جزاك الله خير...............جهد اكثر من رائع................
جزاك الله خير...............جهد اكثر من رائع................
شكرعلى المعلومات القيمة. بخبرتك كده ايه أحسن. زيت يدى أداء و
يحافظ على موتور عربيه فيات 32
الزيوت اللي في السوق حاليا أقل نوعية فيها ( اللي الكود بتاع الapi بتاعها sg ) معمولة للعربيات موديلات التسعينات وما قبلها
طبعا حضرتك عارف إن آخر فيات 132 وحتى الأرجنتا كانت إنتاج 1987 تقريبا.. وبالتالي أي زيت موجود في السوق ومن أي ماركة هيكون مناسب جدا ومفيهوش أي مشاكل
طبعا.. الزيوت اللي كود الapi بتاعها أعلى هتديك حماية وأداء أعلى.. بس سعرها أغلى بكتير
فيه حاجة مهمة جدا.. ابعد عن أي زيت تخليقي .. خصوصا لو كنتش عملت عمرة للموتور بقالك فترة أطول من 5 سنين.
بس حقيقي حقيقي.. مش هقدر أدلك على ماركة زيت معينة.. ﻹنهم بالنسبة لي كلهم واحد... اختار الماركة اللي تريحك ... بس لما تشتري اختار مكان موثوق فيه علشان الغش.
سؤال بس أعرف منين الزيوت التحليقيه دى أنا بحط كاتليكس. فلور ده كويس ولا ايه
طب لومفيهاش احراج........ممكن اعرف ايه هو الزيت المناسب للنيو صني؟؟ وهل mobil1 و shell altra مناسبين للعربيه ولا لا؟ وخصوصا اني بحس ان العربيه تقيله في السحب غير اي نيوصني سوقتها وصوتها بيعلى على 2500 RPM ومش عارف التقل ده من الزيت ولا من الفتيس ولا من ايه !!!!!!!!
بصراحة مش واخد بالي من نوع الزيت اللي حضرتك بتحطه... لو تقدر تجيبلنا اسمه مظبوط بالانجليزي أو تصورلنا العبوة من قدام ومن ورا
ولو الموضوع صعب هحاول أبسطها على حضرتك
ببساطة كده.. امسك علبة الزيت وبص عليها
لو الزيت تخليقي.. هتلاقي مكتوب عليها Synthetic بخط واضح وكبير
ولو عايز تعرف كود الـAPI... غالبا هتلاقيه بخط صغير.. غالبا على ظهر العلبة.. وممكن تلاقيه من قدام تحت كود اللزوجة
أعتقد إنك بتدور على زيت اقتصادي ما يكلفكش كتير...
صدقني زيوت التعاون كويسة جدا..وبالنسبة للفيات 132 تقدر تحط فيها أي زيت في التعاون..
بس ما تنساش يكون متعدد درجة اللزوجة.. يعني مش مكتوب عليه SAE 40 مثلا.. لازم يكون مكتوب عليه حاجة زي 20W-50 أو 15W-40.
...
ايهما افضل ياباشا بعد اذنك في نوعية الزيت التخليقي لكيا سيراتو 2014
1- موبيل وان .... بس في ناس بتقول انة بيتبخر فاية راي حضرتك في الكلام دة
2 - شل الترا بس ممكن الواحد يتعب علي مايلاقية بس موجود
3- توتال كوارتز بس في ناس بتقول انة بيعلي صوت الموتور
فاية راي حضرتك وايهما ترشح علمأ باني لسة لم اغير الزيت بعد ولسة لم اكمل 1000 كيلو فاعايز اعود العربية الحقيقة علي نوعية زيت تكون كويسة وامش عليها باستمرار .. .. وايهما تفضل في رقم اللزوجة بما ان حضرتك معاك نفس العربية .. وبارك الله فيك
أنا أؤيد فكرتك في استخدام نوع زيت واحد ... لإني قريت في أحد المواضيع إن الاستمرار على ماركة زيت واحدة أفضل علشان الإضافات اللي في الزيت الجديد ممكن تسبب بعض المشاكل مع بقايا الزيت القديم.. صحيح كمية البقايا صغيرة وممكن تهمل تأثيرها.. بس استمرارك في استخدام ماركة زيت بعينها أفضل بشكل عام من التغيير من ماركة للتانية كل شوية.
