الموضوع: مشاركات خارج موضوع ( هل أنت راضي عن أداء عربيتك الألنترا 2012 )

المشاركة الأصلية كتبت بواسطة Amrgamal1

انا مش من ملاك العربيه بس لو تسمحلي اقول رأي لانها مع واحد صاحبي وسوقتها كتير
طالما مش من ملاكها و قيادتك لها محدودة مش هاتقدر تقييمها مظبوط , لازم علشان تقييم اي عربية و تصدر حكم نهائي تسوقها مسافة كبيرة أو وقت طويل طبعا حكمك عليها مش زي واحد عامل بيها 20000 كم

اول مره سوقتها كانت لسه عامله 300 كيلو
العربية قبل ال 1000 كم الاولي أدائها بيختلف و بعد ال 10000 كم بيختلف تماما

طبعا كنت موهوم بشكلها بس لما اعدت جواها وانا سايقها لقيت خامه الطابلوه سيئه جدا وفرش الصالون والابواب خفيف
الصاج خفيف بالمقارنة بأيه مثلا ؟؟ و لا حضرتك قدرت تقيس سمك الصاج علشان تعرف أنه خفيف

ولما سوقتها بقي عجبني بصراحه طالعه العربيه .. اكيد عشان زيرو بردو ف كل حاجه تمام والطلعه كانت كويسه

من طلعتها حسيت انها هتجيب ال 100 بسرعه ..بس خادت وقت
الفتيس 6 نقلات لو أنت سواقتك هادية فطبيعي انها تأخد وقت ده لو أنت بتقارنها بمانيوال مثلا أو عربية أوتو 4 سرعات

ولما جريت بيها لقيتها خفيفه جداااااااا علي الطريق والباور خفيف اوي حسيت ان العربيه مافيش ثبات خالص واصغر ظلطه في الارض بتخلي الدريكسون يلعب
دي مسالة تعود علي الباور الكهرباء مش أكثر لكن علي فكرة هو بيتقل و أحساسك مش صح و الا أزاي ناس كتير علي الطريق بيجروا بالعربية و بيأخدوا بيها غرز علي سرعات عالية ؟

قولت يمكن عشان مش متعود عليها لقيت بعدها ب اسبوع صاحبي كان سافر بيها اسكندريه
بيقولي الطريق كان مفتوح بس ماعرفتش اجري خوفت من العربيه بعد ال 120 بتبقي خفيفه اوي
هيا مسألة تعود و ثقة في العربية مش أكثر و دي بيتم أكتسابها مع الوقت لما تعرف أمكانياتها و اللي سايقها يعرف أمكانياته و قدرته علي التحكم فيها

المهم
-فتحت الكبوت اتفرج علي الموتور لقيت الصاج خفيف جداااا وضعيف والكبوت خفيف ومافهوش عزل للموتور
برضه عايز افهم يعني أيه صاج خفيف ؟ سمك الصاج أقل من 1 مم مثلا و لا سندت عليه بصباعك فأتخرم ؟
أما عزل الموتور فيكفي انك و العربية دايرة مش هاتسمع صوته و أنت جوه العربية و هنا أنا باقارن عزلها بالتويوتا كورولا و أقدر أقولك أنها مقاربة ليها جدا و ده عن تجربة

-الباور بتاعها عجبتني اوي وانا بركن ممكن تحركه بصباع واحد عادي
ودي ميزه حلوه اوي في الركن بس ع الطريق عيب مش ميزة زي ما قولت
ميزة طبعا داخل المدن و علي الطرق السريعة كويس برضه و ألا ماكنتش عرفت أخد بيها ملفات علي 140 كم/ساعة

-والعربيه واطيه جدا كمان علي الارض.. كنت انا وصاحبي بس اللي في العربيه وحكيت في مطب بعدي عليه كل يوم بعربيتي مع انها واطيه بردو بس مش بتحك زي ما الالنترا حكت كدا
أرتفاع عربيتك كام سم ؟

