هل ده الى حضرتك تقصده
Castrol MAGNATEC - Car Engine Oil | Castrol United Kingdom | Products | Home
اصل مكتوب عليه
sm
هل ده الى حضرتك تقصده
Castrol MAGNATEC - Car Engine Oil | Castrol United Kingdom | Products | Home
اصل مكتوب عليه
sm
فالفولين من الشركات العالمية المعروفة على مستوى العالم من زمان جدا.
وبتعمل زيوت كتير.. فحضرتك قصدك على أنهي زي فيهم؟؟
خليك ماشي على نفس القاعدة اللي احنا ماشيين عليها... يعني هات الزيت اللي مواصفاته زي الكتالوج أو أحسن... بغض النظر عن ماركته.
ولو قدامك أكتر من زيت بنفس المواصفات.. يبقى ساعتها ندور على الماركة.
طبعا.. الكلام ده بدون الدخول في مسائل غش الزيوت اللي بيحصل في بعض الأماكن.
كاسترول ماجنتك يعتبر من زيوت المستوى التاني عند كاسترول .. والمستوى الأول عند كاسترول هو "كاسترول إيدج Edge"
المشكلة إن أغلب شركات الزيوت مش بتقول بصراحة إذا كان الزيت نص تخليقي ولا تخليقي ولا إيه بالظبط...
علشان كده إحنا هنعتبره نص تخليقي.
...
والله أنا ما أفضلش إن الزيت يقعد أصلا..
المشكلة اللي أتوقع إنها تحصل جاية بالذات في بداية التشغيل...
حسب الكتالوج بتاعك.. لزوجة 5W-X خفيفة جدا في بداية التشغيل وممكن ما تعملش طبقة التزييت المطلوبة والموتور والزيت لسه باردين..
وبالتالي معدل التآكل ممكن يكون عالي أكتر من اللازم مع كل مرة تشغل الموتور على البارد.
الموقع اللي حضرتك دخلت عليه ده بتاع بريطانيا...
خليك في الزيوت المخصصة للشرق الأوسط. وادخل على الصفحة دي:
CASTROL ARABIA
ودي مواصفات الزيت اللي قصدي عليه
http://msdspds.castrol.com/bpglis/Fu...PXE-8XZ73R.pdf
...
طيب ولو حولت من زيت معدنى لزيت تخليقى حيحصل مشكله ؟ علما ان العربيه ماشيه 21 الف بس
انا لقيت توتال كوراتز بس مش مكتوب عليه ال ACEA
مكتوب عليه كود تانى ILSAC
TOTAL Quartz 9000 SN Future GF5 5W30
ممكن حضرتك توحضلنا الفرق من الكود التانى ؟
مفيش أي مشاكل...
21 ألف ده يعني العربية لسه جديدة ما عملتش أي رواسب داخلية
والعربية موديل 2014.. يعني الجوانات لسه بحالتها.
الـILSAC دي اللجنة العالمية لمعايير واعتماد الزيوت International Lubricants Standardization and Approval Committee
اتكونت سنة 1992 .. وهي في الحقيقة عبارة عن اتحاد لـ"جمعية صناع السيارات الأمريكيين" و "جمعية صناع السيارات اليابانيين"
ما عملوش حاجة زيادة غير إنهم أخدوا نفس كود الـAPI وسموه بأسماء تانية مع بعض التعديلات الطفيفة بحيث تتوافق مع معايير توفير الوقود وتقليل الانبعاثات الأوروبية.
فعليا.. تقدر تقول إن:
API SH = ILSAC GF-1
API SJ = ILSAC GF-2
API SL = ILSAC GF-3
API SM = ILSAC GF-4
API SN = ILSAC GF-5
...
الف شكر ليك على الايضاح الجميل .....
معنى كدة ان توتال كوارتز مش واخده ابروفل من ACEA لان مش موجود الكود عندهم فى المواصفات ؟
TOTAL Quartz 9000 SN Future GF5 5W30
صح.. مش واخد تصنيف من الـACEA..
بس خلي بالك إن الصفحة اللي حضرتك حاططها دي بتاعت توتال ماليزيا... والمشكلة إنك ممكن جدا تلاقي نفس الزيت بنفس الاسم بمواصفات مختلفة في كل بلد..
ده Total Quartz 9000 لوحده منزلين منه 18 نوع بمواصفات مختلفة... ومش هتلاقي من كل دول في مصر غير واحد أو اتنين.
http://kosser.net/masla/katalozi/Pas...0CATALOGUE.pdf
كده هتوه نفسك جامد .. فالأفضل تدور عند بتوع توكيلات الزيوت أو تروح تشوف بنفسك في المحلات المضمونة وتشوف إيه المتاح هناك.
ولو نويت تجيب توتال.. فده موقع توتال المصري:
http://www.total.eg/b2c-lubhome/B2C-...ucts-cars.html
...
شكرا ليك ... المشكله الحقيقه انى فعلا مش لاقى 5w30 فى اى براند فى مصر ومفيش بردوا A5
كل الى موجود 5w40 و A3 !
انا لقيت توكيل بترومين حنزل بليل اشوف عندهم الزيت الى قلتيلى عليه.