الموضوع: محاولة فاشلة لتثبيتي من اتنين أغبية

بسم الله الرحمن الرحيم
السلام عليكم و رحمة الله و بركاته

زي ما العنوان بيقول محاولة تثبيت فاشلة من اتنين اغبياء ع موتسيكل و ديه تعتبر محاولة التثبيت الرابعة اللي تحصلي خلال سنتين الأول ع طريق الـn\a و التانية ع طريق السويس و التالتة عند البيت و ديه الرابعة و الحمد لله عدوا ع خير
امبارح بليل الساعة 11 في الشارع اللي جنب انبي كنت ماشي هناك عشان الف من اليوتيرن اخر الشارع و ارجع ع انبي تاني
لقيت موتسيكل ورايا عليه اتنين و بينور و كلاكسات عشان يعدي عشان كنت ماشي ع سرعة 40-50 لأن الشارع ضيق و ممكن حد يعدي و لا عربية تطلع فجأة و كمان الشارع ضلمة مفيش غير نور البيوت اللي منور الشارع بالعافية فعديتهم و اللي طبعا كان مستعجل عشان يطلع لقيته هدي قدامي فجأة و بعدها جيه جنب العربية من اليمين و بيقفل جامد و اللي وراه يشاورلي بايديه اركن
ده الغباء يعني انتوا بموتسيكل و جايين لواحد سايق عربية و عايزين توقفوه ديه رمية واحدة هطيرهم هم الاتنين فرميت عليهم بشكل تحذيري بحيث لو مرجعوش هشيلهم و شديت شوية في اللحظة ديه عربية كانت جاية من ورا شكله شاف المنظر قالك اروح اوجب و لقيته قرب و خلاص بقي جنبي في اللحظة ديه انتهزت الفرصة و رميت ع الموتسكل جامد و زنقته بيني و بين العربية و لكم ان تتخيلوا منظرهم من الخضة و الموتسيكل لعب بيهم و كانوا هينزلوا يتعجنوا و هدوا ع الاخر و خدوا يمينهم و جريوا و انا كنت وصلت لليوتيرن شمال و صاحب العربية التانية داخل يمينو كلكست لصاحب العربية و لفيت و رجعت الحمد لله و الغريب اني مشوفتش حتي شومة طلعت و لا مستنيين اقف او اهدي و بعدين يطلعوه بدل ما اشيلهم لو شوفت سلاح

الواضح ان امبارح كان اليوم العالمي للتثبيت لأن في نفس اليوم الصبح كنت نازل مع صاحبي رايحين مستشفي المعلمين فخدناها من عند كوبري قصر النيل الصبح و الحمد لله الدنيا كانت هادية لا فيه ضرب و لا حاجة و قابلنا اتنين هناك بيحكولنا انهم كانوا هيتثبتوا ع مدخل التحرير واقفين قصادهم بالشوم و واحد عايز واقف قدام العربية و بيشاور بالشومة يوقفهم اللي كان سايق شاله بجنب العربية بحيث ميحصلوش حاجة و جري و التاني حصلت معاه برده بنفس الطريقة اول امبارح بس جري بدون ما يشيل حد

بعد ما خلصنا و احنا راجعين برده رجعت من كوبري قصر النيل عشان انزل النفق و اطلع ع الكورنيش ع كوبري 6 اكتوبر لقيت عيال كتيير متلميين ع عربية ع كوبري قصر النيل طبعا مبصتش و خلعت عالطول قبل ما تقلب لأن من كام يوم برده كنت نازل مع صاحبي هناك و احنا هناك و راجعين من عليه لقينا الطوب و الازايز طايرة و الضرب اشتغل و كله بيجري يمين و شمال و تحذيرات للناس كله يلف و يرجع او يجري و المشكلة ان الواحد معاه العربية لو ع رجله هيطلق ساقيه للريح

و اخيرا نصيحة يا جماعة حاولوا متنزلوش بليل كتيير و تبعدوا عن الشوارع الضلمة مع انها مبقتش فارقة ضلمة من نور او نهار من ليل
و خاصة ان كل ما اكلم حد اعرفه يقولي كنت هتثبت او قريبه اتثبت بالفعل و اتقلب

و ربنا يستر طريق الجميع