خليك ماشي مع الكتالوج
الـ5w-40 ده بتاع مواصفة vw 502/505
وعلى فكرة.. أنا عايش في السعودية... وبحط زيت 5w-30.. وعنديش أي مشاكل.
...
سؤال بسيط وهو اول مشاركه بمنتداكم الرائع
عربيتي اسكودا فيفوريت94 ايه افضل زيت ليها صيف وشتا؟؟؟
أهلا وسهلا بيك معانا.. وإن شاء الله تستفيد وتفيدنا كمان :)
الكلام اللي تحت ده اقتباس من المشاركة رقم 167 في نفس الموضوع بتاعنا هنا.
وعلشان أساعدك أكتر...
تقدر تنزل كتالوج العربية من هنا:
ŠKODA Favorit - Owner's manuals - ŠKODA
هو للأسف بالبولندي... بس صفحة الزيت فيه رقم 65 وفيها كل اللي حضرتك بتسأل عنه.
http://nileup.com/up/uploads/nilemotors_14170928951.png
...
انا لسة شاري عربية هايما فاملي موديل 2008 ، هي عربية صيني بس بموتور ماذدا 1600 cc ، صاحبها اللي جبتها منه ميعرفش يعني ايه زيت معدني او تخليقي ، فبتالي هو ميعرفش كان بيغير زيت نوعه ايه ، العربية ماشيه 92 الف كيلو ، الموتور بحالة جيدة جدا من حيث الاستخدام ، ومتصلحش فيه حاجة قبل كدا خالص ، تنصحني احط زيت ايه ، ولو هو كان بيحط معدني وانا حطيت تخليقي بعديه هيحصل مشكلة ، اتجنب كل ده ازاي عشان احافظ علي الموتور ، هل في نوع زيت احطه الاول بعد كدا احط التخليقي ، المشكلة كمان اني مش لاقي الكتالوج بتاع العربية فمش عارف هما ناصحين بايه . معلش طولت عليك بس لاني محتار اوي فالموضوع ده وحدش عارف يفدني
والله فعلا مشكلة بجد موضوع الكتالوجات اللي بتضيع دي... تقولش يعني حرام أدي كتالوج العربية للي هيشتريها مني؟؟
سبحان الله
المشكلة إن حتى كتالوج المازدا فاميليا 1997-2003 مش موجود على النت ببلاش
على العموم.. أنا عرفت أنزل كتالوج المازدا 3 موديل 2004.. وأعتقد إن المواصفات ما تختلفش كتير
Owners Manual | Mazda Vehicle Manuals | Mazda Canada
المشكلة إن الكتالوج معمول لعربيات أمريكا
لزوجة الزيت الموصى بيها في الكتالوج هي 5w-20 بس.. ومفيش لزوجات تانية...
وكود الـAPI على الأقل يكون SL .. مع مراعاة إن الزيت يكون موفر في الطاقة Energy Conserving
طبعا... مش هتلاقي لزوجة الـ5w-20... وأعتقد إن أنسب لزوجة في الحالة دي هي 5w-30
الحاجة التانية اللي تاخد بالك منها إن كود الـACEA يكون A5 أو A1 ... لإن الأكواد دي هي الموفرة في الطاقة... وأنا شخصيا بفضل الـA5 بدون شك.
على فكرة... ممكن قوي يكون كتالوج العربية الأصلي مش طالب كل المواصفات دي... بس احنا بنشتغل على حسب المتاح قدامنا.
ورأيي.. زن على دماغ الراجل اللي باع لكم العربية لحد ما يجيب لكم الكتالوج.. أو شوف لو موجود في التوكيل أو يجيبوه من الصين.
...
انا عندي استفسار عن انا بجرب دلوقتي شيل الجديد الفضي بس api طلعت مش مناسبه للمتور الكاتلوج عندي api SJ/sl فهل في فرق و الزيت الوحيد اللي كل مواصفات متطابقة من اللزوجة و api هو موبل 0w40 فهل ارجعله تاني مع العلم ان السيارة هوندا HRV 2005 والعربية عامله 158 الف
شكرا
سؤال تاني معلش, هل يوجد فروق في السحب أو كتمة في المتور بين 5W30 و 5W40, عشان واضح إن مواصافات العربية VW 502 Fixed Service Interval و VW 504 Long Term Service Interval وانا كدا كدا مش لائي Castrol 5W30 و كلهم بيقولو بطل ينزل و مفيش غير 5W40 في Castrol.
