الموضوع: ليه اشتريت ال بى واى دى اف ثرى byd f3 2013 ؟

المشاركة الأصلية كتبت بواسطة aw2100

انا اختلف مع حضرتك انا بقالى 32 سنة ركبت فيهم 3 عربيات مستعمله اول واحده 1100 فيات موديل 1969 لمده 15 سنة والتانية 128 موديل 1980 لمده 15 سنه والأخيرة سكودا فليشيا موديل 1997 سنتين وكل عربيه كانت 10/10 طوال المدد دى وده طبعا توفيق من ربنا اولا وثانيا الخبرة الكبيرة ليا فى العربيات و الصنيعى الأمين ومش مشكلة التكاليف وحتقولى ليه مستعمل؟؟
طبعا العربية المستعملة هى قديمة اصلا فمبتخصرش فيها كتير عند بيعها ثانى حاجة انا باشترى عربيات قطع غيارها متوفرة وبشترى دائما عربية غشيمة متبهدله مش كويسه بس المهم الشاسية ودواخل العربيه وبعد كده كام الف جنية مع صنيعى فاهم تمام بربى العربية وبتبقى احسن من الجديده وحاليا انا بشجع اى حد على شراء العربيات المستعمله مع اتخاذ كل الحذر فى الشراء وتكشف على العربية كويس وتعمل رنج كام الف للاصلاحات فمثلا 80000 جنية تشترى مرسيدس او bmw h او سكودا اوكتافيا مستعملة وتصرف عليها 20000 كمان يبقى الأجمالى 100000 جنية تضرب اى عربية صينى بالجزمة وتعيش معاك 15 سنه امان وكفائة وطبعا قطع غيار متوفره و العربية الجديدة مكلفة فى الحوادث لاقدر الله وشاسية ضعيف جدا وطبعا عادى تلاقى العربية تتعطل ده عادى مهى ماشية فى شوارع مصر المحروسة مطبات وتراب وبنزين معفن مليان تراب وميه ويسلام لو قطعة غيار مش موجودة حتى جوه التوكيل طبعا ده عادى جدا فبصراحة انا بقول لالالالالالالالالالالالال ا للصينى واسف على الأطاله !!!

بسم الله


أولا تسمحلى أشكرك على مرورك الكريم علينا هنا فى قسم بى واى دى و الإهتمام بالمشاركه و إبداء رأيك , حتى تعم الإستفاده و لا بأس من إختلاف الأراء , فلولا إختلاف الأذواق لبارت السلع

حقيقة أن مشاركتك هذه مست أعماق مشاعرى و باطن تفكيرى

يا سيدى الفاضل , أنا شاب ابلغ من العمر قرابة 28 عاما , تربيت على ثقافة السيارات من المدرسه و النادى و الجامعه و الشارع و التلفزيون و المجلات و ملاحق السيارات و انت أكيد كذلك مثلى.

نحن جيل عرف رامى سرى و عمرو ماجايفر و أخرون من دونهم الله يعلمهم ممن يهوون سباقات السيارات و يحترفونها إحترافا مثل الاوتوكروس و غيره و أنت أكيد مثلى من هذا الجيل

و حتى السباقات العشوائيه التى تحدث ليلا فى مساكن شيراتون و جامعة الدول و صلاح سالم العرويه و غيرهم

نحن جيل وقف معجبا بفن التخميس اللى هو ال drifting و سباقات المواتير اللى هى ال drag race و حلم و حاول و جرب و نجح و فشل و كسب و خسر و مازال عشق السيارات يجمعنا و يقربنا و مازالت روح المنافسه فينا تشعل حماسنا و شجاعتنا التى قد تصل فى أغلب الأحيان إلى تهور , و أنت تعلم و أنا أعلم.

أود أن أصل فى كلامى إلى انه طبعا إذا ذكرت السيارات , فيجب أن يكون على رأس قائمة الذكر المرسيدس و البى ام دبليو , لا يوجد (( إثنين)) مننا نحن هذا الجيل يختلف فى هذا.

طبعا , و هل يخفى القمر

هاتين الماكينتين الألمانيتين , سحقا لكل السيارات الأخرى بل سحقا مرة أخرى لكل السيارات , سحقا للأبد.

ألمانيا ,, بلد الصناعه الأولى فل عالم , إذا ذكر الصناعة , ذكرت ألمانيا

أتذكر مثل من الأمثله العالميه يقول : لو الموت كان ألمانيا فقم بشراءه , معنى هذا المثل أن الألمان برعوا فى صناعة كل شىء لدرجة جعلت الناس تقبل على شراء منتجاتهم مغمضين العين و حتى و لو كانوا يصنعون الموت ذات نفسه , سيقبل عليه الناس من فرط براعتهم.

