بسم الله الرحمن الرحيم

في البداية احب اشكر الاستاذ / سيد منسق قسم سيات علي مجهوداته المتميزة في المنتدي وعلي مساعدته للاعضاء سواء في الرد علي الاستفسارات داخل المنتدي او حتى خارجه .
لك كل الشكر والتقدير

اما الموضوع فهو بخصوص معدل الاستهلاك الطبيعي للابيزا موديل 98 موتور 1000 cc بالنسبة ليا معدل الاستهلاك غير طبيعي . المشوار اليومي بتاعي حوالي 60 كم ولمدة 6 ايام في الاسبوع يعني الاجمالي 360 كم في الاسبوع . بالنسبة للطريق والسرعة الصبح طبعا بيكون الطريق تقريبا فاضي وبيكون متوسط السرعة من 100 كم/ ساعه الي 140 كم / ساعه المشوار بياخد معايا وقت من 30 الي 40 دقيقة وبالنسبة للعوده فالطريق بيكون فيه وقوف كتير وللعلم انا بستهلك تيل فرامل بسرعه تقريبا 4 شهور مع العلم انه تيل ecg الماني 135 جنية تقريبا بالنسبة لمتوسط السرعة في العودة فبيكون حسب ظروف الطريق لكن في مسافه ثابته في الذهاب والعودة تقريبا 10 كم الطريق بيكون فاضي فيها ودي المسافة اللي بقدر اوصل فيها لسرعه 140 كم / ساعه سواء في الذهاب او في العودة اما باقي الطريق فبيكون حسب الظروف اوقات زحمه واوقات ماشي وبياخد معايا وقت من 45 الي 60 دقيقة .
* معدل الاستهلاك :
360 كم في الاسبوع
كل اسبوع بفول التنك والاحتياطي بـــ 60 او 65 جنية ده المتوسط يعني تقريبا بحط من 32 لتر الي 35 لتر لكل 360 كم.
يعني الصفيحة ( 20 لتر ) بتعمل 205 كم تقريبا
وبالمناسبة كنت عايز اسأل علي موضوع الاحتياطي ده لان بلاحظ ان العربية بتستهلك الاحتياطي الاول فهل ده طبيعي ولا العربيه بتستهبل المفروض انه اسمه احتياطي يعني العربيه تستخدمه لما التنك يفضي !!!!!
* مؤشر التانك :
بالنسبة لمؤشر التنك في التابلوه انا طبعا زي ما قولت لحضراتكم اني بفول العربية للزور زي مابيقولوا كل اسبوع ووقتها المؤشر بيبقي علي full وبيفضل علي علامة دي لمدة يومين او تلاتة تقريبا وبعد كده الاقيه نزل في اليوم الرابع ربع يعني يبقي علي علامة الثلاث ارباع وفي اليوم الخامس المؤشر ينزل الي نص التنك واليوم السادس بيكون بين النص والربع الاخير الثلث تقريبا .
في حاجه برده عايز اقولها اني اوقات لما بدور العربية الصبح بلاقي المؤشر في النص بالرغم من ان العربية متفوله علي الاخر وبعد كده يبدأ المؤشر في الصعود لحد ما اوصل شغلي ( يعني بعد 30 كم يكون وصل لعلامة full هل ده عيب في العوامة ؟ هو مش دايما بيعملها بس اوقات كتير بيحصل .
السؤال ؟
انا عارف ان معدل الاستهلاك مش طبيعي طبعا السؤال بقي هو الاستهلاك الغير طبيعي ده راجع لسواقتي ولا لعيب في العربية ؟
مع العلم انا سواقتي عنيفة شوية للاسف يعني بجري و كده وده لاني علي طول بكون مستعجل لاني دايما بكون محكوم بوقت وجربت كتير اعمل زي ما بعض الاعضاء بيقولوا نظام الانزلاق والحاجات دي بس بصراحة لقتها حاجة ممله طحن وعايزة واحد فاضي .
ولو العيب في العربية يبقي عيب ايه بالظبط ؟
ياريت لو حد من الاعضاء معاه نفس العربية يقولنا متوسط استهلاكه كام كم في الصفيحة و قيادته للعربية معتدلة ولا عنيفة.
تحياتي للجميع