الموضوع: أول سنة حياة وظيفية - سيرة ذاتية

المشاركة الأصلية كتبت بواسطة Noha-M

علا الولد اللى اسمه يوسف بات فى الحمام لحد تانى يوم؟؟؟؟؟؟

لأ طبعا يا نهى.. ده انا روحت ونسيته في الحمام وتاني يوم لما رحت المدرسة مدير الحضانة حكى اللي حصل بعد ما مشيت.. اللي هو قعدوا يدوروا عليه في كل حتة و في الآخر لقوه في الحمام.. انا بأه ساعة كل الأحداث دي كنت في بيتنا :biggrinjester:

بعد الكلام عن الأطفال و مقالبهم و طبايعهم وبعد ما شفنا سوا صورهم.. نتكلم شوية عن الزميلات.. و همه بينقسموا إلى قسمين: قدام و جداد.. القدام كانوا من أيام التعيين بالدبلومات.. انما لسه موجودين و شغالين.. و دول بيسند ليهم فصول العربي و سنهم بيبدأ من أواخر الأربعينات. اما الصغار الخريجات الحديثات أمثالي فكانوا بياخدوا فصول اللغات و طبعا كان شتان ما بين مرتبات المجموعتين و ده كان بيخلق مشاكل كلها بتيجي فوق دماغنا احنا الجيل الجديد.. ستات بأه و غيرة و الذي منه

انما الحمد لله.. كل المشاكل عدت على خير و جيت قبل ما اسيب المكان بشوية رحت لواحدة من المدرسات دول و صفيت معاها الخلاف اللي هو كان محض اختلاق مشاكل من ناحيتها و اللي هو اصلا انا ناسية سببه تماما دلوقتي

دي كانت أول وظيفة لية في حياتي و أول مرة اتعرض لنظام التوقيع و الدسائس و المؤامرات المعروف بين طبقات الموظفين و الحمد لله ما اتعاملتش مع النوعية دي في عمل آخر لي حتى الآن :)

نيجي بأه للدادات.. الدادات كان ليهم صفات شخصية مميزة جدا.. و لكل واحدة حكاية.. دادة عزة مثلا كانت ايامها عندها حوالي 34 سنة و كانت محتاجة فلوس ايامها بشدة عشان كانت بتجوز بنتها
أصلها اتجوزت عندها 16 سنة و بنتها هاتتجوز و هي عندها 18 سنة
عزة كانت طيبة و مؤدبة جدا و نسمة كده في الحضانة بصراحة.. يا ترى فين أراضيها دلوقتي؟

دادة سامية دي ابتسامة طيبة و حنية تمشي على الأرض.. كانت نفسها عزيزة و محترمة بشكل.. سنها أوائل الأربعينات و كان زوجها مريض و ملازم الفراش و الدخل الوحيد كان هو اللي بتدخله للأسرة من عملها في الحضانة.. طبعا كلنا كنا بنحرص على اننا ناخد بالنا منها اكتر واحدة.. لسه لحد دلوقتي فاكرة ابتسامتها الحيية دائما.


اما دادة سلوى فكنا مسمينا الليدي سلوى.. و أحيانا الكونتيسة سلوى.. أصلها كانت على طول قرفانة من الشغلانة و بتعمل كل حاجة تطلب منها بإباء و شمم
انما ورا كل ده مخبية قصة حزينة عن واحدة بلغت الخمسين تقريبا و لم تتزوج و قاعدة عند أخوها.. و منتهى أملها في الحياة انها تجمع مبلغ تقدر تاخد بيه أوضة و صالة تستقل فيهم و تبعد عن مضايقة زوجة اخوها ليها :(
دي كانت قصة فترة التدريس.. فاضل فيها شوية صغيرين قبل ما ننقل على المرحلة اللي بعدها.. و نعدكم بمواقف أكثر تشويقا من ذي قبل

و تمر الشهور و تصير الأمور بيس اوف كيك.. و الدنيا وردي و العيال زي السكر و بأت ميس علا عندهم دي المية و الهوا.. و لله الحمد قدرت اكسب ثقة أولياء الأمور و اتصادقت مع والدات اكتر من طفل و طفلة عندي
انما.. انما لما بصيت لبعيد شوية ما لقتش اني لية كاريير.. و لقيت ان الانجليزي بتاعي بيضيع مني و باقضيها طول اليوم Good morning Miss و I want to drink و I want to go to the toilet و هكذا.. و كل اللي طلع عيني فيه 4 سنين هايذهب أدراج الرياح.. و كان لا بد من وقفة
أول حاجة بدأت اعملها اني كنت بحاول على أد ما أقدر احافظ على مستوى اللغة عندي على ما أشوف حل و اتبعت ساعتها طريقة غريبة شوية، انما كانت مفيدة و الله. اللي كنت باعمله اني كنت باقعد قدام مسلسل الساعة 5 بتاع ال Nile TV و اسمع حوار المسلسل و أتابع ترجمة الحوار بالانجليزي المكتوبة على الشاشة.. كنت بامسك في ايدي نوت بوك و قلم و ألاحظ الكلام و التعبيرات اللي مترجمة من عربي لانجليزي و اكتب الحاجات الجديدة علية و بعد المسلسل ما يخلص افضل أراجعها.. وقتها فعلا طلعت بحصيلة كويسة للمرحلة اللي كنت فيها ساعتها.