المسألة هنا مالهاش علاقة بكون ماركة زيت معينة أفضل من التانية... وزي ما أنا بقول باستمرار.. الفروق بين ماركات الزيوت تكاد تكون غير ملموسة.
بالنسبة لزيت موبيل 1 .. أنا بصراحة مش مقتنع بالكلام بتاع التبخر اللي طالع عليه ده... بدليل إن ناس كتير بتستخدمه ومحدش اشتكى.. والناس اللي اشتكت أظن إن الزيت مش مناسب للاستخدام في مواتيرهم أصلا.
بالنسبة لزيت شيل ألترا.. أنا شخصيا أفضل ما أتعبش علشان أشتري الزيت.. خصوصا إذا ما كانش فيه فروق محسوسة زي ما قلنا من شوية
بالنسبة لزيت توتال كوارتز.. فكتالوجات سيارات كيا عموما بتوصي باستخدام زيوت توتال كوارتز... وأنا شايف إن لو الزيت ده متوفر بسهولة.. اشتريه... انت كده ماشي زي الكتاب ما بيقول
بالنسبالي.. أنا ما غيرتش الزيت غير مرة واحدة هنا من ساعة ما اشتريت العربية... وغيرته على 5000 كم... حسب ما قالولي في التوكيل وأنا باستلم العربية
رحت في أحد محطات الخدمة التابعة لوكيل كيا وحطولي زيت بترومين a-1 تخليقي مستوى الخدمة بتاعه api sn ولزوجته 5w-30
http://img.montada.haraj.com.sa.s3-w...a28092f5c0.jpg
الحقيقة ما لاحظتش مشكلة مع الزيت.. وصوت العربية (اللي عامل لناس كتير مشكلة) ما اتغيرش.
أنا لو ناوي أغير الزيت .. هحط زيت توتال كوارتز .. والسبب في كده هم مجرد إني أمشي على توصية الكتالوج.. ولو إن الجزئية دي بالذات مش مشكلة بالنسبالي.
حضرتك عارف طبعا إن اللزوجة الموصى بيها في كتالوج السيراتو (لمنطقة الشرق الأوسط) هي:
5w-30
5w-40
10w-30
15w-40
20w-50
يمكن لو لقيت زيت 5w-40 ممكن أجربه ... بس أتوقع تغيير بسيط في سحب العربية.
...
الحقيقة مقدرش أقول إذا كان ينفع تستخدم الزيت ده إلا لما نرجع لكتالوج العربية ونشوف إذا كان الزيت يتوافق مع المطلوب من ناحية اللزوجة ومستوى الخدمة في الأول.
وإذا كان الزيت النص تخليقي ماشي مع المكتوب في الكتالوج ، يبقى المفروض نمشي على خطوات التغيير دي لإن موتور عربية حضرتك يعتبر قديم (12 سنة)، وغالبا لما تغير لزيت تخليقي هتلاقي جوانات وأويلسيلات الموتور بتبدأ تضرب واحدة واحدة زي ما شرحنا
...
السلام عليكم يا باش وطبعا مجهود رائع ملموس فى هذا الموضوع وربنا يجعلة فى ميزان حسناتك
ثانيا : والدتى عربيتها كيا سيفيا 2002 من الزيرو لحد 60000 كم كانت بتحط زيت معدنى موبيل xhp وكنت بغيرة على 4000 او 4500 كم والكلام دة لمدة كبيرة 10 سنوات وبعد كدة بدائت من سنتين اغير نوع الزيت لتخليقى بعد 60000 وكلو تمام ومفيش بخرة وكلة تمام ولزوجتة 5w - 40 وهذة اللزوجة مذكورة بكتالوج السيارة وبيأدى الغرض لحد 10000 كم بدون مشاكل بالسيارة سواء صوت عالى او بخرة او اى مشكلة والدنيا تمام ولله الحمد .
