الموضوع: .... نصائح قبل متشتري كيا او اى عربية و مشاكل السيراتو المتوقعة عن تجربة ....

المشاركة الأصلية كتبت بواسطة d/farid cerato

موديل 2012؟انا معايا تيمو اختها هنا في السعودية؟ايه رايك في ثباتها؟و الجنط 15 مع العفشة؟كمان موضوع الدريكسون مش في النص عندك؟و البوش عندك علي 90 بيظهر اوي؟
و انت قبل 10000 كانت بتاخد منك بنزين جامد؟

ثباتها معقول مش وحش , الجنط 15 كويس مع العفشة غير ال 17 خالص , الدركسيون الحمد لله مفهوش اى مشاكل بحسها فيه و موضوع البوش ده محستوش و قبل ال 10 الاف كان الاستهلاك مش مظبوط و كان عالى و ظبط مع الوقت هى مو 2011

المشاركة الأصلية كتبت بواسطة msco

*معرفش يعنى اية الموتور بيسقف بس في الغالب انا بحط بنزين 91 ومفيش مشاكل

*ايوة ياباشا اهم حاجة تفيدني عايز اغير نوع كوتشات مريح شوية لان الكومهو دي فعلا مراجيح وخصوصا الجنط ال 17 .. تنصحني بإيه ياكبير وخصوصا اني ماشي عليهم الوقتي 20 الف وبقالهم سنتين .. اغير الوقتي ولا استنى شوية ؟

*استهلاك البنزين عندي معقول ديما بيترواح من 9 لتر -10 لتر / 100 كيلو والتنك بيعمل معايا 450 كيلو تزيد او تنقص 20 كيلو .. معرفش ده كويس ولا وحش

*الاربع ابواب والشنطة بيطلعو مزيكا حسب الله الوقتي .. ومش عارف اعمل بصراحة غير اني اكبر دماغي

*الفوانيس فعلا مشققة جدا مع اني لا بغسل بجاز او بنزين بس بشغل النور العالي كتير عشان طريق شغلي معظمة صحرا .. هل في علاج ولا مفيش ؟

في النهاية ياباشا احب اشكرك على الموضوع واقولك انك فعلا راجل برنس ريحتني كنت مفكر ان العيوب دي عندي وبس .. واتمنى ان حضرتك تفيدني في الاستفسارات اللي كتبتها ومكنش متقل عليك .. والله ولي التوفيق

ربنا يخليك ده من زوقك ، وتحت امر حضرتك فى اى استفسار

* بخصوص تسقيفة الموتور يعنى والعربية فى حالة التسارع تسمع سوط تكتكه كده والموضوع اذا كان فى مرحلة صعبة كل ماتدوس بنزين يزيد الصوت جداً ده مش عيب فى العربية ومش هيظهر خالص طول ماالبنزين نضيف والفلاتر نضيفة وصيانة مستمرة.

* اصبر على الكوتش شوية عندي الكوتش ماشى عليه 36 الف وسنتين والصراحة يمكن علشان بمشى فى شوارع كويسه بقدر الإمكان فلغاية دلوقتى كويس كحالة بس مش معجب بمستواه.عنفسى بفكر فى نوعين رقم 2 او 5 :

1- KUMHO ECSTA DX
2- KUMHO ECSTA SPT KU31
3-اذا عايز أداء HANKOOK VENTUS V12 evo2
4-اذا عايز راحة ونعومة HANKOOK S1 Nobel
5-BRIDGESTONE Turanza ER300

طبعا فى حاجات افضل من الأنواع دى بكتير بس دول من وجهة نظرى متوافقين مع مستوى العربية واحسن من الراكب فيها بفارق محترم.

* استهلاك البنزين عند حضرتك مقبول وقريب جدا من معدل الإستهلاك عندى كمان

* الأصوات فى الأبواب والشنطة بنسبة كبيرة ممكن يتعالجو بشحم شفاف ليثيم بيتباع مقاوم للماء فعلاً ممتاز واذا فى صدأ هو صعب بس اذا فى يعنى قبل متحطه ممكن تنظف الأول ب WD-40 وتسنى يوم وتحط الشحم.

* للأسف الفوانيس ملهاش علاج طالما ظهر فيها المشكلة، ممكن فى حجات مخصوص للحفاظ على الفوانيس الأمامية والخلفية من الشمس مواد زى البولش كده موجودة فى السوق بس مش منتشرة.

تحياتى ويارب بالتوفيق ديماً.

المشاركة الأصلية كتبت بواسطة mostafamohamed

اولا : الف شكر على الموضوع دة يا باشا
ثانيا انا عندى مشكلة "صوت خشونة او ورة بس مع تشغيل التكييف وتدوس بنزين على السرعات المنخفضة المشكلة دى مش ظاهرة علطول" و عربيتى عاملة 2000كم بس هى دى مشكلة بجد ولا اية و هى ممكن تتصلح ؟؟؟

العفو ياباشا، دى مش مشكلة مؤثرة على كفاءة العربية خالص وعربيات كتير شغالة سنين منغير اى تأثير على حاجة هو الصوت ساعات بيكون مزعج بس على السرعات البطيئة خالص. الصراحة فى حلول موجودة من الأعضاء فى المنتدى الجميل هنا بس بعضها معملش فرق دائم وحاجات تانية زى تظبيط الكمبيوتر بس التوكيل ميعرفش عنها حاجة للسيراتو فمحدش جربها.

المشاركة الأصلية كتبت بواسطة maaatrixxx

انت كده جبت كل حاجة عن مشاكل السيارة فى موضوع واحد

الله يخليك ياباشا، يارب نقدر نفيد الجميع ديماً.

المشاركة الأصلية كتبت بواسطة hazemhassan

بصراحة انا كنت هبيع الانوس وناوى على سيراتو بس كدة هراجع نفسى قبل ما اجبها
لانى هجبها عشان اتفادى عيوب لانوس يطلع عيوب الانوس احسن هتقولى ازاى؟
هقولك الانوس ب70الف والسيراتو ب110الف والاتنين مشاكل بس مدفعش مبلغ كبير ودمى بتحرق واتخنق من العربية

فعلا فى فرق كبير بين السيراتو والانوس يستحق ان حضرتك تغير وبرضه الثمن ده. الحاجات المكتوبة دى للتوضيح علشان اذا حد ظهر معاه اى حاجة من دى يبقى عارف انها مش حاجة توقف العربية او تقلل منها الحاجات دى معظمها بيظهر فى اى عربية فعلاً مع اختلاف المؤثرات وتركيز كل واحد مع العربية.

شكرا وتحياتى لحضرتك،

المشاركة الأصلية كتبت بواسطة d/farid cerato

تيمو الفئة ديه سعرها كام في مصر موديل 2012 اليومين دول؟؟؟

من 109 الى 115 , انا كنت جايبها ب 110 بس سمعت انها وصلت دلوقتى 104