ما تيجو نبقي شعب محترم

**mohamed ismail** · 06-08-2008 04:49 AM

الله ينور عليكي يا اخت بوسي ايوة كده يا جدعان الناس تصحصح معانا
ومش عاوزين نوجد مبرر للغلط
لو في ايدك الصح اعمله ومتتردتش
واحتسب الاجر عند الله
ومن سن في الاسلام سنة حسنة فله اجرها واجر من عمل بها الي يوم القيامة
ومن سن سنة سيئة فعليه وزرها ووزر من عمل بها الي يوم القيامة

**cobraa2008** · 06-08-2008 08:53 AM

ماشي ياجدعان اذا احنا كلنا التزمنا بالقوانين الجدية وبنتبعها هل

البلد هاتقدم لينا مكافاة على ذلك!!!!

اقصدي هاتصلح الشوارع وتشيل المطبات وتعمل اشارات مرو كهربية وتكبر الشوارع ولا لا

ده اللي مفروض يحصل

ياعني انا لما ببقى ماشي غلى المحور بمشي 80 ليه اولا ادامي الطريق نظيف وجدي وواسع ومنظم فالواحد بيختشي على دمه ويمشي عدل

بس موش لما امشي على اسكندرية الصحراوووي ةلما لما اكون راجع من اكتوبر ويقولي اقصى سرعة 60 والطريق مايتمشيش عليه ارعين اساس ا لا

ماينفعش الشعب لوحده ياخد موقف لازم البلد كلها تاخد موقف

**Akram** · 06-08-2008 09:29 AM

موضوع جميل يا محمد و مساهمة قوية من بوسي ,
و كم احباط من باقي الأعضاء ..... :( :( :(

(((قبل أي حاجة البلد دي بلدنا و لو مش عجبا حد يبقى يشوفله بلد تانية)))

انا معاكم يا شباب في الموضوع ده , ان لازم نعمل الحاجات الصح دي مش علشان القوانين لكن علشان ده ديننا و علشان أنفسنا ,

انتم عارفين يا جماعة انا رأي إن سبب كل المشاكل اللي احنا فيها هو اننا بعاد عن ربنا ,
لو احنا ملتزمين بديننا و بنراعي ربنا ,
مش هتلاقي حد يغش في البيع ,
مش هتلاقي حد يستخدم واسطة علشان يآخد بيها حقك ,
مش هتلاقي حد يآخد رشوة ,
مش هتلاقي الناس اللي واخدة الطريق لحسابها و مش عاملة إعتبار لأي حد ,
هتلاقي الناس ملتزمة بالسرعة و الحارات المرورية و أماكن الإنتظار علشان ربنا ,
هتلاقي الناس بتراعي بعض في كل حاجة ... في الصوت و الإشارات و الأنوار .. علشان ربنا ,
هتلاقي الموظفين في أي مصلحة بيشتغلوا و بيخدموك علشان ربنا ,
هتلاقي اللي يعمل حاجة غلط هيقفله الف واحد يصححله الغلط ,
هتلاقي الصنايعية بيراعوا ربنا و مش بيفتوا و لا بينصبوا ,
هتلاقي اللي بيرصف الشوارع بيراعي ربنا و يعمل حاجة كويسة ,
هتلاقي اللي بينظف الشوارع بيشتغل كويس لانه بيراعي ربنا ,
هتلاقي المسئولين بيقوموا بشغلهم و بينزلوا لأرض الواقع (أقصد للشوارع نفسها) ,

هتلاقي حاجات كتيييييرة , للأسف مش موجوده :( :( :(

طولت عليكم .......
*
*
*
*
في الآخر هلاقي الواد الزئردة ميدو بيصحيني و يقول يالا يا بابا قوم علشان توديني الحضانة ........ :) :) :)

**hamedo0** · 06-08-2008 10:20 AM

والله الموضوع جميل بس حيبقي ايه شعورك وانت واقف في لجنه وعربيتك مافياش حاجه ورابط الحزام هو صعبان عليه ان العربيه مافيهاش حاجه وبيديك الرخصه
وفي نفس الوقت في عربيه تانيه مفيم ومافيش نمر وصوت الكاسيت عالي
وبيعمله تعظيم سلام وبيقوله اتفضل ايه شعورك سعتها

