الموضوع: سواقة ستات.. كفاية بأه.. ارحمونا

المشاركة الأصلية كتبت بواسطة SEATLOVER

طيب انا هاضحى بنفسى ..واشارك فى الموضوع دة و انتى منفعلة كدة وربنا يُستر

انا هارد على موضوعك بشوية اسئلة اتمنى انى اللاقى اجابة ليها منك و من السائقين السيدات
1-لية مصممين تتعاملوا مع العربية انها حتة حديد او صفيحة مركب بتنقل اغراض فقط
2-لية مش عايزين تتعلموا و تلقطوا السواقة وتقلدوا اللى بيعرف يسوق صح قدامكوا
3- لية عدم الاهتمام بعربيات الاخرين و اى حكة او خبطة ..معلش مفيش حاجة يعنى !!
4-لية مفيش اهتمام بعربياتكوا ..واى عربية استخدام سيدة ...بتبقى من ادوات المطبخ القديمة !!!
5-لية مش عايزين تعرفوا اى حاجة فى السواقة غير الفتيس و بالكتير اوى دراع الاشارة !!
6-لية كل اصول المشى فى الشارع بتقتصر عندكوا فى الانتقال من نقطة لاخرى عن طريق خط مستقيم !!!
7-لية بتحبوا عربيات كبيرة و انتوا مالكوش فيها !!!
8-لية بتعتبروا المشى بالعربية مايفرقش كتير عن المشى على الرجلين !!!!
9-لية بتعتبروا الكل مفروض يقدم فروض الولاء و الطاعة و يحمد ربنا انكوا نزلتوا تسوقوا فى الشارع !!
10-حجم الخساير و الهالك فى العربيات فى السوق بسببكوا بيزيد عن 40% من المستعمل ... دون اى تأثير عليكوا ..ومصرين على نفس الطريقة

فى ذيكوا رجالة صحيح بس
الفرق بينكوا و بين سواقة الرجالة ...انهم بيجوا عليهم زمن بيتصلحوا شوية انما
انتوا مُصرييييين على الطريقة دى

الحل :
فيكوا انتوا لا تصلحوا من نفسكوا و تطورا اسلوبكوا .... لا هايفضل الوضع كما هو علية ..وممكن يبقى اسواء

احنا بنقول كدة من باب الخوف عليكوا ... احنا الحمد الله بنعرف نخلص نفسنا منكوا لكن فى النهاية انتوا اللى مسئولين عن ارواحكوا و ارواح اللى معاكوا و خصوصاً الاطفال ...اللى بتجبوهم على التابلوة من فرملة من بتعكوا

الكلام مش موجة ليكى يا عُلا و لكن موجة لكل واحدة مُصرة على الطريقة دى فى ما يطلق علية مجازاً (سواقة )

والف شكر انك فتحتى الموضوع دة

و شكرا ليك يا سيات على المشاركة :)

شوف انا يمكن معرفش أفيدك في كل الأسئلة دي لإني مش باسوق بقالي شهرين على بعض.. انما اللي أقدر أقولهولك ان ما تمثله السواقة او العربية بالنسبة للست غير تماما ما تمثله بالنسبة للراجل.. زي ما أشرت قبل كده السواقة بالنسبة لكتير من الستات ماهي إلا وسيلة تقيها شر البهدلة في وسائل المواصلات و على هذا فالعربية بالنسبة لها ماهي إلا حتة حديدة هاتأدي لها غرض معين و خلاص لإنها لما بتكون رايحة مشوار بتكون عايزة تنجز بأي شكل عشان يا اما سايبة الولاد في البيت او وراها 50 ألف حاجة تعملها.. اما السواقة بالنسبة للرجل ففي رأيي هي بتشبع فيه حاجة معينة مش عارفة هي ايه الصراحة.. يمكن إثبات ذات او احساس بالسيطرة او التمكن او اني انا الواد اللي مافيش مني.. و دي برضه حاجة في نفسية الرجل ما نلوموش عليها و برضه السياة بالنسبة له هي زوجته التانية أو بنته اللي ما خلفهاش.. بيعتني بيها إعتناء خاص و بيسهر على راحتها :)

هارجع برضه و أقول لك اهي امكانيات و طرق مختلفة للتعامل مع المحنة - بالنسبة لي - اللي اسمها السواقة.. و المضطر يركب الصعب :)

اما ان الوضع هايفضل كده فأحب أبشرك بإن آه الوضع هايفضل كده طول ما الستات ما بتحبش السواقة و طول ما هي بتتعامل على الطريق على أساس توقعات مسبقة و شكلنا كده مش هانخيب ظنونكم :)

من الآخر كده زي ما احمد ابراهيم قال: يا رجال مصر.. تأقلموا :)

المشاركة الأصلية كتبت بواسطة gemino

الموضوع بأه وباء ستات على رجالة
فعلا ما جتش عليكم ما الشعب كله بيسوق زى الزفت

الظاهر ان الشعب المصري هايبدأ ياخد حبوب تأقلم بعد كده :)

