الموضوع: تعديل الجولف 2

المشاركة الأصلية كتبت بواسطة madawbs

ياشباب انا ان شاء الله ناوى اظبط شوية فى عربيتى الجولف 89 1300 cc
انا هاقول لكوا الى ناوى عليه وانتوا وجهونى لو فيه حاجة احسن

اولا: هاغير الموتور بواحد 1800 انجيكشن وبفتيس اوتوماتيك ( وياريت لو حد يقوللى لو يعرف هل فيه فرق فى استهلاك البنزين ولا لأ لان واحد صاحبى متبهدل من البنزين موتوره 1800 كاربراتير).

وبرضه عاوز اسأل لان الميكانيكى الى باتعامل معاه قاللى احسن بدل مانجيب موتور 1800 لوحده اننا نشترى ربع عربية استيراد كامل وناخد منه الى احنا عاوزينه علشان نوفر شوية فلوس حيث ان الموتور ال 1800 الكويس فاضى بيعمل حوالى 4000 - وده لسة كلام الميكانيكى - ( وطبعا الكلام ده كان قبل زيادة البنزين فممكن يكون السعر قل شوية عن كدة دلوقتى ) والربع الى هو بيقول عليه ده هايتكلف حوالى 6500 ومش هانرجع نقول عاوزين خراطيم ولا سربنتينة ولا اى حاجة خالص لاننا بندور ونجرب قبل مانشترى

وكمان بييجى باور والتكييف كامل واعلبة الدريكسيون بتاعته وكمان دريكسيون وقطمة كاملة ومساعدين والشجرة بتاعت الشاكمان واكيد هاركب فلتر هوا رياضى وديفل

ثانيا : ادخل لجوة العربية اغير الكراسى واحتمال اخد التابلوه بتاع الربع الى اشتريناه من شوية لو طلع احسن من التابلوه بتاعى .

وبعد كدة نشوف طقم جنوط وكاوتش كويسين بس قلقان من الصينى لو ربنا وفق فى طقم ايطالى بسعر كويس يبقى هايل وعاوز اسألكوا بالنسبة لمقاس الكاوتش هو المقاس الحالى 14/70/175 وده الى فى الكاتالوج وانا مستريح فيه جدا والعربية لغاية 185كم مستريحة وثابتة على الطريق تمام التمام هل حد ينصحنى اغير ل15/50/195 ولا خلينا زى ماحنا ؟؟

ثالثا : الدهان انا عربيتى لونها ابيض هل حد ينصحنى بتغيير اللون ولا خليه زى ماهوه واحطله استيكارات تروش الموضوع شوية لان فيه ناس خوفتنى من انى اغير اللون لانهم قالولى انى لازم ارش القوايم بتاعت البيبان وده طبعا انا رافضه لان العربية فابريكا دواخل وواحد قاللى ان ممكن مارشهمش وارش من برة بس ده طبعا هايخلى منظر العربية مش حلو .

على العموم انا لو هاغير بافكر فى الرمادى الميتاليك او الفضى او الفيرانى

رابعا : طبعا الsound system انا عندى sony expload cd player ممكن اجيبله سماعات انضف من الى موجوده ولا لازم اجيب GM

ولو حد يعرف بعض الاسعار الى انا مش عارفها علشان ماتخمش فيها يبقى كدة عمل واجب معايا تمام

الحاجات الى انا مش عارف سعرها :
1- فلتر هوا رياضى
2- الشاكمان الديفل
3- الكراسى (انا مش عارف ايه الفارق بين الركاردوا والطيارة فياريت حد يقوللى)
4- الجنوط والكاوتش
5- تكاليف الدهان

معلش زهقتكوا لان الاسئلة كتير والموضوع طويل بس انتوا عودتونى على الكرم والشهامة

وان شاء الله هاكون معاكوا خطوة خطوة فى كل حاجة هاعملها وبالصور لو قدرت
الف شكر

-------------------------------------------
احمد حـــــ ابوكريم ــــــــــــــامد

ايه ده الجولف هنا و انا مش موجود انا جيت اهو:)