**hesham_tawfiq** · 06-08-2008 10:28 AM

السلام عليكم
انا بس حبيت احكيلكم تجربتى البسيطه فى السواقه فى شوارع احد الدول العربيه اللى اعتقد انها افقر مننا ( عشان محدش يقول فى الخليج ).
انا لما سقت مع الناس دى انبهرت لانى مش متعود عالنظام والذوق- مع ان الشوارع ضيقه جدا ومعضمها اتجاهين- فى السواقه فاضطريت انى اسوق زيهم لانى لو مكنتش عملت كده كنت هتاخد مخالفات بالعبيط ( وظابط المرور برضه ذوق حتى وهو بيفحص تراخيصك ).
ولما اتعودت على السواقه هناك بعد ماكنت مجبر بصراحه ابتديت فعلا استمتع بالسواقه وحسيت بجد بسلام مع نفسى ومع الناس اللى فالشارع اللى سايق واللى ماشى.
كنت دايما مبتسم وهادى وانا سايق.
محدش يقوللك مش من حقك تركن هنا طالما المكان فاضى خلاص يبقى من حقك تركن.
بصراحه لما رجعت هنا نفسى قفلت من السواقه فى مصر اصلا ومبحبش اركب عربيات من اساسه الا غصب عنى.
عموما انا متأكد تماما ان العيب عيب الناس مش الحكومه لان لو كل واحد عارف واجباته قبل حقوقه عمر ماكان دا يبقى حالنا سواء فى السواقه او فى غيرها

**hesham_tawfiq** · 06-08-2008 10:35 AM

المشاركة الأصلية كتبت بواسطة hamedo0

حيبقي ايه شعورك وانت واقف في لجنه وعربيتك مافياش حاجه ورابط الحزام هو صعبان عليه ان العربيه مافيهاش حاجه وبيديك الرخصه
وفي نفس الوقت في عربيه تانيه مفيم ومافيش نمر وصوت الكاسيت عالي
وبيعمله تعظيم سلام وبيقوله اتفضل ايه شعورك سعتها

هكون محبط طبعا لكن فى نفس الوقت انا ليا ان انا ماشى صح بصرف النظر عن الباقي. وطالما ما تاخدتش مخالف ظلم هكون راضى عن نفسى

**AhmedElsayed** · 06-08-2008 10:42 AM

للى بيحترم بيحترم نفسه
وكفاية الواحد يحس انه متحضر لنفسه بصرف النظر عن الناس اللى حواليها

اكتر حاجة بحسها فينا هو الاستسهال والبحث عن شماعة

اى حاجة تبقى الحكومة هى السبب حتى الناس الللى بتتاخد مخالفات يبقى غريبة الحكومة برده هى السبب

**osamamab** · 06-08-2008 10:47 AM

حد فكر يستغل عربيته للخير (طبعا هاتقولوا إزاي يعني) .. بسيطة جدا .. إبدأ في رمضان ..

وانت مروح قف للناس كبار السن الواقفين منتظرين مواصله لا تأتي إلا مكدسه (إن أتت أصلا) .. وبمنتهى البساطة قول لهم أنا رايح المكان الفلاني لو ده طريقكم .. لو ما لقتش ناس كبار أكيد هاتلاقي ناس تعبانين .. يعني إن أخلصت النيه أكيد ربنا هايبعتلك الأشخاص اللي هايدفعولك (حسنات) والله يضاعف لمن يشاء

جايز لما أصحاب العربيات والميكروباصات والأجرة عموما يبقوا سباقين للخير ربنا يرفع عنا وعنهم البلاوي اللي بنشوفها في الطريق ومن الطريق وبسبب الطريق وخلافه ..

اللي عنده أفكار تانيه للخير يقولها .. واللي يقدر ينفذ يبقى جزاه الله خيرا .. ولو طول العام مش رمضان بس يبقى شئ هايل

وربنا ينير بصيرتنا جميعا للخير

**THEMAYOR** · 06-08-2008 11:01 AM

السلام عليكم و رحمة الله و بركاته

انا مقتنع تمام الاقتناع بكلام الاخت بوسى و الاخ محمد اسماعيل و الاخ اكرم
كلام 100100 و مينفعش نجادل فيه لان ده الصح

بس انا عندى سوال بسيط . لو واحد مننا فى منصب مهم و ابنه اخطا هل سيترك القانون يحاسبه مثله مثل الاخرين و لا هتحاول تطلعه من المشكله ؟!!!!!! فكر و جاوب بامانه شديده

او عندك اتنين بتعملوهم اختبار او مقابله شخصيه واحد منهم قريبك او واحد قريبك موصيك عليه و التانى احسن بس متعرفوش هتعمل ايه؟!!!!!! فكر و جاوب بامانه

او تكون ممثل للقانون و يجيلك تليفون من ناس اعلى منك منصبا و تغير حكم قضائى
علشان تقدر تكمل و متتفصلش من شغلك . هتتغيره و لا لا؟!!!!!

