استطلاع راى نايل موتورز .. تـؤيد ام تعارض :: هذا السـعر " لنيـسان ميـكرا " فى مـصر

**mody3on** · 05-09-2012 04:09 PM

ملهاش لازمة الا لو نزلت ب abs و2 ايرباج و ebd
غير كدة مش هتنافس البيكانتو والسبارك وال i10

**medoghaly** · 05-09-2012 04:09 PM

هتبقي زي البيكانتو من الاخر و هيبقي ليها سوقها و بعدين رايي في السبعينات شغال بس بالنسبالي شكلها عادي البيكانتو كشكل احلي

**Ahmed.TV** · 05-09-2012 04:11 PM

المشاركة الأصلية كتبت بواسطة axel

عربية بالامكانيات دي و المواصفات ديه لو حبينا انها تنزل هنا و تجميع مصري و تقدر تنافس
يبقي فئة المانيوال لا تزد عن 70 الف اما فئة الاوتو يكون سعرها 75 الف
لأن لازم يتم مراعاة طريقة تفكير المستهلك و امكانياته المادية و ليس البائع
يعني هنا المستهلك اولا هيقولك موتور صغير بغض النظر عن امكانياته حتي لو قولتله تربو هيقولك برده صغير
نقطة تانية الناس بتبص للهاتشباك انها عربية صغيرة حتي لو كانت اوتوبيس لكن طالما هاتشباك تبقي صغيرة و خسارة فيها فلوس كتيير و اخرها 50-60 الف
نقطة تانية يقولك اللي يخليني ادفع فوق الــ70 فيها و هي هاتشاك اشوف لانوس او فيرنا 1600 سي سي عربية سيدان قطع غيار في كل مكان و رخيصة و سهلة البيع او حتي يشوف برليانس او اسبرانزا او.. او.. كلها عربيات تتميز بالوسع و الشكل و السعر المقبول و اللي يقدر عليه الكثير و قطع غيار موجودة و عربيات اثبتت نفسها انما ديه غالية و لسه محدش يعرفها و لسه القطع منزلتش حتي

باللاضافة ان العربية لسه محدش جربها و هل هتناسبنا هنا مميزات عيوب لسه محدش يعرف حاجة

فالأفضل من وجهة نظري الشخصية

المرحلة الأولي : ان العربية في الأول تنزل في الستينات لمدة سنة - سنتين مثلا مانيوال 60 - اوتو 65 العربية تثبت نفسها قطع غيار تنتشر الناس تشوف العربية اعلانات دعاية اخر دلع

نيجي للمرحلة التانية : العربية نجحت و اثبتت عليها اقبال زي الفل نشد السعر واحدة واحدة يعني الفين زيادة الناس هتفكر طب نلحق العربية قبل ما تزيد و نخسرها و العربية ناجحة و عليها اقبال زيادة بالرغم الارتفاع الطفيف في السعر طيب يبقي لوز نوصل العربية المانيوال 65 الف و الاوتو 70 الف

المرحلة التالتة : اللي تحدد ها ايه اخبار العربية ؟؟

لسه ناجحة و عليها اقبال بالرغم الارتفاع الطفيف طيب لوز يبقي نوصل العربية واحد واحدة للفئة اللي هي مانيوال 70-75 و الاوتو 75-80

لكن لو لأ الاقبال ابتدي يقل بسبب ارتفاع السعر للمبلغ السالف ذكره طب نثبتها بقي ع السعر القديم او سعر وسط ما بين الاتنين

هي ديه وجهة نظري لنزول العربية دي السوق هنا

راى يحترم وبشدة بصراحة يا عمور

وان كنت حاسس ان العربية دى لو نزلت مصر استحالة تنزل ب60 الف او 65 الف كبداية

بس انا معاك جدا فى باقى الراى خصوصا على تفكير الناس على السيارات الهاتش باك

**mazagngi2010** · 05-09-2012 04:41 PM

بيكانتو ايه اللى تتقارن بدى
على الاقل البيكانتو 4 سلندر مش 3 ومتنسوش ان المصريين عموما بيكرهوا كلمه 3 سلندر دى كره العمى

عربيه يابانى على دماغى بس استهبال فى السعر محدش هيقربلها وعندكوا السوزوكى الالتو الشكل الجديد خير مثال
مابعتش حاجه
الميكرا دى عدلها 60 مانوال و 65 اوتو بالكتير علشان تبيع
اكتر من كده اجيب فيرنا او بيكانتو الجديده احسن على الاقل البيكانتو انضف فى الشكل