ثالثا : المشكلة بقى ان جوان التاكيهات اللى فوق دة بدأ يجيب زيت بسيط بس بتظهر المشكلة دية فقط لما يكون فى سفر بالعربية اى بيظهر عند الضغط العالى اى سرعات زيادة فهل المشكلة دية بسبب تغير الزيت لتخليقى ام دية مشكلة عادية مش بسبب الزيت وهل ممكن الزيت يسسب مشاكل اخرى او يضرب اولسليهات تانية اكون عارفها ولا ارجع للزيت المعدنى تانى و خلاص
ملحوضة السيارة عاملة الان 78000 كم ومعلش طولت عليك . والسلام عليكم ورحمة الله وبركاتة
المشكلة دي أساسها إن العربية عمرها دلوقتي أكتر من 10 سنين.. والزيت التخليقي أظهر المشكلة بوضوح
المعروف إن أي أجزاء مطاطية أو بلاستيكية عمرها الافتراضي 5 سنين.. بيحصل للأجزاء دي تحلل باستمرار بتفقد فيها خواص المرونة بتاعتها لحد ما يوصل لمرحلة إنها ممكن تتكسر بسهولة.. والكلام ده بيظهر بوضوح بعد خمس سنين.
واضح طبعا إن العربية مش بتمشي كتير.. يعني لما حضرتك غيرت للزيت التخليقي كان عمر العربية عدى ال5 سنوات ( 8 غالبا )... والزيت التخليقي كشف الجوانات والأويلسيلات المشرخة.
المشكلة دلوقتي إنك حتى لو رجعت للزيت المعدني هتفضل الجوانات تجيب زيت لإنها خلاص.. حالتها بقت ما تستحملش.
الحل دلوقتي إنك تغير جوانات الموتور.. (هما مش كتير على فكرة).. وممكن ترجع للمشاركات رقم 18 و 73 من نفس الموضوع لتوضيح أكتر
...
أشكرك لمتابعة الموضوع وعندى كام سؤال
ايه هى الأولسيلات اللى محتاجة تغيير علشان أستعمل زيت تخليقى
وأنا راجعت كتالوح العربية ولقيت إن بيانات الزيت كالآتى
http://center.jeddahbikers.com/uploa...3979824421.png
أعلى زيت موجود فى الكتالوج API SL مش عارف فيه زيت تخليقى من الفئة دى ولا هيبدأ من M
وفى النهاية لو لقيت زيت تخليقى مناسب وغيرت الأولسيلات ونضفت الموتور علشان أستخدمه ... هيفرق فى الأداء ولا هيزيد عمر الموتور ولا ايه ؟
زي ما قاللك د. خالد أسامة.. كود الapi المكتوب هو أقل كود تقدر تحطه في الموتور... والواضح إن أقل كود مسموح هو se... يعني أي نوع زيت لمواتير البنزين موجود في السوق ممكن تحطه وانت مطمن.
على فكرة... كذا مرة شفت زيوت تخليقية الكود بتاعها sl... وبتبقى رخيصة طبعا.
بالنسبة لفرق الأداء... ممكن تلاحظ فرق بسيط .. بس ده بسبب اللزوجة الخفيفة.. مش علشان إنه تخليقي.
إنما الميزة الأساسية طبعا في طول عمر الموتور اللي بيستخدم زيت تخليقي.
على فكرة.. كل الكلام ده مكتوب في الموضوع الأساسي فوق... بس اقراه تاني بالراحة.
...
