الموضوع: ليه اشتريت ال بى واى دى اف ثرى byd f3 2013 ؟

المشاركة الأصلية كتبت بواسطة tarekhassan88

اولا بشكر حضرتك على ردك و على نصائحك الجميله اللى اكيد هاخد بيها ان شاء الله

ثانيا هو فعلا فى اختلافات بين موديل 2010 و موديل 2013 بس الحاجات دى مش هتفرق اوى معايا اللى هيفرق بس هو ان لو فى عيوب فى الصناعه و ده بسبب ان 2010 ده كان اول سنه يحصل تجميع مصرى للعربيه و اتمنى من الاعضاء المحترمين يقولولى لو فى حد منهم معاه 2010 او حتى يكون سمع من اى شخص فى التوكيل مثلا

ثالثا و ده الاهم فاحنا جيران يا باشا انا من منشية البكرى مصر الجديده

رابعا بقه انا هروح ارفع العربيه فى بنزينة الوطنيه اللى فى شيراتون لان انا و اصحابى بنرفع العربيات فيها و هما بردك محترمين جدا و بيفصصوا العربيه و كمان هيبقى معايا ميكانيكى العيله و ده شاطر جدا و باذن الله خير و اتمنى ان ربنا يكرمنى فى عربيه نظيفه و بنت حلال و سعرها مناسب ليه

و الله انا مبسوط اننا طلعنا جيران ,,, لووووووووز العنب

أحسن حاجه تعملها عشان الناس ترد عليك بسرعه انك تعمل موضوع جديد منفصل تسميه مثلا "سؤال لملاك ف3 2010" أو مثلا استفسار عن موديل 2010" أو مثلا "سمعة إنتاج 2010" ,, حتلاقى كل اللى معاهك 2010 أو سنة صنع قريبه منها حيدخلوا يردوا عليك

المشكله مش فى عيوب الصناعه ,, المشكله فى وجود عطل مستخبى تصليحه مكلف

55000 الف جنيه ممكن تجيب عربية مستعملة اوكتافيا a4 او اوبل فيكترا عربيات المانى وثبات على الأرض وقطع غيار معمرة جدا وافضل من الصينى والكورى واليابانى ومبروك على العربية الجديدة!!

المشاركة الأصلية كتبت بواسطة diakkoko

اولا السلاما عليكم ورحمه الله وبركاته سلمى لكل اعضاء المنتدى المحترمين اللى استفد من خبراتهم كثيرا بس ليا سؤال يمكن مكرر بس اللى بيكون عاوز يشترى عربيه بيكون موسوس زياده عن اللزوم علشان بالبلدى ما يلبس فى الحيض انا معايا فى حدود 55000 الف جنيه عاوز اجيب عربيه كويسه وماتتعبنيش سؤالى لكل الاعضاء وبالاخص استاذ احمد صاحب الموضوع الجميل انا فى الاول من سنتين كنت معجب جدا بى اللوجان ولكن شوفت البى واى دى فعجبتنى اكترحابب البى واى دى علشان اوبشن وعلو عن الارض وثمن بالمقارنه بمثيراتها فى نفس الفئه السعريه زى الفيرنا واللانوس واللوجان ومن ناحيه اسعار قطع الغيار وتوفرها باسعار كويسه وكنت بقول هكمل عليهم واجيب زيروا بص وضع البلد مخلى الكل خايف من السرقات وبعدين ظهرت فى الصوره ال ام جراند بصراحه شفتها فى المعرض جميله شكلا بس كا اعتماديه لسه جديده فى السوق ما نعرفش حد قيمها بعد استخدام كتير فا ياريت تشركونى فى حيرتى اجيب مستخدم ولا زيرو ولو مستخدم
1-تنصحونى بأيه ولو زيرو تنصحونى بأيه والكل يتكلم بأمانه الله علشان الكلام ده هيحدد اتجاهاتى
2-ايهم افضل بى واى دى تجميع صينى ام مصرى مع ذكر الاسباب واخر موديل فى الصينى كام واى موديل سنه افضل
3-ان فكرت فى المستخدم فى لانوس 1 و2 بى واى دى واكسيل رأيكم ايه
4-ولو مستخدم اتوماتيك لانوس او اكسيل ايه رأيكم
5-لو مستخدم انه افضل اتوماتيك ام مانويل
6-لو ليكم ترشيحات اخرى احب اعرفها مع ابداء الاسباب
7-رأيكم استلف واكمل على اللى معايا واجيب زيرو ولا الموضوع مش محتاج زنقه واجيب مستخدم فى حدود اللى معايا
8-بعد استخدام بى واى دى فتره كبيره ايه العيوب والمميزات بكل امانه يمكن اكون قرأت كل الكلام ده قبل كده حرف حرف بس احب اسمع الكلام النهائى بعد اذنكم يمكن تقولوا انى متردد اوى بس متهيألى ده كان حال ناس كتير زى
وفى النهايه لكم منى كل الشكر والتقدير لكل من كتب حرف فى هذا المنتدى لانى استفد جدا من الكل مع احترامى لعدم ذكر اسماء بعينها ولكن الكل يعرف العمالقه والسلاما عليكم ورحمه الله وبركاته