-عجبني كمان التكييف اوي تلاجه بصراحه كنت عامله علي 3 كنت بتكتك من البرد بس مش عارف في الشمس يبقي شديد كدا ولا لأ
في الحر و عز الصيف أقصي حاجة اقدر أشغله علي 2 مش 3

من الاخر العربيه المُجمل بتاعها ك شكل حلو بس المضمون مش حلو خالص و سعرها كتير اوي عليها بصراحه
رأيك أحترمه طبعا و لكنه ليس مقياس

انا مش قصدي اشوه صورة الالنترا والله انا قولت رأي وانطباعي ليها عن تجربه شخصيه وكمان بركبها كتير مع صاحبي وهو رأيه فيها كدا بردو
ويمكن هي عاجباكو اوي عشان ماركبتوش الماني وعرفتو يعني ايه صاج ناشف وخامات محترمه ومواتير طبعا
او يمكن عشان انا مابركبش غير الماني ف ماعجبتنيش بس هي كويسه
أسف ع الرد يا جماعه وياريت يتمسح لو مش عاجبكو

المشاركة الأصلية كتبت بواسطة amrgamal1

انا مش قصدي اشوه صورة الالنترا والله انا قولت رأي وانطباعي ليها عن تجربه شخصيه وكمان بركبها كتير مع صاحبي وهو رأيه فيها كدا بردو
ويمكن هي عاجباكو اوي عشان ماركبتوش الماني وعرفتو يعني ايه صاج ناشف وخامات محترمه ومواتير طبعا
او يمكن عشان انا مابركبش غير الماني ف ماعجبتنيش بس هي كويسه
أسف ع الرد يا جماعه وياريت يتمسح لو مش عاجبكو

يا باشا اهلا وسهلا بحضرتك , مليون مرة بنقول دي معادلة وكل واحد بيختار اللي يريحه وكل حاجة ليها مميزاتها والا مكانش هيبقى في غير شركة عربيات واحدة اللي شغالة في العالم
حضرتك ب 130 الف تقدر تجيب ايه عربية كومباكت واسعة بتكييف تلج وموتور 130 حصان وشكل جميل وكماليات كويسة وفتيس 6 سرعات واعادة بيع اقرب للممتازة وقطع غيار متوفرة ورخيصة ؟
اينعم مفيهاش عوامل امان للاسف وخامات مش كويسة ومش اوروبي ,
ممكن اجيب فورد فييستا كماليات حلوة وخامات روعة وعفشة كويسة واوروبي وكعربية ممتازة وعوامل امان , بس عربية صغيرة وضيقة وموتور ضعيف 96 حصان وتكييف ضعيف وقطع غيار مش متوفرة زي الالنترا وفتيس 4 سرعات واعادة بيع ضعيفة
الموضوع مش قفش بس مفيش عربية زيرو في مصر اصلا تستاهل سعرها , فده مش عيب في العربية دي بحد ذاتها

المشاركة الأصلية كتبت بواسطة amrgamal1

انا مش قصدي اشوه صورة الالنترا والله انا قولت رأي وانطباعي ليها عن تجربه شخصيه وكمان بركبها كتير مع صاحبي وهو رأيه فيها كدا بردو
ويمكن هي عاجباكو اوي عشان ماركبتوش الماني وعرفتو يعني ايه صاج ناشف وخامات محترمه ومواتير طبعا
او يمكن عشان انا مابركبش غير الماني ف ماعجبتنيش بس هي كويسه
أسف ع الرد يا جماعه وياريت يتمسح لو مش عاجبكو

أولا.. مافيش داعي للأسف أحنا هنا كلنا أخوات و بنتعلم من بعض و بنحترم بعض و بنستفيد من أراء بعض حتي لو الأراء دي مخالفة لأرائنا
مرحبا بك دائما في قسم هيونداي أخ عزيز و مرحبا برأيك و نقدك قبل مدحك

ثانيا.. أنا بس كمهندس عايز أعرف : يعني ايه صاج ناشف ؟ و هل فيه صاج طري ؟
و أيه الفرق بين الاثنين ؟