أولاً شكراً ألف شكر على هذا الجهد الرائع والكم الغزير من المعلومات
و أعتقد فعلاً ان هذا الموضوع هو مرجع أساسى لمن يريد معلومات تفيده حقاً فى اختيار الزيت المناسب لسيارته
خصوصاً ان معظم المعلومات اللى عندنا عن الزيوت معلومات زى ما حضرتك قلت مصادرها ميكانيكى او مراكز زيوت وبالتالى أغلبها معلومات خاطئه
فشكراً ألف شكر مره أخرى
وإذا سمحت لى عندى سؤالين :
السؤال الاول هل صحيح ان وضع مغناطيس قوى على فلتر الزيت بيساعد على تجميع الرواسب داخل الفلتر ؟
السؤال الثانى انا بستخدم ڤالڤولين إنچن آرمور و ميعاد تغيير الزيت قرب وبفكر أجرب وولڤر رأيك الشخصى أغير ولا بلاش علماً بان العربيه لانوس ٢٠٠٨ و حالة الموتور الحمد لله ممتازه ؟
السلام عليكم ورحمه الله وبركاته
اخى الفاضل جزاك الله خيرا على هذا الموضوع الممتاز الصراحه رائع
لى سؤال بعد اذنك :
معاى عربية بولونيز 87 وباغير زيت سوبر 7500 مصر للبترول 1000كم وكنت عايز اغير لزيت 3000كم بس بتاع الزيوت قالى خليك فى ال 1000كم احسن والصراحة مش واثق فى الموضوع ده
فهل ممكن اغير لزيت 3000 كم ولا افضل على ال 1000كم واه هو النوع الكويس مع العربيات القديمة زى البلونيز بتاعتى ولك جزيل الشكر
وضع مغناطيس قوي هيساعد على تجميع الرواسب اللي بتنجذب للمغناطيس .. بمعنى إنه الشوائب الحديدية هي بس اللي المغناطيس هيجذبها.
غير كده مفيش.
فيه في أمريكا منتج مخصوص عبارة عن كذا مغناطيس مرصوصين جنب بعض ويتلفوا حوالين الفلتر..
زي كده:
http://www.mightyram50.net/vbulletin...1&d=1371069088
وده شكل الشوائب اللي بيجمعها
https://www.expeditionexchange.com/f...ag/offroad.jpg
وفيه أفكار تانية زي كده..
http://i00.i.aliimg.com/wsphoto/v1/1...font-b-CAR.jpg
أو حتى ممكن تعمله بنفسك باستخدام أي مغناطيس قوي ... بس مهم جدا إنه يكون قوي جدا... علشان يقدر يسحب كل الشوائب، وكمان علشان ما يقعش منك في مطب جامد ولا حاجة.
عموما.. الفلتر لو بيتغير في مواعيده تأثير المغناطيس هيكون أقل طبعا... لإن الزيت مش هيكون فقد خواصه ويزيت كويس... وده معناه تآكل أقل بدون شك.
بالنسبة للزيوت... فأنا باحكم على المواصفات وماليش دعوة بأي ماركة
أنا دخلت على صفحات زيت فالفولين Engine Armour (الجركن البرونزي)... ولقيت منه 3 أصناف.. واحد بس هو اللي تخليقي بالكامل ولزوجته 5w-40.. وتصنيف الـAPI بتاعه SN/SM
Engine Armour Products - Valvoline Engine Armour
بيقولوا في الصفحة إن الزيت ده معمول مخصوص للشرق الأوسط
كمان دخلت على زيت فالفولين SynPower (الجركن الفضي).. وده كله تخليقي بالكامل وفيه منه كذا لزوجة (0w-20 - 0w-40 - 5w-30 - 5w-40)... وتصنيف الـAPI بتاعه SN/SM
SynPower 5W-40 - Synpower - Valvoline
بالنسبة لوولفر... فالتخليقي بالكامل منه عبارة عن 3 أنواع إسمهم Supertech و Hitech
كلهم كود الـAPI بتاعهم SM فقط، وواحد بس منهم هو اللي لزوجته 5w-40
في رأيي بعد المقارنة السريعة دي.. فأنا شايف إن فالفولين أحسن بشكل عام... وأفضلهم هو فالفولين إنجن أرمر (الجركن البرونزي)، لإنه معمول للشرق الأوسط زي ما هما كاتبين.
