عايز اجيب موتور مياه ..لعمارة او لشقة !!!!!

**R A N A** · 14-07-2008 12:14 PM

طب ياجماعة لو مش هايتركب لشقة لا هايركب لبيت مكون من 3 ادوار يبقي مواصفاته ايه وبكام والعملية كلها ممكن تتكلف كام؟

وهل هايركب علي المياه العادية بتاعة الحكومة ولا مياه تانية (اصلي سمعت انه بيركب على مياه تانية مش عارفة جوفية باين)

اصل المياه عندنا بتقطع تماما في كل الادوار وبعدين تبتدي تيجي في الدور الارضي من الساعة 5 عصرا لحد تاني يوم الصبح وبعدين تطلع في الدور التاني من الساعة 2 باليل لحد تاني يوم الساعة 8 او 9 الصبح بالكتير اما الدور التالت بقي ممكن تيجي بعد الفجر وتقعدلها كده ساعتين تلاتة عذاااااااااااب والله
وللأسف كل الجيران عندنا مركبين مواتير عشان كده بيسحبوا المياه الشارع كله ومن عندنا ونبقي احنا الضحايا
بس لما والدي سأل قالوله الموضوع هايدخله في 3 الاف جنيه ويمكن اكتر ( الكلام ده صحيح)
ياريت حد يفيدني

**Islam_galal** · 14-07-2008 12:33 PM

أنا جربت موتور ايطالي بيدروللو بقالو سنتين و نصف
ممتاز
انا جبته موتور سحب راكب في البلكونة (الدور الثامن) و اهم مميزاته ان قدرته علي السحب عالية (9متر) بالاضافه انه كان ارخص من كالبيدا كتير

**om mohammed** · 14-07-2008 04:37 PM

فعلا الموضوع ممكن يتكلف 3000 جنية او اكتر بس ما دام للبيت كلة يبقى اكيد فى مشاركة

**original** · 14-07-2008 07:54 PM

كالبيدا عشان جربت كل الأنواع مفيش موتور قدر يعمل اللى كالبيدا بيعمله

**R A N A** · 16-07-2008 04:02 PM

المشاركة الأصلية كتبت بواسطة veva

فعلا الموضوع ممكن يتكلف 3000 جنية او اكتر بس ما دام للبيت كلة يبقى اكيد فى مشاركة

ماهو للأسف البيت كله ملكنا يعني معندناش سكان يشاركوا

يعني بابا هو اللي هايلبس المبلغ لوحده

بس احنا نعتبر في اول الشارع يعني بيتهيألي دي ميزة انها تخلي الموتور يسحب اكتر بس لو حد خاض التجربة يقولي تفاصيلها كام بالضبط ومنين وكده

**onsi** · 01-05-2010 12:29 AM

المشاركة الأصلية كتبت بواسطة islam_galal

أنا جربت موتور ايطالي بيدروللو بقالو سنتين و نصف
ممتاز
انا جبته موتور سحب راكب في البلكونة (الدور الثامن) و اهم مميزاته ان قدرته علي السحب عالية (9متر) بالاضافه انه كان ارخص من كالبيدا كتير

يا راجل يا طيب يمكن تكون المية فعلا عندك كويسة بعد تركيب المتور ...لاكن اكيد حسبتك غلط
لان الدور الثامن اللى انتا مركب المتور فية يعنى 24 متر وقدرة المتور على السحب 9 متر حسب قولك؟؟؟ فكيف عالية وفى فرق 15 متر على الاقل

**samcar** · 01-05-2010 03:32 AM

3000 جنيه دى واسعه شويه
جنابك انزل شارع الجمهوريه او السبتيه - اشترى موتور ساير اسبانى لو لقيته او فيم ايطالى او كلبيدا
المهم ابعد عن الصينى رغم فرق السعر الكبير - لان المواتير الصينى تعبانه جدا جدا - ورغم رخصها لكن حتبوظ وتدخلك فى قرف التصليح وترجع خاضع للسباك

انت على 3 شقق يلزمك موتو 2 حصان - مش اكتر علشان ما تحملش على العداد
هات اتوماتك- اتاكد انه ايطالى اصلى - ما تجبش بالونه- حترميها بعد سنه لان الكاوتش بيضرب والميه بتدخل جواها وبتخلى طعم وريحه الميه تقرف

