كلمت ١٦٢٠٢ عشان أحجز صيانة في العامرية, العربية مكملتش ١١٠٠ كم بس من ساعت ما إستلمتها ودراع المالتي فنكشن فيه مشكلة في خفض الصوت فإن شاء الله يغيروه في الضمان.

الأول إتصلت بالعامرية عشان أتأكد إن الدراع موجود, بس ملاحظ إن إللى بيردو في العامرية ملهومش أي علاقة بكونهم خدمة عملاء الصراحة, يعني بحس إن إللى بيرد عليا ميكانيكي مثلا (ألو .. أيوه ياباشا ....) هههههه, المهم شرحتلو الموضوع فقاللى (طب حضرتك عرفت منين إن العيب في الدراع) قلتلو (زرار تعليه الصوت شغال تمام, لاكن زرار الخفض مش شغال تمام, إنت إيه رأيك يبقى العيب فين؟!!!!!!) رد وقالي (ماشي عموما الدراع موجود), ربنا يسهل ويستر بقى ويحلوها من غير مالواحد يغتت ويقل أدبه هههههه.

بعد كده كلمت ١٦٢٠٢ ناس ذوق ذوق الصراحة, قلتله المراد عمله بالصيانة وشرحتلو نفس الموضوع.

النقطة الأهم وإللى تهم ناس كتير, قلتلو (أنا كمان عندي مشكلة بخصوص التكيف السخن والصهد إللى بتسببه المواسير بتاعته, وأعرف ناس حلو الموضوع في فرع المقطم بإنهم قامو بإلغاءئه ومنع المياه الساخنة من دخول الصالون), كنت متوقع إندهاش أو إستنكار لاقيتو قاللى (آه تمام, يبقى نضيف كمان إلغاء التكيف السخن)!!!! بصراحة مصدقتش, برضه كنت متوقع إني لسه حاهاتي ويتقطع نفسي في الإقناع, بس بصراحة قفلت وأنا مبسوط, بس لسه قلقان إني ألاقي عندهم إستنكار للحكاية لما أروح العامرية إن شاء الله, ربنا يسهل.

هو موضوع السخونية ده مش مدايقني قوي بس بصراحة لو هيفرق في التكيف زي ماسمعت هيكون أفضل من السخن إللى مضنش حد بيستخمة, وكمان أعتقد ده حيفرق في إستهلاك البنزين.

كفاية كده عليكو بقى, إيه الرغي ده كله!!!!