سلام عليكم يا جماعة
انا يمكن دى اول مشاركة فى نقاش فعال زى ده
حابب اقول رأى وان شاء الله مش حيضايق حد
انا احب اقول اولا ان والدتى تملك فيرنا 2010 وانا اوقات بسوقها
انا كشخص اعتبر السيارة كفئة سعرية فى مصر جيدة (ووالله مش دفاع) وخامات على قد حالها وده عادى
ويجماعة بالعقل كده ازاى بمبلغ 120000 مثلا حتجيب سيارة متكاملة من كله وزيرو ؟
وقلت لوالدتى كده دى عربية مدينة مشى عادى وتمام مش حتشتكى لكن كسفر اقلق ليه بقى !!!
لانه انا سوقتها وبعد سرعة معينة اللى هيه نفس السرعة القانونية بتلاقى العربية خفيفة وده طبيعى جدا فبتحتاج تحكم اكتر (والحمد لله والدتى مش بتحب السرعة اطلاقا ولا السفر بعربيات)
وعلشان ببساطة شديدة جدا يا جماعة ان اى عربية على سرعات عالية جدا خلاص ميعتبرش عوامل الامان كلها فعالة زى ما على سرعة متوسطة
وانا شفت حوادث فيديو وصور لعربيات من ماركات عالمية وكلها سوبر كار (لا داعى للماركات ) والحادث بيبقى بشع جدا والله
ثانيا موضوع السرعة ده قصة تانى والشد وكده
مع احترامى التام لكل الناس اللى بتعشق الكلام ده
لما يبقى ياجماعة مثلا السرعة المحددة مثلا 120 هل يعقل انى امشى 200؟
على افتراض انى مستعجل - هل تعتقد انك كده وفرت وقت , مانتا ممكن تتعطل فى حاجة تانى؟
طب افتراض اخر وهوه ده الاغلب انت بتحب السرعة - اللى انا اعرفه ان فى مناطق مخصصة فى القاهرة او اسكندرية لمنافسات وبطولات بين السيارات فليه متعملش الكلام ده هناك؟
اللى انا عايز اقوله ان الاستعراضات والسباقات ليها اماكنها الخاصة وده مش غلط فى الاماكن دى وتقدر تثبت نفسك هناك وان الاماكن دى مجهزة لكده ومؤمنة
اخر حاجة احب اقولها على فكرة انا شاب برده واول ما بفكر اسرع بتراجع عن كده لانه ابسط ما فيها ان الشارع مش مكان للاستعراض والسرعات المبالغ فيها
وانا لو مسافر انا متأكد انى حسوق على امكانيات الطريق - والسرعة بدل ما امشى على 200 مالها 100 او 120 وحشة؟
ارجو انى مكنش ضايقت حد واسف على الاطالة
وكل سنة وانتم طيبين
المفضلات