الموضوع: تقريري المتواضع عن استلام تيدا هاتش باك 2012

المشاركة الأصلية كتبت بواسطة ehabvet

مبارك عليك التيدا يا دكترة .. بصراحة عرفت تنقي
وبصراحة أنا من أول الموضوع وأنا مبسوط جدا عشان لقيت واحد زي حلاتي من طنطا ومعاه تيدا وكمان إسمه إيهاب
بصراحة ماكنش فاضلك غير حاجة واحدة بس وتبقى 100 100 إنك بدل ما تكون دكتور عيون تبقى دكتور بيطري زي حلاتي :)

التيدا عربية ممتازة .. ربنا يبارك لك فيها .. هتفرح بيها يوم عن يوم بإذن الله
وبالنسبة للزيت كده زيادة قوي ولازم تنزل الزيادة دي في أقرب فرصة عشان متأثرش على الحساسات

وياريت بعد كده تروح توكيل أوتوإيجيب أو سبع المنصورة

بس عندي سؤال وحيد محيرني ..

إيه القرية اللي تبع طنطا وتبعد عنها 20 كيلو دي ؟!!!

دكتور0ايهاب000كل سنة وحضرتك بخير وبألف صحة وسلامة
طبعا انا ليا الشرف ان اسمائنا متشابهة وكان الشرف هيزيد لو المهن واحدة00بس حصل خير متعوضة ياباشا
بالنسبة للعربية 00فعلا مواضيع حضرتك من الحاجات اللي زودت حبي للتيدا وربنا يباركلك في عربيتك ويحفظها من كل سوء000بس كده حضرتك قلقتني على موضوع الزيت000يعني اروح لاي مركز صيانة واقولله نزل الزيادة ولا ينزل الزيت كله؟؟؟؟
وهل في ضرر من طول المدة لاني بصراحة عملت حوالي 700كيلو على الزيت وهوكده
بالنسبة للقرية بتاعتي انا من قرية 00الجعفرية-مركز السنطة
بجد يادكتور انا فرحان ان حضرتك نورتني فى موضوعي خاصة بعد ماعرفت اعمل اقتباس00000ربنا يديم الود مابينا000شكرا

السلام عليكم ورحمة الله وبركاته
دكتور0ايهاب000الجعفرية تنور بيك ياباشا ويحصلنا عظيم الشرف00وبجد مش هزار
بالنسبة للزيت00انا رحت النهاردة لمركز صيانة ناشونال يونيون وشرحتلهم الموقف وقابلت الاستاذ مدير المركز00الراجل رحب بيا وقاللي حاضر 000هنغير الزيت؟؟؟؟
قلتله حضرتك الزيت لسه ماكملش 600 كيلو وانا حاطط موبيل وان العشرة الاف فلو ممكن نسحب الزيادة فقط
قاللي ماينفعش ماعندناش سحب
قلتله طيب ممكن ننزل الزيت ونشيل الزيادة ونحط الكمية المتبقية بالمقدار المضبوط تاني؟
قاللي ماينفعش نحط الزيت تاني طالما نزلناه
قلتله طيب ايه العمل بالضبط
قاللي هننزل الزيت ونحط زيت جديد بالمقدار المضبوط ونغير الفلتر وبالمرة هنربط العفشة(يعني صيانة الالف كيلو اللي انا لسه عاملها من اسبوع)؟؟؟؟؟؟
قلتله بكام ياعم الحاج000قاللي الزيت ب265(شل العشرة الاف)+فلتر ب55+مصنعية ب65 يعني كله ب385جنيه
قلتله شكرا---- ورحت لمركز تغيير زيت عند ميدان اسكندرية عنده جهاز شفط الزيت وخليته شفط حوالي نص ليتر وهبقى اتابع مقياس الزيت والعربية باردة علشان احدد اشفط اد ايه بالضبط
التكلفة0000خمسة جنيه
انا متشكر جدا لاهتمام حضرتك 00وياريت لما حضرتك تنور الجعفرية تديني فكرة علشان اقابلك ياباشا ونتعرف على بعض اكتر
في امان الله

المشاركة الأصلية كتبت بواسطة ahmed.tv

كل سنة وانت طيب يا دكتور .. والف مليون مبروك وربنا يعطيك خيرها ويكفيك شر الطريق
وكلنا هنا اخوة فى الله .. وتحت امرك فى اى مساعدة

تحياتى ليك

كل سنة وحضرتك بالف خير ياعمدة والله يبارك فيك
على فكرة 00مواضيعك عن التيدا كانت من اكتر الحاجات اللي شدتني للتيدا بعد ما كانت نظرتي ليها سلبية 00لكن بعد ما ركزت وعرفت متطلباتي وبدأت افكر بطريقة جديدة خصوصا بعد دخول دكتور ايهاب عالم التيدا بشدة00قلت خلاص مفيش غير تيدا باذن الله وقد كان
شكرا لحضرتك وسعيد بوجودك في موضوعي
دمت بألف خير

المشاركة الأصلية كتبت بواسطة shere74

الف مبروك ومتنساش التقرير علشان انا نفسي اجيب التيدا وعايز اعرف المميزات والعيوب

الله يبارك في حضرتك وربنا يكرمك وتجيب العربية اللي نفسك فيها سواء التيدا أو اللي احسن منها باذن الله
بالنسبة للتقرير انا عملته بس هو متوزع على كذا مشاركة ويمكن تلاقي اجابة السؤال اللي انت عاوزه في وسط الكلام 00اصل انا للاسف ضعيف شوية في الكمبيوتر عموما وفي تنسيق المواضيع خصوصا00(مواليد السبعينات وجيل الاتاري)
لو في اي سؤال حضرتك عاوز تسأله انا تحت امرك
نورت الموضوع يا باشا