الموضوع: أول سنة حياة وظيفية - سيرة ذاتية

الصراحة كده و من الآخر اني قلت لها اديني فرصة أفكر.. قالت لي أد ايه؟ قلت لها يومين.. هارد عليكي يوم الخميس (يومها كان التلات).. و بعدين فكرت و قلت لها.. و لا اقول لك.. خليها الأحد احسن.. قالت لي أوك.. هاستنى منك مكاملة يوم الأحد.

ماخبيش عليكوا انا مخي فضل يودي و يجيب.. و هنا بأه جه دور شوشو.. طبعا دي فرصته.. و خد عندك بأه كلام ييجي في دماغي من نوع يعني هي بتقول لك اقلعي الحجاب لا سمح الله؟ دي بتقول لك بس قصريه زي ما كنتي مقصراه قبل كده.. و يعني هو انتي كنتي مالك لما كنت لابسة ايشارب قصير؟ ما انتي طول عمرك لبسك ملتزم و حشمة.. ده حتى سنين الكلية كلها عدت من غير ما تلبسي بنطلون زي زميلاتك و لا تحطي ماكياج و لا حتى رتوش.. في حين ان زميلاتك اللي برضه محجبات كان الجينز و الماكياج عندهم اساسي.. يعني انتي مش هاتفجري يعني.. و بعدين دي فرصة ما تتعوضش.. و المرتب ضعف اللي انتي بتاخديه من المدرسة بعد نبح قلبك بالساعات.. ده كفاية ميزة الكلام طول اليوم مع واحدة انجليزية.. و مكتب بتاعك و تليفون و منظر.. يعني ده انتي تبقي غبية لو رفضتي الوظيفة عشان السبب ده


اما عن الجانب الآخر فكنت باقول لنفسي.. طيب انا عملت حاجة عشان ربنا يبقى راضي عني.. هارجع تاني و ارجع فيها ليه؟ انا مرتاحة في شكل اللبس ده و مبسوطة بيه.. اقوم آجي عشان وظيفة أغير كل ده و ارجع زي ما كنت؟ يرجع تاني شوشو يقول لي و يعني هو انتي كنتي ايه؟ ده انتي محجبة من سن 10 سنين (أيامها طبعا).. في وقت كنتي انتي و اتنين بس المحجبات في فصلك كله في المدرسة.. يبقى اللي هاتعمليه ده مش حاجة جامدة اوي.
و أرجع تاني اقول لنفسي يعني هي الست دي هي اللي هاترزقني؟ ما الرزاق موجود و هو اللي بإيده كل شئ.. طيب افرض عملت زي ما هي عايزة و اشتغلت عندها فعلا و بعدين ما عجبهاش شغلي؟ ابقى كده خسرت نفسي و شغلي في المدرسة عشان لا شئ؟ بلاش دي.. افرض الست ماتت بعده ما اتعينت على طول و قفلت المكتب؟ يبقى اعتمدت على الزايل و أغضبت الحي الذي لا يموت؟
و طبعا شوشو مش سايبني.. يا بنتي هو انتي هاتعملي معصية؟ الموضوع أبسط من كده بكتير

ما اطولش عليكوا فضلت كده ييجي يومين.. كر و فر.. يمين و شمال.. فوق و تحت و استخير و اسأل الناس و استشرت كمان مديري في الحضانة فنصحني اني ما اتخلاش عن اللي حاسة اني حالي أفضل بيه و لا اتنازل عن مبادئي و قال لي بعيدا كمان عن الدين، الناس دي بتحترم اللي بيتمسك بمبادئه.. فلو اتمسكتي بستايل لبسك ده هي ممكن تتمسك بيكي اكتر.
برضه ده ما ريحش بالي اوي.. انا عايزة حاجة واضحة امسك فيها.. حاجة تقول لي آه أو لأ.. حاجة تجيبلي من الآخر.. و الحمد لله ربنا ما طولش علية بيها.