معلش أستحملني أنا عارف إني صدعتك
لا خالص والله.. مفيش صداع ولا حاجة..
أنا بس اتلخبطت شوية...
هو مش حضرتك كنت بتقول إن مواصفة عربيتك هي VW 505-00/507-00 ؟
واحنا اتفقنا إن زيت موبيل أو زيت وولفر يمشوا معاك... ده حتى حضرتك قلت إنك هتشتري Mobil 1 ESP Formula.
وقلنا كمان إن موضوع الماركة ده ما تتقيدش بيه... المهم إن الزيت يكون موفي طلبات الكتالوج.
إيه اللي غيرها وبقت VW 502-00/504-00 ؟؟؟
ولا حضرتك بتتكلم على عربية تانية؟؟
...
مبدئيا هي نفس العربية, وانا فعلا أشتريت ال Mobil ESP Formula بس التوكيل مرضيش يحطو (بدون ما أدخل في تفاصيل) و قال لي على مسئوليتي وقالو زيت Castrol بس هو الي ينفع, وانا بصراحة قلت مش طلباها أعملها بره والعربية تخرج من الضمان و هما كدة كدة بيتلككو من غير حاجة.
المهم رجعت الزيت و بعدين لما بصيت تاني في الكتالوج لقيت ال VW 507 ده للديزل (Diesel) وال VW 504 Long Interval Service الي هو المفروض يتغير كل سنتين أو 30000 KM بس مش متأكد صراحة.
ولو Fixed Interval Service الي هيا كل 10000-15000 KM يبقى VW 502 / VW 504, ده الي مكتوب في الكتالوج بالضبط و ده لينك ليه في صفحة 212.
http://www.seatcupra.net/files/Leon5...eon%20MY13.pdf
فا قلت كده كده ال VW 504 ينفع في الحالتين بس للأسف مفيش غير زيت Castrol 5W30 الي ينفع وانا مش لاقي خالص في السوق غير زيت Castrol 5W40 الي هو مطابق مع VW 502, عشان كده كنت بسأل حضرتك.
دلوقتي قدامي الآتي:-
1- أمشي مع مواصفات VW 502 و أجيب Castrol 5W40.
2- أنتظر و أدور أكتر على Castrol 5W30 عشان أمشي مع مواصفات VW 504. (علما إن العربية ماشية 6000 KM و عدى 1000 KM على الصيانة أصلا بسبب الحوارات ده).
ده بالنسبة لو هعمل الصيانة في التوكيل, و لو برة التوكيل يبقى أجيب تاني زيت Mobil 1 ESP Formula او لو في حاجة أحسن و ده مخوفني عشان الضمان وعشان لو أي زيت تاني غبر Castrol ممكن يكون غير مناسب.
وياريت لو حضرتك توضحلي كده لو فيه فرق كبير بين 5W30 و 5W40 من حيث الأداء والسحب والتكييف والبنزين إلخ...
أسف على الإطالة و في أنتظار رد حضرتك...
مفيش إطالة ولا أي حاجة.. وصدقني .. أكتر حاجة بحبها هي الأسئلة الجديدة دي لإنها بتساعدني كمان إني أدور وأزود معلوماتي..
نيجي لأسئلة حضرتك..
الحقيقة الكتالوج حاطط شوية قواعد لموضوع الزيت.. وواضح إنه مركز على مسألة نوع الزيت إذا لإنه معتمد على أسلوب صيانتك للعربية.
فيه جملة مهمة مكتوبة في الكتالوج.. إن أسلوب الصيانة المتبع بيبقى مكتوب على ظهر كتيب الصيانة اللي جاي مع العربية (كتيب الضمان اللي بتقدمه للتوكيل)... وبيبقى مكتوب عليه كود معين
لو الكود ده PR QI6 يبقى تحط زيت Long life بس.. اللي هو في حالتك VW 504 ..
أي كود تاني يمشي معاه الاتنين.. وأنا بصراحة ما أتوقعش إن الكود ده (PR QI6) يكون مكتوب على الكتيب..