و كم انتى جميله أيتها ال BMW , وقفت يوما محتارا , ما الذى بجذب عينى دائما للبى ام دبليو , ما الذى يجعلنى أعشق شكلها و لا ينافسها فى عشقى أى سيارة أخرى , هل هى الشبكه الأماميه المزدوجه , هل لأن العجل الأمامى مرحل للأمام جدا بحيث يكون الكابوت كله خلف العجل الأمامى و بذلك يعطى مظهرا رياضيا خلابا , لا أعرف و لا أريد أن أعرف , كفى إنى أعشق النظر إليها و لا أخفى عليكم , أرغب فى إمتلاكها

عندما كنت عند معرض القرش بجوار الميريلاند , أنا و صديقى كنا نأكل الأرز باللبن بالأيس كريم من عند ألبان المالكى , و فى نفس الوقت ننظر إلى السيارات الجديده بإعجاب , سألنى صديقى كاسرا الصمت : أحمد ؟ انت لو معاك فلوس كتير اوى و مش فارقه معاك خالص ,حتجيب عربيه ايه ؟

تصوروا الإجابه , اخرون غيرى عند هذا السؤال بالتحديد قد يشطحون بخيالهم و يكون جوابهم : فيرارى , لامبورجينى , مازيراتى , بنتلى , بوجاتى , رولزرويز , استون مارتن , بورش , مايبخ , باجانى زوندا ......


و لا أى من هؤلاء جاوبته , قلت له BMW 3 SERIES 2013 !!!


يا الله

هيا بنا نرجع لأرض الواقع مره أخرى


فعلا , قبل شراء البى واى دى الصينيه , كنت أفكر جديا فى شراء بى ام دبليو مستعمل , حلم حياتى من الطفوله و المراهقه , و سألت من حولى ممن أثق بهم و فى أراءهم و كان جوابهم كالأتى :

مش حتقدر عليها و لا على مصارفها , قطع غيارها غاليه جدا , و تكاليف صيانتها باهظه , و كذلك ترخصها و ضرائبها

فمن يركب بى ام دبليو او مرسيدس , يجب ان يحافظ عليها و يصونها , و يعلم جيدا , اينعم السياره موديل قديم و مستعمله و لكنها مكلفه فى مصاريف تشغيلها و صيانتها , و على رأى المثل الشعبى "مفيش حلاوه من غير نار"

أنا موظف , دخلى هو مرتبى , متزوج و عندى طفل , أعباء الحياه طاحنه و الفرصه لم تأتى بعد , يعنى بالعاميه "زمنى لسه ماجاش"

و أنا مقتنع ان المفروض الواحد لا يلبس ثوب غير ثوبه , و على قد لحافك مد رجليك

ربنا مخلقش الناس كلها متساويه فل أرزاق , كل واحد له رزقه , و له دخله و له مسؤلياته

مش معنى انى صرفت نظر عن البى ام دبليو , يعنى انى صرفت نظر طوال حياتى , الحياه مراحل و محدش بياخد كل حاجه مره واحده و الحمد لله أوى عل انا فيه

ان شاء الله يجى اليوم اللى ابقى استاهل فيه البى لم دبليو و ابقى معايا مهرها

صحيح , انتوا عارفين انا بشبه البى ام دبليو المستعمله ديه ب ايه ؟ , بشبهها ببنت ثريه جدا و من عيله غنيه جدا بس مطلقه , لو اتجوزتها , صحيح مش حتدفع مهر غالى اوى و مصاريف جامده , هى أصلها مطلقه فا منكسره مش حتطلب كتير فل أول ,,, لكن يا معلم لازم تعيشها فى نفس المستوى اللى كانت عايشه فيه مع أهلها , فساتين من بره و أكل فاخر , كافيار و لحم غزال و بيض نعام و تاخودها تفسحها فسحه ممكن تكوع فيها اد مرتب عشر موظفين قطاع خاص كمان.


الله الغنى


انا ليا بس طلبين منك يا قمر ,,, و الله منورنا


الطلب الاولانى , بلاش إستخدام لفظ الضرب بالجذمه , ده لو سمحت , ليه ؟ , حكلمك بصراحه و من القلب , انا بحب عربيتى و بينى و بينها حاله حب , فامحبش حد يقول "عربيه تضرب عربيتى بالجذمه"
, الكلام ده بيضايقنى , و بيزعلنى , و أى انسان محترم متربى على خلق برضه الكلام ده حيزعله , فأكون شاكر ليك لو استخدمت مثلا مصطلح زى "عربيه أحسن و أفضل من عربيتى.

الطلب الثانى انك تعمل بحث عل نت على صناعة السيارات الصينيه عشان تعرف الناس ديه وصلت لأيه و ماشيين ازاى و كيف هو شكل المؤشرات الداله على مستقبل صناعة السيارات الصينيه ؟, هل الؤشرات تقول نعم ستكتسح ؟ أم لا ستنحسر ؟ ,,, من واقع بحثى أقول لك بالفم المليان


نــــــــــعــــــــــم أوو ى ى ى ى ى ى ى ى ى ى ى ى ى ى ى ى


أشوفكم الحلقه اللى جايه , سلامو عليكم