الموضوع: زواج المصري من أجنبية.. ليه؟

المشاركة الأصلية كتبت بواسطة ehab08

ممكن أكمل على كلامك يا أستاذ حازم
95% من بنات مصر بتقيم الرجل بعربيته وخد عندك الأمثله دى حصلت معايا
* العبد لله أترفض مره من آنسه مصريه جدا محترمه عشان عربيتى لادا وعلى فكره الرفض جه قبل ما تشوفنى

* العبد لله كلاكيت تانى مره أتفرض عليه شرط من آنسه مصريه جدا محترمه أن أغير عربيتى اللادا برضه قلت ياواد كبر دماغك هى ما تقصدش فأقترحت أجيب شاهين زيرو فكان رد الآنسه المصريه جدا المحترمه لأ لأ لأ الشاهين دى بيئه وطبعا هنا الأنسان المصرى جدا المحترم جدا اللى جويا طلع وضربت كرسى فى الكلوب وفركشت كل حاجه

بصراحة مش عارفة اقولك ايه
انا معاك ان في بنات في منتهي السطحية وبتفكر بالطريقة دي فعلا بس بردة في بنات ناس كويسين جدا والله ومالهمش طلبات مبالغ فيها ولما بتلاقي اللي قدامها شاريها فعلا بتتنازل عن اي فشخرة كدابة او بتحاول تساعده لو هيا خلاص هاتموت يعني من غير فشخرة
بس ممكن سؤال هي الاخت دي كان عربيتها نوعها ايه؟
انا حاسة ان مكنش عندها عربية اصلا

* آنسه مصريه جدا محترمه رفضت أن يكون زفافنا فى دار الدفاع الجوى أو الهيئه الهندسيه بحجة أنه بيئه وعاوز الفرح فى فندق 5 نجوم وبرضه هنا الأنسان المصرى جدا المحترم جدا اللى جويا طلع وضربت كرسى فى الكلوب وفركشت كل حاجه -- مش عارف أيه حكاية بيئه دى اللى طالعين فيها --
أل 5 نجوم أل 5 عفاريت --- ولا بلاش
أيه ياعم حازم ردك نكش اللى جويا زى ما أكون ما صدقت
عرفتى ليه يا علا فى شباب من مصر بيتجوز من بره مصر

طب لو فندق 4 نجوم الفرح مش هايتم يعني
علي فكرة دار الدفاع الجوي القاعات بتاعتها حلوة جدا ومش رخيصة يعني الفرح هناك اقل حاجة 15 الف جنيه يعني تمن عربية 127 تتجاب للمدام تروح بيها السوق :p افيد من الفرح :D

والله انا اعرف بنات يدوب عملت كتب كتاب وخروجة أو سهرة حلوة بعده وبس كده ولا فرح ولا غيره.
بس بصراحة انا ضد فكرة عدم عمل فرح دي لإن الفرح ده انت مش بس بتعمله عشان انت وهيا تفرحوا بس لأ عشان تفرحوا اهاليكوا اللي مستنيين اليوم ده من سنين بس طبعا بالمعقول يعني مايتعملش في الشارع مثلا يعني وفي نفس الوقت ميروحوش يعملوه في Fourseason ويكلفوه 150 الف جنيه يعني بجد حرام وربنا هايحاسب الناس دي علي اللي هما بيعملوه ده
بس في حلول وسطية يعني لو المكان مش عاجبها اوي تكمل من معاها هي واهلها ويعملوه اياكش يعموله في فرنسا فوق برج ايفل حتى :biggrinjester::laugh:

أقوللك على حاجه تانيه أفتكرتها مره برضه فى أول مقابله تعارف مع أهل آنسه مصريه جدا محترمه كانت الأسئله كالآتى بعد أول 10 دقايق تعارف:
س:عندك شقه؟
ج: عندى شقتين الحمد الله
س:ليه ؟
ج:ليه أيه حضرتك؟ -العبد لله مستغرب-
س:ليه جايب شقتين؟
ج: شقه جابها لى والدى-رحمة الله عليه- وشقه أنا بدفع أقساطها كأستثمار
س:عندك عربيه؟
ج:حاليا لأ
س:والعربيه اللى معاك دى بتاعت مين؟
ج:دى بتاعة أخويا ولما باجى من السفر بستلفها منه
س:هى بأسم مين
ج:هى أيه دى حضرتك
س:العربيه
ج:بأسم أخويا
س:حتجيب شبكه فى حدود كام؟
---هنا بس قررت إيقاف محضر الشرطه ده---
العبد لله : مش قبل الكلام ده المفروض حضرتك تسأل عنى وعن أهلى مش يمكن أكون حرامى ولا نصاب جى يتجوز بنتك
أهل الآنسه المحترمين المصريين جدا: لأ لأ الجواب باين من عنوانه بس أنت ما قلتش الشبكه فى حدود كام؟
العبد لله : طيب مش نخلى حاجه نتكلم فيها لما والدى يحضر معى - قبل وفاة والدى - مهما كبرت ومهما كنت أنا اللى حدفع لازم أكبره وأحسسه أنه له دور فى حياتى والمره القادمه يكون معى ونتكلم
ج:معلش أدينا بندردش قول قول
ولما حسوا أن الجو أتكهرب غيرو الموضوع
بقولكم أيه كفايه كده

