تقرير صيانة ال1000 بمركز خدمة احمد مرعي بالاسكندرية

**amged_en** · 16-01-2013 08:43 PM

نظرا لظروف تواجدي بالاسكندرية ومعرفتي بوجود مركز خدمة جديد قررت اني اعمل صيانة الالف بمركز خدمة احمد مرعي ويوجد في اول طريق مصر اسكندرية الزراعي بعد مخرج سموحة من جرين بلازا بحوالي 2 كم علي اليمين.
قمت بالحصول علي رقم تليفون المركز من الكول سنتر لنيسان ورقمهم 01211155570
قلت اتصل واحجز ميعاد النهاردة, الاستاذة بلغتني ان الحجز لازم يكون يوم او اتنين قبل الموعد وممكن اروح علي طول في نفس اليوم وان النهاردة فاضي فقلت علي بركة الله
خرجت علي موزع ليكوي مالوي جبت الزيت 5w-40 top tec الجركن 4 لتر وعمل 265 جنيه

واتحركت علي مركز الخدمة ووصلت الساعة 14:00 , قابلت مهندس الاستقبال , ناس مقابلتهم ممتازة اخذ بياناتي وملاحظاتي في عشر دقايق , وقاللي علي عرض نيسان للصيانة وانه هايعملي الصيانة كلها مجانا بالزيت والفلتر في العرض, وهما بيستعملوا زيت توتال

قلتلوه ان انا جبت زيت تاني واني هاخد اوفر صيانة ال5000 مجانا..... الراجل قال OK وكانت المفاجأة ان علشان استفيد من العرض لازم اعمل صيانة ال5000 عندهم برضه

كلمت نيسان واكدوا لي المعلومة وانا طبعا مش حانزل مخصوص من الغردقة واضرب 800 ك علشان اخد العرض.. معلش طلعت اوت

المهم الراجل استلم العربية ودخل بها علي الورشة وانا طلعت الاستراحة ,
الاستراحة ممتازة , مكيفة ومشروبات مجانية ومكان للصلاة (مكتب فاضي) شاشة LED 41
والاهم بانوراما تطل علي الورشة لمتابعة السيارة

الورشة كبيرة ومنظمة فيها 6 روافع يعني ممكن يشتغلوا في 6 عربيات في وقت واحد , ومكان انتظار لاربع سيارات اخري , انا عديت 5 عمال و اتنين مهندسين و 2 في الغسيل
ابتدي الشغل الساعة 14:30 , انا كنت اشتكيت من مشوار الدبرياج والفرامل , بص عليهم العامل وبعدين رفع العربية وابتدي شفط الزيت ,وبعدين شد علي العفشة ونزل العربية

وطلع جركن الزيت .........وابتدي التعجب لاقيته بينادي علي عامل جنبه وقعدوا يقلبوا في الجركن وهبا راحوا مناديين المهندس وكنصولتوا وحكاية..انا الصراحة قلبي وقع في رجليا ...المهم لقيت المهندس بيهز دماغه OK .
حطوا الزيت ودوروا العربية وجربها قدام وورا كام مرة علشان كنت حاسس ان فيه عضة في النقلة التانية...وقالولي انهم ظبطوا الريكلاج بتاعها.
دخلت العربية علي الغسيل....ممتاز جدا من برة وتعباااااااااااان قوي من جوة .
دفعت الفاتورة فلتر 57 جنيه وبالضريبة 62.5 جنيه. وكانت الساعة 15:45
صحيت الحاج (والدي كان معايا ) وريح شوية علي الفوتيه الجلد قدام التلفزيون
واستلمت العربية . من مهندس الاستقبال .....اللي سألني سؤال واحد
هو الزيت ده انت جبتوا منين اصل واضح ان نوعيته نضيفة جدا
طبعا انا رحت لابس بالطو الدكتور وفردت نفسي شويه (ربنا يخليكوا لينا ياصقور)
وانا بشرحلوه مميزات الزيت, وشكرت الراجل علي الخدمة الجيدة
وتحركت في تمام الساعة 16:00 بعد ساعتين بالتمام والكمال

**Dr_MaTrix** · 16-01-2013 09:04 PM

الف مبروك يا باشا على الصيانة والعربية وعقبال كده صيانة 100000000 يا رب وما تحرمناش من التقارير دى دايما

**hamadakotb** · 16-01-2013 09:49 PM

شكرا على التقرير ، يا ريت كمان تقرير سريع عن العربية.

**amged_en** · 16-01-2013 10:05 PM

المشاركة الأصلية كتبت بواسطة dr_matrix

الف مبروك يا باشا على الصيانة والعربية وعقبال كده صيانة 100000000 يا رب وما تحرمناش من التقارير دى دايما

شكرا يا باشا علي المرور

**amged_en** · 16-01-2013 10:11 PM

المشاركة الأصلية كتبت بواسطة hamadakotb

شكرا على التقرير ، يا ريت كمان تقرير سريع عن العربية.

ان شاء الله بعد تجربة السيارة بعد الصيانة

**kliken** · 16-01-2013 11:57 PM

الف مبروك على الصيانه و ربنا يحفظهالك

**dodyam** · 21-01-2013 09:50 AM

حضرتك كان ممكن تاخد منهم برضه عرض الزيت والفلتر و تشيل الجركن عندك لوقت صيانة العشرة آلاف

حضرتك جبت منين زيت ليكوى مولى قصدك من الجراج اللى قصاد نادى القضاة ولا بنزينة شارع شامبليون

**canner** · 21-01-2013 01:09 PM

الف مبروك على الصيانة و الف شكر على التقرير و عجبنى قوى الاسلوب بتاع الكتابة و عقبال صيانة ال100000 كم ان شاء الله

تحياتى

**S O P H O S** · 21-01-2013 02:27 PM

الف مبروك الصيانة ..

**amged_en** · 21-01-2013 08:08 PM

المشاركة الأصلية كتبت بواسطة dodyam

حضرتك كان ممكن تاخد منهم برضه عرض الزيت والفلتر و تشيل الجركن عندك لوقت صيانة العشرة آلاف

حضرتك جبت منين زيت ليكوى مولى قصدك من الجراج اللى قصاد نادى القضاة ولا بنزينة شارع شامبليون

جبت الزيت من قصاد نادي القضاة ....وبعدين مارضيوش يدوني الزيت والفلتر , وقاللولي في صيانة الخمسة هما يركبوها