المشاركة الأصلية كتبت بواسطة Mido80

انا معاك في كل كلمة قلتها. فعلا سواقة الستات تنقط يعني تبص تلاقيها ماشية قدامك بسرعة 60 كم علي طريق السرعة فية 100 كم وتديها نور عشان تعديك ولا حياة لمن تنادي بل ممكن تشتمك وتديك كلمتين في اجنابك وعشان انت محترم لازم تسكت وتفوت.وخد عندك بقي من النوعية دي كتير
دة بالنسبة للستات عموما وليس المصريات فقط (شهادة احاسب عليها)
تعالي بقي لسواقة الرجالة المصريين، اقسم بالله انا كنت هاموت انا وأسرتي بسبب واحد مصري قطع عليا الطريق بغباوة ومس بس كدة، دانا لما بكلمة واقولة مش تحاسب قام يقل ادبة عليا. مش عارف نعمل اية بالظبط

برضه شكوى و نقد من غير تقديم حلول.. يا ميدو من فضلك اقرا مشاركتي الأولى في الموضوع و شوف انا باترجى فيكوا من الصبح انكوا تعملوا ايه.

المشاركة الأصلية كتبت بواسطة OlaOsman

.. انما اللي أقدر أقولهولك ان ما تمثله السواقة او العربية بالنسبة للست غير تماما ما تمثله بالنسبة للراجل..:)

ماهى دى المشكلة
الموضوع مالوش علاقة بحب السواقة او متعتها او لا
الموضوع ان المشى بالعربية لة اصول و تقاليد وعٌرف ..وعلى كل من فتح الباب و اقعد قدام الدريكسيون انة يلتزم بية
طول ما مبداء العربية و سيلة انتقال دة ...فى دماغ الستات ..الوضع هايفضل ذى ماهو
طب ماهو الراجل الكبير اللى نازل بعربيتة الشغل ... بيبقى عندة نفس الهدف و هو الانتقال من مكان لمكان ...بدون ادنى حب للسواقة او التمتع بالقيادة
بس بيروح بسلام و بيرجع بسلام .... عشان كان عايز يفهم
بس كدة

المشاركة الأصلية كتبت بواسطة SS

انا بصراحة مش عارف اقولك ايه بس للاسف ديه مشكلة سلوكيات و ثقافة مجتمع و صفات هباب كتير بقيت من سمات المجتمع اكتر من كونها مشكلة الستات نفسهم مع السواقة ....يعنى هو اى نعم - بس من غير ما تتعصبى- سواقة كتير من الستات مملة نوعا ما بس بصراحة عن نفسى انا الحاجة الوحيدة اللى بعتبرها مشكلة هى بطىء رد الفعل غير كده انا مش شايف فى سواقة الستات مشكلة ده مع ملاحظة انا فيه بنات وستات كتير بيسوقوا احسن من الرجالة ميت مرة...انما بصراحة اللى انا متفق معاكى فيه بشدة هو انا اغلبية الرجالة للاسف اول ما يشوف واحدة ست سايقة يركبه ميت عفريت و يدخل فى موشح انتقاد مستمر ده ان ماحولش يرخم و يستعرض قدراته ..حتى لو معملتش حاجة...مجرد انها ماشية فى حالها و مابتشدش و لا بتعمل غرز ده يعتبر جريمة ...بس زى ما قلتلك هى دماغ الناس بقيت عاملة كده و انا بصراحة عن نفسى مش عارف حل

مش مشكلة على فكرة انك مش عارف الحل.. المهم انك تكون عارف ان فيه مشكلة و ان الستات اللي بتسوق دول بني آدمين و ممكن يضايقهم كتر النقد ليهم و التريقة عليهم.

شكرا جزيلا على المشاركة المتميزة :)

المشاركة الأصلية كتبت بواسطة SEATLOVER

ماهى دى المشكلة
الموضوع مالوش علاقة بحب السواقة او متعتها او لا
الموضوع ان المشى بالعربية لة اصول و تقاليد وعٌرف ..وعلى كل من فتح الباب و اقعد قدام الدريكسيون انة يلتزم بية
طول ما مبداء العربية و سيلة انتقال دة ...فى دماغ الستات ..الوضع هايفضل ذى ماهو
طب ماهو الراجل الكبير اللى نازل بعربيتة الشغل ... بيبقى عندة نفس الهدف و هو الانتقال من مكان لمكان ...بدون ادنى حب للسواقة او التمتع بالقيادة
بس بيروح بسلام و بيرجع بسلام .... عشان كان عايز يفهم
بس كدة

و الله يا عمرو انا عن نفسي بحاول على أد القدر اللي اتعلمته و مارسته من السواقة إني ألتزم بأخلاق السواقة و ما أضايقش حد.. انما أرجع و أقول لك انتوا برضه اللي بتقولوا اننا مخلوقين كده ردود فعلنا مش سريعة كفاية و اننا تقدير الأبعاد عندنا في الضياع.. و في نفس الوقت انتوا برضه اللي بتشتكوا و بتحاسبونا على حاجة المفروض انها مش بإيدنا.. طيب يعني انتوا ايه اللي يرضيكوا بالظبط؟ :)