الموضوع: شل 10000 ولا 5000

المشاركة الأصلية كتبت بواسطة ashraf_ibrahim

مفيش ضرر ولا حاجة
الفكرة كلها ان الزيت دا ممكن نشبهه بنوع من انواع الادمان
لما بيتعود على نو معين من الزيت بيكون تغييره مرفوض شوية الاول بس بيظبط بعد كدة
اللي ممكن يحصل لو الموتور ماشي كيلوات كتيرة انه الزيت هينقص معاك شوية في الاول
وبعد مرتين هيظبط معاك والدنيا تمشي بيس
بس لو ماشي كيلوات اكتر من الحد المسموح للزيت التخليقي اصلا الزيت هيفضل ينقص ومش هيكون التغيير دا كويس
عداد عربيتك كام يا عزيزي ؟!

انا كنت بسال عشان عاوز افهم انت ليه قلت له ميحولش من زيت الـ 5000 الي زيت الـ 10000 وانه يحط زيت نصف تخليقي الـ 7000 (عشان الحاجات دي مش بفهمها اوي وعايز افهم)

لكن بالنسبه ليا انا معايا ماتريكس 2008 عامله 160000 ومن ساعة ما جبتها وانا بحطلها زيت شل الترا الـ 10000 والحمد لله معنديش مشاكل
بس الي انا فهمته من ردك السابق ان في حد أقصى للكيلومترات لاستخدام زيت الـ 10000 وبعدها المفروض اغير لنوع اخر نصف تخليقى او معدني (مش عارف انا كده فهمت صح ولا غلط)
وبعدين انا ساعات الزيت بيقعد معايا زياده شوية عن الـ 10000 وساعات بوصل بيه لـ 15000 فهل ده ممكن يكون له ضرر على الماتور ولا لأ
وشكراً على اهتمامك

المشاركة الأصلية كتبت بواسطة ashraf_ibrahim

هفهمك يا عزيزي واحدة واحدة معايا وهقلك
الصح انك العربية لما بتكون لسة جديدة تخطلها زيت تخليقي كامل زي شل هيلكس الترا
الزيت دا موصى بيه هنا في مصر 10000 كم
لكن اسطورة زيت ال 10000 دي اسطورة فاشلة
يعني الزيت يمشي 15000 كم عادي جدا طالما ان لزوجته مظبوطة وطالما انه مش بينقص وطالما ان لونه بيتغير ويكون اغمق
لو حصل ال 3 حجات دول يبقا الزيت كويس مفيش منه اي ضرر او خوف وطبعا مع كل تغييرة زيت تغير فلتر
طيب الحاجة اللي قريناها على مواقع شركات الزيوت واللي عرفناها وحفظناها ان الزيوت التخليقية بتتحط للمواتير ما قبل ال 100000 كم
وما بعد ال 100000 كم بنحط زيوت نصف تخليقية لأن بطبيعة الحال المفروض ان الخلوصات بين اجزاء الموتور بتكون بقت اكبر شوية فبنحط زيت نصف تخليقي عشان نحافظ على ان الزيت مينقصش
في حالة انك بتحط زيت تخليقي على طول والزيت مش بينقص معاك وحالة الموتور كويسة
بتقدر تستمر على الزيت التخليقي على طول بدون اي مشاكل لما بعد ال 100000 كم زي حالتك كدة يا عزيزي
في حالة انك بتحط زيت معدني وعاوز تغير لتخليقي هنا بنبتدي نشوف الموتور ماشي كام كم لأن التغيير من معدني لتخليقي مش حاجة عشوائية
يعني لو موتور ماشي اقل من 100000 كم بنقله تقدر تغير لزيت تخليقي بالكامل مع الوضع في الحسبان ان بنسبة كبيرة الزيت اللي هتحطه لأول مرة مش هيكمل معاك ال 10000 كم وهينقص عن معدله الطبيعي ودا طبيعي جدا
ولكن في حالة انك حاطط زيت معدني والموتور معدي ال 100000 كم حتى لو الموتور حالته كويسة خلاص مبنقدرش نقول انك تقدر تغير لزيت تخليقي بالكامل لأن العمر الافتراضي للمرحلة اللي تقدر تغير فيها لتخليقي انت عديتها خلاص !
فبنقول ان ساعتها تغير لزيت نصف تخليقي وتمشي عليه عادي جدا ال 10000 كم مفيش مشاكل
لأن الزيوت ليس لها عدد كيلومترات معين زي ما بيتقال عندنا هنا في مصر
على مواقع شركات الزيوت العالمية هتلاقيه بيقلك يتم قياس منسوب الزيت مرة كل 1000 كم
وبعد 10000 كم تبتدي تفكر انك تغير الزيت مهما كان نوع الزيت
هنقول ان دا في الظروف القياسية مش الظروف اللي زي مصر فنزل يا سيدي 3000 كم عشان الزحمة والتراب والكلام دا
اتمنى اكون حاولت اوضح شوية :f_eyeb1[1]:

انا مش عارف اشكرك ازاي انت كده وضحتلي الأمور بشكل كبير جزاك الله عني خير
ده انا كنت فاهم الموضوع غير كده خالص وكنت فاكر ان الواحد ممكن يغير من نوع لنوع كده عادي من غير مشاكل وفي مره كنت المفروض اغير زيت وكنت مزنوق في الفلوس شويه فكنت ناوي أحط زيت 5000 عشان ارخص وقلت احط المره دي 5000 والمره الجايه ابقى اغيره لل 10000 بس بصراحه رجعت في كلامي وقلت بلاش استرخص في العربية وحاول اوفر في حاجه تانيه
يعني معنى الكلام ده ان الواحد ميغيرش الزيت حتى لو العربية وصلت 500000 إلى إذا بدأ يلاحظ نقص في الزيت
طيب معلش يا بشمهندس بالنسبة لموضوع تنضيف دوره الزيت أيه حكايته أنا معرفش عنه حاجه وعمري ما عملته فحضرتك تنصحني بيه ولا لا ولو هيتعمل يتعمل ازاي وهيفرق في ايه بالظبط
وشكراً ليك مره تانية