بالنسبة للي يناسب عربيتك.. فأنا متهيألي إن أي واحد فيهم يمشي معاك... بس مقدرش أقوللك بشكل نهائي إلا بعد ما أعرف كتالوج عربيتك بيقول إيه... ولو إني متأكد إن الكتالوج طالب مواصفات أقل من كده بكتير.
بس اللي يهمني من ده كله.. هو اللزوجة.. لإن دي لازم نلتزم بيها حرفيا.
...
عزيزي..
أي نوع زيت متعدد اللزوجة ومخصص لعربيات البنزين يمشي مع عربية حضرتك.. وبالعكس.. ده أقل نوع زيت في السوق مواصفاته حاليا أعلى من المطلوب بكتير... حتى ولو كان زيت التعاون.
بس زي ما قلت لحضرتك... اتأكد إنه زيت متعدد اللزوجة ولمواتير البنزين
والأهم من ده وده... اشتري الزيت من مكان مضمون .. علشان الزيوت ممكن تتغش بسهولة.
بس ليه ملحوظة صغيرة...
أقل مسافة تقعد فيها زيت في عربيتك هي 5000 كم... وحرام تنزل زيت قبل كده لإن الزيوت حاليا بقت مستواها أعلى من زمان بكتير
ولو مش بتعمل المسافة دي بسرعة .. يبقى تحسب بالوقت... وأطول وقت تقعد فيه الزيت في العربية هو 6 شهور للزيوت المعدنية و12 شهر للزيوت التخليقية
خلي بالك... مسألة 1000 و3000 كم دي بتوع الزيت بيقنعونا بيها علشان يبيعوا زيادة .. مش أكتر... فياريت ما تمشيش ورا الناس دي.
...
تم تحديث المشاركة الثانية في الموضوع بإضافة معلومات أكتر حول بخر الزيوت.
أرجو منكم قرائتها.
...
السلام عليكم
بعد التحية والتقدير
اشكر حضرتك اخى الكريم على المعلومات القيمة دى
بس عربيتى زى ماقلتلك قديمة بولونيز 1987 واعتقد والله اعلم ان 5000 ك كتير شوية ولا اه
وياريت من فضللك لو تكتبلى نوع او اكتر من الزيوت اللى تنفع معاى ولو على الخاص علشان الافادة
وسؤال اخير الاحظ مع الاستخدام ان منسوب الزيت عندى بيقل على فترات هل ده طبيعى
والف مليون شكر لحضرتك
لا يا فندم... 5000 مش كتير ولا حاجة.. ده فعليا أقل مسافة المفروض الزيت يخدم فيها في الموتور... خصوصا مع تطور الزيوت الحالية.
وأنا قبل ما أجيب عربيتي هنا في السعودية كان عندي في مصر تويوتا كريسيدا 1982 وفضلت معايا أكتر من 10سنين قبل ما أبيعها في 2009 (كانت مع والدي قبل كده)... وكنت بنزل الزيت على 3000 لإني ما كنتش بمشي بالعربية كتير... ده غير إني ما كنتش عارف معلومات كتير عن الزيوت في وقتها.
على فكرة... كنت بحط الزيوت الرخيصة بسبب الأحوال المادية طبعا... بس كنت فاهم كويس إن مستواها أعلى من المطلوب في كتالوج العربية... والتالي أنا مش بعمل حاجة غلط.
دلوقتي وبكل ثقة أقول لحضرتك الزيت يقعد مش أقل من 5000 كيلومتر في الموتور، ولو نويت تجيب زيت مستواه أعلى يبقى تطول مدة الخدمة بتاعته، ولو حبيت تحط زيت تخليقي مستواه sn اللي هو أعلى مستوى حاليا تقدر تخليه في موتور عربيتك مش أقل من 20 ألف كيلومتر
بس نقص الزيت عند حضرتك ده هو المشكلة...