و عليكم السلام و رحمة الله و بركاته

ربنا يوفقك فى حاجه تسعدك و تريحك ماتتعبكش

و حقق طبعا توسوس ,, ديه فلوس حتندفع و شقا عمر مش من الهوا

طبعا انا بحمد الله على شرائى البى واى دى و مش ندمان خالص و لو رجع بيا الزمن تانى برده كنت حشتريها ,, الحمد لله ما شاء الله

طبعا الزيرو زيرو و أفضل مليون مره من المستعمل مفيش كلام

و لكن موضوع السلف و الإستدانه ده أمر ليس هين و لازم تكون جربته قبل كده و دقته لأنه متعب و مؤرق فعلا ,, إلتزام طويل الأمد فى ظروف متقلبه و كله فى علم الغيب

الإمجراند هى فعلا العربيه اللى عامله زى البطيخه , يا تطلع حمرا يا تطلع قرعا , لكن باقى العربيات متجربه و معروف مشاكلها و عيوبها و مفيش حاجه كامله

عيوب البى واى دى ان فتيسها محتاج يتلين فى الأول و لكن مع تغيير زيت الفتيس و تشحيم العصايه لا مشكله بإذن الله , دبرياج عمره قصير و لكن محلوله مع وجود اليابانى و الكورى كبديل ,, و لازم تشيك عليها كويس كل فتره لتجنب الصدأ و علاجه فل بدايه أسهل و أفضل بمنتجات إزالة الصدأ عزل الأجزاء المعرضه للصدأ

بالنسبه لمنافسين البى واى دى فل سعر ,, فأنا مش حتكلم عليهم لأنهم عربيات قديمه و السوق شبع منها و شبع كلام عليها و لو عديت بس من قدام قهوه و سألت أى حد ايه رأيك مثلا فل فيرنا و لا اللانوس حتلاقى حافظ العربيه ,, فا خلاص ,, الموضوع منتهى ,, كده انت عارف مميزات و عيوب كل عربيه ,, استخير ربنا و اتوكل على الله و ربنا يوفقك

المشاركة الأصلية كتبت بواسطة diakkoko

شكرا على الرد والاهتمام بس ليا سؤال هل العيوب اللى حضرتك ذكرتها ده موجوده فى الموديلات التقفيل الصينى يعنى موديل 2007 و موديل 2008 ولا ايه واخر الموديلات التقفيل الصينى لغايه سنه كام واى موديل سنه فيهم افضل لانى شايف ان التقفيل المصرى فى عيوب فى موديل سنه مش موجوده فى موديلات سنين تانيه مثال زى السخونه فى موديل 2012 فى بعض الناس اشتكوا منها مش موجوده فى موديلات تقفيل مصرى موديل سنين اخرى وشكرا

مشكلة السخونه ,, هى مشكله وهميه فل بى واى دى , عشان سبب السخونه هو سلك أرضى أسفل البطاريه ,, و بيتظبط فل توكيل عاادى ,, انما العربيه نفسها مابتسخنش , ديه سخونه وهميه بسبب خطأ فل قرأه

أنا مركبتش التقفيل الصينى عشان اتكلم عنه ,, ممكن حد تانى يفتيلك فى ده و أعتقد العضو sv65 ممكن يكون أدرى منى لأن عربيته موديل قديم

عامتا الموديل التقفيل المصرى بيتهيئلى انه أفضل فى اللحامات و لكن التقفيل الصينى أفضل فى الفينيش النهائى و العفشه و برده محتاجين حد يأكد الكلام ده معايا