‘إعادة أمتحانات جميع رخص القيادة قريباً ؟؟؟

**me_medoo** · 13-03-2012 02:38 PM

أكد مصدر غير مسؤول عن أعادة أمتحان جميع رخص القيادة الخاصة والنقل والموتسيكلات والخاصة والعامة ...

هذا الخبر هو كدبت أبريل الشهر الي جي ... كتير مننا بيشتكي وجود كمية كبيرة من الحمير في الشارع والناس الي مبتعرفش تسوق ... لكن عندما نبحث في الموضوع ... نكتشف ان نسبة كبيرة من الناس مرحوش أمتحنوو أساساً ... لكن الي كان بيحصل ان خالو في المرور ولا باباه ولا ابن عمو ولا حتى عمو ولا صاحبو ... فيقوم يساعدو في أستخراج رخصة ...

طيب والي ميعرفش حد في المرور ... بيروح عند اي أمين شرطة ويديلو 500 جنية وصورتين وشهادت بطنة ونظر ... وهو عليه الباقي .

حتى مع الاسف مع الاسف كتير من الناس بتروح مدرسة خاصة لتعليم القيادة علشان هما ليهم سككهم في استخراج الرخص ولا امتحان ولا ديولوو .

طيب والغلبان بأه بيعمل أيه ... الغلبان باه ياسيدي بيروح يمتحن ... ويخوفوه من الامتحان ويقلو كده هيسقطوك .... حتى لو كنت بتعرف تسوق ويقلولك تعالة بعد شهر في السمر كورس ههههههههههههه

وقلك ياسيدي هيعملو امتحنات كتيرة واسئلة نظري
ومن ضمن الاسئلة لو انتا ماشي في الصحراوي والاستيبن فسا هتعمل ايه هههههههههههههههه
الي يقولك هركن على جنب واغيرو يسقطوه على طول
لأن الاستبن اساساً في الشنطة هتغيرو باي اذا هو استيبن

وشوية أسئلة دمها خفيف كده ... زي ماتعودنا على خفت دم الشعب المصري ، قال أيه يسئلو الي هيمتحن لو انتا راكن بالعربية وجيه واحد وراك زمرلك هتعمل ايه ؟؟؟
لو قال هوسعلو واركن على جنب ... برضو يسقطوة لأنك كده ولاكده ياحمار أنتا راكن واقفل العربية ههههههههه .

يعني حبت اشتغلات حلوة لكن انهم يعلموه أو يمتحنوه في المكانيكا ... ولا في الاشارات ولا يشفهوه شمام ولا مسطول أبداً ... ولا يختبروه في كيفية تغير الكوتش او الاسعفات الاولية أبداً ، وكانت النتيجة الناس كلها الي سايقة ... تعتبر ممعهاش رخص ... لكن الحياة والشوارع والتجارب هيا الي علمتهم ازاي يسوقوا ، علشان كده بنشوف حمير كتير بيجيلك من اقصى اليمين عاوز يلف ويرجع يوتيرن في الشمال ... والي يخشلك مرة وحده والي يكسر عليك بدون مايبص في المرايا ... ده اذا في مرايا أصلاً واذا كانت موجودة يكون قفلها علشان متتكسرش ههههههههه تقلش دي حليه للعربية مش حاجة مهمة .

فالمفروض يعيدوو كل أمتحنات رخص السواقين من جديد
بأمتحنات بحق وحقيقي وبجد ... مش ب 500 جنية .

[youtube]http://youtu.be/9dVI80ULC7s[/youtube]

[youtube]http://www.youtube.com/watch?v=PEdJ-veLcvg[/youtube]

**me_medoo** · 13-03-2012 02:44 PM

السؤال هنا : هل تؤيد فكرة أعادة أصدار الرخص لجميع قائدي المركبات والميكروبصات وسواقين النقل والموتسيكلات ؟ أم لا تأيد الفكرة ؟ وهيا كده كده خربانة ؟

وتحياتي ....

**dr_radioooooo** · 13-03-2012 03:10 PM

للاسف طلعتها بواسطة من مرور مدينة نصر

**amrelsaqqa** · 13-03-2012 03:13 PM

المشكلة مش مشكلة جهل بس
في ناس بتعرف تسوق وعارفة القواعد ولكن بتبلطج ودول ساعات بيبقى الضرر منهم اشد

يعنى مثلا سواق الميكروباص لما يكسر عليك ، ده مش معناه انه مش عارف ، هو عارف ان السواقة بحق ربنا مش كدة وبيبقى قاصد يبلطج

الشارع هو اللى بيعلم كل حاجة سيئة ، بيعلمك تكسر على الناس ، ترشق في اي مكان لما تكون الدنيا زحمة وتخلى الطريق 8 حارات ال يعنى كدة هتعدى اسرع ، لما تكون سواق ميكروباص تبقى ماشي عامل ارهاب للشارع كله ، و تعب اعصاب للركاب اللى راكبين معاك ، كل شوية تدوس بنزين وتنطر رجلك مرة واحدة على غيار 1 و 2 و وتصدع الناس كلها ...

ده اللى الشارع بيعلمه واللى الناس بتعمله

انما الامتحان للاسف عقيم جدا مش هيعلمك تغير حارتك ازاى ولا هيعلمك تمشى على الطرق السريعة وتمشى في وسط البلد ازاى وفي الزحمة ازاى وتاخد اليوتيرن ازاى وتطلع الكبارى ازاى
ولا حتى بيعلمك تقف في الاشارة اازاى ولا بيعلمك تحترم الطريق والناس اللى ماشية عليه ازاى ،

الامتحان اختصر السواقة كلها في الركنة الزجزاج وهى اساسا حاجة من اتنين يا واحد متمكن فعلا في السواقة و بيعرف يعملها بسبب درجة تمكنه
يا اما اي واحد ما يعرفش اي حاجة قعد يتدرب عليها لحد ما حفظها من غير ما يكون اتقن السواقة كلها .. وياريته بيطلع يعرف يركن بين عربيتين حتى ..