معلش واضح ان كل خبراتك في الموضوع ده سيئة مش عارفة ليه بس يمكن لسة مفيش نصيب عشان كده محصلش اتفاق معاهم وعموما انت تحمد ربنا انك متفقتش مع الناس دي لإن البنات والاهالي اللي بيفكروا بالطريقة دي عمرهم ماهيريحوك بعد الجواز واديك خلعت بدري بدري يعني واتنت الكسبان فضلت محتفظ بالشقتين لنفسك بدل ماحد ييجي يشاركك فيهم

المشاركة الأصلية كتبت بواسطة ehab08

ممكن أرد على حضرتك
الطلبات المبالغ فيها بتكون من ناس عاديين جدا بس فشخره كدابه ليه بأه
أصل بنت خالتى جالها شبكه بكذا يبقى أنا لازم أكتر منها
أصل بنت خالة عمة بنت أخت مرات أخويا عملت فرحها فى مركب على النيل يبقى أنا لازم أتجوز فى تيتانك

معلش معلش بتاعة تيتانيك دي ان شاء الله هاتعمل فرحها فوق سطوح بيتهم لما تعنس عشان تبطل تفتري علي الناس

بالنسبه للزوايه التانيه
أول شرط فى الرجل الأخلاق والتدين لو توفر فعلا فيبقى أختى هى اللى تختار مش أنا لأن هى اللى حتعيش معاه
أنتى تختارى مين فيهم؟

بص والله الموضوع بالنسبة ليا محير رغم اني تقريبا اتحطيت في الموقف ده وكان في شخص مش مصري عايز يتقدم ويتجوزني وكان متدين جدا وخلوق جدا ومثقف ومعها ماجستير كمان بس اهلي رفضوه تماماً من قبل مايشوفوه حتى لمجرد انه مش مصري.
وبيني وبينك انا عقلتها هو بالمناسبة مكانش بيتكلم عربي اصلا يعني لغة التفاهم بينا كانت هاتبقي انجليزي اينعم الحمد لله انا كويسة في الانجليزي وبتكلم بيه عادي بس في حاجات مينفعش نعبر عنها غير بالعربي طب اهزر معاه ازاي والنبي ده؟ :D
وبعدين كمان موضوع ان الاطفال هايبقوا علي جنسيته هوه على قد ماهو ميزة لكن في حالة لاقدر الله وحصل انفصال اولاً انا هاطرد على مصر وماليش اي حقوق وثانيا الاطفال يإما ابوهم هاياخدهم بالعافية يإما لو عرفت اخدهم انا هايتعاملوا هنا معاملة الاجانب يعني اقامة سنوية لازم تتدفع ومصاريف اضافية في التعليم وغيره.
ده غير اختلاف العادات والتقاليد من بلد للتانية برده والصدام الحضاري اللي ممكن يحصل مابيني ومابينه أو حتى مابين الاطفال والناس اللي حواليهم في مصر.
فالموضوع بالنسبة ليا انا شخصيا صعب اتجوز حد مش مصري

رغم كل مساوئ الرجل المصري الا اني مش هاتجوز غير راجل مصري ان شاء الله يعني.

انا مصرى ومقيم فى مصر ومتجوز من اجنبية
مش عارف لية انا حاسس انكم واخدين صورة اننا مرضى نفسيين وعايزين العلاج فورا
انا متجوز من 10 سنين وعندى كريم والحمد للة
انا لما اتجوزت كان عندى شقة غرفة وصالة ومراتى قبلت العيش فيها ولم تكن مجهزة يعنى يادوب تلاجة وبوتجاز والحاجات الاساسية
ولم تطلب فرح كبير ولا شبكة مع العتم انها ليست كبيرة فى السن ولا وحشة
هى اصغر منى ب 7 سنين
ولم تضغط على يوم فى المصاريف او عايزة مش عارف اية
الحمد للة ربنا كرمنا واصبح عندنا فيلا كبيرة حديقة
ولكن الاهم هو كيف تربى الاطفال
هم معندهمش هزار فى التربية زى عندنا
ابسط حاجة مفيش طفل ينام بعد الساعة عشرة مساء
كريم 5 سنين ويتكلم 3 لغات بطلاقة
لم تنتظر حتى يذهب الى المدرسة وانما بدات تعليمة من سن صغيرة المهارات الاساسية
مش عايز اطول عليكم بس احنا مش مرضى وشكرا

