الموضوع: اول يوم منذ 3733 يوم بدون تدخين

المشاركة الأصلية كتبت بواسطة adel1414

الحمد لله رب العالمين 3 شهور مبطل سجاير وربنا يثبتك ويثبتنا لان اللى حيعود عليك اهم واكبر بكتير من التدخين..انا العامل المساعد كان لبان النيكوتين واسمه نيكوريت دة تركيزه 2 مل و4 مل طبعا 2 مل للى اقل من 25 سيجارة فى اليوم ودة اللى كنت باخدة ولسه مستمر عليه عند الحاجة اول ايام التبطيل كنت باخد فاليوم 4 ولحد اسبوعين بقيت باخد 2 فاليوم ووصلت لعند الحاجة فقط او لو موقف خلاص الرغبة الملحة اشتغلت وحتنتكس :) بس المهم انك متاكلش او تشرب حاجة قبل اللبانة بربع ساعة ولا بعدها بربع ساعة وتبدا باكلها واول ماتحس بلسعة كدة منها حطها بين الخد واللثة لمدة دقيقة وعيد اكلها تانى دة للوصول لاقصى استفادة من اللبانة واكلها يستمر من 20-30 دقيقة على الاكثر بجد فرقت معايا جدا جدا جدا ودى تجربتى الخاصة والجميل ان اللبان دة بطعم الفواكة او النعناع او كلاسيك ملوش طعم ولا فيه سكر ودة اكتر واحد كنت بحبه وكمان ممكن تشتريه بالشريط 15 لبانة ب27 جنيه من اى صيدلية كبيرة..نصيحتى التانية ومهمة جدا اشرب شاى اخضر بالنعناع رووووعة وحيكرهك فى السجاير وفى الشاى العادى بس خد بالك مش الفتلة الشاى الاخضر الصينى وطريقته تعاير مثلا 5 كوبيات ماية وبعد مايغلى خالص حط 5 معاق شاى ممسوحة مع نعناع واطفى عليه فورا وسيبه ربع او تلت ساعة يخرط وبعدين صب واشرب وحط سكر لو عاوز...واكثر من السوائل العطور الاستحمام بماء بارد ...وربنا حيوفقك ان شاء الله وتقلع عن عبودية الشئ المقزز الى اسمه تدخين

متشكر جدا يا فندم علي نقل تجربتك لينا علشان نستفيد بيها جميعا
و الهدف ان كلنا نشجع بعض و نبطل
و حلو برضو موضوع اللبان ده و حبقي اجربه لو زنقت قوي

رابع يوم الحمد لله بدون تدخين
اضحكوا بقي
كل شويه احس ان انا صايم علشان مش بشرب سجاير و افرح جدا لما اكتشف ان ينفع اكل و اشرب عادي ههههههه
النهارده حاسس انه اصعب من الايام اللي فاتت مع ان اول يوم فضلت صاحي ال 24 ساعه كامله
بس النهارده حاسس اني تعبان فعلا
ربنا يقويني ويثبتني
حاجه نيله ان الواحد يحس ان في حاجه ماسكه فيه كده و متحكمه فيه
تحسسك كده انك ضعيف بس انا ان شاء الله حهزم الاحساس ده
ويا رب كل اللي عاوز يبطل يعرف و يهزم السيجاره