الموضوع: ليه بنقارن الكوري بالياباني وهو بيكسب الألماني

لا هي صراحة لسه قدامها شوية عشان تبقى كويسة ك handling زي المازدا ، بس طبعا اللي هنا دي شبه مازدا مش مازدا بموتور البطة ده

المشاركة الأصلية كتبت بواسطة Hosam_Optrawy

ايه دا انتوا لسه مكملين :)

طيب بما ان سيرة التطور افتحت , هاحاول اقول نبذه مختصره عن تطور هيونداى وكيا والكورى عموما , صحيح هيونداى وكيا ملهمش تاريخ كبير زى معظم الماركات الاوروبى واليابانى بس مش شرط انها ملهاش تاريخ يبقى ملهاش حاضر ولا مستقبل


اولا المبيعات : طبعا المبيعات مش كل حاجه بس دا عامل مهم يدل على تطور الماركه ونجاحها ومدى ثقة المشترى فيها وانها بتلبى احتياجاته , ولو كانت المبيعات مش مهمه مكنش جنرال موتورز وتويوتا وفولكس فاجن يقطعوا بعض على المبيعات وهاتك يا بناء فى مصانع فى الصين وغيره :)

المهم , سنة 98 كانت مبيعات هيونداى حوالى 900 الف عربيه فقط , وكيا 365 الف , ترتيب هيونداى كان ال 15 عالميا , و كيا 21 عالميا , ولو جمعنا مبيعاتهم يبقى مليون و 265 الف فى المركز ال 13 عالميا ومعظم الماركات اليابانى والاوروبى سابقاهم فى الترتيب

سنة 99 كانت اول مره مبيعات هيونداى تعدى المليون وبالتحديد مليون و 307 الف وكيا 796 الف وطلعوا للمركز ال 11 عالميا

سنة 2001 طلعو للمركز التاسع بحوالى 2 مليون ونص عربيه , وفضلت فى نفس المركز لحد سنة 2005 بس مبيعاتها زادت شويه عدت ال 3 مليون للشركتين مع بعض

سنة 2006 كان فيها طفره لانهم وصلوا للمركز الخامس عالميا وهيونداى وصلت مبيعاتها 2 مليون ونص وكيا عدت المليون

سنة 2008 عدت مبيعاتهم ال 4 مليون واستمرت فى المركز الخامس لحد 2009

2010 كانت طفره تانيه ووصلوا للمركز الرابع واستمروا فيه لحد 2011 وغالبا السنه دى كمان 2012 لان المبيعات مازالت فى زياده , 2010 كيا وصلت 2 مليون و 2011 وصلت 2 مليون ونص , هيونداى فى 2011 عدت 4 مليون

بخلاف اجمالى المبيعات , الجديد فى السنوات الاخيره ان هيونداى وكيا وتحديدا هيونداى بقى ليها وجود وانتشار فى امريكا واوروبا ودى حاجه مكنتش موجوده من 10 سنين مثلا


ثانيا تطور العربيات :

فى البدايه هيونداى كانت بتعتمد على ميتسوبيشى فى المواتير فى موديلات زى البونى , وكيا خدت من مازدا زى السيفيا والبرايد , بس فى اواخر التسعينات واوائل الالفينات ابتدو يعتمدوا على نفسهم فى المواتير وغيره

لحد فتره قريبه كان اقوى موتور 1600 بيطلع 105 حصان كان بينزل فى معظم الموديلات , وبعد كدا بقى 112 حصان اللى فى الاكسنت الجيل التالت وريو الجيل التانى , وبعدها بقى 121 حصان فى الالنترا و 124 سيراتو ومؤخرا 130 فى الالنترا و 140 بال GDi

نفس الكلام باقى المواتير كلها اتطورت قدرتها زادت مع استهلاك بنزين وانبعاثات اقل

استعملت التربو فى الموتور ال 2000 سى سى Theta بيطلع 271 حصان 365 نيوتن بينزل فى السوناتا والاوبتيما والسبورتاج , تانى تربو كان ال 1600 اللى بينزل فى الفيلوستر 204 حصان 265 نيوتن

استعملت الحقن المباشر GDi فى معظم مواتيرها 1600 - 2000 - 2400 - 3000 - 3300 - 3800 - 5000

عملت اقوى موتور ليها لحد دلوقتى 5000 سى سى 430 حصان 510 نيوتن بينزل فى الايكوس والجينيسيس

طورت الفتيس من 4 سرعات ل 5 وبعدين 6 واخيرا 8 سرعات وشغالين على ال 10 سرعات

عملت فتيس دوال كلتش DCT بينزل فى الفيلوستر

بتستعمل نظام تعليق منفصل ( فى الموديلات الاوروبيه او الكبيره فقط )

عملت Full Size Luxury Car الايكوس والكوريس K9

معظم الاوبشنز والرفاهيه والتكنولوجيا الموجوده فى باقى الماركات بقت موجوده عادى

بقى عندهم اكتر من 30 موديل فى مختلف الفئات

الامان :

من الحاجات المهمه طبعا واللى اشتغلت هيونداى كيا عليه واللى اثبته نتايج ال EuroNCAP , وفى الموديلات الاوروبى وفى امريكا معظم العربيات 6 ايرباج و ESP وغيرهم من وسائل الامان

سنة 2007 كيا سييد كانت اول عربيه كورى تاخد 5 نجوم , ومن ساعتها كل عربيات كيا 5 نجوم لحد وقتنا هذا ( عدا البيكانتو ) وعددهم 6 موديلات , هيونداى كانت اول عربيه تاخد 5 نجوم ال i30 فى 2008 ومن بعدها برضه كلو 5 نجوم وعددهم 7 موديلات

دا غير اختبارات امريكا وال ANCAP للموديلات التانيه اللى مابتتباعش فى اوروبا وخدت 5 نجوم


الجوائز :

خدت كذا جايزه سواء سيارة العام او من افضل مواتير او احسن تصميم

وعموما هيونداى تعتبر الماركه الاكثر نموا فى العالم حاليا

وموديلاتها فرضت نفسها بقوة وبقى لها الحق والجرأه انها تتقارن بموديلات يابانى واوروبى وتتفوق احيانا باعترافات وتقييمات كبار خبراء السيارات فى العالم



طبعا انتوا زهقتوا لان كدا مابقتش نبذه مختصره دانا حكيت تاريخ حياتهم :)

ممممم ، برضه مستحيل تتقارن بالهوندا ، دول بيقلدوها حتى في العلامة جابوا h وخلوها مايلة يا عم