**the_air_devil** · 05-09-2012 05:39 PM

أول حاجة : لازم اعرف التكلفة الفعلية للسيارة قبل ماحط سعر من دماغي ... وهانمشي بنظام تكلفة مستهدفة , وتكون في حدود من 60 لحد 80 ... علشان تراعي اختلاف الفئات من مانيوال لأوتوماتك لنص كماليات أو جميع الكماليات وتنافس الأنواع الأخرى من نفس العينة

ثانياً: لو تجميعها في مصر هايكون فارق في التكلفة الإجمالية ومنافستها للسوق, ساعتها هاكون مع الرأي المؤيد للتجميع المحلي...أما لو هاتتجمع هنا وتكون في نفس سعر الدايهاتسو الياباني أو ماتعرفش تنافس الشيفروليه السونيك أو سبارك المتجمعة في كوريا ... أو تكون بالسعر ده ولكن بمستوى وحجم سبيرانزا الصغيرة , كل ده لا يصب في مصلحته تجميعها في مصر ... هايكون مجرد شغل لخطوط الإنتاج على حساب أنواع أخرى السوق المصري أولى بها

من ناحية العربيات الهاتشباك وثقافتها في مصر:

1- حجم الكثافة المرورية في الشوارع محتاج فعلاً عربيات صغيرة, وده بيدعم الاتجاه للهاتشباك وتصنيعها محليا

2- استهلاك البنزين الكثيف والتكلفة العالية, بتصب في زيادة الاعتماد على عربيات منخفضة الاستهلاك أو خفيفة الوزن, وده منطبق على الهاتشباك عموماً, وطبعاً لو الاستهلاك الخرافي ده بتاع ميكرا فعلاً حقيقي, هاتكون تجربة هايلة.

3- الهاتشباك شبابية جداً ومتزنة وثابتة على الطرق أكتر لأنها مالهاش شنطة تدي قوة خلفية ممكن تعوم العربية, وكما انها مناسبة لكتير من البنات والسيدات اللي دخلوا وبقوة مجال امتلاك السيارات في مصر

4- هاتشباك من غير وسائل أمان قوية = نعش طائر ... خصوصاً على الطرق السريعة داخلياً زي المحور والدائري , أو على طرق السفر ... والمفروض ده يتراعى في الميكرا وكما تعودنا من نيسان ان عربياتها آمنة بشكل كبير, خصوصاً مع حاجتها لمنافسة عربيات كتير في نفس الفئة وبالسعر ده لكن مفتقدة للوسائل الأساسية للأمان ... يشيل منها وسائد هوائية وفرامل إي بي إس ويحطلي كاست اربع سماعات وحساسات ركن ... ويقوللك جميع الكماليات !!! ...فلو تدخلت نيسان وأنقذت المستهلك من الهبل ده هاتكون لها الغلبة في السوق خلال سنتين أو تلاتة بإذن الله .

5- كما تعودنا من المصمم الياباني وانه بيخترع مساحات واسعة على الرغم من صغر الهيكل الخارجي, لو لقينا عربية بالحجم ده وقادرة على انها تشيل اربع ركاب من الطول متوسط القامة, أربع أصدقاء كالعادة زي مابنشوفهم راكبين هاتشباك ... فده هايكون سبب كبير للنجاح لأن باقي العربيات من نفس الفئة بتتميز بالمساحة الداخلية الضيقة والغبية في كثير من الأحيان ... لدرجة ان الكنبة الخلفية أحسنلها تتقلب ربع نقل لأنها لا تستخدم إلا للتخزين والكراكيب !!

وفي الأول والآخر ... دراسة تسويقية على نطاق واسع, وتكلفة تقديرية دقيقة ودراسة لحجم الإنتاج وطاقة المصنع تقدر تحدد العربية تنتج هنا ولا لأ

مع ملاحظة : ....... العربية ممكن تتجمع هنا لو تكلفتها معقولة , وتتباع لدول أخرى لو ماكانش السوق المصري متقبل قوي للنوعية دي ... يعني يتصدر للشرق الأوسط والأدنى وكل الدول اللي بيننا وبينها اتفاقيات جمركية وتبادل حر ... ساعتها تبقى قيمة اقتصادية لمصر أكتر منها مجرد عربية بتنافس كام عربية تانيين ... وده الوجه المشرق للموضوع

**Omar_4ever** · 05-09-2012 05:44 PM

ازاي يبقى الفرق بينها وبين الصني 10000 جنيه
انا شايف ان المفروض آخرها يبقى 70 الف جنيه عشان تقدر تنافس لإني بصراحة مش شايف شكلها ملفت يعني

**buddha** · 05-09-2012 05:59 PM

مع ان يتم تجميعها فى مصر

مع التحفظ على السعر(الغرض من التجميع محليا هو ان تنافس فى السوق المصرى)
فلو سعرها 60 او 65 هيكون فعلا سعر ضارب ومحل انظار الكثير

بالتوفيق ان شاء الله