الموضوع: دخلت الطب وانا كارهه الكلية وتخرجت والان ابحث عن وظيفة خارج نطاق الطب فمن يساعدنى

المشاركة الأصلية كتبت بواسطة m707707

عارف طبعا شكل مستشفيات العسكرية اية وبجد هتتعب جامد لما تتنقل من الجنة اللى عندك الى مستشفيات الحكومة وعلى فكرة وصفك انها مستنقع زبالة فية مجاملة كبيرة جدا وخد عندك

اول ما هتدخل المستشفى هتلاقى موظفة دبلوم صنايع قاعدة على الدفتر الحضور والانصراف بتشطب على الدكاترة ولازم تدى اليها فروض الطاعة ...بعض المستشفيات الامضاء فيها فى ايد وكيل المستشفى بس فى الغالب موظفين والافضل ليك انك كمان تتعامل مع الموظفة لان وكيل الميستشفى هيبصلك بصة لو بتيجى متاخر على النباطشية وهيديك كلمتين ادام الناس ممكن يحرجك اكتر من الموظفة

هتدخل القسم وتاخد نباطشيات فى اى قسم هتختارة هتلاقى رئيس القسم فيها بيتحكم فيك كانك عامل يومية وهيسلخك نباطشيات سهر ليلك زى نهارك فى الاعياد وغير الاعياد

لو عايز تدخل حجرة العمليات لازم توزع سجاير سبارس على كل العمال اللى بينضفوا حجرة العمليات وتكسب ود التمريض بعزومات عشان تمشى حالك معاهم ويسبوك تتعلم براحتك وتاخدخيوط جراحية كتير لانك فى الاول بطبع هتستهلك خيوط كتير وانت بتتعلم فلازم تشيل الناس على كفوف الراحة

فى نباطشيات القسم اياك تطلب من ممرضة اللى سهرانة معاك تركب محاليل مجرد حقن مسكنات وفلسع العيان لان الممرضة شغالة فى 3 اماكن وجاية مسشتفى الحكومة مش شايفة حتى الحيطة او حتى سرير المريض من التعب فلو طبت تركب محاليل هتاخد كلام من ادامك ومن وراك هيسم بدنك

هات جوانتيات جلد نضيفة للاستعمال الشخصى لك لان جوانتيات الحكومة كلها دم ملوث وكمان تسبب هرش وحك رهيب وحساسية مع طول الاستعمال

التمريض القليل الادب تحاشا العمل معة فى اضيق الحدود جدا خصوصا الستات الكبار واعرف ان لو ممرضة قلعت الشبشب وضربتة على راسك هتاخد 3 ايام جزاء فقط يعنى خصم 20 جنية من مربتها اللى اصلا معدوم فانت من الاول اعمل حاجز بينهم وبينك

ما تبيع النباطشية السهر الا بعد شهرين تلاتة عشان ما حد يستغلك ويرفع سعر بيع النباطشية عليك

متديش رقم تلفونك لاى مريض ابدا هيقرفك بجد

العيان اللى جاى بربطة المعلم مع اصحابة اعمل اعتبار خاص جدا واعملة احلى واجب لانك لو اخطئت معاة اى خطاء بسيط هيشوطوا فيك واصحابة هيعلوا عليكم فيلم وممكن تضرب فى الاستقبال ويبقا شكلك وحش جدا ادام الناس وما حد هتشوفة هيدافع عنك واياك تستغيث بامن المستشفى لانة هيقعد يتفرج ويضحك عليك ويمكن كمان يصورك عشان ينكتوا عليك فى السهر ويسلوا وقتهم

العيان اللى عايز يتحجز فى المستشفى عشان الاقامة و ياكل ربع الفرخة يوميا على حساب المستشفى عشان يوفر خصوصا المسنين اللى عايزين المستشفى قاعدة تسالى ولب وفول بدل القاعدة فى البيت لوحدهم يفضل انك تحجزهم بالمستشفى دون نقاش او تحاول اقناعهم احسن ما ترفض حجزهم فى العنابر وهتاخد دعوات وسب وشتم وشكاوى فيك للصبح ووجع دماغ انت فى غنى عنة

مدير الاستقبال لازم تكسبة عشان بيوزع الصناديق على كيفة الشخصى وفى ناس هتاخد ضعفك لو انت ما عملتلة فروض الطاعة وناس هتاخد خصومات


حجرة الاطباء للنوم فى المستشفى الحمار يقرف ينام فيها انصحك تجيب معاك ملاية خاصة بيك تفرشها علىالكنب احسن ليك ما تاخد مرض التنيا وفى رقبتك ورجلك او اى مرض جلدى تانى معدى وياريت ما تاكل من اكل المستشفى مباشرة خد الوجبة بتاعتك فراخ او غيرة واطبخها بنفسك افضل الف مرة لو اتفقت مع العاملة على كدة لان قسم الطبيخ فى المستشفيات كلة نمل وصراصير وفئران بايتة فية من الصبح لليل

الصيدليات اللى جنب المستفيات هتبعتلك مناديبهم عشان تكتب الدواء اللى قرب يخلص تاريخ صلاحيتة للمرضى فى الاستقبال على ادوية شركات عايزة تصرف منتجاتهك وبنسبة طبعا من كل روشتة هتطلع منك هنصحك وهقلك بلاش الشغل دة عشان الفلوس دى حرام فى حرام ومرة شفت روشتة ب 80 جنية قيمة الدوا لمريض عظام وهو اصلا مريض قلب وضغط بس الطبيب الامتياز مش كان لاقى ياكل لان مرتبة بطبع زى منتا عارف 300 جنية فاظطر انة يعمل الشغل القذر دة وانا هعيدها عليك ونصيحة كل عيش حاف احسن لك

العيان اللى فى العنابر وعيان بجد وعايز يعمل عملية كبيرة ومحجوز اسابيع ومحدش سال فية انصحة انة يروح لطبيب الاخصائى فى عيادتة والا لو قعد سنين مش هيتعملة حاجة !!

اما العيان اللى عمل عملية مثل جراحة سكر القدم فانصحة انة يترك المستشفى بعد العلمية فوران لان العنبر اللى هيتحجز فية هيلوث الجرح اكتر واكتر خصوصا ان النمل والصراصير والفئران صديقة دائمة لاقدام ويد المرضى


ولى طلب منك وانت فى الاستقبال اطمئن ان ادوات الجراحة والغرز الجراحية معقمة لان التعقيم عبارة عن شوية سيدكس وخلاص من غير فرن او غيرة ودة هيسبب بلاوى فى نقل الامراض طبعا وهتكسب وزر العيان دة لاخر نفس فى حياتة فاذا كنت ناوى على الشر اعمل اى بلوة فى المستشفى بس بلاش دى خصوصا لان مستقبل العيان فى ايدك بجد لو عملت لية غرزة جراحية والادوات غير معقمة


عارف انى سودتها فى وشك بس ربنا يعينى ويعينك اننا نلاقى اى نخرج او هروب من جحيم المستشفيات الحكومية ولو الى النار

بجد وجعتنى وجسمى اشعر
حسبى الله ونعم الوكيل فى وزاره الصحه وكل مسئول بجد حسبنا الله ونعم الوكيل