ده نموذج من اسئله كثير ميقدرش الواحد يعمل الصح فيها الى اذا كان ايمانه عالى جدا بربنا

انا مش بحبطكو بالعكس انا باعمل مواجهه بينك و بين نفسك علشان التغيير لازم يكون نابع من داخلك

و انا مقتنع جدا انى التغيير لازم يبدا من قاعدة الهرم و ليس من قمته علشان يكون تغيير اساسه سليم و طبعا الشعب هو قاعدة الهرم و القمه احنا عارفينها كويس

ادعو الله ان يغير حال مصر الى الاحسن و يزيد الايمان فى قلوب المصريين

اعتذر عن الاطاله و مستنى ردودكم

**MMamdouh** · 06-08-2008 11:09 AM

معلش يا بوسى اختلف معاكى فى نقطة.... البلد مش انا و انتى و هو و هى و احنا.... البلد كمان حكومة

و الحكومة وظيفتها المحافظة على النظام و محاسبة المخطىء... و لما المخطىء ميتحاسبش يبقى مفيش رادع لاى حد يعمل غلط و بالتالى كله حيحاول يعمل غلط عشان يستفيد اى استفادة...

الكلام دة ينطبق من اصغر عيل بيعدى الشارع وسط العربيات بدل ما يروح لماكن عبور المشاة و اشارة العربيات مقفولة لحد الباشا اللى جاب عبارة خردة و حمل عليها فوق طاقتها و موت اكتر من الف انسان

الدافع فى الحاجتين واحد... الفهلوة

كل الناس نفسها تعمل حاجة تحصل بيها على حاجة زيادة و لو على حساب النظام... ليه امسك منديل مش نضيف فى ايدى و امشى بيه لما ممكن ارميه على الارض؟
ليه امشى 3 او 4 كيلو لقدام لما ممكن ارجع 100 متر بضهرى و لو فوق كوبرى؟
ليه البس الحزام لما ممكن اظنش؟
ليه امشى قانونى لما ممكن امشى حالى؟

وصلت الصورة... صح؟؟؟

طيب احنا اتفقنا ان اللى بيعمل كدة انسان مش كويس... و يمكن كمان يستاهل الحرق.... طيب المفروض ان اللى زى كدة تطبق عليه عقوبة رادعة تعلمة الادب و يبقى عبرة لكل واحد تسول له نفسة انه يعمل كدة... بس هل دة بيحصل؟؟

طبعا لا... دا اللى بيعمل كدة بيبقى محبوب من الناس.... ابجنى تجدنى... يبقى اللى بيعمل كدة مصدر خير لناس معينة من ضعاف النفس اللى بيقبلوا على نفسهم انهم ياكلوا من سحت... و لما الرقابة تبقى منعدمة و محدش بيعاقب لا اللى بياخد الفلوس و لا اللى بيدفعها... حتلاقى نفسك انت شخصيا حقك بيروح و شوية شوية حتبقى مواطن درجة تالتة

و بردة محدش حيعبرك لانك مش "مفتح" و حقك حيتهضم.... تفتكروا فى الجو دة ممكن واحد يبقى عندة استعداد يمشى صح؟؟؟ دى سعات بتقلب مع ناس بالعند و بيعملوا الغلط بالعند فى القوانين عشان الاوضاع اللى حكيت عليها

معلش القصة مش احنا و بس.... القصة احنا و السلطة مع بعض... الناس الكويسه حتلتزم لانها ناس محترمة و الناس اللى مش محترمة حتلتزم غصب عن عين ابوها و بالاكراه... ساعتها حنبقى زى كل البلاد التانية

انا كلامى صح و مش غلط و انتوا اللى اكدتوا عليه من غير ما تحسوا... راجعوا كتاباتكم عن قصص الناس اللى جابت بضهرها عشان فاتها المخرج على الطريق برة مصر... فى كل الحالات حتلاقى ضابط مرور ظهر من تحت الارض و ادى مخالفة و ممكن حبس و جلسات اجبارية مع دكتور نفسانى... فى المصر القصة ممكن تخلص بكلمتين حلوين للعسكرى او شلن كبير للامين