عموما.. كود الـ502 مرن أكتر من كود الـ504.. لإن فيه درجات لزوجة أكتر.
باختصار .. الـ502 بيقوللك حط زيت لزوجته 5W-X أو 10W-X... وX هنا معناها أي لزوجة.. 30 أو 40 أو 50
إنما كود الـ504 بيلزمك بدرجة لزوجة منخفضة (0w-30 أو 5w-30) علشان يوفر في استهلاك البنزين.. ده غير إنه صديق للبيئة (مطابق لمواصفة Euro 4 لتقليل انبعاثات العادم الضارة).
تقدر ترجع للوصلة دي لو عايز تتأكد:
Volkswagen Oil Specifications - oilspecifications.org
نيجي للفرق بين الـ5W30 و 5W40
بشكل عام.. أداء الموتور مع زيت الـ5w-40 هيبقى أقل شوية من ناحية السحب.. واستهلاك البنزين هيزيد شوية
بس ما أتوقعش إن الفرق هيكون ملحوظ بشدة
رأيي .. خليك مع التوكيل.. ما دام ما بيحطوش حاجة مخالفة للكتالوج.. وعلشان الضمان طبعا..
...
أنا فعلا بصيت على كتالوج الصيانة عشان أشوف أنهي كود مكتوب, بس للأسف مفيش حاجة متعلم عليها خالص و ده الي أثار حيرتي أكتر.
التوكيل بيحط Total 5W30 بس مواصفات VW502 / VW 505 مش VW 504, عشان كده قلت ال Castrol أفضل, بس مفيش غير 5W40 وانا حاسس انه هيأثر فعلا من ناحية الأداء و كده, و في نفس الوقت خايف ال 5W30 يأثر على عمر المتور على المدى البعيد.
طبعا انا يهمني اﻷداء بردو, فا مش عارف بقى انت رأيك أيه أو لو مكاني تعمل ايه بإعتبار كل النقاط المذكورة
تعديل: لو مع التوكيل زي ما بتقول يبقى يا Total 5W30 VW 502 / 505 او Castrol Edge 5W40 VW 502/ 505
مواصفة الـ502 تخص مواتير البنزين... ومواصفة الـ505 تخص مواتير الديزل (زي ما حضرتك نبهتنا من شوية).
فالزيت اللي تلاقي عليه المواصفتين دول يعني ينفع لمواتير فولزفاجن البنزين والديزل.
نفس الكلام يتقال على مواصفة الـ 504 (للبنزين) .. والـ507 (للديزل)
بالنسبة للزوجة..
أتفق معاك.. اللزوجة الـ40 هتديك حماية أكتر شوية.. والـ30 هتديك توفير في البنزين وسحب أحسن.
طيب نحلها ازاي دي؟؟
اسأل نفسك... انت ناوي تقعد العربية عندك كام سنة؟؟
لو أكتر من 7 سنين... خليك في الـ40...
لو أقل... خليك في الـ30
إشمعنى 7 سنين؟؟؟ علشان ده غالبا العمر اللي العربيات بتبدأ تفتح بقها فيه.
هو أنا طبعا ناوي أخلي العربية حبة حلوين, و مش من النوع الي بيحب يغيير كتيير, بس هو أنا مينفعش أجرب المرة ده 5w40 وبعديين أغير 5w30 لو حسيت الدنيا مش تمام, ولا غلط على المتور؟ عشان أنا سمعت فيه ناس بتحط 5w30 في الشتاء و 5w40 في الصيف, و مصر تقريبا شهريين ثلاثة الي هما ممكن يكونو فعلا برد والباقي صيف, لي درجة إني خايف يكون ال 5w40 مش مناسب للجو الحالي عشان المتور لسه جديد.
سؤالى للبشمهندس ربنا يباركلو ؛
انا معايا سوزوكى سويفت ديزاير 2015 و فى صيانة الالف كيلوا فى التوكيل غيرت زيت توتال 5000 كيلوا و العربيه كانت عامله 1070 كيلوا و اللى انا فهمته من كل اللى قريته ان الكتالوج بيوصى ب زيت 5 دابيو 30 و انا ناوى امشى على الزيت ده 4000 كيلو و انزله و اغير لزيت تخليقى هل كده غلط على الموتور و ايه افضل زيت تنصحنى بيه للسويفت 2015 فى مصر و جزاك الله خيرا
ربنا يجازيك خيرا على مجهودك
أهلا بحضرتك...
