| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 5 من 19 الأولىالأولى 1 2 3 4 5 6 7 8 9 10 15 ... الأخيرةالأخيرة
النتائج 41 إلى 50 من 187

  1. #41

    الصورة الرمزية abo-omar

    رقم العضوية : 132847

    تاريخ التسجيل : 30Dec2012

    المشاركات : 37

    النوع : ذكر

    الاقامة : القاهرة

    السيارة: .

    السيارة[2]: بريليانس v5

    الحالة : abo-omar غير متواجد حالياً

    افتراضي -

    hasad">

    اخي رغم ان الموضوع فعلا اخد وقت طويل في القراءه الا انني اجده موضوع قصصي رائع وشيق
    يعكس فعلا ما يعانيه بعض الاشخاص وانا منهم في اتخاذ قرار شراء سيارة جديده
    فانا من 4 شهور والي الان لم احسم قراري والنتيجه ان زادت اسعار السيارات في السوق
    وعايز اعرف رايك عن byd f3 اوتوماتيك وانا قرأت ان الفتيس ياباني واعتقد نيسان صني
    وايضا رايك في byd g3 وليه مدخلوش في المقارنه هل لان السعر في الاتنين اعلى


  2. #42

    الصورة الرمزية ahmedselaraby

    رقم العضوية : 133020

    تاريخ التسجيل : 03Jan2013

    المشاركات : 418

    النوع : ذكر

    الاقامة : CAIRO , EGYPT

    السيارة: BYD F3

    السيارة[2]: FIAT SIENNA

    الحالة : ahmedselaraby غير متواجد حالياً

    افتراضي معايا كوبون ,,,,, معايا كوبون -

    بسم الله


    أولا طبعا انا اشكرك على ثقتك فيا و سؤالى عن البى واى دى اتوماتيك و ال جى 3


    انا جبت المانيوال من الامل ب 72900 و ساعتها الاتوماتيك كان ب 85000 , طبعا الاسعار اتغيرت عشان سعر صرف الدولار , و الاسعار الجديده دلوقتى بسمعها من الكلام عل منتدى بس انا مش متابع اخرتها ايه ,


    المهم طبعا زى ما هو واضح ساعتها كان فيه فرق 12 الف جنيه بين المانيوال و الاتوماتيك , و لو انا كان ساعتها معايا تمن الاتوماتيك , كنت دخلت فى شريحه تانيه و اختيارات تانيه و بدائل تانيه , و للأمانه كان ممكن البى واى دى الاتوماتيك ساعتها مايكونش هو إختيارى , كان ممكن يكون فى حاجات فى نفس رينج السعر اللى هو ال85000 افضل مل بى واى دى يخلونى افضلها على البى واى دى , بس طبعا انا متعبتش نفسى و عملت مقارنه و لا روحت اتفرجت و لا سألت , عشان كده مش حقدر افتيلك اذا كان البى واى دى اتوماتيك افضل من منافسيها فى نفس رينج السعر و لا لا ء , و نصيحه لوجه الله , لا تعتمد فقط على الكلام اللى مكتوب فل منتديات و المواقع , لازم تنزل تشوف العربيه و تفليها و لو عرفت تختبرها اختبرها و اسأل عليها كتير و انزل شوف قطع غيارها موجوده و لا لاء و اسعارها ايه و قارن , و هل العربيه موجوده اصلا و لا خلصت و بعتنا نجيب تانى.

    البى واى دى اتوماتيك مش وحشه , فتحة سقف و سنسور خلفى و اربع سماعات و طاره مالتى و فتيس يابانى , و لكن بالمقارنه بمنافسيها فى نفس الرينج , الله اعلم

    و نصيحه تانيه لوجه الله لو معاك عربيه 1600 او اقل دلوقتى "لا تبيع" انتظر لحد ما موضوع كوبونات البنزين ده يبقى واقع و بعدين بيع , لأن العربيات ال 1600 و اقل بتغلى دلوقتى سواء زيرو او مستعمل و طبعا سيادتك يهمك تبيع بالغالى مش بالرخيص عشان لما تيجى تشترى بقه حتلاقىه برضه غالى فاميكونش الفرق كتير عليك

    و لكن لو عربيتك اكتر من 1600 نصيحه بيع دلوقتى حالا لأن العربيات ديه حتبقى برخص التراب و لو استنيت حتخسر كتير و ممكن متعرفش تبيع اصلا و تقعد العربيه زى بيت الوقف

    اما بالنسبه لل جى 3 , فانا لما كنت بدور الاول عل نت ملقيتش حد عارضها زيرو او مستعمل , و معرفش سعرها كام , و بعدين انا ماشوفتش منها تلاته فى مصر , نادره جدا , و لما روحت الامل ملقيتهاش معروضه اصلا فى فرعين و مسألتش عليها , برده لو خلاص حبيتها اوى , ارجوك شوف قطع غيارها الاول فين و بكام , و هل حضرتك يهمك الريسيل و لا لاء , طبعا حضرتك فاهمنى انا عايز اقول ايه


  3. #43

    الصورة الرمزية ahmedselaraby

    رقم العضوية : 133020

    تاريخ التسجيل : 03Jan2013

    المشاركات : 418

    النوع : ذكر

    الاقامة : CAIRO , EGYPT

    السيارة: BYD F3

    السيارة[2]: FIAT SIENNA

    الحالة : ahmedselaraby غير متواجد حالياً

    افتراضي هو ده حيبقى تمامنا -

    اخر كلام سمعته برضه عن موضوع كوبونات البنزين ده , انو فئة ال 1600 ممكن تكون هى كمان مش محظوظه , يعنى حينبها مل حب جانب , و صحابها حيغلبوا فى بنزينها برضه , مش عارف اخرتها ايه , حنمشى بتوكتوك بعد كده , شكله كده هو ده حيبقى تمامنا فل اخر


  4. #44

    الصورة الرمزية bassem.naguib

    رقم العضوية : 5577

    تاريخ التسجيل : 12Feb2008

    المشاركات : 4,439

    النوع : ذكر

    الاقامة : cairo

    السيارة: يا رب

    السيارة[2]: Fiat One twenty eight M/T

    دراجة بخارية: لا يوجد

    الحالة : bassem.naguib غير متواجد حالياً

    افتراضي -

    اقتباس المشاركة الأصلية كتبت بواسطة ahmedselaraby مشاهدة المشاركة

    المهم طبعا زى ما هو واضح ساعتها كان فيه فرق 12 الف جنيه بين المانيوال و الاتوماتيك , و لو انا كان ساعتها معايا تمن الاتوماتيك , كنت دخلت فى شريحه تانيه و اختيارات تانيه و بدائل تانيه , و للأمانه كان ممكن البى واى دى الاتوماتيك ساعتها مايكونش هو إختيارى , كان ممكن يكون فى حاجات فى نفس رينج السعر اللى هو ال85000 افضل مل بى واى دى يخلونى افضلها على البى واى دى , بس طبعا انا متعبتش نفسى و عملت مقارنه و لا روحت اتفرجت و لا سألت , عشان كده مش حقدر افتيلك اذا كان البى واى دى اتوماتيك افضل من منافسيها فى نفس رينج السعر و لا لا ء , و نصيحه لوجه الله , لا تعتمد فقط على الكلام اللى مكتوب فل منتديات و المواقع , لازم تنزل تشوف العربيه و تفليها و لو عرفت تختبرها اختبرها و اسأل عليها كتير و انزل شوف قطع غيارها موجوده و لا لاء و اسعارها ايه و قارن , و هل العربيه موجوده اصلا و لا خلصت و بعتنا نجيب تانى.

    زي أيه بقى أتوماتيك في نفس الرينج وزيرو .. معتقدتش فيه حاجة في نفس الرنج زيرو أفضل من البي واي دي ومواصفاتها وبقول الكلام ده بعد دراسة مستفيضة ..

    ولو مستعمل أتوماتيك أيه برضه؟! .. بس المشكلة الرئيسية أن الواحد بيقلق لما يشتري أتوماتيك مستعمل بالذات .. ولا مش معايا في النقطة دي .






    Life's too Short for the Wrong Job

    ziabassem سابقا


  5. #45

    الصورة الرمزية mirra

    رقم العضوية : 95806

    تاريخ التسجيل : 22Apr2011

    المشاركات : 479

    النوع : ذكر

    الاقامة : tanta

    السيارة: lada2107

    السيارة[2]: fiat128

    دراجة بخارية: لا يوجد

    الحالة : mirra غير متواجد حالياً

    افتراضي -

    اقتباس المشاركة الأصلية كتبت بواسطة ahmedselaraby مشاهدة المشاركة
    ليه اشتريت ال بى واى دى اف ثرى byd f3 ؟
    حتكلم عن نقاط هى اساس حكمى على العربية دى و سبب شرائى لها
    اولا : خبرتى النظرية و معلوماتى عن العربيات عموما
    ثانيا : انا ركبت و سقت قبل كده عربيات ايه ؟
    ثالثا : انا ليه بعت عربيتى اللى قبل البى واى دى و حبيت اغير ؟
    رابعا : ايه البدائل اللى كانت قدامى واللى كان سعرها قريب من ال بى واى دى و حكمى عليها
    خامسا : رحلتى العملية الجدية للحجز و الشراء و المواقف التى تعرضت لها
    سادسا: انطباعى و حكمى على ال بى واى دى عن تجربة بعد امتلاكها

    اولا : خبرتى النظرية و معلوماتى عن العربيات عموما : انا لحد اولى اعدادى مدرسة كانت معلوماتى عن العربيات صفر و حبى لها كان ولا حاجه لحد ما كنت راجع من المدرسة مع واحد زميل بيتى جنب بيته و كلمنى عن العربيات و استفزنى انى معرفش اى حاجه عنها و جاهل بها تماما و معرفش الفرق بين الفيات و المرسيدس للأمانة لدرجة انه ساعتها سألنى سؤال بقى تركب مرسيدس و لا تركب فيات فقلتلو فيات لمجرد ان احنا عندنا فيات و للامانه ايضا زميلى ده بطل يتكلم معايا من بعديها يظهر ان انا استفزيتو اوى بجهلى للعربيات
    و ابتدت من هنا رحلة الانفجار العظيم لعالم العربيات فحياتى و اللى كان بالمصادفة فى مصر ايضا , انا افتكر هذة السنين انها كانت بدايات حاجات كتير فى مصر تخص العربيات و منها نزول العربيات الكورى مصر و على رأسهم الهيونداى اكسل و الكيا برايد و كانت الاوبل فيكترا الالفين 2000 سى سى لسة نازله برضة و الاسكودا فليشيا كانت اول ما نزلت الناس كانت مستغربة من شكل الشعار او اللوجو بتاعها و ايضا بداية الإعلام المتخصص للعربيات زى ملاحق جريدة الاهرام و اخبار اليوم كل يوم جمعة و سبت و مجلة أخبار السيارات ايام ما كانت لسة فى عزها (دلوقتى خلاص راحت عليها)و كنت بشتريها من العدد الاول و كانت ساعتها فيه مسابقة للفوز بالمرسيدس العيون اول شيب اول ما نزلت حاجة اسمها عيون مرسيدس و المهم دخلت المسابقة و مكسبتش و فيه ناس كتير احبطت عشان كان عندهم امل يكسبوا و بعد كده عملوا مسابقة على عربيتين الفاروميو بس مدخلتش المسابقة دى , بس ملحوظة : الانترنت ايامها مكنش زى دلوقتى كان دايل اب صباح البطء يعنى و كان لسة استخدام النت فى مصر و الإعتماد علية فى الاتيان بالمعلومة مكنش اد كده علشان كده كان الاعتماد على الجرايد و المجلات دا كان شىء عادى جدا , و افتكر ساعتها من كتر جهل شريحة كبيرة من المصريين بالعربيات و اشكالها كان فى اشاعة انو فى واحد جاب هيونداى اكسل و شال اللوجو بتاعها من عل شبكة و الدركسيون و حط لوجو اوبل و باعها لواحد على انها اوبل فكترا بنفس ثمن الاوبل و الله اعلم بحقيقة هذة الاشاعة
    المهم انى كان عندى كل اعداد مجلة اخبار السيارات لدرجة انها مليت صناديق عندنا فل بيت و اهلى اشتكوا منها و ماكانوش لقينلها مكان لأنى مكنتش بحب افرط فى ولا عدد و كنت بفلى اخبار السيارات يعنى كنت بقراها كلمة كلمة و حرف حرف و ساعات اكتر من مره لدرجة انى حفظت كل الماركات و الموديلات و كان اى حد يسألنى عن اى عربية اقوله موتورها كام سلندر كام سى سى كام حصان و العزم كمان تخيلو كام نيوتن/متر كنت حافظ الارقام عن ظهر قلب زى ما بيقولوا و مواصفات العربية و نظام التعليق فيها و هى جر امامى و لا دفع خلفى و مميزاتها و عيوبها و اسعارها و كنت بحب اعمل مقارانات بينها و اقول انهى الاحسن من وجهه نظرى
    و أفتكر كمان انو ساعات لما كان ملحق السيارات بتاع الاهرام او اخبار اليوم بيكون العدد حلو كنت بحتفظ بيه برضو سنين من غير ما افرط فيه لدرجه ان ورق الجرايد كلنا عارفين انو مع الوقت بيصفر يعنى لونه بيقلب اصفر , اهو انا كان عندى اعداد من الملاحق دى اصفرت من الزمن و كنت لسه محتفظ بيها برضه , على ما افتكر كان فيه عدد كان كله عن العربيات الدفع الرباعى اللى هى ال4*4 دا انا احتفظت بيه لحد ما تحلل تقريبا
    و شاء القدر ايضا ان يتوفى واحد من اعمامى رحمة الله عليه فى نفس هذة الفترة و الذى كان الله يرحمة يحب ميكانيكا السيارات و بيفهم فيها فلما توفى ترك مكتبة من الكتب كلها عن ميكانيكا و هندسة السيارات باللغة العربية مشروح فيها كيف يعمل الموتور و فكرة الكوبلن و الكورونا اللى هى بالعربي التروس الفرقية و كل ما يخص ميكانيكا السيارات و كان ابنه مش هاوى و مش غاوى هذة النوعية من الكتب فاختها انا بعد علمة طبعا و قعدت افليها هى رخرا كلمة كلمة و حرف حرف لدرجة انى عرفت حاجات مش ممكن اى حد عادى كده يعرفها زى مثلا موضوع الكرونا دا اللى هو فى عربيات الدفع الخلفى بيشتغل ازاى و ازاى يخلو العربية فى الملفات تكون الكاوتشة الخلفية اللى فى الزاوية البعيدة الواسعة تلف اسرع من اللى فى الزاوية الضيقة علشان الكاوتش مايتنحلش و يدوب بدرى و ميعملش صوت احتكاك بالارض اثناء دوران العربية الدفع الخلفى و هكذا و وصلت لمرحلة من فهمى للميكانيكا انى كنت ساعات ببتكر افكار ميكانيكية جديدة زى فكرة بديلة لفكرة الكوبلن يعمر اكتر و صيانتة اقل و هكذا و لكن هذه الابتكارات لم ترى النور و ظلت حبيسة خيالى و الله اعلم ما مدى نجاحها ان نفذت
    و طبعا بعد تطور خدمات الانترنت فى مصر منذ زمن و اصبح الولوج سهلا و التصفح سريعا باتت أخبار السيارات و كل ما يخص السيارات من علوم و أخبار و مقارنات و فضائح امرا سهل الوصول اليه , و الحقيقة انا من ضمن الناس الشرهين جدا فى معرفة كل ما يخص السيارات على الانترنت و ممكن اقعد بالساعات لا اشعر بالوقت اثناء الابحار فى محيطات النت
    و كنت بحب رسم العربيات جدا لدرجة انى كنت برسم كتير اوى ايام ما كنت فل مدرسة و كانت رسوماتى بتعجب زمايلى و مره فيه واحد زميل ايام تالته ثانوى طلعلى ورقة من محفظته فيها رسمه انا كنت راسمها من عدة سنوات قبليها و انا مكنتش فاكر انا رسمتها امتى و قالى انه لسه محتفظ بيها من كتر ما هى عاجباه و قعد يتفرج عليها و ام مرجعها تانى محفظته , و لحد دلوقتى بعد ما اتجوزت الحمد لله و انجبت طفلا مازلت احتفظ ببعض رسوماتى فى صندوق لتذكرنى بايام الشباب و المراهقة
    و عامتا انا من اشد المعجبين بالسيارة السوبارو عامة و امبريزا خاصة لتميزها فى افكار الموتور و التعليق الثورية و طبعا البورش و اللكزس و الهوندا لتميزها فى جودة الصناعة و البى ام دبليو لتميزها فى تصميمتها و الجاجوار و المازيراتى و الفيرارى لتميزها فى جمال الصالون الداخلى و التابلوه و غيرها كثير من السيارات و الماركات فانا ارى ان كل سيارة لها ما يميزها و ما يعيبها