و فضلت كده شوية لحد ما السنة قربت تخلص و امتحنوا الولاد و استلموا شهاداتهم و أخدوا الأجازة.. و بدأ التفكير فيما بعد.. يا ترى هاستمر في التدريس و لا لأ.. طيب و لو هاستمر يا ترى هافضل في كي جي و لا هاتنقل لابتدائي؟ طيب هل انا فعلا عايزة اتنقل لابتدائي؟ انا اصلا مش بارتاح في التعامل مع مدير قسم ابتدائي و المبنى بتاعهم كئيب و ضلمة.. طيب و هلاقي فين مدير متفهم و مساند اوي زي مدير الكي جي اللي انا باعمل تحت رئاسته؟.. المهم ان الأسئلة دي كلها كانت بتدور في ذهني في وقت كان لازم فيها أقرر هافضل في المدرسة و لا لأ عشان كل مدير لكل مرحلة كان لازم في الوقت ده يسلم تقريره لأصحاب المدرسة عن المدرسات الجداد و مين فيهم بيرشحهم للاستمرار في المدرسة بحيث ان المدرسة تعمل حسابهم في المرتبات أثناء شهور الصيف و مين فيهم اللي مش بيرشح بقائهم للسنة الجاية بحيث انه يسرحوهم من دلوقتي.. و الحمد لله مديري رشحني للبقاء.. و بقيت..


و استمريت في المدرسة خلال الصيف.. أروح المدرسة الصبح.. نقعد انا و المدرسات.. أقرا الجرنال.. نشرب الشاي و نفطر.. نتكلم.. نرغي.. و بعدين ع الساعة 1 بالكتير نبدأ نروح.. يا سلاااااااااااام.. حياة في منتهى الملل.. طبعا باروح البيت من الساعة 1 دي مش بالقى حاجة اعملها.. بس لا زلت باحرص على مسلسل النايل تي في
طبعا لقيت ان دي مش عيشة بالطبع.. بدأت أدور على شغل بارت تايم.. سبحان الله.. المرة دي ما لفتش كتير.. لقيت اعلان في الجرنال عن انستركتور لللغة الانجليزية بارت تايم في مركز لغات و كمبيوتر.. لأ و ايه؟ رقم المركز اللي في الجرنال بيشير الى انه في شبرا
لما اتصلت بأه عشان احدد معاد للمقابلة كانت المفاجأة التانية.. و هي ان المركز ده في شارع متفرغ من الشارع الموازي لشارعنا.. يعني على بعد خطوات من بيتنا
سبحان الله لما بيريد بتيسير الأمور
رحت المقابلة و حكيت القصة و سألني شوية أسئلة بالعنجليزي و الحمد لله ماكانش مشترط اني اكون خريجة مدارس لغات
و تم التعيين بمرتب تعبااااااااااااان.. بس اهو بارت تايم يعني هو احنا هانتأمر؟

قضيت في المركز ده شهرين بس.. و كمان شوية هاقول لكوا ليه شهرين بس.. و عشان أقول لكوا ليه شهرين بس لازم ارجع بالأحداث كام شهر عشان ندخل من قصة المركز للقصة التانية اللي بدأتها و لسه فيها لحد النهاردة.


يومي كان عبارة عن اني باروح المدرسة اعمل الطقوس اياها و بعدين أروح على طول اتغدى و اريح شوية و بعدين انزل المركز من الساعة 5 و نص للساعة 8 و نص و طبعا أروح انام زي القتيلة لتاني يوم الصبح.. و هكذا.. بس بصراحة استفدت جدا من الشهرين اللي اشتغلتهم في المركز ده و فرقوا معايا فعلا و كنت بادرس لناس كبار أصغر مني بسنتين تلاتة و أدي و اكبر مني بكتير أحيانا و كان معظمهم مستواهم في الانجليزي تعبااااااااااان
شوية كده و احكي لكوا حبة عن المركز و اللي حصل معايا فيهم خلال الشهرين دول.. و بعدين نرجع فلاش باك و ندخل في مفترق الطرق اللي كنت فيه من 10 سنين و عملت فيه ايه.. تابعونا و لا تنسونا من صالح دعائكم :)