أنسب زيت لموتور عربية حضرتك هو الموصى عليه في الكتالوج..
والحمد لله.. قدرت أوصل للكتالوج من موقع ماروتي سوزوكي.
http://marutistorage.blob.core.windo...SwiftDzire.pdf
دي هي توصيات الكتالوج للموتور البنزين.
http://nileup.com/up/uploads/nilemotors_14190561201.png
وبناء على الكتالوج.. لزوجة الـ5w-30 و 10w-30 ما ينفعوش مع موتور عربيتك
وفي المقابل.. الكتالوج إدى حضرتك اختيارات تانية كتير
10w-40 , 10w-50
15w-40 , 15w-50
20w-40 , 20w-50
كده السوق اتفتح قدام حضرتك.. وأي نوع زيت معدني أو نصف تخليقي في السوق يمشي مع حضرتك
الزيوت التخليقية مش هتنفع لإنها مش مناسبة من ناحية اللزوجة.. إنما لو حصل ولقيت زيت تخليقي يمشي مع درجات اللزوجة اللي فوق دي.. مفيش أي مانع من استخدامه.
خلي بالك... الكتالوج عامل رسمتين للزيت... واحدة لموتور البنزين.. والتانية لموتور الديزل (السولار)
وواضح جدا إن موتور الديزل أحدث ومتطور أكثر.. بدليل نوعية الزيوت الموصى بيها.
نصيحتي الأخيرة لحضرتك.. اثبت على نوع زيت وبلاش تجارب التغيير كل شوية.
متشكر لحضرتك يا بشمهندس
انا عربيتى زيرو كل اللى عملته لحد دلوقتى 1200 كيلو بس و لكن فى التوكيل فى اول صيانه اعملها غيرولى زيت معدنى توتال كوارتز 5000 لزوجته 20 دابليو 50 بس حاسس ان انا غلطت فى حق عربيتى لما عرفت بعد كده ان الزيت المعدنى دا بيتحط فى المواتير القديمه و الزيوت التخليقيه الحديثه المعالجه كيميائيا دى بتنضف الموتور و تحافظ عليه من الاحتكاك و التآكل الداخلى على المدى الطويل لعمر الموتور بس لازم تكون معود عربيتك عليه من الاول
فا نا مش عايز اعود عربيتى و هى لسه جديده على زيت معدنى حرام فانا ناوى اغير لزيت تخليقى المره الجايه ممكن بعد شهرين تلاته او كمان 1000 كيلو و انزل الزيت المعدنى و اجيب زيت تخليقى و اغير الفلتر طبعا ؛ فحضرتك تنصحنى بزيت تخليقى مناسب و امته انزل الزيت المعدنى و الفلتر عشان العربيه ما تتعودش عليه و يا ريت لو فى معلومه عن الفلتر المناسب مع العلم انهم فى التوكيل بيتعاملوا بس فى زيت توتال كوارتز 5000 20 دابليو 50 معدنى و توتال كوارتز 9000 و لزوجته 5 دابليو 40
وهل انا فعلا غلطت لما حطيت زيت معدنى فى موتور لسه جديد و ازاى اصلح الغلطه دى
متشكر لحضرتك يا بشمهندس
انا عربيتى زيرو كل اللى عملته لحد دلوقتى 1200 كيلو بس و لكن فى التوكيل فى اول صيانه اعملها غيرولى زيت معدنى توتال كوارتز 5000 لزوجته 20 دابليو 50 بس حاسس ان انا غلطت فى حق عربيتى لما عرفت بعد كده ان الزيت المعدنى دا بيتحط فى المواتير القديمه و الزيوت التخليقيه الحديثه المعالجه كيميائيا دى بتنضف الموتور و تحافظ عليه من الاحتكاك و التآكل الداخلى على المدى الطويل لعمر الموتور بس لازم تكون معود عربيتك عليه من الاول
