الموضوع: عايز اجيب موتور مياه ..لعمارة او لشقة !!!!!

المشاركة الأصلية كتبت بواسطة hemeds82

مهندس عصام ازي حضرتك انا الحمد لله اشتريت كالبيدا 0.75 حصان بمستلزماتة بس كل اللي تحتي واللي فوقي جابو كالبيدا 1 حصان :_alshmokh08[1]:هل دة ياثر علي المياة اللي بتيجي ليا ولا مالهوش دعوة سؤال تاني بعد اذنك هل المفتاح بتاع الكهرباء اسيبة شغااال علي طول ولا المفروض لما ضغط المياة كويس اقفلة وان شاء الله انا هسافر اسبوعين بعد العيد المفروض اعمل اية علشان اتجنب ان المروحة تقف والموتور مايشتغلش (بيقولو الموتور يقفش ) واسف علي الاطالة

مبروك عليك الموتور
مش هيتأثر لانك بتغذى شقة واحدة
لو انت اشتريت مجموعة مشتملات(بالونة واتوماتيك وعداد ووصلة نحاس ) يبقى هتشغل مفتاح الكهرباء مرة واحدة وتسيبه شغال والبالونة هى اللى هتقوم بموضوع فصل ووصل الموتور اتوماتيك
انما لما المياة تكون قاطعة فى المنطقة ومفيش مياة واصل ليك تفصل مفتاح الكهرباء فورا علشان الموتور ميتحرقش وهو شغال على الفاضى بدون مياة .
وانت مسافر افصل مفتاح الكهرباء بس علشان لو المية قطعت وانت مسافر الموتور ميشتغلش بدون مياة ويتحرق.

وكل سنة وانت طيب
وترجع بالسلامة

المشاركة الأصلية كتبت بواسطة fire333works

معلش أسف على التداخل مع صاحب الموضوع بس أستأذن المهندس عصام فى سؤال ...أنا كنت إستريت الكالبيدا ال 2 حصان لعمارة 12 دور _24 شقة ..بعد تركيب الموتور أدائه كويس جدا ((علما بإنى ركبتله 3 بالونات بناءا على نصيحة السباك)) لاحظت إنه بيفصل بعد فترة كبيرة نسبيا (أوقات يشتغل بال20 دقيقة متواصلة على ما يفصل) فهل ده عادى ؟؟ سؤال تانى عندنا المنطقة بيقطع فيها الميه كتير فهل فيه حل أخر غير إن أفصل كهربا الموتور((وقت إنقطاع الميه)) عشان البواب ساعات بيبقى ضارب حاجة تقريبا ومش بياخد باله ..أو مثلا علامة سهلة جدا أفهم بيها البواب عشان برده ساعات مش باخد فى بالنا أصلا إن الميه قاطعه وهو شغال على الفاضى

الأخ الفاضل :
الموتور 2 حصان دى قليل على 24 شقة وبالتالى فان البالونات بتاخد وقت كتير علشان تتملى ودى بيخلى الموتور يشتغل كتير لان البالونات مش بتلحق تملى مع الاستهلاك الموجود .
المفروض ان 24 شقة تاخد مية 160 لتر/دقيقة عند 50 متر رفع بمعدل ان كل شقة تاخد متوسط 7 لتر/دقيقة بضغط واحد بار على الاقل ودا لانى بافترض ان كل الشقق فاتحة المية فى وقت واحد ودا وارد ، طيب الحل ايه
اجيب اتوماتيك ضغط عالى من 4-8 بار وازود بالونة كمان واضبط الاتوماتيك على الفتح على 4 بار والفصل على 6 بار بحيث اننى اقلل الفترة اللى بين الفصل والوصل
لان الاتوماتيك اللى عند حضرتك ممكن يكون 2-4 بار اللى هو العادى ودى قليل على عدد الشقق 24

تقبل تحياتى
وكل عام وانتم بخير