الموضوع: اول مشاركة ليا فى المنتدى و حتار اشترى كورولا 2007 ولااوبترا زيرو

خليك في الكورولا شرط الحالة طبعا وعلى فكرة هو ده سعرها وموديل 2007 بالذات في ناس بتدفع فيه اكتر من كدة

يعنى من الاخر حرام تقارن الاوبترا بالكورولا لو حالة الكورولا نضيفة جدا

المشاركة الأصلية كتبت بواسطة y a r i s

ههههههههه والنبي يا دكتور سيبك من الحج محمد .... لان محمد باشا عندوا عقدة من التويوتا ميجان ميين ياباشا الي تدوس على التويوتا كورولا دي بس .... ياسيدي هات عربيتين وحده كورولا ووحدة ميجان. وخود العربيتين رحلة كده. للصين وشوف مين الي هتفيص الاول في السكة. مش هقول غير كده.

وبعدين ده حتى امبارح اتفاجئة من صور السفارة الامريكية الي ولعوا فيها في ليبيا. السفارة الامركية واخدلي بالك ياحج محمد. عربيات تويوتا كلها الي موجودة فيها. .... بلاش كده حرب الليبيين على القزافي. كانوا بيحطوا المدفع فوق عربية اسمها ايه ؟ عارف اسمها ايه ؟اسمها تويوتا ياباشا. بسم الله مشاء الله والله اكبر. حرس الحدود بتاع جزيرة العرب كلها ( السعودية عمان البحريين الكويت والامرات وحتى اليمن ) تويوتا. عربيات افريقيا كلها تويوتا الامم المتحدة حول العالم كلها un كلها تويوتا وفي شوية نيسان روح افغانستان الي هيا افغانستان هتلاقي عربيتهم كلها تويوتا روح عند بدو سينا وعربها هتلاقيهم مابيركبوش غير تويوتا علشان في النهاية تقولي الميجان تدوس على التويوتا طيب دي هتدوسها ازاي دي ياباشا عارف احمد منسق قسم تويوتا بسم الله مشاء الله عندوا حتت تويوتا واتحداك انوا هيسبقك وهو بياكول طبق رز بلبن وعليهم شوية مهلبية كمان او كرملينوا من عند المالكي وهو بيسابقك بالميجان

اما لعزيزي الدكتور صاحب الموضوع لاتقلق من التويوتا بتاتاً .... وياسيدي لو كانت نضيفة. العربية واشتريتها ب ١٠٠ ومعجبتكش. انزل بيعها في سوق الجمعه هتجبلك ١١٥ وانتا مغمض شرط ان حالتها نظيفه وده فوق انها اتوماتيك كمان

اما يا عزيزي يا حج محمد بتقول المبلغ ده وهو ال ١٠٠ الف جنيه هو الميت الف جنيه في الزمن الي احنا عايشين فيه ده يعملوا حاجة ده حتى ميفتحوش كشك سجاير على ناصية الشارع كان زمان يقولك يااااه ١٠٠ الف جنييييييييه وتحس انوا مبلغ ضخم بل تكاد تكون ثروة النهردة علشان تركب عربية وتقول انا راكب عربية اقل حاجة ١٢٠ الف جنية .

ده الهونداي الاكسينت. فاكرها الي كانت بتتباع ب ٣٣ الف وكانوا بيدللوا عليها النهردة بتتباع ب ١٠٣ الف جنيه وبالحجز كمان هههههههه فالزمن اتغير ياباشا وهقولك كمان حاجة. فاكر الميجان كانت بتتباع بكام زيرووو وفاكر الكورولة سنة ٢٠٠٦ بتتباع بكام. شوف بقة النهردة واحنا داخلين على سنة ٢٠١٣. وحسني اتشال والدنيا اتغيرت والقزافي اتقتل وزين العابدين طار وبشار اهو على وشك .... شوف الدنيا كلها اتغيرت بس بسم الله مشاء الله سعر التويوتا ماتغيرش خالص في حين ان سعر الميجان وقع وبقة تتباع في سوق الجمعه على ٦٥ وياريت حد عاوز يشتريها كمان او ياريت تلاقيلها زبون حتى.... مع احترامي. للميجان طبعاً ولمعالييك يامحمد باشا ....

تويوتا هي صانع السيارات رقم واحد في العالم برغم غلاء سعرها .... لكن يارب يحفظلنا تويوتا ويباركلنا فيها ويكتر منها كمان وكمان ويبعد عنها كل الازمات الاقتصادية قارد يا كريم .... وتحياتي

ولاتقلق يادكتور من مصاريف السرفيس بتاعها في متناول الايد وحجات بسيطة كلها .... واوصيك ونفسي بالياباني فالياباني ملهوش تاني والسلام عليكم ورحمت الله اقول قولي هذا واستغفر الله العلي العظيم لي ولكم .... اللهم قد بلغت اللهم فاشهد . :)

ههههههههههههههههههههههههه هههههههه انت مسخرة بجد بس هى فعلا زى خطبة الجمعة ...... شوف بقى المفاجات اللى عرفتها النهارده
1. الاوبترا اتوماتيك زيرو بقت ب 107 الف اصلهم بطلوا يجيبوها علشان يمشوا حال السونيك و المعرض قالى ان فاضل 6 عربيات بس اللى فاضلين يعنى كمان ممكن اتدبس فى لون مش عاوزه
2. الكورولا طلعت سوده مش شامبين و ده على فكرة مش توهان منى لا اصل انا اصلا مش بشوفها طالما هى فى الجراج بالاسبوع و الاتنين دى اخر مرة طلعت كانت فى العيد لنا كاوتش بتاعها دخل فيه مسمار و اتغير الكاوتش بسببه و ميزة انها فى الجراج لا حد خابطها و هو بيركن و لا طفل لذيذ من اطفالنا خدها خرابيش بالمفتاح رايح جاى و كتب بحبك يا سعاد هههههههههه
"اللون الاسود بتاعها تحفة " و على فكرة انا قولتله طيب ما البطاريه كده تبوظ قالى انا لسه مغيرها من 6 شهور و مغير معاها الفلاتر كلها و حاطط زيت ال 10000 و هيا 40000 و مغير زيت الفتيس الاوتوماتيك كمان
3. العربيه حتنقل ملكيه شهر 10 اصله كان شاريها و فاضل فيها 10 شهور " يعنى الف و نص او الفين مصاريف مطلوبين كمان "
4. العربيه فول ابشن من غير فتحة السقف و جنوطها حكايه

انا حاسس ان خير ان شاء الله بس خايف لو ركبتهاو انا فى السواقه ميح كده حجيبها خردة فى شهرين انا بفكر اجيب سواق يركب جنبى لمدة شهر او اتنين و اديله 800 او 900 جنيه يعلمنى اعمل ايه