فا نا مش عايز اعود عربيتى و هى لسه جديده على زيت معدنى حرام فانا ناوى اغير لزيت تخليقى المره الجايه ممكن بعد شهرين تلاته او كمان 1000 كيلو و انزل الزيت المعدنى و اجيب زيت تخليقى و اغير الفلتر طبعا ؛ فحضرتك تنصحنى بزيت تخليقى مناسب و امته انزل الزيت المعدنى و الفلتر عشان العربيه ما تتعودش عليه و يا ريت لو فى معلومه عن الفلتر المناسب مع العلم انهم فى التوكيل بيتعاملوا بس فى زيت توتال كوارتز 5000 20 دابليو 50 معدنى و توتال كوارتز 9000 و لزوجته 5 دابليو 40
وهل انا فعلا غلطت لما حطيت زيت معدنى فى موتور لسه جديد و ازاى اصلح الغلطه دى
ملاحظه ان الكتالوج اللى حضرتك جيبته من ع النت مختلف عن اللى عندى فى 10 دابيو 30
؛ 10 دابيو 40 ؛ 15 دابيو 40 ؛ 20 دابيو 40
و افضل اختيار لاستهلاك الوقود و بدء التشغيل الجيد فى الطقس البارد
5 دابيو 30 بس مش عارف احمل الصوره الموقع مش قابل معايا و صوره الكتالوج هتلاقيه فى صفحه 35 من نفس الموضوع اللى احنا عليه دلوقتى با سم ayman
بصراحة أنا مش فاهم يعني إيه العربية "تتعود" على زيت!!!
هو ماله الزيت المعدني ؟؟؟
الزيت المعدني زيه زي الزيت التخليقي... عليه إضافات بردو ويكادوا يكونوا زي بعض في الحتة دي
كل الموضوع إن الزيت التخليقي مميزاته في عمره الطويل وسرعة السريان في بداية التشغيل..
عموما ما تخافش.. الزيت المعدني مش بيضر العربية لو تم اختياره بصورة صحيحة
وكمان الزيت التخليقي... ممكن قوي يكون ضار لو اخترته غلط
خلينا نشوف الكتالوج بيقول إيه..
http://i856.photobucket.com/albums/a...RUMS/SWIFT.jpg
أولا.. الكتالوج ما قالش إن الزيت لازم يكون تخليقي
ومفيش كتالوج بيقول الكلام ده إلا نادرا جدا وفي بعض السيارات السوبر رياضية..
ثانيا... كود الـAPI (أو تصنيف الجودة زي ماهو مكتوب في الكتالوج) الموصى بيه مش هتلاقي منه غير الزيوت المعدنية في أكواد SG , SH , SJ
كود SL ممكن تلاقي منه معدني أو تخليقي "رخيص" أو نصف تخليقي
كود SM غالبا بيكون تخليقي في السوق المصري
على فكرة.. كود SM و SN فيه منهم زيوت معدنية ... بس مش بتنزل مصر.
المهم ... اتأكد إن الزيت يكون مستوى الخدمة بتاعه زي الكتالوج أو أحسن منه.. وكمان تكون لزوجته زي الكتالوج
تخليقي ولا معدني... الموضوع ده مش مشكلة كبيرة
على فكرة... ممكن جدا تلاقي زيت معدني بمواصفات أفضل من بعض الزيوت التخليقية
تفتكر في الحالة دي .. أشتري مين؟؟؟
على العموم... الغلطة الوحيدة اللي حصلت إن اللزوجة بتاعت الزيت اللي في التوكيل (سواء المعدني أو التخليقي) مش هي اللي موصى بيها في الكتالوج.
قدامك حل من اتنين:
1- اسألهم لو تقدر تجيب زيت من برا وتديهولهم يحطهولك.. وهل ده يطلعك من الضمان ولا لأ..
لو قالولك ينفع... هات زيت لزوجته حسب الكتالوج ومستوى الخدمة بتاعه حسب الكتالوج بردو..
ومش هقوللك على ماركة زيت... أي زيت متوافق مع الكتالوج بتاع العربية هيمشي كويس معاك.
2- لو قالولك ما ينفعش... حاول تتكلم معاهم وتقوللهم إن الزيت ده مش زي الكتالوج...
غالبا هيقولولك إنهم ضامنين العربية فترة الضمان (خمس سنين بالكتير... وبعد كده وقعت يا معلم)
لو محاولاتك ما جابتش نتيجة... اطلع على حماية المستهلك.
...
