اول يوم منذ 3733 يوم بدون تدخين

**m_adeleid** · 11-10-2012 06:52 AM

المشاركة الأصلية كتبت بواسطة amr.elsayed

انا بطلتها فى رمضان الماضى الحمد لله .. كانت حاجة اساسية عندى انى نويت اشغل نفسى بالعبادة فى رمضان
واحاول اجتهد فيه اكتر من السنين السابقة

1- قبل رمضان بيوم اشتريت علبة كليوباترا علشان بكرها عمى .. العلبة دى فضلت معايا اول 3 ايام
وكنت قرفان منها ومش متعود عليها فكنت بنفوخ كدة وبرميها من نصها

2- بعد كدة ما اشترتش سجاير خالص وانشغلت بالعبادة فى رمضان وبقيت كل يومين اشرب سيجارة
بس بقيت بتضايق لما اشرب سيجارة علشان كنت بحس انها بتضيع كل اللى بعمله

3 - وبعد حوالى 15 16 رمضان كدة منعت السجاير تماما وانشغلت بالعبادة اكتر بالذات لما دخلنا فى العشر الاواخر

4- حسيت بتاثير شوية بعد رمضان مع الفطار وكثرة الناس من حوليك اللى بتشرب سجاير طول الوقت بالاضافة لوسوسة الشيطان

بس الحمد لله مسكت نفسى وفترة كدة وبقيت كويس وبقى عندى قدرة لمقاومة اى شعور احتاج فيه للسيجارة
........................
ونصيحة لاى حد بيبطل من غير ادوية انه يأهل ويجهز نفسه لما هو مقبل عليه خاصة للتاثير النفسى لتبطيل السجاير
لان التاثير الجسمانى قليل اوى بتختلف من شخص للتانى واكتر واحد فينا ممكن تختفى عنده الاعراض الجسمانية بعد اسبوعين بالكتير
والتاثير بيكون خفيف كمان فى الاواخر ومش شرط تظهر اعراض اصلا
........................
الاثر النفسى بقى هو اللى بيغلس عليك جدا جدا جدا .... وهو دة اللى محتاج ارادة بالذات فى جزئية التعود
وشعورك الداخلى بالحرمان من متعة معينة

1- قاوم شعور انك عايز تولع سيجارة مع القهوة او الشاى او بعد الاكل واشرب عصاير كتير كتير كتير واللمون ممتاز والموز
علشان اللمون بيهدى الاعصاب والموز بيحسن مزاجك وطبعا كل الفواكه ممتازة

2- راعى نفسك كويس جدا وانزل اشترى هدوم جديدة و برفانات و نظافة ومعطرات للعربية ومن الاخر ماتحرمش نفسك من اى حاجة
لانك حيكون عندك شعور داخلى بالحرمان الى حد ما فخليه يضيع بانك تشترى اللى نفسك فيه بحيث ما يزيدش

3- صحابك المدخنين حاول تقهمهم انك نفسك تبطل علشان يساعدوك وتطلب منهم عدم شرب سجاير معاك فى العربية

4- ممكن تحس بتقلب فى المزاج شوية حاول تقاوم وبلاش عصبية ... ههههههه ربنا يستر على سواقين التاكسى .. ممكن تطلع غلك فيهم

5- اعمل حسابك فى 3 شهور اعتبرهم فترة نقاهة وتصحيح لما اتلفه التدخين وتقويم لسلوكك وواحدة واحدة حتكون كويس وارمى ورا دهرك
اى تصرف غلط تعمله وخليك عارف انها تاثير المدعوئة وان دة تصرف عرضى حيقل و حينتهى مع الفترة الزمنية اللى انت محددها

6- واهم حاجة اعمل خيييييييييير كتييييييييييييير وادعيييييييييى ربنا كتييييييييييييييييييييييي ير ودى كفيلة انها تكون سند ليك وحتقويك

على فكرة انا كنت بشرب سجاير لاكثر من عشر سنين وكذا مرة احاول وتيجى حاجة تعكننى وارجع انيل من الاول
لكن المرة دى قفشت فى دماغى واستفدت منها جدا لانها قربتنى كتير من ربنا ودة فضل من عند ربنا بحاول بكل ما اوتى من قوة انى احافظ عليه

وعلى فكرة حتلاقى معاك فلوس كتير جدا اكتر من ثمن السجاير اللى بطلتها .. ودة بيكون فضل من عند ربنا
لانك تركت فاحشة كنت بتضيع رزقك فيها وربنا بيعوضك خير منها بكتير

وربنا يعفو عنا جميعا ويبعد عننا اى حاجة بتسبب الازى او المرض او تكون سبب فى غضب ربنا مننا

ربنا يباركلك يا عمرو بيه
متتخيلش كلامك مفيد و اثر فيا ازاي بجد
لابنا يثبتني ويثبت كل اللي بيحاول يبطل
وفعلا انت جبت المفيد في الجانب النفسي للسجاير
ويارب يعدي علي خير

**m_adeleid** · 11-10-2012 06:57 AM

المشاركة الأصلية كتبت بواسطة ahmed_adham

ربنا يوفقك ويعدي الايام دي معاك على خير.