هات سكس بلف - حتى لو البيه السباك قال لك مالوش لزمه يا بيه - والكلام ده
الاهم بقى - ضحى شويه وخلى اللى حيبيع لك الموتور يدلك على فنى كويس- صحيح اى سباك مبتدئ ممكن يركب موتور بس قلة الخبره حتدفع تمنها بعدين لو الموتور اتحرق لاقدر الله مثلا

الموتور والحاجات دى ممكن تدخل فى 1700 1800 لو كتير ممكن تجيب حصان ونص او تجيب موتورين 3/4 حصان وتركبهم على ماسوره واحده - بس دى عمليه مزعجه فى التركيب والصيانه

اهم حاجه تتاكد ان الخط اللى بتسحب منه ما بيفضاش- المقصود ان الميه لما بتقطع - بيبقى ضعف ضغط مش الخط فاضى - لان لو حصل ده الموتور حيسحب هوا وممكن يتحرق

اهم حاجه لازم يعملها معاك فنى التركيب انه يضبط لك ضغط الدخول والخروج - يعنى امتى الموتور يبدا الشغل ويرفع اد ايه ويفصل امتى
ولو جايبه لل 3 شقق يبقى لازم يجرب والتلاته شغالين مع بعض- ميجربش لك شقه شقه

برضه المهم بعد التركيب تتاكد ان وصلات الصحى كلها عندك سليمه وما بتسربش خصوصا وصلات السيفون- لان التسريب ده بيطول فترة تشغيل الموتور ويقصر عمره
لو عرفتم تتفقوا مع بعض كسكان هاتور موتور واحد واتشاركوا فيه - وممكن يبقى لكل واحد مفتاح تشغيل عنده - بكده استهلاك الكهربا حيتوزع على الكل حسب استخدام كل واحد
حاجه تانيه قبل ما تجيب الموتور- راجع المواسير اللى عندك واتاكد من نضافتها - ولو هى نص بوصه غير ل 3/ 4 بوصه او حتى بوصه- ممكن ده يوفر عليك شرا الموتور- اوتجيب موتور صغير للطوارئ فقط

**omaroof** · 01-05-2010 01:41 PM

المشاركة الأصلية كتبت بواسطة hamedo0

عاوز تجيب موتور انزل شارع الجمهوريه احسن حاجه الايطالي لاكن السعر بصراحه معرفش ويمكن حد من الاعضاء يفيدك اكتر والله يكون في عونك

المشاركة الأصلية كتبت بواسطة mmamdouh

اسمع ان ماركة كالبيدا الايطالية احسن شركة فى المجال دة

mmamdouh

المشاركة الأصلية كتبت بواسطة aif

كالبيدا ايطالي من شارع الجمهورية
انزل اسأل عند اكتر من محل وفاصل ولازم تجيب سباك تاني يركبهولك يكون ثقة ومتجرب قبل كدة .... واحسن هات موتور قوي شوية عشان يقدر يسحب في ظل وجود اكتر من موتور ..... وممكن لو الشقة اللي جنبك متفاهمين معاك يبقى الموتور علي الشقتين .... وبكدة يبقى التكلفة ح تنخفض كتير

المشاركة الأصلية كتبت بواسطة ahmed samy

كالبيدا

بس حاسب المية تعورك :)

فعلا كالبيدا ممتاز انا مركب واحد 1.5 حصان ممتاز

**MMamdouh** · 02-05-2010 01:25 PM

انا ركبت موتور فى شهر 7 اللى فات

نزلت شارع الجمهورية سالت على الكالبيدا 1 حصان كان معدى الف جنية و لقيت ماركة اسمها مترا ايطالى ب 875 و اشتريتة لانى استغليت الكالبيدا... جبت الموتور بالبالونة و العداد و الاوتوماتيك و ضمان سنة

عملت وصلة مية بعداد من مرفق المياه عشان محدش يفتح بقة من سكان العمارة و يقول انى بسحب مية على قفاهم... و كمان اسمع انه مش قانونى انك تركب موتور خصوصى على خط المية العمومى بتاع العمارة (مش فاكر التكلفة كام)

جبت سباك عمل خطوط مية من العداد للموتور ثم من الموتور الى شقتى (الدور الخامس)و التكلفة كانت حوالى 450 جنية و جبت كهربائى عمل وصلة كهربا من الشقة للموتور ب 150 جنية

MMamdouh