اما عن الشهرين اللي قضيتهم كمدربة في معهد اللغات فكان اني بدأت مع ناس زي ما قلت ما شاء الله فيهم أكبر مني سنا وفي أصغر و في اللي في سني بالظبط.. يجمع بينهم الضعف الملحوظ في اللغة الانجليزي.. طبعا بدأت معاهم في الأول كتاب و شرايط و مستويات و المواضيع المعروفة دي.. انما ما لمستش منهم تحسن ملحوظ.. و عشان انا كان عندي رغبة صادقة في ان الناس دي تتحسن في اللغة الانجليزية، فاتجهت لطريقة جديدة تماما ما لحقتش أثبت نجاحها من فشلها، بس كان فيه تجاوب ملحوظ من المتلقين.

اللي حصل هو اني كان هدفي هو اني أولا أخليهم يعرفوا يكونوا جمل انجليزي صحيحة من ناحية الجرامر و الstructure فبدأت اني أقفل الكتاب خالص و أخليهم يشاركوا معايا باستعمال اللغة الانجليزية.. ازاي بأه؟
شوفوا.. كنت باخلي اللي يسألني سؤال ما أجاوبوش الا لما يسألني الجملة كلها بالانجليزي و أكونها معاه كلمة كلمة لحد ما تبقى جملة صح.. يعني مثلا: كان حد فيهم يسألني: ازاي ابقى كويس في الانجليزي؟ فأخليه يترجم كل كلمة من دول للانجليزي و بعدين نبدأ نرصها مع بعض.. و في النص طبعا بادي شوية جرامر عشان لازم همه يعرفوا ليه مثلا أقدر أقول على نفسي I want، انما لما آجي اتكلم عن زميلي مثلا لازم احط حرف إس في الفعل و تبقى He wants و ده بيجرني لشرح قاعدة Do و Does و هكذا ربطت لهم الكلمات.. بتكوين الجمل.. بقواعد الجرامر.
زي ما قلت انا معرفش نتيجة الطريقة دي على المدى البعيد بتكون ايه عشان ما لحقتش اشوف نتايجها اوي.. بس اللي لاحظته انهم كانوا مبسوطين انهم خرجوا من سجن الكتاب و الشريط و بدأت الجمل السليمة تطلع منهم همه مش بيتلقنوها تلقين.


بس ما تخافوش.. انا ما اترفدتش من المركز عشان ركنت الكتاب و الشريط و لا حاجة.. انا سبت المركز لأسباب أخرى هاشرحها قريبا ان شاء الله .

اللي فاضل لي من ذكريات المكان ده هي وشوش مشوشة.. منهم وش صاحب المركز اللي زعل جدا لما قلت له اني ماشية و قال لي كلمة مش ناسياها.. قال لي انتي من الناس اللي نقدر نقول عليهم ان نسمتهم خفيفة على الأماكن اللي بيتواجدوا فيها بس في نفس الوقت مؤثرين :)
الصراحة هو اللي كان راجل ذوق و محترم جدا الصراحة.

الحتة اللي جاية دي تبدو هامشية و حشو ع الفاضي.. انما هي في الواقع محورية جدا في سير الأحداث: في الفترة دي كان ستايل لبسي عادي جيبات و بلوزات و حجابي عبارة عن ايشارب قصير عادي خالص.. انما لما بدأت أدرس لناس في سني و أكبر و منهم شباب و باضطر طبعا اني أديهم ضهري و اكتب حاجة على البورد.. كنت باقلق من نظراتهم و باحس اني مش مطمنة.. فقمت شارية طقم ايشاربات مربع حجم كبير على أد ما قدرت.. و أصبح ده ستايل لبسي العادي.


خليكوا فاكرين بأه الحتة دي عشان زي ما قلت ليها أهمية محورية فيما هو آت

المشاركة الأصلية كتبت بواسطة ehab08

دود مورنيد ميس
يارب سهلو
آخر حلقه كانت يوم الثلاثاء الساعه 10:34 الصبح ولغاية دلوقتى ما فيش أى حلقات جديده
شكلك كده عمله زى عمر الحريرى فى فيلم العتبه الخضرا مش عارف يألف من غير سندوتش الفول كان أسمه حماده بيتهيألى
أستاذ حماده قصدى أستاذه علا قصدى علا بس
أيه اللى حصل مع يوسف وأيه اللى فى 3 حلقات الباقين

الحلقات نزلت يا إيهاب :)

شكرا جزيلا على المتابعة :)