متشكر جدا يا فندم ربنا يكرمك

**m_adeleid** · 11-10-2012 06:58 AM

المشاركة الأصلية كتبت بواسطة mido777

نفسى ابطل فعلا ...
بس الموضوع عندى مختلف شوية
انا بشرب شيشه ( معـــــســـــل )

ومبيعديش يوم غير لما اشرب شيشه
فى اليوم من 4-8 حجر

والغريب انى لما بسافر بره مصر وبقعد من 7-10 ايام طبعا من غيرها ومش بتفرق معايا
بس اول لما ارجع بعوض اللى فاتنى :(

فعلا الشيشه خطر جدا ويا رب تبطلها بسرعه خصوصا ان عندك الاستعداد و بتعرف تقعد من غيرها شويه
ربنا يكرمك وتبطل

**m_adeleid** · 11-10-2012 07:00 AM

المشاركة الأصلية كتبت بواسطة ibn_seena

خد بالك الشيشه اخطر من السجاير بكتييير. وفيها كمان احتمال نقل امراض كتير حتي مع اللي الطبي ومن ضمن الامراض دي الدرن.
وعلي فكرة الدرن موجود ومتفشي في مجتمعنا وما اختفاش زي ما الناس فاهمه. حضرتك انزل مستشفى الصدر وانت تعرف. ..
وبالنسبه للباشا صاحب الموضوع فانا احييك علي شجاعتك. ...والخطوة دي مش سهله. اوعي ابدا تتنازل عن هدفك مهما كان. ...
ولمعلوماتك. التدخين هو السبب الرئيسي لامراض كتيرة في الصدر. اخطرها. سرطان الرئة . .. و مخاطر ممكن توصل لدرجة استئصال رئه كامله. .....

استمر. وربنا هيعينك. بس انت استعن به ولا تعجز.
كفايه انك لو يوم مسكت سيجارة في ايد ابنك. مش هيكونلك عين تضربه. لانك قدوته. فكن نعم القدوة

متشكر جدا يا فندم كلامك شجعني جدا
وبأذن الله مش حتنازل عن هدفي ابدا
وفعلا لازم نبدأبنفسنا و نكون نعم القدوه

**m_adeleid** · 11-10-2012 07:02 AM

المشاركة الأصلية كتبت بواسطة qmax

ربنا معاك خطوه ممتازه اتمنالك النجاح

انا لا شاي ولا سجاير الحمدلله ولا كنت مُدخن ونفسي كل الناس تبعد عن التدخين

انت كده شجعتني اني اشتري الدوا ده لصديق وهااغصب عليه ياخد منه هههههههه

متشكر يا فندم
بالنسبه للدوا هوا فعلا فعال و كويس جدا
وامريكا اعتبرته انجح دوا لعلاج التدخين
بس عيبه انه غالي ولازم تاخد الكورس كله او اغلبه

**m_adeleid** · 11-10-2012 07:03 AM

المشاركة الأصلية كتبت بواسطة rompo10

ربنا يكرمنا ونبطلها كلنا نفسي بجد

ربنا يكرمك و تبطلها يا رب
حاول تشوف الدوا ده حيساعدك كتير

**m_adeleid** · 11-10-2012 07:18 AM

المشاركة الأصلية كتبت بواسطة bido600

احب اطمنك واقولك ان شاء الله هيجيب نتيجة حلوة قوي معاك
قول يا رب وعلي فكرة الدنيا بتبقي طبيعية بس انت اللي بيتهيقلك كدة عشان الشيطان يقولك ارجع تاني

انا الحمدلله اخدت الدوا و عزمت النية
والحمدلله بقالي 6 شهور مدخنتش ولا فكرت ارجع غير مرة ولا اتنين لاكن مرجعتش فكرت بس اشوف شكلي بيها لاكن مولعتش حاجة
واحب اقولك صدقني صدقني المدخن فاقد حجات كتيرة قوي
الحمدلله حياتي اتقلبت 360 درجة من ساعت مبطلت

ودا لينك لموضوع كنت عاملة وانا باخد الدوا
http://www.nilemotors.net/nile/287712-a.html

وربنا يقويك ويبعدك عنها ويبعد كل مدخن عنها
العزيمة العزيمة العزيمة وربنا يقويك

انت مش متخيل موضوعك ده فادني قد ايه
وراني ايجابيات كتير للتبطيل و تشجيع غير عادي
ربنا يكرمك ويكرم كل واحد بيشرب و يبطل
و يكرمني يارب و يسهل الموضوع عليا
انا اخترت اليوم الحادي عشر في كورس الدوا يكون يوم التبطيل و بقالي كده يومين الحمد لله
بس ناوي اشتري علبه كمان وممكن اتنين علشان ابعد خالص عن اي نيه للرجوع
وربنا المستعان

**أبو_يوسف** · 11-10-2012 03:01 PM

جاء شخص إلى الشيخ خالد الجبير فسأله :

يا دكتور قد اقلعت عن كل شيء يغضب ربي .. إلا التدخين

فقال له الشيخ : هل تريد أن تتوب عنه ؟
...
... ... قال والله يا دكتور حاولت بكل الطرق فلا أستطيع

فقال له :

بعد كل سيجارة تدخنها .. قم وتوضأ حتى لو كنت على وضوئك ثم صل ركعتين لله .