لازم نعرف الأول معدل النقص قد إيه، وبعدين ندور إذا كان فيه تسريب من الموتور ولا لأ.. وإذا ما كانش لازم نشوف هل عندك دخان بيخرج من الشكمان ولا لأ.. وأحيانا الدخان بيطلع في أوقات معينة وانت سايق..خصوصا لو كان الموتور خفيف.
كل حاجة من دول ليها علاج مختلف.. فحقيقي مش هقدر أفيدك من غير ما أعرف شوية معلومات زيادة.
بالنسبة لنوع الزيت اللي أوصي بيه... فالحقيقة أنا عامل الموضوع ده بالذات علشان ما أقولش المعلومة دي..
لإنك ببساطة تقدر تدخل أي محطة بنزين وتمسك علبة الزيت وتقرا اللي عليها... هتلاقي نفسك بتشتري من غير وصاية من حد على دماغك.
...
الاخ العزيز
أرجو الاتصال علي للأهمية، إذا كنت بجدة
0505605340
أو مراسلتي على الايميل
mohsamman@gmail.com
تحففففففففففه فعلا و بشكرك جدا جدا جدا على المجهود الخرااااااااااااااااااااا اافى ده
اولا الف الف شكر على المعلومات الغزيرة التى اضفتها لنا وبعد اذنك لدى سؤال وارجو الشرح باستفاضة
انا عندى نيسان صنى سوبر صالون موديل ٢٠٠٨ عاملة ٢٥٠٠٠ الف كيلو ومنذ يومين كنت ابحث عن نوع زيت تخليقى مناسب لسيارتى وبعد البحث تم الاستقرار على زيت ليكوى مولى وقمت بشرائه بالفعل ونصحنى البائع تغيير الزيت بنوع 10w-40 وتعلل بذلك ان السيارة عاملة عدد كيلو مترات قليلة وانه هو النوع المناسب للسيارة
LIQUI MOLY - Motor Oils, Additives, Car Care - Products - Super Leichtlauf 10 W-40
وبعد تغيير الزيت بالفعل وجدت ان معظم الاعضاء ينصحون بنوع اخر 5w-40
LIQUI MOLY - Motor Oils, Additives, Car Care - Products - Top Tec 4100 5 W-40
المشكلة الان ان معظم الاراء تقول ان النوع الاول غير مناسب فى بلدنا مصر وهناك اراء اخرى تقول انه زيت ليس تخليقى ١٠٠٪ بالكامل لذلك ارجو من حضرتك انك تنصحنى اعمل ايه هل انزله واغيره للنوع الثانى ام اتركه كما هو وان تركته انزله بعد كام كيلو وما تاثيره على السيارة علما باننى ليس لدى اى مانع من انزاله ان لزم الامر وشكراً على تعاونك مرة اخرى
الاخ العزيز borio1704
اولا الف الف شكر على المعلومات الغزيرة التى اضفتها لنا وبعد اذنك لدى سؤال وارجو الشرح باستفاضة
انا عندى نيسان صنى سوبر صالون موديل ٢٠٠٨ عاملة ٢٥٠٠٠ الف كيلو ومنذ يومين كنت ابحث عن نوع زيت تخليقى مناسب لسيارتى وبعد البحث تم الاستقرار على زيت ليكوى مولى وقمت بشرائه بالفعل ونصحنى البائع تغيير الزيت بنوع 10w-40 وتعلل بذلك ان السيارة عاملة عدد كيلو مترات قليلة وانه هو النوع المناسب للسيارة
LIQUI MOLY - Motor Oils, Additives, Car Care - Products - Super Leichtlauf 10 W-40
وبعد تغيير الزيت بالفعل وجدت ان معظم الاعضاء ينصحون بنوع اخر 5w-40
LIQUI MOLY - Motor Oils, Additives, Car Care - Products - Top Tec 4100 5 W-40
المشكلة الان ان معظم الاراء تقول ان النوع الاول غير مناسب فى بلدنا مصر وهناك اراء اخرى تقول انه زيت ليس تخليقى ١٠٠٪ بالكامل لذلك ارجو من حضرتك انك تنصحنى اعمل ايه هل انزله واغيره للنوع الثانى ام اتركه كما هو وان تركته انزله بعد كام كيلو وما تاثيره على السيارة علما باننى ليس لدى اى مانع من انزاله ان لزم الامر وشكراً على تعاونك مرة اخرى
أخي الأستاذ إيهاب..
