الموضوع: تقريري المتواضع عن استلام تيدا هاتش باك 2012

السلام عليكم ورحمة الله وبركاته
انا آسف للمرة التانية للتاخير بس ظروف خارجه عن ارادتي والله
على فكرة في لقطة نسيت احكيها وهي اني بعد ما رخصت طلعت على طول على المصرية للسيارات ودخلت المعرض 00اول المندوب اللي انا كنت حاجز معاه شافني قاللي والله لسه مفيش تيدا وانا لسه باعت فاكس مش عارف فين حتى اسأل استاذ فلان واستاذ علان 00ورايح يندهلهم
قلتله تعال يا استاذ (------) ووريته مفاتيح العربية
الراجل اترسم على وشه نظرة ذهول ماشفتهاش في حياتي 00قالي ازاي ومنين00المهم ماصدقنيش غير لما شاف العربية راكنة قدام المعرض000اول ما شافها قاللي هات الوصل اللي انت حاجز بيه علشان تاخد فلوسك
المهم00000نكمل باقي التقرير
-التسارع000ماشاء الله رائع --انا طبعا اول مره اسوق اوتوماتيك لكن انا ملاحظ ان دواسة البنزين حساسة جدا لمقدار الضغط عليها00يعني لو بتضغط تدريجيا عليها وبرفق هتلاقي تسارع رائع وناعم جدا بدون احساس بالنقلات نهائي وبالنقل على rpmمنخفض
اما في حالة الضغط المتوسط الغير مفاجئ هتلاقي العربية اتخطفت لجزء من الثانية وجمعت سرعة عالية لكن مع الاحساس بالنقلات والنقل على rpm اعلى
اما في حالة الضغط المفاجئ لكن بدون الوصول الي اخر الدواسة هيحصل نفس الموضوع السابق لكن اكثر وضوحا0000بالمناسبة انا ماعملتش كيك داون خالص ولا جربت الوفردرايف
-الكاوتش00 بريدجستون ياباني نقشة b250----انا اول ما استلمت العربية رحت حطيت نيتروجين لاني حسيت انه هيكون اطرى لكن بامانة محسيتش بفرق كبير
بالمناسبة انا شايف ميزة النيتروجين الوحيدة هي الحفاظ على الضغط داخل الاطار ثابت بغض النظر عن الحرارة الجوية او طول المشوار لكن له عيب خطير وهو انه بيظهر عيوب الكاوتش لاني كنت حاطه في الفابيا مع كاوتش اندونيسي جديد لانج بس مش فاكر اسمه الصراحة كان مخلي العفشة سيئة جدا وكانت احسن من غيره
-الشنطة جميلة وحجمها مناسب لكن حكاية الكنبة اللي بتتحرك كلها لقدام بيخلي حجم الشنطة بيتضاعف ومع ذلك مساحة الجلوس الخلفي تظل اكبر من الفابيا في اقصى حالاتها
-مساحات التخزين والمساند الامامية والخلفية وحوامل الاكواب سواء في الابواب اوالصالون ممتازة
-الاضاءة الخارجية سواء عالي او واطي قوية ومفروشة وكاشفة الطريق
-نيجي للنقطة المهمة وهي استهلاك البنزين0000
انا استلمت العربية يوم 3-8 عاملة 77 كيلو
اول امبارح 15-8 كانت عاملة 1037كيلو وكنت فولت مرتين 0000بالضبط 81ليتر فبحسبة بسيطة هنلاقيها مشيت 11.5 كيلو لكل ليتر مع العلم ان العربية مابتتحركش بدون التكييف ومعظم المسافة زحمة او طرق مكسرة ومطبات
وصلنا كده لصيانة الالف0000طبعا انا من طنطا وطبيعي اروح ناشيونال يونيون لكن كان في اجماع في المنتدى انه سيئ عشان كده توجهت لمودرن موتورز شبين الكوم الاقرب لي بعد طنطا
وصلت الساعة عشرة ونص وكنا يوم الاربعاء اللي فات 15-8 وكانت العربية عاملة 952كيلو
خدها مهندس الاستقبال وقاللي هنغير زيت وفلتر ونكشف على السوائل ونربط العفشة ونشحمها وقاللي بنغير بزيت موبيل قلتله حط موبيل وان العشرة الاف كيلو وبمناسبة رمضان الفلتر هدية والمصنعيات مجانا
انا كان عندي ملاحظة مهمة في العربية وهي ان عندي اربع لمبات في الطبلوه مش بينورو
لمبة الحرارة الزرقاء لما بتكون العربية باردة وتختفي لما العربية تسخن دي مش موجودة خالص مفيش غير لمبة الحرارة الحمرا اللي الكمبيوتر بيشيك عليها ساعة الدوارة0000 المهندس قاللي التيدا مافيهاش الكلام ده هي المبة الحمرا وخلاص؟؟؟؟؟؟؟؟
وبرضو لمبة النور الصغير ولمبة النور الواطي ولمبة الشبورة كلهم مش موجودين مفيش غيرلمبة النور العلي الزرقا0000المهندس قاللي برده التيدا مافيهاش الكلام ده لان دي مكسيكي وفي طرازات وموديلات بتبقى كده000000طبعا مع كامل احترامي ليه بس ده كلام فارغ لكن انا مااصريتش انه يكشف ويفك ويشوف لاني حسيت بعدم تمكنه خاصة انه كان المهندس الوحيد والباقي فنيين وبصراحة اكتر انا مش متاكد اذا كان اصلا مهندس ولا مجرد موظف بس بأمانة راجل خلوق ومحترم جدا
طبعا الموضوع مااخدش اكتر من نص ساعة لان مفيش زحمة وكمان العربية اتغسلت
بالمناسبة انا ليل ملاحظتين
اولا والعربية مرفوعة علشان تربيط وتشحيم العفشة بصيت تحتيها مالقيتش تصفيح تحت الموتور وسالت الفني قاللي التيدا بدون تصفيح 00انا زعلت لان الفابيا كان فيها
ثانيا هماحطوا اربعة كيلو زيت فانا معرفش هل ده مظبوط ولا لا لاني فاكر كنتوا اتناقشتوا في الموضوع ده وكان في خلاف حوالين الكمية بالضبط0000ربنا يستر
المهم انطباعي بعد الصيانة0000
العربية فاقت اكتر من الاول وتحسها عصبية وبتتلكك على لمسة البنزين
صوت الموتور وانا خارج من الصيانة كان اعلى من الطبيعي حاجة بسيطة لمدة نص ساعة 000بعد كده ولغاية دلوقتي ماشاء الله هادئ جدا عن الاول وهو اصلا من الاول صامت
في نهاية التقرير انا بشكر كل واحد هنا في النايل موتورز عموما وصقور نيسان خصوصا على الدعم والمحبة والاخلاص في النصيحة لوجه الله
دمتم بكل الود وفي امان الله
اخوكم---ايهاب محمد ابوالنور
اخصائي طب وجراحة العيون

