الموضوع: غيرت كوتش السيراتو 215/45/17 كوهو اكستا ku31 ZR,XL

المشاركة الأصلية كتبت بواسطة moha4tec

هسالك و ارد عليك يا باشا
بس المقاس دا اصلا صعب بصراحه

و عرض الكوتش فرق معاك اد اه فى الملفات و السرعات يعنى .
يعنى مثلا ملف كنت بتاخده على 60 بقيت بتاخده على 90 و الا 120 مثلا .
يعنى التحسن للضعف و الا اه ؟؟؟؟

هو فعلا المقاس رخم ومش موجود منه الا الكومهو ال Solus Kh17 واكسليرا اندونيسي !! مالقتش منه اي انواع تانية بس انا لما سرشت على النت لقيت انه لسه نازل حديثا Ecsta للمقاس ده يمكن لسه ماوصلتش مصر

شوف بالنسبة للملفات هي طبعا فرقت معايا فكتيير وعملت فرق جامد جدا

كمان الفكرة مش باخد الملف على كام !! لا الفكرة في باخد الملف ازاي ؟

يعني قبل كدة الملفات كانت كلها على الواسع وعلى كذا حارة عشان العربية ماتعرضتش مني دلوقتي بدخل الملف في حارتي وكابس بنزين وعلى سرعة اعلى والعربية بتبقى Under control

بس لازم تاخد بالك ان الفرق ده لسببين مش عشان تعريض المقاس الخلفي فقط

لا لازم تحط في الاعتبار انك شلت كاوتش وحش والتماسك بتاعه B وحطيت كاوتش تاني اعرض والتماسك بتاعه AA

وبرضوا Still لسه الكاوتش الامامي B يعني اكيد لو هو كمان اتغير هيبقى فيه تحسن اكبر

الملفات الواسعة اللى بتتاخد على سرعات عالية اللى كان اخري فيها 130/140 بالعافية ومن الواسع للضيق عشان اريح العربية ولو في حارتي كان اخري فيها 130

بقيت باخدها 160 في حارتي بدون مشاكل الى غير اني بنقل حارات مع وعكس الملف زي الحلاوة

ده بالنسبة للملفات اللى واسعة شوية وبتتاخد على سرعات عالية

اما الملفات الرخمة فيه ملف لما تبقى جاي من فيصل في اتجاه الرماية وفيه اشارة في وشك وملف شمال يرجعك فيصل والهرم

الملف ده كان اخري فيه 60/70 وعلى واسع وعلى كذا حارة وببقى حاسس اني خلاص هتقلب

دخلت الملف ده من كام يوم 90 وطلعت منه 100 واخده على الضيق في الحارة الشمال ومطلعتش سنتي من حارتي وانت طبعا عارف لما تاخد ملف رخم على الضيق بتبقى صعبة على العربية

ماجربتش اخده على الواسع بس ممكن لو الواسع ادخله 100 تقريبا

بس للامانة في نص الملف الكاوتش زحف سيكا لاني داخل الملف بطريقة رخمة اوي فقمت فاتح للعربية سنة لبرا ورجعت حارتي تاني

بس اللى كانو راكبين معايا محسوش بالكلام ده محدش خد باله

اما بالنسبة للغرز فانا متذكر غرزة خدتها زمان على المحور على 140 بعرض اربع حارات

ماكنتش صعبة اوي بس عشان من اليمين لاقصى الشمال وجمبك الرصيف فكان لازم تردها في سعتها ولقيت العربية زحفت حبة وربنا سترها

امبارح على المحور واخد غرزة اصعب منها بكتير بعرض الخمس حارات على 160 والعربية كانت Under control انا حتى استغربت بعدها وللحظة كدة وانا باخد الغرزة كنت مستعد ان العربية تعملها وتعرض لكن الحمد لله مسكت نفسها تمام

الى غير اني كنت ماشي داخل على ال 190 وحاسس العربية عادي ممكن اخد بيها غرز وطبعا ده كان قبل كدة مستحيل

يعني الفرق جامد وملحوظ جدا وطبعا لما ملفات اللى كان اخرك فيها 130 تاخدها 160 ده يعتبر تحسن كبييير