    ثانيا : انا ركبت و سقت قبل كده عربيات ايه ؟: أول عربية سوقتها و هى دى اللى اتعلمت عليها السواقة كانت السيات 132 الالفين 2000 سى سى , و احب اقول ان فيه ناس كتير ببساطة بتكره الفيات بكل موديلاته القديم منه و الجديد و ليهم اسبابهم , لكن انا حتكلم عن ال132 من وجهه نظرى , العربية دى تحس انها عربية فعلا مش لعبة يعنى لو سوقت مثلا اكسنت و لا ريو ولا سيينا و نزلت منها و سوقت 132 حتحس انك كنت راكب لعبة زى العربيات اللى بتخبط فى بعض فى الملاهى , ال 132 دى كانت عربية تقيلة و ابعادها كبيرة كانت دبابة , عربية معموله فى الثمانينات و العربية دى بعناها لواحد من اعمامى و هى لسه معاه لحد دلوقتى سنة 2013 (تقريبا 30 سنة شغل خدمة شاقة و سفر) لسة شغالة و ماسكه نفسها و بحالتها , عمى ده كان معاه مرسيدس زلموكة و باعها و كان بيزن علينا نبيعلوا ال 132 هو و احد تانى من اعمامى كانوا بيتخنقوا عليها كل واحد عايز يشتريها لحد ما رضخنا لحكم الزمن و الرغبة فى التجديد و بعنهالوا , و للأمانة العربية دى ماكنتش بترضى تطلعاتى و حبى للعربيات لأن انا كان دماغى فى جولف قديمة او سيفيك قديم او بى ام دبليو الدبانة.
    عربيتى التانية كانت برضو فيات بس المرادى فيات سيينا موديل 2002 تقفيل مصرى , اشترناها مستعملة سنة 2005 من سوق العربيات اللى فمدينة نصر يوم جمعة , كانت حالتها ممتازة و متكيسة و نظيفة , كانت ماشية 30 الف كيلو , العربية دى انا كنت مالكها يعنى كانت باسمى , كانت طبعا انعم من ال132 , دركسيونها و فتيسها ناعمين اوى بس موتورها كان ضعيف 1400 سى سى و حسيت انو النقلات (التروس) بتاعت الفتيس معمولة بنسب معينة عشان تدى عزم مش قوة و دا طبعا عشان تغطى على ضعف الموتور يعنى علشان اوصل لسرعة 100 كيلو/ساعة فقط لازم ال ار بى ام يكون على 3.5 على الغيار الخامس و دا طبعا على خلاف عربيات تانية ممكن ال 100 كيلو دول يجو على ار بى ام 2.5 لو اقل على الخامس برضة ,
    و العربية دى كان فيها مشكلتين كرهونى فيها , اولا هى كانت خفيفة على الارض مش ثابتة و دا عشان هى كنزه (عكس عريضة) و عالية عن الارض و شنطتها كمان عالية (مركز الثقل مرتفع) و بعدين وزنها خفيف و نظام التعليق و العافشة بتاعها ماكانش بيدعم الثبات , اما العيب الثانى انها كانت بتسخن و فى اخر ايامها معايا قبل ما ابيعها للميكانيكى بتاعى كانت تقريبا لازم تسخن كل اسبوع مره , مشكلة السخونية دى فل سيينا عامتا شىء عادى و لكن كانت عندى المشكلة دى زايده عشان الرادياتير كان مخروم بيسرب مية و دا من حادثة انا كنت عملتها و بدل ما اغير الرادياتير , استرخصت و لحمته , المهم انا قبل ما ابيعها غيرت الرادياتير بواحد جديد و موضوع السخونية ده انتهى لأجل غير مسمى بس انا كنت خلاص قرفت منها و قررت ابيعها.
    من العربيات اللى سوقتها كتير بس ماكنتش بتاعتى كانت بتاعت اختى هى الفيات بونتو , تحس ان العيلة دى واخدة توكيل فيات , المهم , البونتو افضل حالا من السيينا بمراحل , و حسيت ان نقلات البونتو معمولة بنسب معينة عشان تدى قوة مش عزم (عكس السيينا) و دا طبعا عشان البودى بتاع البونتو صغير و شنطتها صغيرة فمش محتاجة عزم زى السيينا و ده انعكس على ادائها و تسارعها بالإيجاب , و كمان البونتو عربية ثابتة نسبيا على الطريق بس يعيبها صغر حجم شنطتها , مش حتحس بالموضوع دا غير لو حتسافر مع عيلة , حتنسى البونتو اصلا و تروح تستلف عربيت واحد صاحبك يكون شنطتها اكبر , غير كدا هى سقفها عالى , اعلى من السيينا و ده معناه راحة فى الجلوس
    كان فيه عربيات تانية عندنا فى العيلة زى الفولكس فاجن البولو موديل 94 و البوينتر و الهيونداى جيتس بس عشان ماسوقتهاش كتير فا مش حتكلم عليها

