السلام عليكم ورحمة الله وبركاته

نزل اكثر من موضوع بخصوص وصول الياريس 2013 الهاتش باك لمصر

وكان فيه كلام كتير حول المواصفات والاسعار والفئات

فحبيت اني اتاكد بنفسي ,, توجهت لتويوتا البرجسي في شارع مراد

وبالفعل اول ماوصلت لقيت الياريس الجديدة موجودة في المعرض هناك فحبيت اعملكم تقرير مبسط عن العربية شامل الفئات والاسعار والالوان

العربية من الخارج والداخل شكلها رائع وجميل واحلى من الصور بكتير









خلينا ندخل في المواصفات مباشرة

------------------------------------

المحرك :

العربية نازلة بماتور 1.33 16 صمام بقوة 99 حصان عند 6000 لفة وكذلك عزم 125 نيوتن عند 4000 لفة

الجدير بالذكر ان الماتور اللى في العربية مختلف عن الماتور اللى كان بينزل في الياريس القديمة

فالماتور اللى موجود في الياريس القديمة كان بقوة 86 حصان فقط !!

------------------------------------

ناقل الحركة :

بالنسبة للمانويل فهو 6 سرعات اما الاتوماتيك CVT استيبترونيك مزود بنمط Sport للقيادة الرياضية !! وعلى حسب كلام مسؤل المعرض هناك انها 4 سرعات فقط

الى غير انها مزودة بمكانية التحكم بالنقلات من خلال عجلة القيادة



------------------------------------

السيارة من الداخل :



الخامات المستخدمة جيدة جدا

من الداخل شكلها جميل وضعية العدادات ممتازة كمان الكاسيت Touch screen بيعطي ايحاء بالفخامة

الى غير ان جميع الفئات الطارة فيها جلد ! بإستثناء اول فئة مانويل



------------------------------------

المساحة الداخلية :

للاسف السيارة من الداخل ضيقة جدا !! فانا اقدر اقول انها فعلا اضيق من الياريس القديمة بشكل ملحوظ !! خصوصا من الخلف

ويؤسفني اني اقول ان العربية لا تصلح للاستخدام العائلي !!!!!!!

------------------------------------

الفئات والكماليات :

العربية نازلة باربع فئات وباسعار مختلفة ودي حاجة كويسة عشان تغطي شريحة كبيرة من المستخدمين

اول فئة مانويل سعرها 109 الاف جنيه

(اموبليزر + طارة ملتي فنكشن للتحكم بالصوت + ABS + 2 Airbags نظام صوتي مكون من 6 سماعات وكاسيت CD touch screen + Aux + USB + مريات كهرباء + اشارات في المرايات + ريموت كنترول لاغلاق السيارة )

اول فئة اتوماتيك سعرها 117 الاف جنيه

تزيد عن الفئة السابقة ب ( فيتيس اتوماتيك CVT استيبترونيك مزود بنظام Sport للقيادة الرياضية + طارة جلد + طارة ملتي فنكشن للتحكم بالصوت والرد على المكالمات + paddle shift للتحكم بالنقلات من خلال الطارة + بلوتوث + مرايات ذاتية التعميم )

تاني فئة اتوماتيك Full Option سعرها 124 الاف جنيه :

 تزيد عن الفئة السابقة ب ( تكييف اتوماتيك Dual Zone + صندوق امتعة امامي به لمبة ومبرد + امكانية طي المقاعد الخلفية )

اعلى فئة اتوماتيك HighLine سعرها 141 الاف جنيه :

 تزيد عن الفئة السابقة ب (زجاج خلفية ملون + فوج لايت + جنوط اسبور + حساسات مطر + كاميرا خلفية + مثبت سرعة + Smart Key )

------------------------------------

التقييم ::

طبعا مش هقدر اقيم اداء العربية الا من خلال التجربة الفعلية على الطريق لكن من خلال امتلاكي للياريس القديمة لاكثر من 6 سنوات

فاللى اقدر اقوله ان الياريس الجديدة نفس وزن القديمة ومحرك بقوة 100 حصان اعتقد هيكون اداءها ممتاز + اقتصادية وتوفير في البنزين

بالنسبة للخامات فالعربية من الداخل الخامات جيدا جدا وافضل من القديمة بمراحل

وضعية العدادات ممتازة والكاسيت التاتش اسكرين مدي شكل رائع للتبلوه

بإستثناء الفئة اللى ب 142 الاف !!! فالعربية يعتبر سعرها ممتاز ومناسف خصوصا اول فئة اتوماتيك ب 116 الاف وفيها كماليات ممتازة

يعيبها فقط ضيق الصالون وان مساحتها الداخلية فعلا ضيقة !! لكن ان شاء الله تتحل مع النسخة السيدان

في اقرب وقت ان شاء الله هيكون فيه تجربة فعلية للعربية على الطريق وان شاء الله التقرير هينزل لحضراتكم بالصور والفيديو