المشكلة الرئيسية فى تطبيق القانون و معاقبة المخطىء... لما الاقى اللى بيغلط مبيتعاقبش و بيبقى باشا اكيد انا عمرى ما حلتزم باى حاجة و حبقى مخنوق من كل حاجة... تخيل لما العربية اللى قدامك فى اللجنة متفيمة و معليهاش نمر... و تتخيل طبعا ان صاحب العربية حيبقى زبون سقع لافراد اللجنة... لكن فجاءة تلاقى الامين بص فى العربية و ضرب سلام لصاحب العربية و قاله عدى من غير اى حاجة... تفتكروا احساسكم ايه؟؟؟؟؟؟

لما واحد موت 1033 و متحاسبش على اى حاجة لان الناس ماتت من الغرق فى البحر مش لان العبارة الغير مطابقة للقوانين و اللى فيها حمولة زيادة و كانت بطنها مليانة ميه من مكافحة الحريق هى اللى غرقت بيهم... تفتكروا حد حيفكر فى اى حاجة تانية لما يبقى البنى ادم رخيص اوى كدة؟؟؟

المشكلة الاكبر ان فيه ناس اعتادت على مخالفة القوانين طالما مفيش رقيب... يعنى كام واحد فينا بيلبس الحزام قبل اللجنة؟؟ او بينزل الموبايل تحت و هو معدى على اشارة فيها امين شرطة معاه دفتر؟؟... و من الناحية التانية كام مرة جالك واحد قالك الركنة ممنوعة هنا ياباشا رحت مابجة عشان تركن؟؟ و كام مرة غمزت موظف عشان يخلصلك ورقك و ميتلككش على حاجة؟؟

المنظومة بايظة من كل النواحيى و مينفعش نصلح ناحية واحدة و التانه زى ما هى... اقولكم على حاجة؟؟؟ انا فرحان بهوجة قانون المرور الجديد دى اوى و بفرح لما الاقى واحد بيتاخد مخالفة... اصل انا اتفقعت من كم العربيات اللى ماشية منها اللى من غير نمر و اللى عليها نمر قد باكو البسكويت و اللى متفيمة و اللى بيرغى فى الموبايل و اللى مش لابس الحزام... و فيه ناس بتعمل كل دة فى نفس الوقت

اول ما ظهرت شدة القانون الجديد كلة مشى بالادب... و اللى كان مقضيها اتقفش و اترزع مخالفة محترمة حتفكرة دايما انه يلزم... لو فضلت الهوجة دى على طول الدنيا حتنصلح... لان كل واحد حيغلط عارف انه حيتقفش و يدفع و ممكن كمان يتحبس... للاسف مش هى دى الطريقة المتحضرة للتعامل لكن هى الطريقة الانسب فى ظل ما وصلنا ليه

بيفكرنى بكلمتين قالهم دكتور فى الجامعة عندنا... على قد ما ادايقت من اللى قاله على قد ما لقيت انه صح.... الراجل قال: المصرى مبناش الهرم حضارة... دا بناه سخرة.... و قناه السويس مبناهاش حضارة... برضة بناها سخرة

للاسف لو بصينا على وضعنا الحالى حنلاقيه مش مختلف كتير... طالما احنا مش مضغوطين و علينا رقيب... مبنعملش الصح... منا اللى بيعمل كدة كهوايه و منا اللى بيعمل كدة عشان يسرق و منا اللى بيعمل كدة لانه مضطر لان الصنفين السابقين حياكلوا حقة

يااااه دا انا كتبت كتير اوى و دوشتكم... بس كويس ان الواحد فضفض شوية بدل ما يطق

MMamdouh

الموضوع: ما تيجو نبقي شعب محترم

LinkBack

أدوات الموضوع

عرض

-

-

-

-

-

-

المواضيع المتشابهه

اللي بيحجز تيجو هيستلم تيجو 2013 ولا لا

تيجو 1600 vs تيجو 2000

جين 2 و لا تيجو 1.6

يا ريت تشوفوا الفيديو ده، و ممكن نبقي نعمل ركن للي عايز يعيط .

عيب نبقي في بيت ال128 و منتكلمش عن الفئه المعدمه (اقل من 30 الف) .... اشتري ايه؟؟؟

الكلمات الدلالية لهذا الموضوع

المفضلات

المفضلات

ضوابط المشاركة