    ثالثا : انا ليه بعت عربيتى اللى قبل البى واى دى و حبيت اغير ؟ : زى ما قلت قبل كده و اتكلمت عن مشاكل السيينا
    رابعا : ايه البدائل اللى كانت قدامى واللى كان سعرها قريب من ال بى واى دى و حكمى عليها : أهوا دا الكلام المهم و المفيد , الخيارات المطروحة امامى ساعتها و اللى كنت اقدر اشتريها كانت
    1- الشيفرولية لانوس
    2- الهيونداى فيرنا
    3- الرينو لوجان
    4- البروتون ساجا
    5- الاسبرانزا a516
    6- الاسبرانزا m11
    7- البى واى دى f3
    8- نيسان صنى (مستعمله)
    كان ثانى تفكير ليا بعد عربيه حتعرفوها من كلامى بعدين انى اجيب نيسان صنى مستعملة من 2008 و انت طالع لحد كسر الزيرو , كنت بقول اهو عربية يابانى احسن من الكورى و الماليزى و الصينى و الفرنساوى مع احترامى لكل هؤلاء جميعا بس اليابانى يابانى برضه , و اسم نيسان اسم مرموق جدا , كفاية تقول انك راكب نيسان , حتى لو كان توك توك بس ماركة نيسان , يعنى من الاخر الماركة ليها ثمن , انا فاكر انو كان فى عربية 4*4 نزلت مصر بماركتين هما الشيفرولية فرونتيرا و الايسوزو رودايو , نفس العربية هى هى بالملى بس مغيرين الشعار بدل شيفرولية بقى ايسوزو و بالتالى كانت الشيفرولية اغلى من الايسوزو (بفرق يتحدد على حسب سوق العرض و الطلب فى المعارض طبعا و ليس الوكيل) عشان اللوجو بتاع شيفرولية على العربية بس كده , و برضه فى حاجة تانية انو قطع غيار اليابانى معمرة , اه صحيح غالية بس ثمنها فيها و دى كانت ميزه فل نيسان , و حاجة تانية ان شكل النيسان كان عاجبنى , عربية ليموزين بحق , كبوت طويل و شنطة كبيرة و فوانيسها الامامية شبه فوانيس المرسيدس شبح الجديدة , طبعا انا بتكلم على صنى موديل 2011 بعد ما غيرو شكل الفوانيس الاماميه بس
    بس كان فيه عيوب برضه , مفيش عربية كامله , حديث الناس كلها عن النيسان صنى انها بتاكل بنزين , معدل استهلاك عالى , و انا اتأكدت من الكلام ده بنفسى , فانا شغال فى مشروع فى التجمع الخامس و فيه سواقين كتير بتجبنا و تودينا للمشروع و كل شهر السواقين دول بيجمعوا فواتير البنزين عشان بيصرفوها من الشركة , اكثر عربيات بتستهلك بنزين هى النيسان صنى , احنا عندنا سواقين على ميتسوبيشى لانسر بومه و تويوتا كرولا موديلات حديثة و تيوتا ياريس و رينو لوجان و هيونداى اكسنت اللى قبل ال ار بى و هيونداى النترا و كيا سيراتو الجديدة , كلهم اجمعوا بما فيهم ملاك النيسان نفسهم على ان النيسان بتستهلك أكثر من اى عربية 1600 سى سى بفارق محترم , الأرقام مش حاضرة فى دماغى دلوقتى عن معدل الإستهلاك بس ممكن اسألهم تانى , العيب الثانى ان الكنبة ورا ديقة (مديئه على رأى اللمبى) و دا عيب مش خطير اوى يعنى ممكن الواحد يتعايش معاه.
    المهم انا مهتمتش بالكلام دا , قلت دول سواقين بيعملوا كل يوم كيلو كتير و يفرق معاهم موضوع البنزين ده اوى , انما انا عربيتى حتكون استهلاك اسرة و محدش حيركبها غيرى , يعنى كلها مشاوير من بيتى اللى فمصر الجديدة لبيت والدى اللى فمصر الجديدة برضو او لبيت حمايا فمدينة نصر الخ , يعنى كلها مشاوير فل اريا جنبيا قريبة و مش خسارة فى عربيتى الحلوة بنزين العمر كله و قلت خلاص اروح اتفرج عليها الاول زيرو علشان لما اروح سوق المستعمل ابقى عارف شكلها ايه و صاحبها مغير فيها ايه , انا طبعا لو كنت اقدر على ثمنها زيرو كنت اشتريتها زيرو و ريحت دماغى , المهم رحت معرض القرش اللى جنب الميريلاند , لقيتها وقفه عروسة هناك بس لاحظت حاجة دايقتنى فى التقفيل المصرى ان زراير الزجاج الكهرباء سوداء مش عليها اى رسم توضيحى و مبتنورش و شكلها فقير , دا الفيات سيينا تقفيل مصرى اللى كانت معايا كان زراير الزجاج الكهرباء (امامى فقط) كانت بتنور و عليها رسم توضيحى زى سهم كدا و حركات , بس قلت مش مشكله مش حاجة كبيرة يعنى عادى مش قضية , المهم نيجى لبيت القصيد و المشكلة اللى فضلت معايا طول مانا فى فترة البحث عن عربية الا و هى مشكلة الأوفر برايس.
    الأوفر برايس over price : دى يا حضرات مشكلة المشاكل فى السوق المصرى , يعنى العربية تكون ثمنها عند الوكيل حاجة و فى المعارض حاجة ثانية , ليه , عشان الطمع بعيد عنكم (و يقولك اصل ده سوق و عرض و طلب), عربيات كثير اوى لو رحت سألت عنها عند الوكلاء مش حتلاقيها و لو لقيتها حيقولك إستلام بعد ثلاث شهور و ممكن ستة شهور و ممكن تعض تستناها العمر كله و تسمع من رجل المبيعات عند الوكيل كلام خايب زى اصل الشحنة فل جمارك , اصل احنا بنستورد على اد الطلب , و اشتغالات ملهاش اول من اخر , و الحقيقة انه فيه سوق سوداء للعربيات فى مصر ,و بعض الوكلاء للأسف مشتركين فى صناعة هذة السوق و كله بيدور على مصلحته و مكسبه , و العربية بتغلى عن ثمنها الأصلى خمس تلاف و عشر تلاف و خمستاشر الف و لا نهاية لذلك , طول ما فى ناس ساذجة و سهل ينضحك عليها أو الفلوس بالنسبالهم مالهاش قيمة و ماتعبوش فيها , حيبقى الواحد مستعد يدفع اى سعر مبالغ فيه لمجرد انه يمتلك عربيت احلامه , المهم طبعا ان الاوفر برايس دا بيأثر على سعر المستعمل كمان , و اكثر حاجة تغظنى انى لما اقرا سعر العربية فى المواقع المحترمة على النت حاجه و انزل السوق الاقيها بتتباع بفرق اعلى كثير عن سعرها المعروض و المعروف , بس اسمى حنست نفسى بالعربيه و منيت نفسى بيها على اساس ان ده سعرها و لما انزل السوق الاقيه حاجة تانيه , المهم قلت سيبك من المعارض و انزل سوق الجمعة و شوف المستعمل أخباره ايه.
    نزلت سوق مدينة نصر يوم الجمعة و كان هدفى حاجة واحدة : النيسان صنى , و كانت النتيجة كالتالى : معظم الصنى اللى فل سوق متهانه و طلعان عينيها العربية , و الصراحة بعد ما شفت الزيرو صعب عليا اجيب مستعمل صالونه متسخ و مبقع و تابلوهه مشقق و مقشر و صاجه مخبط و مجرح و فوانيسه مشرخه و مكسوره و اللى راشش جنب العربية واللى راشش ال ايه نظافة و ما خفى كان اعظم , لسه بقى ماروحتش كشفت عل موتور فى اى بنزينة شفت حالته كام فل ميه , و يبقى حظك كويس لو طلع حالته 80% أو 70% ! و لسه ماشوفتش العفشه و يبقى حظك كويس لو لقيتها محتاجة تغير مساعد واحد بس او كوبلن الخ و لسه مكشفتش عل شاسيه و يبقى حظك كويس لو كان واخدله مطب على سرعة معوجش الشاسيه بس خبطه باينه , المهم رغبت عن المستعمل و حسيت انى حرمى فلوس و مش حكون مبسوط بالعربية زى ما تكون زيرو , الزيرو زيرو برضه , و للأمانه جربت مواقع الانترنت فى الشراء مستعمل , يعنى يكون واحد عارض العربية على موقع و سايب رقم تليفونه و تكلمه و تتفق معاه على مكان تشوف فيه العربية و دا غالبا حيكون تحت البيت عنده أو جنب مكان شغله و لو عجبتك تشيل , بس لم أوفق فى حاجه و فل الاخر شكل الزيرو بزهوته بنظافته و كونك اول يد تملكها زغلل عنايا , دا غير ان المستعمل معظمه خوازيق و مقالب , يعنى مين حيبيع عربية حالتها محترمة و كويسة و هو راضى عنها , هى الحدايه بترمى كتاكيت , و لو كان فيه الخير مكنش رماه الطير , اكيد فيها خازوق , يعنى انا ححكيلكم على كام قصة كده بخصوص مقالب المستعمل , العربية السيينا اللى كنت شاريها قبل كده مستعمله برضة , بعد ما اشتريتها اكتشفت انها كانت عامله حادثة و وصلت للعظم الامامى بس كل دا كان متغطى ورا الإكصدام , و البونتو بتاعت اختى اشتريناها من واحد صديق والدى و من اقرب الاقربين و اكتشفنا ان الهانم بنت صاحب والدى اللى كانت معاها العربية كانت مبوظة الباور ستيرنج بتاع العربية , ازاى بقة , فيه فل بونتو زرار اسمه سيتى city ده بيساعد العربية انها تركن فل حتت الديقة و الركنات الصعبة , بيخلى الباور ستيرنج يلف اكتر من العادى , فهى سابت الزرار ده متداس عليه علطول مع انه المفروض يتداس عليه بس عند الركنه فا بوظ الباور ستيرنج اللى هو اصلا كهرباء مش زيت و ده مشاكله كتير و لما باعولنا العربية , كانوا ملصمنها و بعد ما اشتريناها منهم ظهر العيب ( حسبى الله و نعم الوكيل) ست الاف جنيه فى التوكيل علشان يتصلح العيب ده و نجيب موتور باور جديد و بره التوكيل محدش فاهم فيها و محدش عارف يصلحها و هكذا , فقررت ابعد عن المستعمل قدر المستطاع , و لقيت نفسى سبحان الله بكره النيسان صنى مع انى كنت حاببها فل الاول و لقيت نفسى بقول دى بتاكل بنزين و احتمال بنزين 92 يغلى بعد ما غلو بنزين 95 الدور جى على ال 92 و بعدين دخلت على المنتديات المشهورة فى قسم النيسان لاقيت الناس بتقول ان النيسان صنى اللى عندنا فى مصر دى و لا يابانى و لا حاجه ده خط انتاج كورى و تجميع مصرى و العربيه ابعد ما يكون عن جودة اليابانى الاصلى بتاع بلدها و بعدين موضوع قطع الغيار المعمرة دى , اه صحيح معمره بس غاليه و البلد داخله على سنوات قحط و شد الحزام و مش عارفين سعر الدولار حيوصل كام و اسعار قطع الغيار حتنط تبقى بكام , هو الواحد ضامن شغله اللى هو مصدر رزقه اصلا , يا عم قول يا باسط.
    كده فيه عربيه من الثمانيه طارت عشان مشاكل المستعمل , فاضل سبعه زيرو , انتو وراكو حاجه , فاضيين يعنى تعرفوا بقيت القصه و حكايتى مع السبعه , طيب اكمل و اجرى على الله , نتكلم عن شيفرولية لانوس , اللانوس عربية فل سوق بقالها 12 سنة (اثنى عشر سنة) , ده عمر تانى , و هذة السنوات ميزة و عيب , ميزة انو طبعا حتلاقيلها قطع غيار بسهولة عند البقال يعنى دا انا سمعت انو بقا ليها قطع غيار صينى , و طبعا اكيد التجار استوردوا هذة القطع لرخص ثمنها على حساب جودتها , على اساس لازم نعرفه ان الصين بلد ال اتنين مليار نسمه بتعمل كل حاجه , الجيد و الردىء , يعنى مفيش مستوى موحد للجودة فى الصين زى مثلا الدول الاوروبية و بعض الدول الاسيوية , فل صين فيها الجودة درجات , و هذه السياسة الهدف منها تلبية الطلب على المنتج الرخيص , الصين عندها اتنين مليار بطن عايزا تطعمهم و تسد جوعهم , مش معقولة حتفكر تعمل قيود و قوانين صارمة على الجودة و تفوت على نفسها فرصة البيع و التصدير لطلب هائل و قوة شرائية هائلة مستعدة تتخلى عن قمة الجودة مقابل رخص الثمن , و هذه القوى الشرائية موجوده بالفعل فى دول عالم الثالث و الثانى , يعنى مل الاخر الفقراء اللى ملهومش حظ فى امتلاك السلع غالية الثمن عالية الجودة بيلاقوا حظهم جى مستورد من الصين , و انا اعتقد انوا اللى بيشتم فل صين حاجة من الاتنين اما فاشل و مش عارف ينافس فبيصب نتيجة فشله فى شتيمة الصين و اما ان يكون اخطأ توجيه شتيمته بدل من ان يشتم التاجر المستورد اللى استورد اردأ ما انتجته الصين , المهم نرجع تانى للشيفرولية اللانوس , زى ما بقولكم العربية ميزتها قطع الغيار و سعر اعادة البيع , اما عيوبها فى نظرى هى اولا انها عربية بقالها 12 سنة فل سوق خلاص تشبع منها يعنى حصلتلو حالت تشبع شرائى , دلوقت تشوف فل شارع بين كل عربية لانوس و عربية لانوس فيه عربية لانوس , اللانوس بقت اكتر مل بنى ادمين فل شارع , انا تحت عمارتى فقط راكن تلاته اربعة لانوس , ما بالك بالعمارة اللى جنبى , ما بالك بالشارع كله , الناس زهقت منها , انا زهقت منها من كتر ما بشوفها , يعنى ايام الشيوعية و الإتحاد السوفيتى اه كان ممكن تلاقى عربية بقالها خمسين سنه و لسة بتنتج هى هى لأن الصناعة ايامها هناك كانت تخطيط مركزى و ملكية عامة لوسائل الانتاج (ملك الدوله) و مفيش استيراد و مفيش منافسه فالشعب مقدموش غير عربية واحدة غصبن عنو حيجبها , مفيش اختيارات , فا ده مابيشجعش على الابتكار و التطوير و التجديد من أجل الصمود امام المنافسة الصعبة , لكن دلوقت فى ظل العولمة الإقتصادية و الأسواق المفتوحة و شعار الرأسمالية "دعه يعمل دعه يمر" اصبحت المنافسة شرسة مش صعبة بس يعنى شركة السيارات اللى مش حتطور و تجدد كل سنه او كل سنتين موديلاتها و تحاول تغرى القوه الشرائية بشتى الطرق حيكون مصيرها الخسارة و الإفلاس و حتشتريها شركة عربيات تانية تستولى على تكنولوجيتها و اسرارها و تستفيد بها , و امثلة على ذلك كثيرة و اسماء مرموقة و رنانه , عندك الفولفو و الجاجوار و اللاند روفر و اللوتس و الساب , هم بحق شركات مرموقة و محترمة و انتاجهم يحترم و كل شركة متفوقة فى اتجاه , فمثلا الفولفو متفوقة فى امن و سلامة الركاب و الماره , و لكن هذا لم يشفع لفولفو فى ظل إقتصاد السوق و المنافسة , و أخر المطاف بيعت لشركة جيلى الصينية بعد ان كانت بحوذة فورد , و على كل حال فطبيعة النفس البشرية انها تمل من التكرار و الإعادة و تسعى دائما للتجديد و تغيير المناظر و تقبل على كل ما هو جديد , و لكن , طبيعة السوق المصرية عندنا و طبيعة العقلية المصرية لها طابع خاص و كاريزما خاصة تميزها عن بقية الشعوب , قد تتشابة مع بعض الشعوب لتشابة الظروف و التاريخ و لكن تبقى مميزة على كل حال , فنحن يا سادة مازلنا متأثرين بالفكر الإشتراكى الناصرى القديم , و القديمة تحلى , و نقدس كل ما هو قديم , ففكر التجديد و التطوير عندنا للأسف يكاد يكون منعدم نسبيا , و لذلك طبيعى جدا انك تلاقى فى مصر سيارة تباع من 12 سنة و مازالت كما هى إلا تغيير بسيط لا يذكر , و أقرب مثال على ذلك الفيات ال 128 , شوفو العربية دى من السبعينيات يا أخوانا , و مازالت لها مريديها و محبيها مع كثرة مشاكلها و أعطالها و صعوبة قيادتها نسبة للسيارات الحديثة , و انا متاكد انو لو ال 128 كانت لسة بتنتج لحد دلوقت و بيطلع منها زيرو بنفس جودة القديمة الإيطالى بتاعت بلدها و بنفس صاجها من غير محاولة ترقيق الصاج لجعل العربية خفيفة و بتجرى و بنفس الموتور و كل حاجة كان زمان العربية دى من أكثر العربيات مبيعا فى مصر لحد السنه دى 2013 مع انها من السبعينيات , يعنى بقالها أكتر من 40 سنة نفس الشكل الصندوقى , و هو ده الفكر المصرى , و بعدين مصر من الدول اللى عندها سوق مستعمل عظيم للسيارات , يعنى تلاقى العربية بقالها 40 سنه و اتغير عليها مثلا قول اربع او خمس ملاك ليها و لسه ماشيه فل شارع بدخان عادمها و باصوات التزييق فيها , و على عكس دول تانيه كتير معندهمش سوق المستعمل بالطريقة دى زى عندنا , العربيه تعض خمس سنين أو عشر سنين بالكتير و تترمى فى مقلب العربيات الخرده اللى هو بعد كده بيجيلنا إستيراد من بره على انه قطع غيار استيراد فى سوق الحرفيين و غيره و يقلك دى عربية متقطعه , و ده سببه ظروف المعيشة الإقتصاديه لغالبية المصريين , فالمصرى بيدفع دم قلبه و شقا و تحويشة عمره عشان يجيب عربيه , و اللى يبيع دهب مراته و يجيب بثمنه مقدم عربيه املا انه يبقى يجيب لمراته غيره لما ربنا يكرمه و يخلص سداد الأقساط اللى عليه و هكذا , و لذلك المصرى مش بيحب يخاطر بفلوسه و دايما يخليه فل مضمون أوى (أضمن حاجه) حتى لو كان ذلك على حساب الشكل الخارجى و الإمكانيات الرفاهيه و التكنولوجية و الرغبه فل تجديد و الإحساس بالتميز , فالمصرى بيضحى بإحساسه بالتميز و الإنفراد و يروح يجيب عربيه نص الشعب المصرى راكبها و النص التانى بيفكر يجيبها علشان خاطر يخليه فل مضمون أوى و مايخاطرش و لو العربيه فيها عيب يبقى نص الشعب المصرى لبس العيب ده قبل ما هو يلبس فيه هو كمان , و يبقى كله لبس يا معلم و محدش احسن من حد , اما انا فطبعا من واقع حبى و عشقى للسيارات و معرفتى بتفاصيل كل عربيه , فانا بحب التميز و التجديد و التطوير و الإبداع و ببعد عن المكرر و الممل و عشان كده لو انطبقت السما على الأرض مكنتش حجيب اللانوس إلا إذا كانت أخر عربيه فل عالم ساعتها حفكر.