........

وجاء إليه هذا الشخص بعد فترة وهو يضحك

فقال له الدكتور : ما يضحكك يا أخي ؟

فقال له الشخص :

رغم أنني كنت أدخن 30 سيجارة يوميا إلا أنه في اليوم الأول مع كل سيجارة أريد إشعالها كان الشيطان يوسوس لي قائلا :

مش لازم يا أخي .. لسة هاتقوم وتتوضأ وتصلي كمان ؟؟ .. لالالا

فدخنت 5 سجائر بدلا من 30

وفي اليوم الثاني 3 سجائر

واكتمل الأسبوع وانا قد أقلعت عنها نهائيا :)

فقال له الشيخ : والله لم اكن اتخيل أنها قد تنفع مع التدخين .

إذن .. مع كل سيجارة ركعتان :)

**m_adeleid** · 11-10-2012 06:08 PM

المشاركة الأصلية كتبت بواسطة timtim

جاء شخص إلى الشيخ خالد الجبير فسأله :

يا دكتور قد اقلعت عن كل شيء يغضب ربي .. إلا التدخين

فقال له الشيخ : هل تريد أن تتوب عنه ؟
...
... ... قال والله يا دكتور حاولت بكل الطرق فلا أستطيع

فقال له :

بعد كل سيجارة تدخنها .. قم وتوضأ حتى لو كنت على وضوئك ثم صل ركعتين لله .

........

وجاء إليه هذا الشخص بعد فترة وهو يضحك

فقال له الدكتور : ما يضحكك يا أخي ؟

فقال له الشخص :

رغم أنني كنت أدخن 30 سيجارة يوميا إلا أنه في اليوم الأول مع كل سيجارة أريد إشعالها كان الشيطان يوسوس لي قائلا :

مش لازم يا أخي .. لسة هاتقوم وتتوضأ وتصلي كمان ؟؟ .. لالالا

فدخنت 5 سجائر بدلا من 30

وفي اليوم الثاني 3 سجائر

واكتمل الأسبوع وانا قد أقلعت عنها نهائيا :)

فقال له الشيخ : والله لم اكن اتخيل أنها قد تنفع مع التدخين .

إذن .. مع كل سيجارة ركعتان :)

والله فكره

**adel1414** · 11-10-2012 11:20 PM

الحمد لله رب العالمين 3 شهور مبطل سجاير وربنا يثبتك ويثبتنا لان اللى حيعود عليك اهم واكبر بكتير من التدخين..انا العامل المساعد كان لبان النيكوتين واسمه نيكوريت دة تركيزه 2 مل و4 مل طبعا 2 مل للى اقل من 25 سيجارة فى اليوم ودة اللى كنت باخدة ولسه مستمر عليه عند الحاجة اول ايام التبطيل كنت باخد فاليوم 4 ولحد اسبوعين بقيت باخد 2 فاليوم ووصلت لعند الحاجة فقط او لو موقف خلاص الرغبة الملحة اشتغلت وحتنتكس :) بس المهم انك متاكلش او تشرب حاجة قبل اللبانة بربع ساعة ولا بعدها بربع ساعة وتبدا باكلها واول ماتحس بلسعة كدة منها حطها بين الخد واللثة لمدة دقيقة وعيد اكلها تانى دة للوصول لاقصى استفادة من اللبانة واكلها يستمر من 20-30 دقيقة على الاكثر بجد فرقت معايا جدا جدا جدا ودى تجربتى الخاصة والجميل ان اللبان دة بطعم الفواكة او النعناع او كلاسيك ملوش طعم ولا فيه سكر ودة اكتر واحد كنت بحبه وكمان ممكن تشتريه بالشريط 15 لبانة ب27 جنيه من اى صيدلية كبيرة..نصيحتى التانية ومهمة جدا اشرب شاى اخضر بالنعناع رووووعة وحيكرهك فى السجاير وفى الشاى العادى بس خد بالك مش الفتلة الشاى الاخضر الصينى وطريقته تعاير مثلا 5 كوبيات ماية وبعد مايغلى خالص حط 5 معاق شاى ممسوحة مع نعناع واطفى عليه فورا وسيبه ربع او تلت ساعة يخرط وبعدين صب واشرب وحط سكر لو عاوز...واكثر من السوائل العطور الاستحمام بماء بارد ...وربنا حيوفقك ان شاء الله وتقلع عن عبودية الشئ المقزز الى اسمه تدخين