و ظللت أفكر و أفكر.. لحد ما يوم الجمعة بالليل كنت سهرانة ييجي لحد الساعة 3 بالليل كده - و انا مش من عادتي أصلا السهر اوي كده - انما كنت طبعا مش جايلي نوم من التفكير.. و كنت قاعدة في الصالة في بيتنا القديم و ماسكة الراديو في ايدي.. قمت فاتحة على إذاعة القرآن الكريم.. و إذ بي افتح على بداية الآية الكريمة: “ربنا لا تزغ قلوبنا بعد إذ هديتنا و هب لنا من لدنك رحمة انك انت الوهاب”. انا ساعتها تنحت.. قلت لنفسي الآية دي يا بت يا علا جاية لك في الوقت ده بالذات زي رسالة.. يا ترى هاتفهميها و لا تسدي ودنك و عقلك؟ انما الحمد لله فهمت الرسالة و قفلت الراديو و قمت نمت.. نمت قريرة العين لأول مرة من أيام.. مقررة قرار واحد مافيش غيره و راضية تماما بكل ما يتبعه من نتايج
يوم السبت ما فكرتش في اي حاجة خاااااااااااااااالص و دخل قلبي اطمئنان و سكينة غير طبيعيين.. طيب هاقلق من ايه طالما انا خلاص أخدت القرار بعد استخارة و بعد اللي حصل ده قبلها بليلة؟ و فعلا يوم الأحد بعد ما رجعت من المدرسة و قبل ما أنزل المركز اتصلت بيها و قلت لها اني فكرت كتير في الموضوع اللي اتكلمنا فيه و لقيت اني مش مستعدة اني أرجع زي ما كنت و مدركة تماما انك مش بتطلبي مني أقلع الحجاب، انما انا لما أخدت قرار تغيير ستايل لبسي كنت مرتاحة ليه و لا زلت.. و مش مستعدة أرجع فيه. قامت قالت لي طيب اديني فرصة أفكر انا كمان
قلت لها تيك يور تايم و فيل فري في اتخاذ قرارك.. وفهمتها يعني ما معناه اني عندي بدل الوظيفة اتنين و مش هاموت على الوظيفة اللي هي عرضاها علية
تاني يوم بالظبط لقيتها بتكلمني و بتسألني احب ابدأ معاها امتى؟
قلت لها اديني اسبوعين أظبط اموري في المكانين اللي انا فيهم و بعدين ابدأ معاكي على 19 يوليو ان شاء الله.. و قد كان.. و بدأت معاها و آديني معاها لحد دلوقتي.. يعني بقالي 10 سنين.
في الحلقة الجاية ان شاء الله هاقول لكم انا اتعلمت ايه من التجربة دي.. و جزاكم الله خيرا على المتابعة :)

ربنا يكرمك يا علا كمان و كمان
تخيلي و أنا باتابع الأحداث حاسس أني سامع موسيقى تصويرية :)
That's how good you are

بعد ما بلغت صاحبة الشركة اني هابدأ معاها كمان أسبوعين.. بدأت اعيد ترتيب أوراقي.. رحت يوم الأحد المدرسة و كلمت المدير بتاعي في الموضوع.. سألني استخرتي؟ قلت له بالتأكيد.. قال لي على بركة الله.. بس انا لسه مش مطمن على الوضع هناك.. و خايف تخسري هنا و هناك.. قلت له طيب انت شايف ايه؟ قال لي انتي هاتاخدي أجازة من المدرسة أسبوع.. عادي خالص زي اي مدرسة ما بتاخد أجازة.. في خلال الأسبوع ده هاتجربي نفسك في الشغل الجديد و تشوفي هاترتاحي فيه و لا لأ.. و انا من ناحيتي مش هاقول لأصحاب المدرسة حاجة و لا ابدأ أدور على مدرسة جديدة إلا لما تيجي تقولي لي خلاص انا مرتاحة هناك و عايزاك تكلم لي أصحاب المدرسة عشان آخد مستحقاتي و ورقي

الصراحة الموقف ده من المدير انا شايلاهوله جميل في رقبتي لحد النهاردة.. و نفسي أقدم له أي خدمة او اعمل له اي حاجة توفي له حقه، ربنا يكرمه يا رب و يجزيه الخير. اللي اتفقنا عليه فعلا حصل و رحت أول يوم شغل لية في الشركة يوم 19/7/1998 و يومها رحت بأطول إيشارب عندي و أوسع لبس عندي.. عشان لو عندها اعتراض او تحفظ من اي نوع احب اعرفه من دلوقتي عشان ألحق مكاني في المدرسة. انما الحمد لله من ساعتها و لمدة 10 سنوات لم تبد اي ملحوظة عني لبسي بصورة سلبية.. بالعكس ده انا لما بدأت أغير ستايل لبسي للعبايات كنت متخوفة من رد فعلها.. انما سبحان الله.. اول مرة اسمع تعليقها المستحسن للبسي كان لما بدأت البس العبايات.. و في هذا الصدد لية خاطرة احب أشرككوا معايا فيها.