    نتكلم بقه على الهيونداى فيرنا , نفس الكلام اللى قلته عن اللانوس ينطبق على الفيرنا , موديل اكسنت قديم نزل لنا بأسم فيرنا , شكل قديم , صالون قديم , انتشار يزهق الواحد منها مايبقاش عايز يشوفها , زياده على ذلك سمعتها فل ثبات على الطريق و انا اصلا متعقد من موضوع الثبات و الرسو ده من العربيه الفيات سيينا اللى كانت معايا فا مش حكرر الغلطه تانى و اجيب عربيه بتعوم منى فى الطريق على سرعة 120 و عشان اخد بيها ملف عادى زى نزله المقطم على صلاح سالم العروبة مثلا لازم اهدى السرعة خالص لحسن العربية تتقلب و ده احساس ان العربيه مش مبنيه صح او مش متصممه صح , عربيه معيوبه , موتورها مش لايق فى قوته مع جسم العربيه (الخفيف جدا) اللى هو الاخر مش لايق مع طبيعة الشوارع و تنوعها , دا غير ان قعدت الكنبه الورانيه ضيقه و هى عربيه واطيه على الأرض (سبحان الله هى عربيه واطيه على الأرض و مع ذلك مش راسيه و مش ثابته يعنى خلطه غريبه متناقضه) بتاكل مطبات بلدنا بسهوله و لازم تعرض العربيه عشان تعدى مطب و هكذا, نقطه اخيره مهمه جدا : فيه عربيات بتبيع اسم و فيه عربيات بتبيع اوبشن , يعنى ايه , يعنى مثلا الهيونداى بتبيع اسم , يعنى ممكن تلاقى العربيه غاليه بس مافيهاش اوبشن عالى عشان الماركه لوحدها ليها تمن , اللوجو او البادج اللى عل عربيه ده له تمن , فانت بتدفع التمن ده كله عشان حتة البلاستيكه اللى ملزوقه عل شبكه و عل شنطه ورا و لكن العربيه فاضيه مافيهاش اوبشن و ممكن تلاقى مثلا الزجاج بتاعها مش كهربا يعنى بينزل و يطلع ببكره زى زمان و مع ذلك العربيه غاليه و ممكن تبقى عربيه نفسها تعبانه كمان , انما فيه عربيات تانيه بتبيع اوبش , يعنى تمن العربيه هو تمن اوبشنها.
    طيب و الرينو لوجان , , العربيه دى انا كنت فعلا حشتريها , طبعا انا مكنش عاجبنى شكلها من بره خالص , شكلها قديم قوى و خطوط تصميمها قديمه محدش يقدر ينكر ده , خاليه من الانحناءات و البومبيهات و كلها زوايا حاده من اول شكل الابواب مرورا بالشنطه و الكابوت و حتى الفوانيس , بس حاولت أحبها و كان عاجبنى شكل فوانيسها الخلفيه و الكروم اللى فل شنطه اهو حاجه بصبر نفسى بيها و خلاص , اما بالنسبه للصالون فهى عربيه واسعه جدا جدا جدا من جوه , اه و الله العظيم , جدا , سقفها عالى مديها وسع جميل فل صالون , و شنطتها واسعه , مع انها من بره مايبانش عاليها انها واسعه اوى كده و ده معناه ذكاء فل تصميم و الإستغلال الأمثل للمساحات , و عاليه عن الأرض بشكل ملحوظ , يعنى مل الاخر عربيه عمليه عائليه , و لكن مش شبابيه اوى و طبعا مش رياضيه خالص , المهم فعلا نويت و قررت اروح الوكيل اشوف ايه نظام الحجز و الإستلام , رحت فرع ميدان المحكمه مصر الجديده اللى هو ادام محكمه مصر الجديده عدل , روحت انا و المدام (ما هى لازم تتفرج برده) و ابنى الرضيع شايلينو فل كاريكوت و كان نايم , رجل المبيعات هناك كان ذوق جدا فوق العاده و بشوش و يحسن التعامل مع العملاء , المهم مالاقيناش العربيه معروضة فكتر خير الراجل كان معاه اختها راكنها بره المعرض تقدر تقول فل معرض برضه على اساس ان المعارض دلوقتى بتستغل الرصيف العمومى (اللى هو ملكيه عامه ملك الشعب) و بتعرض عربياتها عليه عادى و اهو كله بالرشاوى للبلديه و المحليات و يجعله عامر , و بعدين , خلاص , تمام , على بركة الله , عايزين نحجز , مفيش حجز مانيوال , ليه يا عم مفيش مانيوال , لو حجزت حتستلم بعد ست شهور ان مكنش اكتر , اه , اهلا اهلا , خير , ليه ان شاء الله , ست شهور ليه , و ده على الأقل كمان , يعنى ممكن اكتر من ست شهور , طيب , شىء جميل أوى و الله , طيب و الاتوماتيك , ده بقه يا فندم بعد تلات شهور ان مكنش اكتر برضه , حضرتك لو عايز تستلمها دلوقتى ممكن تشوفها فل معارض و الموزعين المعتمدين , طيب شكرا سلام عليكم , من ساعتها و انا جبت كل نمر الموزعين المعتمدين و اللى مش معتمدين و المؤمنين و اللى مش مؤمنين و المتوضيين و اللى مش متوضيين و الأحياء منهم و الأموات و القريب و البعيد و قعدت بقه مابعملش حاجه غير انى اكلم فيهم مل موبيل لحد ما الكريديت خلص و من موبايلى التانى لحد بردوا ما الكريديت خلص و تليفون البيت و و و ... المهم اتسليت عليهم و المفاجأه كانت كالتالى : مفيش رينو لوجان مانيوال فى مصر كلها و بأى سعر , المانيوال كان موجود و خلص و بعتنا نجيب تانى , و انت عامل ايه دلوقت , و الأتوماتيك بيتباع بأوفر برايس over price خيالى , يعنى مثلا فل الوكيل ب(79) تسعه و سبعين الف و كسر , تلاقيها فل معرض ب(88) تمنيه و تمانين , فرق تسعة الاف جنيه زياده على تمن العربيه , خخخخخخخخخخخخخخ , حقى و لا مش حقى , حقى و لا مش حقى , حاجه تجنن و ادى حال بلدنا , طبعا انا قعد يدور فدماغى مخططات و نظرية المؤامره و الماسونيه العالميه و الصهيونيه الامبرياليه و الحملات الفرنسيه و كلام كبير كده و فل اخر صرفت نظر عنها عشان انا اصلا مكنش معايا غير تمن المانيوال منها , تقوم تقولى هات الاتوماتيك و بأوفر برايس كمان , و انا الصراحه مش عايز اخد قرض و اتداين للبنوك , الدين الربوى وحش و ميخليش الواحد يجيلو نوم دا غير التعثر فل سداد و بلاك ليست بنك مركزى و حنحول ورقك للشئون القانونيه و حنرفع عليك قضيه و هناخد منك العربيه , و على ايه و على رأى أحمد مكى فى فيلم "طير انت" لما دنيا سمير غانم قعدت تردحله فل كباريه قالها " بس و على ايه بربربربربربر" بناقص , دا غير ان انا شوفت فيديوهات على اليوتيوب لواحد مهندس مصرى عامل مقارنه بين اللوجان و البروتون ساجا متقسمين على كذا حلقة فيديو و الصراحه كان ممسخر اللوجان و مبهدلها فى تقريره و كله بالصوت و الصوره كمان و مطلع اللوجان دى عربيه زباله و تشطيبها و خاماتها وحشين و تقفيلها زباله و خش و شوف و اتفرج و احكم , يعنى مثلا المسمار اللى بيربط الاستبن تخيلو انو فل لوجان معمول من البلاستيك مش مل حديد , فك المسمار و شوف.
    نتكلم بقه عن البروتون ساجا , العربيه دى مش كاريزما و وشها مش فوتوجينيك , ملهاش شخصيه , حاجه مايعه كده , يعنى ايه , يعنى شكلها من بره مافيهوش اى حاجه مميزه , على عكس اخوتها الجين تو و الواجا و البيرسونا شكلهم مميز و تصميمهم جذاب , و كمان صالونها و تابلوها فقير و مش حلو و تحس و انت داخل الصالون انك داخل قبر , أسود فى أسود يعنى , موضوع الشكل ده موضوع نسبى و يختلف من شخص لأخر و ممكن اللى انا اشوفه وحش ممكن غيرى يشوفو حلو بل فاتن (فاتن مين , ما علينا , المهم) , موضوع الشكل ده مش هو السبب الاساسى لرفضى للعربيه , مع ان البروتون طالع عليها سمعه كويسه انها عربيه ثابته على الطريق جدا و راسيه عل ارض جدا و مواتيرها سعتها قليله بس قوتها كبيره , يعنى موتور 1300 سى سى بيديلك قوة موتور 1600 سى سى و دى ميزه و ده بفضل استعانة بروتون بتكنولوجيا المواتير و التعليق بتاعت شركة لوتس الانجليزيه , يعنى عربيه شبابيه و ممكن تمشى عائليه , هى حجمها مش كبير اوى بالعكس انا شايف ان حجمها صغير و شنطتها مش واسعه بس موضوع الحجم ده ممكن يكون ميزه للى مابيعرفش يتعامل مع عربيه ابعادها كبيره و بتقرفه فل ركنه و كده , بس السبب الاساسى لرفضى لها هو موضوع أسعار قطع الغيار و مدى توفرها , انا ممكن ادفع فى قطعة غيار مبلغ محترم لو العربية يابانى او المانى و قطعة الغيار اصلى بتاعت العربية , لكن عربيه ماليزى و قطع غيارها ممكن ماتلاقيهاش و تعض توفق لها قطع من لانسر و كده , دا غير مقبول , فا موضوع الشكل من ناحيه و قطع الغيار من ناحيه اخرى خلونى اصرف نظر عنها.
    نخش بقه على الاسبرانزا m11 : حبيبة قلبى من جوه , هى عربيه تتحب الصراحه , ابدأ منين و لا منين , أولا شكلها تحفه تصميم بينفارينا الإيطالى , فوانيسها جميله و انسيابيتها و اكرة الباب الخلفى اللى مستخبيه فى القايم بتاع العربيه زى الالفا روميو كده يوحى لك ان العربيه كوبيه و يعنى مل الاخر عربيه شيك , تابلوها شيك اوى و نور عداداتها مميز (أحمر شيطانى , هما بيقولوا عليه كده , تحس انها عربيه شريره و شقيه) , طيب و الموتور , ميه و سبعتاشر حصان يا معلم 117 hp , موتور نمساوى مشهور عالميا , مش حتلاقى عربيه موتورها بالقوه دى و بالسعر ده , طيب و الثبات , حدث و لا حرج , مل اخر العربيه دى اكتر عربيه ثابته فيهم كلهم , ثباتها على الطريق يتخطى ثبات البروتون ساجا و النيسان صنى و الدايو لانوس و طبعا من غير كلام الفيرنا و الرينو لوجان و كمان البى واى دى و البونتو .... مش حنخلص لو قعدت اتكلم عن ثبات العربيه دى , و سبب هذا الثبات الرهيب انو اولا العربيه دى عريضه جدا , عرضها قرب على متر و تمانين سنتى 1.8 , و هى بذلك اعرض عربيه فيهم , ثانيا سقفها واطى (مركز ثقل منخفض) , ثالثا و ده الاهم هو نظام التعليق اللى فيها و خلى بالكم من الكلمه اللى جايه دى : نظام تعليق مستقل متعدد الوصلات (ذو أربع وصلات) , ايه؟ , حد فهم حاجه ؟ , الموضوع ده صعب شرحه بالكلام لازم تشوف نموذج او صورة مجسم امامك لنظام التعليق ده و حبذا لو كان متحرك عشان تعرف فكرتو , ببساطه كده كلما زادت عدد الوصلات كلما زاد الثبات على الطريق , و انا لما دورت على النت لقيت ان نظام التعليق ده مش موجود غير فل عربيات الغاليه اوى فقط زى الأودى و الكاديلاك , دا شىء جميل خالص , و بخصوص موضوع الثبات ده فيه واحد من ملاك العربيه ديه حكالى موقف اتعرضلو و الحجه على الراوى يعنى انا ماشوفتش بعنيا بس هو اللى بيقول انه اتعرض لبقعة زيت على الطريق الدائرى و العربيه فضلت تخمس منه لدرجة انه ساب الدركسيون و قعد جواها يتفرج و من كتر ما خمست حوالين روحها كان خلاص هو قاعد جوه بيقول يلا اتقلبى و ريحينا و خلصى بس هى متقلبتش و اخرت المتمه خبطت من شنطتها كده فى عربيه نقل معديه و طبعا كانت خبطه محتاجه سمكرى و الموضوع خلص فل اخر على مشوار للسمكرى بس العربيه متقلبتش , طيب و الصاج , بردو حدث و لا حرج , صاجها تقيل و سميك و قوى (أشد من صاج العربيات المنافسه) و ده مخلى وزن العربيه كبير يعنى قرب الطن و نصف و ده بردو مديها ثبات و مزود الثبات , و وزنها ده اتقل من عربيات كتير اكبر منها حجما , و بخصوص موضوع الصاج ده انا انتهزت فرصة انه واحد كان ركن العربيه دى قرب البيت عندى فسألته ايه اخبارها , من ضمن اللى قالهولى انه عمل بيها حادثه مع فيرنا و الفيرنا اتشيعت و عربيتو ال m11 محصلهاش حاجه يعنى شوية رضوض خفيفه كده , طب و الوكيل , ابو الفتوح بعد ما طلع من السجن فى قضيته الشهيره , طب و الاوبشن اللى فيها , مش موجود فى اى عربيه من المنافسين , سنسور نور عشان لما الدنيا تضلم او تخش نفق النور ينور لوحده , سنسور مطره عشان لما الدنيا تمطر و ترخ المساحات تشتغل لوحدها , وحدة رفع زجاج عشان لما تطلع مل عربيه تقفل زجاج العربيه كله بالريموت , ده غير الاوبشنز اللى موجوده فى اى من المنافسين , طب و قطع الغيار , الاسبرانزا عامتا انتشرت و كترت فل شارع بس طبعا مش زى الفيرنا و اللانوس و دا خلى قطع غيارها موجوده فى شارع دمشق و التوفيقيه و طبعا عند الوكيل دا غير الإستيراد و المتقطع , دا غير ان الموتور بتاعها مشترك فى كل موديلات الاسبرانزا اللى هى a516 ,m11,tiggo هو هو نفس الموتور الالف و ستوميه و دا معناه توافر قطع الغيار اكتر , و طبعا جنوط 16 و حاجه ابهه , عيوب العربيه دى ان عفشتها محتاجه تتربط كل شويه و للأسف فيه عيوب صناعه بسبب التقفيل المصرى عند توحه (ابو الفتوح) بس العيوب دى فرديه و مش فى كل العربيات و مش فى كل اصدارات السنين يعنى اول ما نزلت كان فيها عيوب صناعه اكتر من دلوقتى زى موضوع شربون الدينيمو اللى كان لازم يتغير , المهم قلت انزل اسأل عليها و افرج اسرتى عليها و اشوفهم حيستريحو فيها و لا لاء , أول ما رحت طبعا رحت على الوكيل فرع ابو الفتوح اللى فى شارع الحجاز فى مصر الجديده قدام بنزينة موبيل الناحيه التانيه ما بين ميدان المحكمه و ميدان هليوبلس , ملقيتش العربيه معروضه , دخلت سألت رجل المبيعات و هو كان شاب سنه صغير قالى العربيه مش بتتباع دلوقتى و مفيش حجز عليها و مش عارفين ايه الموضوع اصلا , هى حتنزل تانى و لا لاء , و أخبار العربيه دى من الاسرار العسكريه , و يظهر انو محدش عارف اخبارها غير ابو الفتوح نفسه و مدير المخابرات العامه المصريه , حاولت اعرف منه اى حاجه و فشلت , بس هو كان شاب ذوق اوى , و لما لقانى عارف كل حاجه عن العربيه انبهر بمعلوماتى عنها و قرر انه يفرجنى عليها , اصله هو نفسه معاه واحده بتاعته و راكنها بره المعرض , سبحان الله , لاحظت انه غالبا بيبقى رجل المبيعات يملك سياره نفس اللى بيبعها زى ما يكون الشركة بتدهالو كنوع من الدعايه او بتسهيلات خاصه اكمنه من رجالتها , ما علينا كلها تكهنات , المهم فرجنى عل عربيه و عجبتنى اكتر , شوفت قعدتها من قدام و شفت شنطتها , شنطتها عاديه يعنى مش كبيره , و بعدين لما دخلنا صالة العرض تانى قالى كلمه معرفتش معناها غير بعدين , قالى ان العربيه دى تنفع لواحد معندوش اسره او عنده اسره صغيره يعنى لسه ولاده صغيرين و انه لما حد بيجلس فل كنبه ورا هو مش بيبقى مستريح فى قعدته قدام , المهم انا مخدتش بالى من كلمته دى و قررت ادور عل عربيه فى المعارض و الموزعين , و نفس الكلام برضه , العربيه مش موجوده و محدش عارف عنها حاجه و محدش عارف حتنزل امتى و لا هل هيه اتوقف انتاجها و لا ايه , و فى هذه الظروف كان فيه اشاعات قويه فل سوق عل عربيه دى , منها ان العربيه بتتهرب لغزه فى فلسطين عبر الانفاق و ان انتاج التلات شهور اللى فاتو كلهم اتهرب لغزه عبر الانفاق , و ان اهل غزه بيدفعوا فل عربيه دى سعر اغلى كتير من سعرها فى مصر و هو ده اللى خلى التجار يبعتوها غزه املا فى الربح الاكثر , مش عارف سمعت انو بيدفعو فل عربيه الواحده خمسة عشر الف دولار أو اكتر مش فاكر الرقم , طبعا انت لو حولتو للمصرى حتلاقيه اغلى من تمن العربيه بكتير , و فيه اشاعه تانيه ان العربيه فعلا فى خط انتاج ابو الفتوح واقفه على قطعتين غيار مش عارفين يجيبوهم من الصين عشان يكملو تقفيل العربيه و تبقى جاهزه للخروج من المصنع , و فيه اللى يقولك دى سياسة تعطيش السوق عشان العربيه سعرها