أولا... أعتذر عن التأخير في الرد.. وهو بكل تأكيد غير مقصود..
حقيقة لا يمكن الجزم بنوع معين دون الرجوع إلى كتالوج سيارتك.. ﻷنه هو الفيصل هنا.
ولا يوجد زيت بعينه غير مناسب لجو مصر.. كل الزيوت يمكن أن تكون مناسبة أو غير مناسبة حسب المطلوب لكل موتور.
وبافتراض أن الزيتين مناسبين....
فتحديد الأنسب يعتمد على أولوياتك وراحتك في قيادة السيارة
الزيت الأول ذو درجة أدنى من الزيت الثاني. .. ولكن.. إذا كان مقبولا من ناحية الكتالوج فلماذا تذهب إلى الزيت الأغلى إذا كان الزيت الأرخص يحقق ما يتطلبه الصانع؟؟
أما إذا كانت أولوياتك هي وضع زيت بعدد مرات أقل خلال العام.. وخاصة إذا كانت قيادتك أثناء السنة ﻻ تتعدى ال10 آلاف كيلومتر.. فيمكنك الذهاب إلى الزيت الثاني
لو قرأت بقية التعليقات على الموضوع . . ستجد ردي واحدا في أغلب الأحوال.. وهو:...
إرجع إلى كتالوج سيارتك لتعلم ما هو الزيت المناسب لسيارتك.. وتعلم من الموضوع كيف تقرأ المعلومات الموجودة على علبة الزيت لتستطيع اتخاذ قرار الشراء دون تأثير من الميكانيكي أو عامل الزيت.
وحينها ستكتشف أنه لا يوجد "ماركة" زيت جيدة على الإطلاق... مجرد أي زيت يتطابق مع ما هو مكتوب في الكتالوج سيكون مناسبا...
حتى ولو كان زيت التعاون..
وعلى فكرة.. زيوتهم جيدة جدا.
...
مساء الفل
انا محتار في لزوجة الزيت المناسب لعربيتى
هى افيو موديل 2006 كورى 1500 8 صبابات كامة واحدة
انا مشتريه مستعملة وممعايش الكتالوج واللى لقيتة على النت كتالوج كندا ومش نفس الموتور
العربية في التوكيل من الزيرو لحد 55000 كم بيتحطلها زيت موبيل 20w50 اللى بيقولو علية 5000 كم
في 55000 كم حطيت شل الترا في التوكيل والزيت نقص بعد حوالى 6000 كم وغيرتى على 7000 كم وغيرت جوان غطا التاكيهات
بعديت حطيت وولف 5w50 قعد حوالى 10000 كم
والغيار التانى سقطة بعد 350 كم علشان لمبة الزيت كانت بترعش وطلع العيب من ساعة الزيت
المهم العربية دلوقت فيها زيت تعاون 20w50 SM
ارجو الافادة عن نوع درجة اللزوجة الموصى بها خاصة انى مش لاقى الكتالوج المصرى
طيب انا لو استخدمت زيت a2 بدل ال a3 هل دا يعمل مشكله
سؤال فني لاني لسه جديد في مجال السيارات
ازاي اعرف الزيت ده تخليقي ولا لا
في موبيل وشل او اي حاجة عموما
هل مكتوب عليه ولا لا
انا قلبت العلبة بتاعة
Mobil Special 20w50 ملقتش معلومة مفيدة
ودورت علي السايت مش قايل
هل معني كده انه معدني؟
متابع
للأسف سعادتك مع كامل احترامى لشخصك..موضع اختيار الزيت التقيل والخفيف والكلام دة مش مظبوط ابدا