جزاكم الله خيرا ......... معلومات قيمة جداااااااااااا
متشكر ليك جدا على الرد
بس انا بعد قراءه و بحث ع النت عن الزيوت و تكنولوجيا التطور بتاعها لقيت ان 75 % من الضرر اللى ممكن اللى يحصل على المدى الطويل لموتور العربيه هى فى فترة الاحماء و بداية التشغيل على البارد لان الزيت بيكون مترسب تحت و تقيل خصوصا فى البروده زى العسل لما بيكون فى التلاجه بياخد وقت عشان يوصل للاجزاء الداخليه و فعلا الزيوت التخليقيه بتوصل بسرعه اكبر و فيها مواد منظفه اكتر
ولقيت ان اكتر زيت مناسب للسويفت ديزاير اتوماتيك 1.2 لتر هو زيت
كاسترول ماجنيتك 5w30 a5 بتكتولوجيا الجزيئات اللاصقه اللى بتلزق فى الاجزاء الداخليه لتوفير الحمايه عند بدء التشغيل على البارد و هو زيت انجليزى تعبئه اماراتى
بس دلوقتى عايز اعرف ايه انسب فلتر زيت كويس و مناسب و يا ريت لو حد يعرف معلومه عن الفلتر المناسل او اسنخدم كاسترول ماجنيتك يحكيلنا عليه
جزاك الله خيرا كثيرا
ليا ملحوظة على كلام حضرتك...
أولا... أتفق مع حضرتك إن أكبر ضرر بيحصل للموتور هو في بداية تشغيله.. ﻷن طبقة الزيت اللي المفروض تكون موجودة على الأجزاء المتحركة بتبقى شبه غير موجودة.. خصوصا لو كانت فترة التوقف كبيرة
بس موضوع تقل الزيت وإنه يبقى زي العسل في الجو البارد... فده ما بقاش موجود حاليا
الكلام ده بيتقال على الزيوت أحادية الدرجة.. على العكس من الزيوت الحديثة متعددة الدرجات
وإذا اخترت لزوجة الزيت بطريقة صحيحة.. فمسألة تجمد الزيت دي أو حتى ثقله تعتبر غير موجودة.
يمكن اللي يميز الزيت التخليقي عن الزيت المعدني إن سرعة سريانه في بداية التشغيل أكبر.. وبالتالي فالفترة اللي هيقعدها الموتور من غير تزييت فعلي هتبقى أقل.
الفرق اللي بنتكلم عليه بيتقاس بالثواني..
أغلب الزيوت التخليقية بتوصل لكامل أجزاء الموتور في أقل من 5 ثواني
وأغلب الزيوت المعدنية بتوصل لكامل أجزاء الموتور في حدود ال10 ثواني
بالنسبة لاختيارك للزيت..
طبقا للكتالوج.. يكاد يكون كل الزيوت التخليقية اللي لزوجتها 5w-30 تمشي مع موتور العربية..
ميزة زيت كاسترول ماجنتك الأساسية هي الإضافات اللي حاطينها علشان توفر طبقة حماية بعد ما الزيت يترسب..
أتوقع إن الزيت ده عليه إضافات من مادة البورون.. زي الموجودة في الwd-40 اللي بنستخدمه في بيوتنا.
اختيار موفق إن شاء الله.
بالنسبة للفلتر... فحاول تشتري الفلاتر الأصلية الياباني..
...
[hide]السلام عليكم
الصراحه يا بش مهندس أنا استفدت جدا من مواضيع الزيوت بتعتك لكن عندي مشكلة أنا معايا فيتارا 2002 اتوماتك v6 من اسبوع لحظت تكتكة جامدة في الدوار لمدة خمسة دقائق ودي مدة طويلة لو انتا مستعجل وبعدين الصوت بيروح وعلي فكرة ماشية 220ك وماتورها علي سبع كتابين تقسمية ولأن الكتابين دي شهادتها معتمدا علي بألوف شد في مع عدم وجود زيت في أعلي الماتور ممكن تبوظ وأنا كنت باستعمال شيل 5000 و النهار طلبت من القاهرة بلدلفري فلبولين نصف تخليقي ارمورد ده صح ولا لا وبعد اذنك عاوز أعرف أفضل زيت للفتيس الاتوماتيك لها[/hide]
التكتكة دي معناها إن طلمبة الزيت مش بتضخ زيت.. أو ضخها ضعيف جدا..