حيغلى و هكذا , المهم كان فيه معرض بيدعى انه عنده العربيه بس مش عارضها هو مخبيها , المعرض ده هو شرين كار اللى فى مدينة نصر , كلمت الراجل بتاع المعرض , تحس انك بتكلم بقال أو لبان مش معرض عربيات , مش عارف الناس دى متعرفش اى حاجه عن خدمة العملاء و إسلوب الكلام مع العميل المحتمل , المهم الراجل قالى انى اجى ادفع التمن و يجيبلى العربيه فى نص ساعه و انا قاعد , طب انا عايز اتفرج عليها قبل ما اشترى , طب اشوفها , طب اعاينها , لا مفيش عنده الكلام الفاضى ده , انت تدفع و بعدين تستلم غميضى و لو دفعت عربون العربيه تيجى تانى يوم أو بعد يومين , قلتله صلى عل نبى , العربيه دى صينى و انا لازم اعاين العربيه الاول قبل ما استلم و اتأكد انه كله تمام و مافيهاش مشاكل ده حقى الشرعى مفيش حد بيستلم عربيه غميضى كده من غير ما يشوفها ده حتى لو كانت مرسيدس , لاقيته اتنرفز فل تليفون و صوته على و ورانى الوش التانى , و يقولى معلش عل لامواخذه , احنا حنكشف عل عربيه احسن منك (و تحسه كان عايز يقولى احسن من عشره زيك) طبعا قالى كلام مفيش داعى لنرفزة الناس اكتر من كده , انا طبعا اتنرفزت و كنت لسه حشوط فيه و اشتمه و العن اليوم اللى كلمته فيه بس لأجل حظه الموبايل بتاعى فصل شحن و احنا بنتكلم و قلت اهو كده يفتكر انى قفلت فى وشه السكه و ده كفايه مفيش داعى للشتيمه و لا البهدله و لا قلة القيمه , اخر مسمار فى نعش الحلم و القشه التى قسمت ظهر البعير زى ما بيقولو و اللى خلتنى اصرف نظر بجد عن الجميله ال m11 انى انا قولتلكو قبل كده فى كلامى عن النيسان صنى انى نزلت سوق المستعمل اللى فى مدينة نصر مش كده , فى نفس اليوم اللى كنت بدور فيه عن النيسان صنى , لاقيت واحد عارض ال m11 برضه , هو كان ماشى بيها عشر تلاف بس و عايز يبيعها , و كانت المفاجأه من غير تجربه السياره و لا حاجه , ركزو بقى فل كلام اللى حقوله ده , لما جلست فل كنبه الخلفيه لاقيت السقف بيحك فى راسى , ايوه و الله , السقف واطى لدرجه مستفزه لدرجة انه بيحك فى راسى من فوق , يا جماعه انا طولى تقريبا 173 سم يعنى قول 174 أو 175 بشعر راسى , فا انا مش طويل قوى و لا قصير إنما الطول العادى بتاع غالبيه المصريين , و ساعتها إفتكرت كلام الشاب بتاع المبيعات اللى فى ابو الفتوح لما قالى " العربيه دى تنفع لواحد معندوش اسره او عنده اسره صغيره يعنى لسه ولاده صغيرين و انه لما حد بيجلس فل كنبه ورا هو مش بيبقى مستريح فى قعدته قدام" , و يظهر ان اللى كان بيقعد وراه كان بيتضايق من السقف برده و بيضطر انه يزحلق جسمه لتحت بطريقه لولبيه عشان السقف ميحكش فى راسه , فا اخينا بتاع المبيعات بيضطر هو راخر انه يقدم الكرسى لقدام عشان يساعد اللى قاعد وراه على اللولبه قصدى الزحلقه للأمام, و هذا العيب كفيل بنسف حلم امتلاكى للعربيه اللى مش موجوده اصلا , و دلوقتى بس عرفت فلسفة اسبرانزا انها تخلى اكرة الباب الورانى فل قايم مش فل باب زى ما تكون عربيه كوبيه بكرسين بس , هى عايزه تقول يا جماعه العربيه دى مش عائليه , العربيه دى شبابيه.
    نتكلم عن الاسبرانزا ال a516 : غايظنى أوى شكل فوانيسها الخلفيه , مفيش فيها اى جمال , تحس ان الفراعنه ايام الأهرامات هما اللى صممو الفوانيس دى , شكل هندسى غريب , المهم العربيه دى من مميزاتها ان صاجها قوى و صالونها واسع و شنطتها كبيره و اوبشنها مش بطال و سعرها كويس و منشرة تاكسى يعنى اكيد قطع غيارها موجوده , و كمان العربيه موجوده عند ابو الفتوح بضاعه حاضره و استلام فورى يعنى مش حتدوخ عليها و تلف عليها المعارض و تحجز و تستلم بعد فتره و كده , و لكن من سؤالى عنها ملقتش ناس كتير بيشكرو فيها , و بالذات سواقين التاكسى , عفشتها ناشفه و ماتورها اللى هو بالمناسبه نفس ماتور ال m11 بيخرب بسرعه و بيروحو يغيروه بموتور ميتسوبيشى لانسر عشان يعيش و يستحمل , و المساعدين بتتغير لمساعدين ميتسوبيشى برضه , فركنت فكره شراءها على جنب و خليتها خيار ثانى لو ملقتش حاجه كويسه وعدله اشتريها.
    و أخيرا و بعد طول انتظار , حان الوقت للكلام عن البى واى دى اف 3 : اول من اشار الى للتفكير فى شراء البى واى دى كان الميكانيكى بتاعى , قالى دى عربيه ممتازه و فراملها اقوى من فرامل التويوتا و مدح فيها , بس انا كنت كاشش منها عشان الماركه بتاعتها , ايه بى واى دى ديه , يعنى ايه , مسمعناش عنها قبل كده و فيه ناس كتير بتستغرب اسمها لانه مش متداول , و بعدين طبعا انتو عارفين الشعب المصرى ابن نكته و يحب يسخر من كل حاجه , زى مثلا السخريه من الحروف اللى مكتوبه على لوح المرور بتاعت اى عربيه , تلاقى المصرى ماشى فل شارع عمال يقرا الحروف اللى على اللوح , هما اصلا الحروف مفرطه يعنى مش ملضومه فى بعض عشان تعمل كلمه , بس المصرى لضمها فى خياله و اضحك بقى على الاسامى و الكلمات و ساعات الكلمه تبقى اسم حيوان و ساعات تبقى شتيمه أو وصف مش كويس و ساعات تبقى كلمه مميزه و هكذا , نفس الكلام عن شعار البى واى دى , بقت بيض , ايوه بيض , فتلاقى اللى بيقولك شوف العربيه البيض دى , و العربيه البيض راحت , العربيه البيض جت و هكذا , و تصدقوا ان هذا السبب هو اللى كان مخلينى اصرف نظر عنها طوال فترة بحثى عن عربيه , انا قلت على اخرت الزمن اركب بيض , يع , و بالمناسبه احب اقولكم ان byd هى اختصار لجملة build your dreams الانجليزيه يعنى إبنى احلامك , او اصنع احلامك , يعنى اللى صمم اللوجو ده يقصد ان العربيه دى حلم للناس و انهم هما اللى بيصنعوا الحلم ده , المهم انا مبتديتش افكر جديا فل العربيه ديه غير لما لقيت كل الخيارات الاخرى فشنك و صرفت نظر عنها , فقررت انا و المدام و ابنى الرضيع اللى كنا شايلينه فل كاريكوت نروح معرض شركة الامل اللى جنب الحريه مول فى مصر الجديده اهو ناخد فكره يمكن فيه حاجه تخلينا نغير رأينا عن العربيه , و الصراحه انا كنت رايح تضييع وقت و كنت ساعتها قرفان مش لاقى عربيه كويسه فإبتديت اتخبط و تصرفاتى متكونش موزونه و افكارى بقت مشتته و هكذا , لما روحت لاقيتها موجوده بضاعه حاضره , عاين و ادفع و شيل , مش زى اللوجان اللى دوخت عليها و لا الاسبرانزا m11 اللى الجن الازرق ميعرفش طريقها , لما شفتها لقيتها عربيه جميله الشكل , تصميمها انسيابى , موتورها ميتسوبيشى , شنطتها ملعب كوره , كبيره أوى , يعنى ممكن يدخلونى فل شنطه و يقفلو عليا و ابقى مستريح و نايم , صالونها هو كمان واسع جدا و اوسع من صالون اللوجان اللى كنت بقول عليه واسع و سقفها عالى ينافس علو سقف اللوجان , و كمان صالونها جميل , ابانوس فى كروم و حاجه اخر دلع , و الوانه حلوه بيج و التابلوه من تحت بيج و فوق رمادى غامق , صالونها كشكل و جمال احلى من صالونات كتير شفتها فى رحلة بحثى عن عربيه يمكن بدون مبالغه احلى صالون فى كل الخيارات اللى انا ذكرتها الاخرى , بل و ينافس فى جماله فئات اعلى , عاليه عن الارض يعنى فل مطبات مش حتحك و سعرها كويس بس هى بتغلى و ده نظرا للإقبال الكبير عليها , طيب شكرا سلام عليكم , كده اخدت فكره مبدئيه عنها , بس انا لازم اعمل بحثى الاول على النت و اسأل عليها من اشتراها , من مجمل اللى قريته عل نت عن هذه السياره من المواقع و المنتديات العربيه منها و الاجنبيه , اقدر اقول انها عربيه كويسه , اولا شركة بى واى دى من اكبر الشركات اللى فل صين و موديلاتها كتير بس لسه منزلتش مصر كلها و فيه ما بينها و بين شركة مرسيدس الالمانيه شراكه لإنتاج سياره كهربائيه مشتركه و ذلك لان بى واى دى متقدمه فى ابحاث البطاريات و الطاقه الكهربائيه , و بعدين لقيت كمان ان الموديل ال اف 3 ده هو اكتر عربيه مبيعا فل صين بلدها الام , و ظل على القمه لعده سنوات , و فى المجمل هو الاكتر مبيعا , فتخيلو معايا لما بلد بمساحة قاره تعداد سكانها اتنين مليار يبقى فيه عربيه فيها هى الاكتر مبيعا , تخيلو كم المبيعات ده حيكون اد ايه , ده ممكن مبيعتها تبقى اكتر من مبيعات كل العربيات مجتمعه فى بلدنا اللى تعدادها تمانين مليون نسمه , و عندنا هنا فى مصر العربيه ديه منشره تاكسى بغزاره , لدرجه انى حاسس انو حيجى اليوم اللى تلاقى فيه كل عربيات التاكس اللى فل محروسه بى واى دى , و بمناسبة النقطه دى احب اقول ان فيه واحد صاحبى زمان مره قالى حكمه انو العربيه اللى تمشى تاكسى دى اعرف انها عربيه كويسه , ليه , عشان سواق التاكسى بيفكر انو العربيه دى اكل عيشو , فأكيد حيجيب عربيه تمنها فيها و اعطالها قليله و تكاليف صيانتها مش مكلفه و سهله و كل الميكانيكيه بيفهمو فيها و قطع غيارها موجوده و رخيصه و بعدين تستحمل الشغل الشاق بتاع التاكسى و تكون حمالة اسيه و متغلبوش و تقف منه و تسخن و تقطع عيشه , ده التاكسى عندنا بيشتغل ورديتين (يعنى فترتين) وردية الصبح و وردية بليل عشان يعرف يسد القسط و يتفضلو حاجه فل الاخر يعيش منها , و ساعات بيغير على العربيه سواقين اتنين , يعنى اتنين رجل على العربيه , و كلنا عارفين ان تغيير الرجل على العربيه بيهلكها , تلاقى واحد بيسوق بطريقة و التانى بيسوق بطريقه تانيه , ده غير ان معظم سواقين التاكس دلوقتى بيقلبوها غاز , و معروف ان الغاز بيقصر عمر المحرك اللى هو معمول اصلا عشان يشتغل بالبنزين , دى كلها شهادات نجاح للعربيه , و لما وقفت كذا سواق تاكس و سألتهم فشكرولى فل عربيه و قالولى انها مريحاهم و هى احسن من الاسبرانزا a516 , ده غير انى عرفت ان عفشتها بتتغير بقطع غيار تويوتا الاصليه , يعنى يوم ما يبقى معاك قرشين زياده و حبيت تخلى العربيه انعم , ساعت ما حاجه تبوظ او تستهلك ممكن تشتريلها قطع تويوتا يابانى اصلى , بس طبعا ده مش اجبار او غصبن عنك ده بكيفك و بإختيارك لأن قطع غيارها اصلا موجوده و رخيصه سواء فل وكيل او فل توفيقيه او شارع دمشق او غيره من مناطق قطع الغيار , و ده غير عربيات تانيه انت مضطر غصبن عنك تشترلها قطع غيار مش بتاعتها عشان بتاعتها مش موجوده او وحشه اوى رديئه يعنى او سعرها مبالغ فيه , و الموتور نفس الكلام موجود بكثره مستعمل و جديد ميتسوبيشى اصلى يابانى بتاع بلده و سعره كويس , يعنى بدل ما تعمل عمره بعد عمر طويل ممكن تسقط مكنه ميتسوبيشى زى اللى راكبه وتريح دماغك , دا غير ان ناس كتير اشترتها و بتقول انها ثابته عل طريق لحد 180 كم/ساعه شغال , ملاحظتى السلبيه على السياره من قبل ما اشتريها ان البويه بتاعتها مش اد كده , يعنى انا شفت الملاكى منها ماشى فل شارع و حسيت انو البويه مطفيه و مش براقه و بتجرب بسرعه , حاسس انهم مش مخدمين عل بويه كويس و مش رشينها بما يرضى الله , بس قولت مش مشكله موضوع البويه ده , لو خلاص قررت تشتريها ابقى اشترى بوليش و كومباوند من اى حته و خليه عندك و اهتم دايما بتنظيف و تلميع العربيه من فتره للتانيه و هى حتفضل علطول عروسه.
    و قلت لنفسى خلاصة القول عندك عربيه فيها التالى:
    1- عربيه زيرو و بالضمان يعنى لو اى عيب ظهر هما ملزمين بتصليحه على حسابهم , يعنى حتفكك من وجع دماغ المستعمل و خوازيقه و كفايه انك اول يد عل عربيه.
    2- معروضه عند الوكيل بتاعها , (استلام فورى) يعنى مش حضطر تحجز و تستنى كام شهر عشان تستلمها و حتبعد عن المعارض و شغل الاوفر برايس و زيادة سعر العربيه عن سعرها المعلن لدى الوكيل و كمان حتقدر تتفرج عليها و تفليها قبل ما تشتريها مش زى عربيات تانيه عايزين يبعوهالك غميضى و كمان مش حينفع تتهرب غزه عبر الانفاق عشان حجمها كبير و سقفها عالى و مش حتخش فى النفق , حتتحشر (طبعا انتو عرفتو انا بتكلم على مين).
    3- عربيه شكلها لسه جديد على السوق المصرى , يعنى مش مظروته و متلاقيهاش ركنه تحت بيتك بالتلاته اربعه , و حتقعد فتره تحس بالتميز و الإنفراد لحد ما العربيه تنتشر اكتر , ساعتها حتكون قدمت و الموضوع مش حيفرق معاك و مش حتركز فيه اوى , دا غير ان حجمها كبير و ده مديها فخامه و برستيج مش حتلاقيه غير فل العربيات اللى اغلى منها بكتير و اللى فى فئات اعلى.
    4- عربيه شكلها حلو من بره و مفيش فى تصميمها حاجه شاذه او حاجه تغيظ , و خطوطها انسيابيه و فوانيسها الاماميه و الخلفيه جميله , ليها كاريزما خاصه و شخصيه مستقله و شكل ملفت للأنظار .
    5- صالونها من الداخل كبير المساحه و السقف عالى مش كابس على دماغ اللى راكبين زى عربيات تانيه (طبعا انتو عرفتو انا بتكلم على مين) و فخم و مبهج (مش قتم) و شيك و مريح فى المشاوير الطويله (هذه المعلومه عرفتها بعد ما اشتريت العربيه).
    6- شنطتها كبيره جدا و اماكن التخزين فى صالونها ايضا كتير , يعنى تنفع للسفر و للعائلات.
    7- عربيه خدمه شاقه و حمالة اسيه بشهادة سواقين التاكسى و قطع غيارها الاصليه متوفره و مش غاليه و فيه البدائل اليابانيه ممكن تركب عادى و صيانتها سهله مش معقده.
    8- موتور قوى 1600 سى سى 106 حصان (و حقولكم على معلومه عن تجربه الموتور ده مع انى لسه موصلتش لكلامى عن فتره ما بعد الإمتلاك و الشراء بس حسبق الاحداث و حقولكم ان الموتور اداءه ممتاز و تسارعه جميل و بيعطى قوه و عزم معا مش واحده على حساب التانيه , بس كفايه كده عليكم , الباقى حقولو لما نوصل لقصة ما بعد الشراء) , و كفايه انه سمعه الموتور ده كويسه يعنى مش زى مواتير تانيه نمساوى بتخرب و مابينفعش تتصلح تانى بعد ما تخرب و بتترمى و يتجاب غيرها (طبعا انتو عرفتو انا بتكلم على مين) و حاجه اخيره هى مابتكلش بنزين يعنى مش شرهه للبنزين.
    9- العربيه ثابته على السرعات العاليه و فى الملفات الصعبه و دركسيونها ناعم و مع ذلك هى عاليه عن الارض و ده كويس عشان طبيعة الشوارع المصريه المبهدله.
    10- عربيه سمعتها كويسه خارج مصر و جوه مصر , كفايه انها الاكثر مبيعا فل الصين بلدها الام بلد ال 2 مليار نسمه.
    11- واخده 3 نجوم فى إختبارات التصادم و فرامل ايه بى اس و اي بى دى و وسادات هواء و احزمة امان قدام و فل الكنبه الخلفيه و دعامات فى الابواب , و احنا مش اد سعر الفولفو عشان كده مبنفكرش فل فولفو , كفايه علينا البى واى دى على اد فلوسنا.
    12- عربيه عائليه و ممكن تنفع شبابيه برضه عشان شكلها حلو و زجاج فيميه خلفى فابريقه مدى شكل حلو للعربيه و مخليها روشه.
    13- نقطه اخيره مهمه جدا : فيه عربيات بتبيع اسم و فيه عربيات بتبيع اوبشن , يعنى ايه , يعنى مثلا الهيونداى بتبيع اسم , يعنى ممكن تلاقى العربيه غاليه بس مافيهاش اوبشن عالى عشان الماركه لوحدها ليها تمن , اللوجو او البادج اللى عل عربيه ده له تمن , فانت بتدفع التمن ده كله عشان حتة البلاستيكه اللى ملزوقه عل شبكه و عل شنطه عشان تقول انا راكب كذا و لكن العربيه فاضيه مافيهاش اوبشن و ممكن تبقى عربيه تعبانه كمان , انما فيه عربيات تانيه بتبيع اوبش , يعنى تمن العربيه هو تمن اوبشنها و هو ده حال البى واى دى , و اخيرا قررت اشتريها.