انا باكتب ودة طبيعة عملى وشغلى وتدريبى في المانيا
كلام سعادتك في اجتهاد كبير وبة بعض وليس كل الكلام مظبوط
و لا يمكن ابدا استعمل زيت تخليقى مع موتور استعمل زيوت طبيعية لفترات طويلة
العكس ممكن بالفعل
وقريبا سوف انشر هنا بعد اذنك طبعا مواضيع دقيقة عن استخدام الزيوت
وفية موقعين احب الناس تتدخل وتشوف ازاى تعرف الزيت الجيد او المصنف والمعترف بة او الزيوت الغير مصنفة على مستوى العالم
https://engineoil.api.org/Directory/EolcsSearch
Car Bibles : The Engine Oil Bible
و لا يمكن ابدا استعمل زيت تخليقى مع موتور استعمل زيوت طبيعية لفترات طويلة
؟؟
كنت بتكلم مع واحد زميلي قالي انه جابه للشاهين بعد فترة طويلة من الطبيعي وماشية زي الفل
هل كده في مشكلة؟
أهلا وسهلا بحضرتك
بداية.. أتفق مع حضرتك إن الموضوع به اجتهاد كبير .. لأني حاولت بقدر المستطاع تبسيط المعلومات للمستخدم العادي.. طبعا بعد فهم ما هو مكتوب في المراجع الأساسية من مواصفات عالمية .. مثل مواصفات الـapi والـacea بالإضافة إلى محاولة ربط ما هو مكتوب في الكتالوجات بالواقع اللي بنعيشه.
وأتفق مع حضرتك كمان إن بعض المعلومات قد تكون متقادمة بعض الشيء... وفي حال معرفتي بالمعلومات المحدثة (update) بحدث المعلومات دي مباشرة في الموضوع... بحيث إن القارئ كل ما يدخل على الموضوع يلاقي آخر ما أعلمه عن الزيوت وبشكل مبسط..
وهو ده هدفي الأساسي... تبسيط المعلومة.. وعدم شغل المستخدم العادي بمعلومات يمكن لو عرفها يتلخبط أكتر.
وعلى العموم ... أنا بأرحب بأي تصحيح للمعلومات اللي بقولها هنا.. ما دامت مبنية على أسس علمية ومراجع موثوق بها... ومفيش حد عنده كل العلم... إنما كلنا بنكمل بعض.
من زمان دايما بقول... هفضل أتعلم لحد ما أموت... ولو في لحظة تخيلت إني أعرف كل حاجة... ساعتها أبقى أكيد ... مش فاهم حاجة.
ليا فقط تعليق على الوصلة الأخيرة اللي حضرتك رجعت ليها...
car bibles : The engine oil bible
أنا قرأت معظمها.. وعلى فكرة ... الصفحة دي كانت أحد المراجع اللي كنت برجعلها وأنا بكتب الموضوع هنا..
ولم أجد ما يدل على أنه لا يجوز استخدام الزيوت التخليقية في مواتير استخدمت (أو اتعودت على) الزيوت المعدنية
وكمان... ما لقيتش ما يدل على إن اللزوجة الأعلى لا تحمي على العكس من اللزوجة المنخفضة..
بالنسبة للصفحة التانية بتاعت الـapi... فدي محتاجة شوية وقت علشان نعرف نجيب منها معلومات.
يا ريت حضرتك توضح لنا وجهة نظرك والمعلومات الجديدة اللي عند حضرتك.
...
طب ينفع استخدام زيت a2 بدل A3 ولا لا ينصخ به