كل سنة وحضراتكم بخير وعيد سعيد على الكل
لو سمحتم يا جماعة كنت عاوز اجابات على اسئلتي ويمكن تكون تايهة في وسط التقرير علشان كده انا هحددهم
اولا000اللمبات اللي مش موجودة في التابلوه وهي لمبة الحرارة الزرقاء(لما بتكون العربية باردة) ولمبة النور الصغير ولمبة النور الواطي ولمبة الشبورة
ثانيا000كمية الزيت اللي حطوها في الصيانة اربعة كيلو والنهارده بشوف مقياس الزيت والعربية بارده لقيت الزيت فوق علامة الmax بحوالي واحد سم
وشكرا جزيلا مسبقا

متشكر جدا لحضرتك يا باشمهندس0محمد سعد
حضرتك كلك ذوق واخلاق وانا كنت متابع رحلة حضرتك في عالم نيسان الى ان استقريت على الجميلة تيدا ربنا يباركللك فيها ويحفظهالك
فعلا عدم وجود اللمبات دي في التابلوه حاجة رخمة جدا وتحسسك بالاسترخاص او الاستسهال مش عارف مع ان التيدا الياباني مع واحد صاحبي وانا اصريت اني اشيك على التابلوه عنده لقيت اللمبات دي كلها موجودة وشغالة؟؟؟؟؟؟؟؟؟
بالنسبة للشبورة هما عملوها زي الالماني مش بتشتغل غير مع النور الواطي
عموما العربية ماشاءالله رائعة وربنا يحميها من العين
كل سنة وحضرتك طيب وعيد فطر سعيد