    بس قبل ما اكملكو بقيت القصه عايز اتكلم شويه عن العربيات الصينى : العربيات الصينى دلوقتى عامله زى الكورى أول ما نزل و قبليها اليابانى اول ما نزل , ايام زمان ايام العز , ايام ما كان البنزين رخيص قبل حرب 1973 المجيده و قبل ما الملك السعودى يقرر انه يساعد مصر فى حربها و يمنع البنزين عن الغرب و يرتفع سعره جدا و من ساعتها و هو طالع , كان فيه العربيات الامريكانى الكبيره ام مواتير 8 سلندر و 6000 سى سى اللى كانت بتستهلك بنزين زى ما الحوت كده بيشرب ميه و بعد الازمه ظهرت السيارات اليابانى بذكاء بمواتيرها الصغيره نسبيا بأجسامها الهزيله نسبا الى الامريكانى طبعا , لو ليك حد كبير كان واعى ايامها لعالم السيارات و لسه عايش لحد دلوقت , خليه يقولك على الهجوم و النقد و التريقه و السخريه اللى خدته العربيات اليابانى ساعتها و كانت محط احتقار لحد ما العالم عرف قيمتها و ذكاء صانعيها و دلوقت بقت ايه و عمله ازاى , و نفس الكلام برضه على الكورى و اول ما نزل مصر و ده انا كنت واعى و حاضر للكلام اللى اتقال ساعتها عن الكورى و السخريه منه و الاستهزاء به و دلوقت بعد 15 سنه الواحد بيفتخر انو راكب هيونداى او كيا , سبحان المعز المذل , له فى خلقه شئون.
    اما بالنسبه لموضوع التقليد , يعنى يقولك ان الصين بتعمل عربيات تقليد الغربى و اليابانى , احب ارد فى نقطتين و اولا بص شوف العربيه السيات الاسبانى كانت اول ما طلعت تقليد الفيات الايطالى و دلوقتى بقت حاجه مستقله بذاتها تحت جناح فولكس فاجن , و بعدين انا قريت مره تقرير فى مجلة اخبار السيارات بتكلموا فيها عن تشابه التصميمات بين كل الصانعين لدرجة التقليد و كأن مفيش افكار جديده فل تصميم و زى ما يكون الافكار كلها خلصت , و التقرير ده مكنش فيه اى سيره عن الصينى و قبل مالصينى ينزل بلدنا اصلا , فا مديقش نفسك لو لقيت ان البى واى دى شبه التيوتا كرولا من قدام و الهوندا سيتى من ورا و تابلوه تويوتا كرولا.
    خامسا : رحلتى العملية الجدية للحجز و الشراء و المواقف التى تعرضت لها : طبعا انا اول حاجه كنت محتار فيها هو لون العربيه , كان عاجبنى الاسود قوى عليها و لكن ناس كتير نصحتنى بلاش الاسود اصله بيترب بسرعه و محتاج عنايه خاصه و مل شمس لونه بيجرب و بيغير , طيب النبيتى , شوفت النبيتى منها بس معجبنيش حاسيتو قافل اوى , المهم رسيت عل رمادى و رحت معرض الامل بشارع النزهه و قلتلهم عل لون بس كان ممكن استلمها علطول , بس فيه مشكله , هى ان بطاقة الرقم القومى بتاعتى منتهيه و لازم تتجدد و مش حعرف ارخص العربيه فل مرور غير بالبطاقة الجديده , و كتر خيره رجل المبيعات هناك اسمه اتاذ مدحت و ده بقى لازم نشكر فيه كتير عشان راجل ذوق و على اد المسؤليه و بيعرف يتعامل مع العملاء غير المدعو اللى اسمه استاذ خالد مدير الفرع , استاذ خالد ده بقى معاملته مش حلوه و كلامه مش حلو و استفذنى اكتر من مره و انصكم نصيحه لوجه الله لو كلمتو شركة الامل فل التليفون او روحتو هناك و طلعلك واحد اسمه استاذ خالد مدير الفرع حاول تتجنبه و ابعد عنو احسن و ذلك لسلامة اعصابك و صحتك النفسيه و اول ما تكلمهم او تروحلهم اسأل علطول على استاذ مدحت و متديهمش فرصه يحولوك على استاذ خالد , المهم , استاذ مدحت قالى انى ممكن اسلمك العربيه بس حتركنها فل شارع من غير لوحة نمر مش كويس , ممكن تتسرق بسهوله و هى معلهاش نمر و ده خطر جدا و امر لا يستهان بيه , و بعدين مش حتعرف تمشى بيها , جدد بطاقتك و قولى حتستلم بطاقتك الجديده امتى و انا حظبطلك ميعاد استلام العربيه على كيفك لما تخلص , قلتله ماشى مفيش مشكله , و ابتدت رحلة البطاقه من اول ما روحت للمدير عشان اقوله انى عايز اخد اجازه لحد يوم ما روحت القسم , اقرب قسم ليا هو قسم النزهه , روحت قالولى اسحب ملف و املاه بس الكمبيوتر عندنا بايظ فعشان تكمل الاجراءات روح قسم مصر الجديده , عندهم الكمبيوتر شغال , روحت قسم مصر الجديده و بعد ما الموظفه لطعتنى قدامها تفرز فل ورق و تمحص فيه كأنها بتنقى رز , طلع مكنة التصوير بايظه و روح بقه قسم النزهه تانى عشان تتصور حضرتك , و انت عامل ايه دلوقت , طبعا انا قلت استنى شويه و الحمد لله مكنة التصوير كانت معلقه و اتصلحت و اتصورت صوره جنان زى الاحداث و قتالين القتلا و روحت و بعد اسبوعين او اقل استلمت البطاقه و تانى يوم روحت عشان استلم العربيه , لقيتها وقفه عروسه فى صالة العرض و كشفت على كل حاجه فيها و طلعوهالى و دفعت و اديت حلاوه و بقشيش , و كانت اللحظه الاولى لى لقيادتها , طبعا انا كنت خايف لأن العربيه لسه جديده عليا و لسه مظبطش رجلى على دبرياجها و لا فراملها و لا بنزينها و المفروض انه حساسية الدواسات بتفرق من عربيه للتانيه و الواحد بياخد فتره على ما يظبط رجله على حساسيه الدواسات و مستواها.
    سادسا: انطباعى و حكمى على ال بى واى دى عن تجربة بعد امتلاكها : اول ما اتحركت بيها لاقيت صوت موتورها واطى و يكاد يكون مش مسموع , قعدتها من جوه حلوه و عاليه , كراسيها تنجيدها ناشف بس مريحه ماتتعبش الدهر و لا العصعوص , طبعا انا لسه ماشلتش المشمع البلاستيك اللى على الكراسى فحاسس انى بتزحلق او بتظفلت , موضوع انذار حزام الامان ده رخم اوى يعنى لو مقفلتش الحزام يعض يزمر كل شويه و ده عادى فل عربيات الجديده كلها فإتعلمت الادب و ركبت الحزام و اهو احسن بدل ماخود غرامه من امين شرطه معاه دفتر عاندو تارجت انو يملاه كلو نمر , الفتيس لسه عايز يتلين شويه طبعا العربيه لسه جديده و اكيد الفتيس حياخد وقت على ماخود عيه و ياخد عليا , استجابه الموتور ممتازه و بينط و يقفز الار بى ام بسرعه مع اقل دوسة بنزين , عدادتها نورها ازرق شكله حلو و شكلهم احلى من عدادات معظم منافسيها فى نفس الفئه السعريه بس طبعا لا تقارن بعدادات الجولف الجديده او السيفيك الجديده , دول حاجه تانيه, حاجه تانيه ممكن تستغربلها و تشك فيها ان نور العدادات (العدادات بس مش التابلوه كله ) مبينطفيش طول ما العربيه دايره يعنى منور علطول طول منته مشغل العربيه , بس بالليل بيخفت شويه يعنى بيقل نوره مع توليع الفوانيس عل واطى و ده عشان مايعكسكش بليل و انت سايق يعنى عشان مايزغللش عينيك و ده سببه انه نور العدادات اصلا نور "ليد" يعنى بيعيش و يعمر ففى حكمه من انو يفضل علطول والع و بعدين ماتحكمش على اسلوب المصريين لما تلاقيهم ماشيين الصبح و طافيين انوار العربيه كأن الواحد بيجيلو فاتورة كهرباء اخر الشهر زياده لو نور العربيه زياده , فيه دول بره كتير الموضوع ده عندهم عادى و مش بس نور العدادات ده كمان بيمشوا الصبح و نور الفوانيس الواطى والع كمان و بالقانون يعنى لو معملش كده ياخد مخالفه كمان , اماكن التخزين جيده جدا , تكيفها قوى , انا جربته مره واحده بس الصبح و احنا فل شتاء , بس لسه لما الصيف يجى حتعرف عليه اكتر .
    نيجى بقى للمهم , اكتر ميزه عجبانى شايفها فل العربيه هو حجم العربيه , يعنى ابعادها الخارجيه و الداخليه , مش حتتخيل العربيه دى اد ايه كبيره غير لما تركن موازى للعربيات اللى جنبك و تطلع بيتك و تبص عل عربيه من فوق من البلكونه , فعلا العربيه ديه ابعادها كبيره , طول فى عرض فى ارتفاع , و ده بالمقارنه بكل منافسيها فى نفس الفئه السعريه , طيب طبعا انتو حتسألونى ايه اللى عجبك فل موضوع ده اوى كده , و حد حيقولى بالعكس كده العربيه حتبقى صعبه فل ركنه و متعبه , ارد اقول : معروف عالميا و دوليا بين كل مصنعين السيارات انهم لما يحبو ينزلو عربيه فخمه و بريستيج دايما موضوع الحجم ده بيكون عامل مهم و اساسى و جوهرى , يعنى مثلا تلاقى ان المرسيدس شبح حجمها اكبر من العيون و الاخيره حجمها اكبر من السى كلاس , نفس الكلام فل بى ام دبليو و الأودى و الفولكس فاجن و غيرهم , تلاقى البى ام دبليو الفئه السابعه افخم موديل هو اكبر موديل من حيث الحجم يليه فل فخامه و الحجم الفئه الخامسه ثم الفئه الثالثه و هكذا , طبعا لكل قاعده شواذ , يعنى إلا اذا كانت سياسة الشركه اصلا من البدايه هو صغر الحجم زى المينى كوبر كده مينفعش يتقال عل عربيه ديه مش فخمه , المهم ايه سبب الفلسفه ديه عند مصنعين السيارات , طبعا هما لاقو عند المستهلك الزبون حاله من الإجماع النفسى العام فى العلاقه بين السعر و الفخامه و الحجم , و انا بقى عرفت المعادله دى الحقيقه بعد ما سوقت البى واى دي , فعلا يا جماعه العربيه الكبيره كبيره , و لا تقولى راكنه و لا دياولو , إحساسى و شعورى بالطريق و بمن حولى من عربيات تانيه مختلف تماما عن لو كنت راكب عربيه صغيرة الحجم او متوسطه , يعنى حجم العربيه بيفرق فى احساس و شعور اللى راكبها , و مش بس كده و لا كمان احساس و شعور من حولك و نظرتهم لك , يعنى العربيه الكبيره ليها احترامها فل شارع و ليها هيبتها , و الكلام ده سواء كنت على طريق سريع او كنت بتركن فى شارع ضيق , و بعدين موضوع الركنه ده انا حتكلم عنه , اللى بيخاف على عربيته لحسن تتجرح او تتخبط و هى واقفه اكيد مش حيركنها ركنه اى كلام صف تانى و تالت و حيفضل انه يركنها بعيد شويه و مش مشكله يمشى حبتين اهو رياضه عن انو يركنها قدام الباب سواء كان باب البيت او باب الشغل او باب الكوفى شوب و ينزل يلاقى عربيته متجرحه و متخبطه من كتر الزء و الجر , دا انا بشوف بلاوى والله , اللى تلاقيه ركب عربيته و دورها و عايز يطلع فيزء العربيه اللى وراه بالاكصدام عشان يطلع مل ركنه , يعنى اكصدام بيضغط على اكصدام , و حاجات مهازل , طبعا اللى بيركن عربيته ركنه كويسه بما يرضى الله , و ركنه زى ما الكتاب ما بيقول , عمره ما حيحس ان الركنه صعبه او فيها مشكله لأنه ركنها صح.
    و اخيرا احب اقول انى مش ندمان خالص عن البى واى دى , بالعكس , انا شايفها افخم عربيه فى كل منافسيها و اجملهم شكلا و اكثرهم راحه و رفاهيه , و ان شاء الله ده مش حيكون اخر كلام اكتبه عنها , و انتظرو كل جديد.
    رغم انك عطلتنى و قعدتنى جنبك نص ساعة اقرا التقرير بس اسلوبك جذاب جداا و لم استطع القيام قبل الانتهاء من القراءة....طبعا انا بهزر ..تسلم ايدك على المقال و مبروك عليك العربية و فى انتظار تقاريرك الخاصة بالاستعمال و التجربة.


