف ان قليل ماهتلاقى حد محافظ على عربيتة وانا مش عايز ابهدلة فى الفلوس او المصنعية

شوف ياباشا حضرتك اتسرعت فى الحكم مش معنى ان بقول ان العربية دية ثابتة او انى جريت مع دة يبقى بشكر فيها وببالغ دية الحقيقة ودة الواقع واكيد زى ماليها نقاط قوة ليها نقاط ضعف وكل الهونداوية عارفين نقاط ضعفها وعلى فكرة موجودة على مر السنين لحد اخر جيل

حضرتك لو عايز تتأكد من كلامى دور فى موضوعاتى هتلاقينى كاتب عيوب السيفيك فى كل فئة وجيل عادى جدا لانها من الاخر ارحم من غيرها بكتيييييييييييييييييييييي ييييييير

وحصل خير ياباشا وسعدت بمشاركتك وتقبل وافر احترامى