الاجابات علي اسألتك:
1-هات نص كامل عشان متتشحططش ورا الحاجات الاستيراد
2-الموتور ال 1800 انجكشن استهلاكه هيكون اقل كتير من الكربراتير
3-لو الكراسي عندك وحشة غيرها او عايز تحسن الشكل غير عادي طالما نويت علي تعديلات في الاساسات يبقي دي حاجات هايفة
4-الكاوتش هتغيره طبعا و بما انك هتغير موتور يبقي هتغير العفشة يبقي جنطها سبور 16 و فرد 205\55
5-بلاش تغير الدهان بيقلل التمن و مش هتبقي دواخل فابريقة و كده خليها زي ما هي و روشها استيكرات و حاجات كده
6-مليش في الصوت خالص
7-مش هتحتاج فلتر هوا هيبقي تحت رجلك موتور غول مش هتحتاج تحسن الاداء بفلتر هوا
8-شكمان ديفل بلاش برضه مش حلو للموتور يعني ملوش لازمة في رأيي
9-الكاوتش هاتوا بريدجيستون او بيريللي او ميشلان
9-تكاليف الدهان لو سكينز اصلية مش هتقل عن 1500 جنيه لو عادي بس بوية نضيفة في انواع الكيلو ب 250 و في ب 400 حاجات كده صاحبي قالي علي سعرها
10-ريكارو دي شركة شهيرة بتعمل الكراسي الرياضية دي اما الطيارة دي اعتقد انك اصدك علي المفصلات الطيارة اللي بتتحط في الابواب هي شكل جامد جدا

طبعاً كل اللي أحنا بنقوله ده آراء و أنت خد القرار انا شايف ان الجنوط 16 ده هتبقى تمام على العربية و ده كلام ناس في الحرفيين مش بس كلامي الجولف الجي تي آي بتنزل فبريكة 185/60 آر 14 يعني لو حطيت 15 عادي جداً لو حطيت 16 ده جميل مش افترى يعني و أنصحك لو 16 يبقى الكاوتش 195/50 و لو 15 هات كاوتش 195/55 أو 205/55 عشان شوارعنا الحلوا و في نفس الوقت الكاوتش مش عالي خالص أما بالنسبة للكراسي الطيارة فهي مش مريحة أوي بالنسبة لي يعني خصوصاً أن الشوارع مليانة مطبات والكراسي ده ناشفة مع أنك ممكن بتمن كرسي واحد تجيب صالون كامل جولف جي تي آي جلد طبيعي و الكراسي كهربة و مريحة جدأ و كراسي رياضية طبعاً و أنتاج فولك فاجن !!! و الصالون بفرش الببان بحوالي 1500 أو 2000 جنيه بالكتير و طبعاً استهلاك الانجيكشن أقل بكتير من أستهلاك الكربراتير و هي دى فايدته اما اللون فالون الابيض الميتلك بيبقى حلو أوي انت قول للبوهيجي أبيض لؤلؤي بس و هو هيفهم :)

الكراسي موجودة في الحرفيين و بتوع الجولف أكتر من الهم على القلب :)
أما بالنسبة للكهرباء فالمقصود بيها تعديل وضع الكرس زي انت ما قلت و عايز أقولك أن انا جالي سعر للكراسيوفرش الببان من حوالي 4 شهور كان السعر 1000-1500 انا لما قلتلك السعر قلتلك 1500-2000 بزيادة و إن شاء الله هاتلاقيهم أرخص من كدة...حلاوتهم انهم فابريك و ريكارو و مريحيين ...انا رأيي في الجنوط انها مهمة جداً بتدي شكل جميل و أداء أحسن في الجري و أمان في الفرامل عشان أحنا لازم نقف برضه :)
أنا رأيي من رأي عمرو باشا فرج هاتهم استيراد و نصيحتي لك قبل ما تشتري من الناس اللي في الشارع روح الحرفيين انا مسميها ( سوق التيوننج في مصر ) روح و اتفرج هتلاقي تشكيلة كبيرة قوي اختار اللي انت عايزه و ادفع اللي انت عايزه لا كدة لا تروح لواحد تاني....الدنيا هناك مليانة كل حاجة :)
و بدل ما تغير صالون ممكن تعمله هناك زي بتاع ألمانيا (سوري يا المانيا) بـ 800-1000 جنيه و السعر ده انا واخده من سروجي هناك الجمعة اللي فاتت يعملهولك جلد و يعملك الكراسي ريكارو...بص هناك الناس كتير فهتلاقي أكتر من اللي انت عايزه و المنافسة جامدة فهتاخد الحاجة بسعر حلو....لف كتير قبل ما تطلع جنيه انا مابعملش كدة بس هو ده الصح :)

ما بدهاش بقى ... الظاهر انني لازم اضغط عليك اتفرج على الكراسي دي هي دي اللي بتنزل في الجولف الـ جي تي آي.