  6. #46

    الصورة الرمزية ahmedselaraby

    رقم العضوية : 133020

    تاريخ التسجيل : 03Jan2013

    المشاركات : 418

    النوع : ذكر

    الاقامة : CAIRO , EGYPT

    السيارة: BYD F3

    السيارة[2]: FIAT SIENNA

    الحالة : ahmedselaraby غير متواجد حالياً

    افتراضي -

    اقتباس المشاركة الأصلية كتبت بواسطة bassem.naguib مشاهدة المشاركة

    زي أيه بقى أتوماتيك في نفس الرينج وزيرو .. معتقدتش فيه حاجة في نفس الرنج زيرو أفضل من البي واي دي ومواصفاتها وبقول الكلام ده بعد دراسة مستفيضة ..

    ولو مستعمل أتوماتيك أيه برضه؟! .. بس المشكلة الرئيسية أن الواحد بيقلق لما يشتري أتوماتيك مستعمل بالذات .. ولا مش معايا في النقطة دي .


    بسم الله

    أولا طبعا أشكر استاذنا باسم باشا لإثراءه الحوار و زيادته عمق , و حقيقه انا ببقى مبسوط لما بشوف مشاركته أيا كانت

    بس طبعا زى ما انتو عارفنى , "فيلسوف" فلازم اتفلسف شويه

    أولا طبعا انا عندى مبدأ فلسفى شويه و اللى هو " الأرض هى اللى بتلف حول الشمس و ليس العكس "

    معنتو ايه الكلام ده ؟ ,, محدش يضحك ,, صبرا و انتو حتعرفوا انا عايز اقول ايه ,, انا قصدى انو زى أى حاجه فل دنيا ممكن احنا نرتبط بيها إرتباط زمنى و وجدانى , فتتحول بحكم الزمن و العشره و الالفه , تتحول من ايه لايه بقى ؟ ,, ركزو معايا ,, تتحول من وسيله إلى غايه , يعنى بدل ما تخدمنى , لا , انا اللى بخدمها , بدل ما تفيدنى , لا انا اللى بفيدها , و ممكن بدل ما توصلنى الجنه , للأسف ممكن تدخلنى النار ,, حد فهم حاااااااااجه ؟؟؟ ,, و لا نقول كمان "عليا النعمه انا شكلى كده حخلى المنتدى كله يتعاطى" يتعاطى فلسفه طبعا , متفهمونيش غلط

    طيب نقول كمان "برضه الراوند التانى كلام تانى" ,,,,,,,,,,,,, شدو نفس بقه ,,,,,,,,,,,,,,, يلا بينا

    يا اخوانا استهدوا بالله , انا قصدى هو انى اخدت عهد على نفسى انى دايما ابوص للعربيه على انها وسيله و ليست غايه فى حد ذاتها , و اخدت عهد على نفسى انو مهما طالت بيا العشره بينى و بين عربيتى البى واى دى سأظل حيادى و عادل فى حكمى عليها , ما لها و ما عليها , مش ححبيلها على حساب عربيه تانيه ممكن مثلا يعنى تبقى احسن منها "من غير ضرب انا بقول مثلا يعتى" لمجرد انى امتلك بى واى دى

    و إلا ,,, صرت انا اللى بخدم البى واى دى , مش هى اللى بتخدمنى و تودينى مشاويرى

    و يبتدى التعصب بقه ,,, و البس فانلة المنتخب الصينى و عليها لوجو بى واى دى فخر الصناعه الصينيه و اروح اتعلم صينى بقه ,, و اروح الاعب فوومانشيه بطل الصين فضرب الدبان فى حتت حساسه و هكذا

    طبعا محدش يعمل كده , محدش يلبس فانله و فوومانشيه و حتت حساسه و كده ,,, هاه ,, ماشى

    طبعا حد حيقولى ,, ايه اللى انت كاتبه ده , هو حد داسلك على طرف ,, مالك يا خويا نفسيتك ابه عليك كده ليه , يا عم خش نام نام , و استغطى كويس ,, نام نام

    مش حنام قبل ما اقول منافسين البى واى دى اف 3 اتوماتيك فى نفس الرينج السعرى


    1- الرينو سانديرو و سانديرو استبواى , فول اوبشن اتوماتيك

    2- الشيفروليه افيو , فول اوبشن اتوماتيك

    3- البريليانس اف ار فى و الكروس , فول اوبشن اتوماتيك

    4- البريليانس اف اس فى , فول اوبشن اتوماتيك


    و المنافسين فى نفس الرينج السعرى بس ((مش اتوماتيك))

    1- بروتون جين تو , فول اوبشن , مانيوال

    2- بروتون بيرسونا , فول اوبشن , مانيوال

    3- اسبرانزا تيجو , فول اوبشن , مانيوال

    4- ام جى 3 , فول اوبشن , مانيوال


    و اللى (( مش )) منافسين اصلا بس للأسف فى نفس الرينج السعرى (عشان بس حبايبنا اللى فل اقسام التانيه ميزعلوش اننا مجبناش حتى سيرتهم)

    1- الفيرنا فول اوبشن اتوماتيك

    2- اللوجان اتوماتيك



    صباااااااااح الفل يا رجاله , اوعى يكون الرجاله هما اللى سقطو منى و دخلو هما ينامو

    محدش بيرد . . . . . . .

