الموضوع: الى كل من يعانى مشكلة سخونة الفليشيا اليكم الحل السحرى

اكيد كل اصحاب الفليشيا بيعانو من مشكلة ارتفاع درجة حرارة المحرك سواء من غير تشغيل التكييف او مع تشغيل التكييف هانقلكم تجربتي بس انا عربيتي من غير تكييف فاللى عربيته من غير تكييف ويعانى من المشكلة فحلها كالاتى:-
1- مروحة الردياتير تكون 6 ريشة اللى هيه الاصلية بتاعة العربية وتكون حالتها كويسة ومش ضعيفة.
2- ردياتير الومنيوم (صيني) تمنه 150 جنيه.
3- ترموستات 82/68 او 86/68.
4- ميه خضرا ماركة ايادا (iada) اسبانى تمنها 38 جنيه جركن 4 لتر العربية تقريبا تحتاج 2 جركن او اى مية خضرا نوع نظيف ونصيحة ابعد عن المصرى والسعودى لانهم مش تمام.
الخطوات :-
1- فك الردياتير الالمونيوم الصينى عند بتاع ردياتيرات وتسليكه وغسل الوش من التراب.
2- تركيب الترموستات الواطى اللى قلنا عليها 82/68 او 86/68.
3- هتروح لبتاع البنزينة تنظف باقى دورة التبريد الموجودة داخل الموتور واللى بالطبع بتاع الردياتيرات مش هيقدر يوصلها نظرا لعد اتاحة امكانيات تساعده على ده.
4- عامل البنزينة تكون محضر المية الخضرة الاسبانى او موبيل او توتال عشان لما يخلص يضيف المية الخضرا.
نصيحة مهمة جدا جدا
لما تروح البنزينة حاول تستنى على قد ماتقدر لغاية العربية ماتكون بردت يعني اكنك سايبها يوم مثلا وده ليه لان عامل البنزينة لو العربية لسه سخنة وانت بطلتها وفتح واشتغل المية اللى داخلة باردة والموتور سخن يا اما هو بيعمل حاجة يخليك مدور العربية ويضخ ضغط مية جامد عشان تطلع المية اللى جوة الموتور ويفضل يقولك زود بنزين والحوارات دى احنا اهم حاجة نضمن ان العربية مفيهاش نقطة مية ودى مش هتتعمل الا لو العربية باردة وتم تفريغ كل المية اللى جواها.