الموضوع: معدل استهلاك الابيزا ؟!!

انا صورتلك الخرطومين اللي قولت لحضرتك عليهم يا بشمهندس ايهاب ودي صورهم







دول زي ما قولت لحضرتك الخرطومين اللي لما بسد واحد فيهم صوت الموتور بيهدي شوية وعلي فكرة الخرطوم اللي بسده وبيهدي صوت المكنة فيه نسبة شفط وعموما انا فصلتهم عن بعض وقفلت كل واحد فيهم بشريط لحام .
تاني حاجة وش الاسبراتير وده بهدلني امبارح اخر بهدله وقصته طويلة هحاول اختصرها . انا اشتريت وش الاسبراتير وانا مروح زي ما قولت لحضرتك واشتريت كمان شاكوش وللعلم برده علشان لو حد حابب يعرف سعرهم وش الاسبراتير 45 والشاكوش 35 يعني الاتنين تمنهم 80 خدتهم بـ 70 المهم وش الاسبراتير اللي اشتريته عليه Cover او غطاء لونه بني شوية كده ولما روحت للميكانيكي قالي ده مش بتاعها ولا الشاكوش كمان بتاعها !!!!
قالي قوله الشاكوش اصغر مقاس ( اضيق حاجة ) طبعا علشان اخلص كان لازم غصب عني ارجع تاني مع العلم ان المسافة من عندي للحرفين حولي 20 دقيقة رجعتله تاني قالي الشاكوش المقاس الضيق ناقص واداني وش اسبراتير تاني وقالي علي فكرة الوش الاولاني بتاعها واللي هتاخده ده مش بتاعها !!!!
المهم رجعتله الشاكوش وخت الوش وروحت ادور انا - مع العلم انه اتصل باكثر من محل قطع غيار وسألهم علي الشاكوش وبعت واحد من عنده يدور عليه وملقاهوش - افتكرت ان م / محمد سيد كان اتكلم قبل كده علي محل اسمه فتح الباب في شارع مرسيدس روحتله وبصراحه ناس محترمة جدا وبرده سألني انت متأكد ان الوش اللي معاك ده هيركب عندك قولتله المفروض !!
المهم خدت منه الشاكوش ورجعت للميكانيكي وهو بيركب بصلي بصة تعجب !! قولتله متجننيش انا علي اخري ارغي عايز تقول ايه ضحك وقالي ده كمان مش بتاعها بس ممكن يركب كان نفسي قاله وحياة ام....... ؟
المهم قولتله ركبه وانا بكره هحاول ادور علي بتاعها بس اخلص قالي لو ركبته مش هينفع ترجعه قولتله مش مشكله هبقي اعمله مج واشرب فيه نسكافيه . بعد تركيبه خدت العربيه وروحت وانا في الطريق لقيت العربيه صوتها هدي كتير عن الاول لدرجة اني حسيت اني كنت راكب جرار زراعي الاول .
ودي صورة وش الاسبراتير القديم وطبعا هتلاقي باين فيه اثار الانفجارات وانه غير صالح للاستعمال الآدمي والغير آدمي برده


ده بالنسبة ليوم امبارح اما النهاردة فبتديته باني عديت علي بنزينة موبيل واشتريت STP بس مش العبوة اللي كان قال عليها م / محمد سيد لانهم نزلوا عبوة جديدة ودي صورتها


العبوة دي الجديدة ومتفرقش حاجة عن القديمة هي اصغر في الحجم لكن مركزة عن القديمة دي تضاف علي 21 جالون ودي برده بتضاف علي 21 جالون حسب كلام الموقع الرسمي للمنتج وده الرابط بتاعه Gas Additives by STP� | Concentrated Bottle Benefits
ضفته علي نص التنك وفولت التنك علي الاخر وفولت الاحتياطي كمان وشغلت التريب وان شاء الله بعد الظهر هروح اغير الزيت والفلتر في بنزينة موبيل علشان كده افتري انا ماشي عليه لغاية النهاردة اكتر من 5000 كم .
السؤال بقي يا بشمهندس ايهاب وش الاسبراتير ايه وضعه اسيبه ولا ادور تاني النهاردة هو عموما ركب بس فيه بوش حوالي 2 مم يعني مش حاكم علي الاسبراتير في سنه كده بس الكلبستين ماسكين عليه كويس ولو هغيره قولي اقول لبتاع قطع الغيار ايه بالظبط علشان مجبش حاجة غلط تاني ولا الوش الاولاني فعلا بتاعها والميكانيكي بيفتي كالعاده وعلي فكرة الوش الاولاني كان محكوم كويس بس الميكانيكي قالي الفوله مرحله ومش ظابطه في مكانها
وانا ان شاء الله هوافيكم بالنتيجة التفويلة اللي جايه لاني مش هقدر احدد دلوقتي وبخصوص الخرطوم الاسود الرفيع ( الشاليموه ) لو ربنا سهل وحددتم مقابله وكان ليا نصيب اشوف حضراتكم هقدر اوصفهولك بالظبط واقول لحضرتك كان مكانه فين بالظبط

تحياتي للجميع