    طب تصبحوا على خير . . . خخخخخخخخخخخخخخخخخخخخخخخخخ خخخخخخخخخخخخخخخخخخخخخ


  7. #47

    الصورة الرمزية abo-omar

    رقم العضوية : 132847

    تاريخ التسجيل : 30Dec2012

    المشاركات : 37

    النوع : ذكر

    الاقامة : القاهرة

    السيارة: .

    السيارة[2]: بريليانس v5

    الحالة : abo-omar غير متواجد حالياً

    افتراضي -

    اقتباس المشاركة الأصلية كتبت بواسطة ahmedselaraby مشاهدة المشاركة

    و نصيحه تانيه لوجه الله لو معاك عربيه 1600 او اقل دلوقتى "لا تبيع" انتظر لحد ما موضوع كوبونات البنزين ده يبقى واقع و بعدين بيع , لأن العربيات ال 1600 و اقل بتغلى دلوقتى سواء زيرو او مستعمل و طبعا سيادتك يهمك تبيع بالغالى مش بالرخيص عشان لما تيجى تشترى بقه حتلاقىه برضه غالى فاميكونش الفرق كتير عليك

    و لكن لو عربيتك اكتر من 1600 نصيحه بيع دلوقتى حالا لأن العربيات ديه حتبقى برخص التراب و لو استنيت حتخسر كتير و ممكن متعرفش تبيع اصلا و تقعد العربيه زى بيت الوقف
    اولا اشكرك اخي المحترم على اهتمامك ونصائحك و ايضا الاستاذ المحترم باسم
    وبخصوص هذه النصيحه رغم توقوعي بإذن الله ان الكلام عن الكوبونات مش هيتنفذ او هيتنفذ بصورة افضل ومرضيه للجميع الا انني لا انوي بيع سيارتي 132 العتيقه 2000 cc وغيرت الماتور والرخصة من كام سنه ل 1600 cc لما الضريبه زادت
    ومش هبعها لانها ذي بيت العيله وما يحمله من ذكريات لا يمكن التفريط فيه فهي من ايام الوالد رحمه الله وتمثل ذكريات الصبا وكيف تعلمت السواقه عليها وكنت اتباهى بها بين اصدقائي
    لذلك ظللت وسوف اظل محتفظ بها كعربيه تانيه سواء لي او لزوجتي وصدقا نفعتني كتير جدا
    واول عربيه امتلكتها باسمي فور تخرجي وعملي كانت 128 وطبعا اتباعت من زمان ثم ال 132 منفرده ثم في 2001 اشتريت بالتقسيط عن طريق عملي شاهين وظللت محتفظا بال 32 وطبعا النوعيه دي مفضله لي رغم اقامتي بمدينة نصر ولكن عشان فقط مشاوير السفر والطرق في الريف المرهقه لأي عربيه لما بسافر لبلدتي كل فتره وعموما انا اعشق النظام والنظافه والحفاظ والعنايه بالاشياء ومنها العربيه
    المهم بعت الشاهين من 4 شهور وابحث عن عربيه جديده من وقتها تكون زيرو واتوماتيك وواسعه جدا بالذات الكراسي الخلفيه عشان الاولاد يكونوا مستريحين والشنطه طبعا مهوله عشان الخيرات اللي برجع بيها من بلدتي ههههههههههههههههه وطبعا عفشه تستحمل مشوار السفر وفيها انظمة امان واوبشن وقطع الغيار متوفره واسعارها معقوله وتكون 1600 cc ولا بلاش عشان الكوبونات 1500 cc هههههههههههههههههههه ويفضل عائلي ثم سيدان (كبيره ووسعه وعاليه) وطبعا عشان الاولاد اللي كبروا تكون شيك وعلى الموضه والسعر حتى 90 الف ولو اني مبقتش عارف الاسعار اليومين دول وهي اللي مخلياني متردد خايف اشتري خلال الاسبوع ده ذي ما انا ناوي الاقي الاسعار انخفضت بعدكده او ظهرت موديلات افضل وخايف مشتريش الاقي الاسعار زادت اكتر فعلا حاجه بقت تجنن
    لذلك ارجو منك اخي ومن الاخوه الكرام مساعدتي بالرأي ولكم جزيل الشكر


  8. #48

    الصورة الرمزية bassem.naguib

    رقم العضوية : 5577

    تاريخ التسجيل : 12Feb2008

    المشاركات : 4,439

    النوع : ذكر

    الاقامة : cairo

    السيارة: يا رب

    السيارة[2]: Fiat One twenty eight M/T

    دراجة بخارية: لا يوجد

    الحالة : bassem.naguib غير متواجد حالياً

    افتراضي -

    @ ahmed

    بس العربيات اللي قولتها دي كلها مش في نفس الرنج إنما أغلى .. وأصدقك القول أني في نفس الحيرة دي .. وطبعاً شلت الفكرة من دماغي الفترة دي مؤقتاً نظراً للظروف الحالية .. وربنا يسهل إن شاء الله .

    @ abo omar
    معرض السيارات حيبتدي يوم الخميس ويكون مفتوح للجمهور يوم الجمعة إن شاء الله .. وحيكون أكيد فيه تخفيضات (اللي أنا متوقع أنها سعر العربيات الأصلي قبل رفع سعر السيارات بسبب الدولار .. وهو في الأساس أستوك سيارات موجود عندهم أصلاً) .

    روح وأتفرج وشوف وقارن واستشير .. وبعد كدة أعمل استخارة وربنا حيهديك للخير إن شاء الله .






    Life's too Short for the Wrong Job

    ziabassem سابقا


  9. #49

    الصورة الرمزية ahmedselaraby

    رقم العضوية : 133020

    تاريخ التسجيل : 03Jan2013

    المشاركات : 418

    النوع : ذكر

    الاقامة : CAIRO , EGYPT

    السيارة: BYD F3

    السيارة[2]: FIAT SIENNA

    الحالة : ahmedselaraby غير متواجد حالياً

    افتراضي -

    اولا انا بعزى أهالى ضحايا حادث القطار , ان لله و ان اليه راجعون

    بالنسبه لموضوع رينج الاسعار ده , فالواحد محتار يعتبر العربيه مسعره بانهو سعر

    سعر الوكيل
    سعر المواقع و المنتديات
    سعر الموزع المعتمد
    سعر المعارض و التجار
    سعر الجشعين و المزايدين
    سعر الاوفر برايس


    انا باخودها بالشبه كده


    و رساله لأخونا ابو عمر ,, فعلا زى ما استاذنا باسم باشا قالك على موضوع المعرض , مشوار المعرض ده حيساعدك كتير , و يا ريت لو فيه عربيات سيادتك ميال ليها و بتفاضل ما بينها , قولنا و ان شاء الله نساعدك بالمعلومات


    و اخيرا برضه , انا بعزى أهالى ضحايا حادث القطار , ان لله و ان اليه راجعون


  10. #50

    الصورة الرمزية abo-omar

    رقم العضوية : 132847

    تاريخ التسجيل : 30Dec2012

    المشاركات : 37

    النوع : ذكر

    الاقامة : القاهرة

    السيارة: .

    السيارة[2]: بريليانس v5

    الحالة : abo-omar غير متواجد حالياً

    افتراضي -

    hasad">

    اقتباس المشاركة الأصلية كتبت بواسطة ahmedselaraby مشاهدة المشاركة


    و رساله لأخونا ابو عمر ,, فعلا زى ما استاذنا باسم باشا قالك على موضوع المعرض , مشوار المعرض ده حيساعدك كتير , و يا ريت لو فيه عربيات سيادتك ميال ليها و بتفاضل ما بينها , قولنا و ان شاء الله نساعدك بالمعلومات


    و اخيرا برضه , انا بعزى أهالى ضحايا حادث القطار , ان لله و ان اليه راجعون
    اولا البقاء لله في ضحايا حادث القطار ربنا يلهم اهلهم الصبر ويجعل مثواهم الجنه

    ثانيا بشكر جدا اخي باسم لانه نبهني لموضوع المعرض وموعده وفعلا هيكون مفيد جدا

    ثالثا بخصوص جملتك اخي احمد (و يا ريت لو فيه عربيات سيادتك ميال ليها و بتفاضل ما بينها , قولنا و ان شاء الله نساعدك بالمعلومات) هما في عربيتين لا مجال للمقارنه بينهم ومعلوماتهم عندي بس الخلاف في قرار شراء واحده منهم او نشوف حاجه تالته توفق بينهم وترضي جميع الاطراف والي الان لم نجدها
    وعلى طريقتك اخي احمد حد فهم حاجه هههههههههههههههههههه
    وعشان الكلام يوضح اكتر هقولك من البدايه
    انا بعد تعرضي لحادث اثر على فقرات ظهري وحركة رجلي ويدي الشمال وعملت يجي 30 جلست علاج طبيعي لحد مشفيت تقريبا والحمدلله قررت ابيع الشاهين المانيول لان الدبرياج بقي يتعب رجلي واحط تمنها على مبلغ معي واشتري اتوماتيك كاش او قسط حسب الظروف
    وبعد لف على المعارض انا وزوجتى واولادي الاربعه كانت النتيجه الاولى اللي وصلنا ليها ان اسرتي اللي نادر مبيتفقوا جميعا على حاجه واحده محدده لقيتهم اتفقوا جميعا وبإعجاب واصرار شديد على شراء كيا كارينز وياسلام لو تشوف ولادي وهما مش قاعدين لأ نايمين وفردين طولهم فيها لما الشاب اللي بيفرجنا عليها في سمير ريان قام بطي الكراسي الخلفيه
    وبالنسبة لي فرغم فخامتها الجامده اعترضت عليها ورفضت شراؤها لان سعرها الكبير لا يتناسب مع امكانيتها القليله وقرات في المنتدي كلام لبعض الاعضاء يؤيد وجهة نظري فيها وان وزن العربيه كبير بالنسبه للماتور والسحب ضعيف وخاصة مع التكييف وايضا مع وجود 5 راكبين فيها بالسائق ودي سمعتها من صديق راكبها وكمان هشتريها تقسيط فقط والقسط هيكون كبير
    وكانت النتيجه التانيه اني وافقت ولكن ليس باصرار شديد على شراء byd لما شوفناها في معرض النزهه وعجبتني جدا خاصة اني قرأت عنها في المنتدي وسألت ناس راكباها وهي فعلا عربيه محترمه وشايفها ياباني وواسعه واوبشن عالي وانظمة امان وسعرها معقول ويتناسب مع امكانياتها العاليه
    واقدر اشتريها كاش ولو تقسيط هيكون القسط مش كبير
    ام بالنسبة لاسرتي فمش مقتنعين بيها ورفضوا بشده لانها صيني والكل مبيشكرش في الصيني وشيفينها مش قيمه ومبيشوفوهاش غير تاكسي واسمها ذي بيض كما سبق وقلت يا اخ احمد ومعرفش سمعوها منك فين ههههههههههه
    المهم قرفوني وقرفتهم من العربيتين كيا كارينز و byd وقررت نشوف حاجه تالته توفق بينهم وترضي جميع الاطراف والي الان لم نجدها بعد 4 شهور وخاصة اني انشغلت بعملي وبطلت ادور وقررت استنى لبداية العام ونزول موديلات جديده عائليه او سيدان واسعه واسعارها معقوله

    التعديل الأخير تم بواسطة abo-omar ; 16-01-2013 الساعة 10:42 AM سبب آخر: خطأ في الكتابه



 
صفحة 5 من 19 الأولىالأولى 1 2 3 4 5 6 7 8 9 10 15 ... الأخيرةالأخيرة

المواضيع المتشابهه

  1. الحمد لله اشتريت نيسان صني 2013
    بواسطة omar shaker في المنتدى نيـــــــــسان
    مشاركات: 25
    آخر مشاركة: 21-12-2012, 05:49 PM
  2. اشتريت بومة 2013
    بواسطة demo0900 في المنتدى ميتـسوبيـشى
    مشاركات: 2
    آخر مشاركة: 24-10-2012, 03:14 PM
  3. الحمدلله اشتريت سيراتو 2013
    بواسطة kariemelsayed في المنتدى كـــــيا
    مشاركات: 17
    آخر مشاركة: 21-10-2012, 04:08 PM
  4. اشتريت لوجان رينو 2013 سودا
    بواسطة amr2008mero في المنتدى قسم خاص بالسيارة لـــوجـــــان
    مشاركات: 3
    آخر مشاركة: 03-10-2012, 12:27 AM
  5. اشتريت كيا سيراتو خليجى مو 2013
    بواسطة mostafamohamed في المنتدى كـــــيا
    مشاركات: 27
    آخر مشاركة: 05-08-2012, 01:42 AM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2