والصوت ده جاي من حركة البلوف الداخلية اللي على طلمبة الزيت .. ووظيفة البلوف دي هي منع الزيت من الرجوع من مجاري الزيت إلى الطلمبة والنزول إلى الكارتير.
أول حاجة حضرتك تعملها هي الكشف على مستوى الزيت
والمؤكد إن حضرتك ما تشغلش الموتور لحد ما تغير الطلمبة.. لإن التآكل اللي بحصل في أول 5 دقايق دول بدون زيت يساوي التآكل اللي ممكن يحصل في سنة كاملة ويمكن أكتر.
من الآخر.. الوضع ده لو استمر معناه عمرة موتور خلال شهر بالكتير.
خلينا نصلح الوضع ده الأول وبعدين نشوف الزيت المناسب.
...
ألف شكر لهتمام حضرتك
بس أنا قصدي بلبلوف chains tension piston ودي اخر جزءا في المحرك يصلها الزيت في دورة التزيت ولأن في اسكندرية الجو بارد جدا اليومين دول فا الزيت مش واصل في اخر الدورة لكن مستوى الزيت تمام جدا بس مع البرودة مش واصل الا بعد شوية و الدليل حتى لو العربية باردة من بليل و دورتها الظهر مش تعمل الصوت العالي ده لكن الصراحة في كمان صوت زحلقة علي سير البور و التكيف و لو طرمبة الزيت فيها مشكلة كان الصوت هببقا مستمر صح أنا حابب أعرف رأي حضرتك
يا فندم لو طلمبة الزيت مش قادرة توصل الزيت لحد آخر دورته .. يبقى مؤكد فيها مشكلة.
وموضوع الجو البارد ده يفترض ما يأثرش على الزيت لإن الزيت متعدد اللزوجة.. ويشتغل في الجو البارد بنفس كفاءة الجو السخن.
عموما.. أنصحك تروح لميكانيكي كويس يكشفلك عالعربية.. وأنا وصفتلك ميكانيكي في موضوعك عن سؤالك على ميكانيكي سوزوكي فيتارا..بصراحة الراجل فوق الممتاز .. بس هو في سيدي بشر.
...
والله يا بش مهندس حضرتك محترم جدا بس أنا فعلا كنت عند الميكنيكي في سيدي بشر امبارح بس اسمه محمد عبده وهوأ كان ليدر في توكيل سزوكي وسألته أمبارح قلي عشان الزيت بارد وحالة المأمور و الحمد لله بيعرق مياه ومستوي الزيت تمام
والنسبة لرضك علي موضوع الميكانيكي والله لسة شايفه دلوقتي لأن الموضوع كان علي عربية غير الي معايا ألأن
الله يكرمك.. أنا ما عملتش حاجة لسه :)
طيب.. ولو إني مش مقتنع بصراحة بموضوع الزيت البارد ده... بس لو عايز تشوف نوع زيت تاني.. فالأفضل نمشي على توصيات الكتالوج ونشوف إيه أقل لزوجة ممكنة ممكن نحطها.
لو كتالوج العربية مع حضرتك.. يا ريت ترفعلنا صورة صفحة الزيت.
...
الف شكر انا فعلا كلمت الاسطي جمال قلي ممكن يمون انسداد في بلوف الكاتينة وقلي غير الزيت و الفلتر
[IMG]http://nileup.com/up/uploads/nilemotors_14202720651.png[/IMG]
علي فكرة نسيت أقول لحضرتك اني كنت بحط ربع كيلو زيت خروع مع 6 ك غيار الزيت بس ده كان من 6 شهور
فى زيت معين موصى به للسياره بعد 100 الف كم
موضوع ممتاز
بش مهندس الزيت ده مناسب ولا لا
[IMG]http://nileup.com/up/uploads/nilemotors_14203679301.png[/IMG]
[IMG]http://nileup.com/up/uploads/nilemotors_14203682581.png[/IMG]
كتالوج العربية مكتوب فيه 5w30 sj
أنا ماشى 45000 و كنت بحط زيت معدنى
ايه أحسن زيت استعملوا و أشتيه منين
و شكرا