فحل المشكلة يكون من شقين :

حل مشكلة الجهل وحل مشكلة البلطجة وده عن طريق :

استئصال الفساد والرشوة من جهاز المرور و تطوير الامتحان للرخص الجديدة وعمل دورات للناس اللى معاهم رخص حالية بما فيهم رخص الملاكى و سواقين الاجرة بأنوعها والنقل بأنواعه ، واصدار قانون صارم عادل محترم لا يسعى لجنى الاموال وانما يسعى فعلا لتحقيق النظام والامان بعد تدريب السائقين عشان يبقوا اتعلموا وعارفين بيتحاسبوا على ايه وتكون البداية بالنقل والاجرة في الدورات والمخالفات وبعدها الملاكى تدريجيا ..

ساعتها الجاهل هيكون اتعلم
والمحترم هيفضل محترم ومعاناته هتقل
والمحترم بس بدأ يفقد اعصابه ويكتسب سلوكيات سواقين الميكروباص هيرجع محترم تانى
واللى مش محترم خالص هيبقى محترم غصب عنه ..

**me_medoo** · 13-03-2012 03:54 PM

المشاركة الأصلية كتبت بواسطة amrelsaqqa

استئصال الفساد والرشوة من جهاز المرور و تطوير الامتحان للرخص الجديدة وعمل دورات للناس اللى معاهم رخص حالية بما فيهم رخص الملاكى و سواقين الاجرة بأنوعها والنقل بأنواعه ، واصدار قانون صارم عادل محترم لا يسعى لجنى الاموال وانما يسعى فعلا لتحقيق النظام والامان بعد تدريب السائقين عشان يبقوا اتعلموا وعارفين بيتحاسبوا على ايه وتكون البداية بالنقل والاجرة في الدورات والمخالفات وبعدها الملاكى تدريجيا ..

ساعتها الجاهل هيكون اتعلم
والمحترم هيفضل محترم ومعاناته هتقل
والمحترم بس بدأ يفقد اعصابه ويكتسب سلوكيات سواقين الميكروباص هيرجع محترم تانى
واللى مش محترم خالص هيبقى محترم غصب عنه ..

واللهي كلمتين زي العسل ... وحلوة فكرة الدورات التدريبية ...
وياريت تكون من ناس محرمة ومحترفة لأن في طبعنا كمصرين بنحب نفتي ... وبالذات لمن يكون الواحد واخد دورة تدريبية يبقى يتباهى بيها ويقعد ما أصاحبوو يفتي وقلهم لا علموني كذا كذا كذا ... وبالتالي شووية شوية هنحسن من نوعية السواقين وسلوكياتهم وتصرفاتهم ... فكرة حلوة ... ومينفعش يخلو الرخص 10 سنين (كأنهم بيقولوا ) مدى الحياة ... لازم نشوف السواق ده حشاش ولا شمام ولا ايه حكايتو ... وأذا تحليل الدم أثبت أنو بيتعطى حاجة يمنع من السواقه فوراً ... ههههههههه على كده نص سواقين مصر هيقعدو في البيت لأنهم حشاشين ... واشي تريمدول واشي بانجو ... واشي افيون ... بس المخدرات دي بتلحس الدماغ ... مينفعش اخلي واحد يقود مركبة ودماغوو ملحوسة هههههههههههه خطر على نفسو وعلى الناس ولا أيه .

**me_medoo** · 13-03-2012 04:01 PM

انا عن نفسي ... أول رخصة قيادة أمتلكها كان بره مصر ... وخدت كورس مكثف ... قبل ماخود الرخصة أسبوع ونص ... ومن ضمن الكورس ... لازم أدرس مكانيكا ... لأنهم هيسئلوني في الامتحان عن كل أجزاء المتور ... لأن مينفعش واحد معاه عربية ومبيعرفش الفرق بين البطارية والدينمو وايه وظيفة كل واحد ... مينفعش تبقى سايق ومش عارف الفرق بين قربت المية وقربة مية المسحات .دي حاجة تكسف .

والاشارات بيسمعوهالك أشارة اشارة ... ده غير امتحان بيشوف شخصيتك سليمة ومتزنه ولا شب طايش ومهبول ومتهور .

بس لمن جيت مصر كان معايه رخصة دولية ... قالي بلها واشرب ميتها انتا مصري هههههههههههه ... رحت امتحن قالولي هيسقطوك ... رغم ان بقالي 10 سنين سويق ... المهم رحت متصل على قريبي ورحت اتصورت وصلى الله وبارك ... حتى افتكر انهم صوروني 3 مرات لأن كل مره مبتعجبنيش الصورة فقل للعسكري لا صور من جديد استنى لمن اسرح شعري ايام مكان عندي شعر هههههههههه وكانت مهزلة .

**Medicalist** · 13-03-2012 04:28 PM

يا جدعان انا بشوف بنات وستات بالهبل بتسوق دلوقتى ده معناه ايه ؟

**aboharb** · 13-03-2012 04:29 PM

الفكره جميله جداااا بس ير قابله للتطبيق اذن هى فكره خياليه اعتقد ان الافضل ان جزء من الاجرائات يكون عن طريق نيابة المرور قبل استلام الرخصه وان يكون هناك حزم مع سائقى الميكروباص والنقل