المشاركة الأصلية كتبت بواسطة OlaOsman

يا جماعة يا جماعة.. بلاش نبدأ الحديث عما يحدث في فترة البحث عن زوجة و فترة الاختيار من جانب الفتاة عشان انا و اللي زيي هانملى صفحات و صفحات من التجارب ال"مؤلمة" و ال"مهينة" بكل معنى الكلمة.. فبلاش عشان ما يبقاش سجال من النوع ده اللي مش هايجيب وراه خير ابدا.

انما خلينا نقول اننا لو قابلنا نماذج من دي في حياتنا فبالتأكيد دي مش قاعدة ممكن انها تعمم على جميع بنات مصر و إلا ما كانش فيه حد اتجوز.. يعني انا أكتر من مرة حد يتقدم لي عن طريق الأقارب و المعارف و في قاعدة التعارف الأولى ألاقيهم بيسألوني (و الله أكتر من واحد مش حالة فردية) و انتي بأه شغالة ما شاء الله في شركة أجنبية.. مرتبك كام يا ترى؟ و نماذج تانية كتير مش عايزة فعلا أفتح كلام فيها عشان مجرى الموضوع ما يتحولش لاتجاه كلنا مش هانحب انه يمشي فيه.

بس هل معنى إني قابلت نماذج زي دي اني أقول ان الرجالة المصريين معرفش مالهم؟

انا اعرف بنات كتير تقريبا مالهمش أي طلبات غير حياة كريمة.. يعني ان اللي عايز يتزوجها يبقى يقدر يعيشها حياة كريمة من غير بهدلة و لا يبقى معتمد على مرتبها في فتح البيت.. بس كده مش أكتر. و و الله فيه بنات كتير اعرفهم مالهمش طلبات معينة في الشبكة و تقريبا مش عايزين شبكة خالص و لا بيفرق معاهم عربيات و لا وسع الشقة و لا كلام من ده و طلباتهم كلها منحصرة في انسان كويس يعرف ربنا و يتقي الله فيها.

عدد كبير من صحباتي اتجوزوا من غير شبكة و شاركوا في فرش الشقة مش هاقول كمان النص بالنص، لأ ده أكتر شوية في بعض الأحوال.. يعني الموضوع لا يمكن أن يعمم يا حازم و يا إيهاب.. التعميم ده شئ مؤذي فعلا.

ياعلا اللي انتي مريتي بيه ده كل بنت بتشتغل مرت بيه وخصوصا لو كانت بتشتغل في شركة كبيرة وبقالها كتير شغالة (يعني بتقبض علي قلبها قد كده)

بس دلوقتي بتقولي بلاش نتكلم عن فترة ماقبل الزواج بالنسبة للولد والبنت.
طب نتكلم في ايه انا عن نفسي ماليش تجربة شخصية في موضوع زواج الاجانب لإني لسة متجوزتش لا مصري ولا اجنبي :D لكن حكيت تجربة زميل ليا وانتهت ازاي وحجم المأساه اللي بيعيشها مع مراته الاجنبيه حالياً.

فلو حد تاني يعرف حد له تجربة برده يحكيلنا ويقولنا ايه اللي خلي الزواج يفشل وايه عيوب البنت الأجنبية وكفاية بقي عيوب في البنت المصرية لإنها بقت خلاص شرك ومتصلحش تتجوز اساسا بعد الهجوم الفظيع ده

الاستاذ ايهاب عنده حق و كلامه فعلا بيحصل
دا انا مره رايح اخطب واحده باباها بيسالني انت جاي ازاي قولتله جاي بالعربيه
لقيته طلع البلكونه و بيقولي انهي واحده؟؟!!!!!!
و سالني عندك شقه ؟؟طب كام متر؟؟طب في الدور الكام؟؟
انا قولتله عندي و 160 متر و في الدور الخامس اخر دور
يقولي لاء بعيد اوي و بكده الشمس حتضرب في السقف طول النهار!!!
طب انت مالك انت تضرب و لا ما تضربش هو في شاب عنده 26 سنه معاه اللي معايا و الحمد لله
و نزلت و ما اتصلتش بيهم تاني و شيلت الموضوع من دماغي

و يا بيردي الواحد ما بيروحش يخطب بنت وزير و لا سفير علشان يبالغوا في الطلبات كده
و يا علا محدش فينا عمم و لو كان في تعميم مكنش حد اتجوز من مصر و كله اتجوز من بره.