بالنسبة لموضوع طاعة الله و الرزق و لما ساعات ناس بتعتقد انهم ممكن يتعارضوا.. قلع حجاب عشان واحدة تلاقي شغل.. شغل في فنادق بتقدم خمور.. بنوك ربوية او ما شابه.. طبعا انا مش بافتي بحرمانية او باحلل حاجة.. انما بحسبة بسيطة جدا هنلاقي اننا بنتعامل مع إله واحد.. يعني اللي هاطيعه و البس الحجاب عشان أرضيه.. هو هو الرزاق.. يعني هو اللي بإيده الرزق… انتوا فاهمين انا عايزة أوصل لإيه؟ يعني لو كان فعلا الدنيا زي الأساطير اليونانية بتاعة الآلهة اللي كل إله تخصص ده كانت الدنيا خربت.. انما أحيانا الشيطان بيصور للواحدة اللي كل ما تقدم على شغل و يقولوا لها مش عايزين محجبة انها لو قلعت الحجاب هتلاقي شغل على طول.. طيب يا جماعة ماهو الحجاب ده طاعة للرزاق.. يعني مش مثلا - معاذ الله - اللي أمرك بالحجاب إله و الرزاق إله تاني فهيحصل تضارب في المصالح. ساعتها آه أقول لك اقلعي الحجاب.. عشان كده مش نافع.. انما سبحان الله الواحد الأحد.. اللي أمرني بالحجاب. هو هو اللي متكفل برزقي لا إله الا هو.. و الحمد لله على لا إله الا الله.

المشاركة الأصلية كتبت بواسطة islambana

انا قاعد مستني ياصبري قصدي يا علا

و آدي الحلقات الجديدة نزلت يا إسلام :)

المشاركة الأصلية كتبت بواسطة Chicco

ربنا يكرمك يا علا كمان و كمان
تخيلي و أنا باتابع الأحداث حاسس أني سامع موسيقى تصويرية :)
That's how good you are

هو فعلا الموضوع ناقصه موسيقى تصويرية

المشاركة الأصلية كتبت بواسطة ehab08

أكثر الله من أمثالك
ربنا يبارك لكى

ربنا يكرمك يا إيهاب :)
انا و الله مش كاتبة القصة دي عشان شهرة و لا عشان الناس تقول شوفوا البنت صاحبة المبدأ دي و اللي و اللي.. أولا لأن ده محض فضل و توفيق من الله و ثانيا انا بس باتمنى يكون فيها إفادة لحد.. يا رب.

بجد بجد موضوع هايل جدا وعاجبني اوي اسلوبك لان دمه خفيف بجد وانا بقرأ موضوعك شريط حياتي الوظيفية برده مر قدام عينيا وافتكرت انا كمان المواقف اللي حصلتلي وقتها وكمية الانترفيوهات اللي عملتها ومازلت لحد دلوقتي بعملها.
بالمناسبة انا برده معايا ليسانس اداب وتربية انجليزي دفعة 2002 وشغالة بقالي اكتر من خمس سنين ومريت بحاجات كتير اوي من اللي بتحكي عليها زي موضوع عقدة الخواجة اللي هي اشتراط خريجي مدارس اللغات وموضوع الحجاب برده بس الحمد لله ربنا لما بيكرم حد بيكرمه من وسع فعلا.
وهابقي احكي حكايتي انا كمان عن الحياة الوظيفية دي بس بعد ماتخلصي حلقاتك ياعلا عشان الناس متتلخبطش.

وعايزة اقول للناس اللي بتقول دور علي واسطة او ادفع فلوس عشان تلاقي شغل ياجماعة ده رزق قبل اي شئ يعني ربنا كاتبه لناس معينة وفي وقت معين بس الصبر والاجتهاد هايوصلوك للي انت عايزه (لايضيع الله اجر من احسن عملا)
وانا عن نفسي اشتغلت في اكتر من شغلانة بدون واسطة نهائي والشغلانة الوحيدة اللي استعنت فيها بواسطة مكملتش فيها اسبوع على بعضه وسبتها.
وبرده انا زي علا فكرت اشتغل في التدريس وفعلا اشتغلت فيه اسبوع واحد ودورت تاني علي مدارس بس الحمد لله ان ربنا موفقنيش في مجال التدريس ده وهاقولكوا ليه بعدين
وحاليا انا شغالة في شركة كويسة والحمد لله الامور مستقرة وبيجيلي وظايف تانية ولما شركة بتطلبني انا اللي بقول طلباتي دلوقتي واحيانا اوافق اني اروح الانترفيو واحيانا مبروحش.
بس في سؤال مهم بقيت اسأله قبل ماروح اي انترفيو وهو (انا محجبة هل الشركة عندكوا بتتقبل ده ولا بتشترط اللي تمسك الPosition ده متكونش محجبة )
لاني بجد اتعرضت للموقف ده ياما وفي شركات رفضتني لمجرد اني محجبة.
عموما انا اسفة اني طولت عليكوا بس هابقي احكيلكم التفاصيل في حكايتي انا بقي بعد ماعلا تخلص ونشوف قصتها كاملة.

الحمد لله الذي بنعمته تتم الصالحات.

النهاردة و امبارح كنت بادي كورس و الحمد لله ربنا وفقني فيه.

معلش متأخرة شوية في الردود بس هالقط نفسي و أتابع بإذن الله :)