اقتباس المشاركة الأصلية كتبت بواسطة hhalawany مشاهدة المشاركة
السلام عليكم ورحمة الله وبركاته ، يا شباب السوزوكي :)

عشان ما اطولش عليكم وعشان ماكتبش مواضيع كتيير ورا بعض حبيت اكتبلكم كذا سؤال في دماغي في موضوع واحد .... وعشان في النهاية انا وغير من اصحاب الماروتي الجداد كلنا نستفاد

قبل اي سؤال احب اذكركم اني شاري عربيتي "سوزوكي ماروتي" جديدة زيرو

اولا : لما باجي انقل اي نقله سيان من الاعلى الى الاقل او العكس ، العربية بتنط مني
ياعني زي ماتقولوا كده كأني بدوس فرامل ووراها بنزين مرة واحدة !!
مع العلم انها مش بتبطل مني والحمدلله
ولاكن مشكلتي هي وزي ماقلتلكم في النقلات ، مجرد اني انقل اي نقلة ما "بعد الاول طبعا" بحس ان العربية بتنط !!

ناس قالولي لما تيجي تنقل تشيل رجلك على طول من الديبرياج مرة واحدة ..
عملت كده طبعا ولا المشكلة معاية موجودة برضو
وناس تانية قالتلي اني مادوسش بنزين وانا بشيل رجل وبرضو النتيجة هي هي !!
لاكن انا لما بنقل واشيل رجلي براحة كده من الديبرياج وفي نفس الوقت بزود بنزين على خفيف .. ساعتها العربية بتنط مني اه ، بس مش جامد اوي
انا بقا عاوز اخليها تبقى سلسة معايا ..ولحد النهاردة مش قادر افهم اي السنس بتاعها او ايه الغلط اللي انا بعمله لما باجي انقل .....


لازم تسايس الدبرياج والبنزين سوا
عالاول والتاني مينفعش تشيل رجلك مره واحده...
لازم ترفع رجلك عن الدبرياج بالتدريج

آخر احتمال هل انت عملت صيانة الالف في التوكيل قريب؟؟؟




ثانيا :
بما اني كفتة على بفتيك في موضوع العربيات ده عامتا .. فانا بصراحة مش عارف اعمل اي تظبيطات ، عارف ان بعض الاخوة قالولي سنترلوك وانزار وليد ابيض واستيكر مثلا .. وغيرهم ..
بس مشكلتي اني فعلا مش عارف انواع ومش عارف حد معين ارحله !! ، كمان انا مقلق ان حد يديني حاجة وحشة او يشتغلني في فلوس وخاصتا اني لوحدي وماعيش حد يكون بيفهم معايا !!
وحتي لو اشتريت شيء ما ، برضوا هاحتاج اني اروح لحد يركبهولي زي الكاسيت مثلا !!
وبرضوا خايف ان اعمل اي حاجة في العربية يجي التوكيل يقولي انها خرجت كده من الضمان ويغلس عليا !!!
فهل اجيب وخلاص وزي ماتيجي تيجي ، وادور انا على كهربائي او اي صنيعي ايا كان واقوله اعملي كذا ولا استنى لما اتحصل على الشخص اللي ممكن يفيدني اكتر ويجي معايا ؟؟
ولا اعمل ايه ؟؟

هو اي حاجه هتعملها في الكهربا من تركيب كاسيت او سنتر او انذار هيخرج العربية من ضمان الكهربا...
الانذار والسنتر لو هتركبهم انا برشح مكان واحد في اخر جسر السويس ورا سوق القنال هو توكيل وولف...


ثالثا :
هل فيه اماكن قريبة من وسط البد تانية بتبيع اكسسوارات عربيات وكاسيتات كويسة غير التوفيقية
هل في واحد كويس ممكن ارحله في وسط البد او المهندسين او الجيزة يركبلي الكاست مثلا
وهل هو بيبقى عنده الكاسيت اشترية واركبه منه ولا اروح اجيبه الاول من حتة تانية وباعدين اروحله اركبه بس ؟؟

افضل اسعار هتلاقيها غالبا في التوفيقيه ولازم تسال على كهربائي كويس هو يركبه وتنقي المكان من الموضوع اللي هحطلك اللنك بتاعه وتحدد انت ميزانيتك كام عشان ممكن نقولك تجيب كاسيت ايه وسماعات ايه...

رابعا :
شوفت نوع كاسيت فلاشة بس اسمه "وولف" ب300 جنيه تقريبا .. حلو ده ممكن اجيبه ولا وحش ؟؟
كمان هل ممكن يتركب عندي عادي جنب الساعة مثلا .. بس طبعا هايتطر يقص ولا لأ
والاهم من ده وده الضمان او التوكيل مش هايغلس عليا فيه ؟؟
والمهم برضوا .. السماعات بتاعة الكاست بتتجاب بمقاسات معينة "كعرض او عمق" ولا اي سماعة على حسب الخامة او النوع تتركب على الباب مثلا وخلاص !!!؟؟؟ والافضل كام واات ؟؟


معمريش سمعت عن الكاسيت ده والافضل تخليك فماركه معروفه سوني او بايونير او كلاريون او بلوبنكت دي الانواع المعروفه والغاليه
لو عايز رخيص وعملي وحلو يبقى جولد ستار او ماتسوبيشي ودول على قدهم
وزي مقلتلك هيضيع ضمان الكهربا (اللي هوا مش مهم) وقشطه كلنا مدلعين العربيات..
السماعات على حسب هتركب فين هتحدد المقاس والواط على حسب الميزانيه...


خامسا :
انا شفت دريكسيون احمر في اسود بس صغير شوية شكله عجبني .. ممكن اجيبه واركبه عادي عند اي حد ولا مايحبزش دلوقتي الموضوع ده وهل سهل تركيبه ولا معقد وهايطول ؟
ولو فرضا عادي مش خطر مثلا اركبه عند مين ؟؟؟

لا انصح بتركيب اي طاره من الطارات الصيني الموجوده في السوق
والطارات السبور الاصليين غاليين جدا...
الطارات الصيني بتبوظ والمسنن بتاعها بيتاكل وممكن مره واحده تيجي تلف تلاقيه بيلف عالفاضي...
ان كنت لابد فاعلا فهي رخيصه وسهلة التركيب...

وشكرا ...
باعتذر جداااااا على الاطالة والرغي .. بس بجد انا حاسس اني لوحدي ومحتاس في بعضي ومحتاج استفسر على كام سؤال ؟؟
وشكرا للمرة التانية ؟؟

واتمنى الرد على حسب النقط الموضحة كلها نقطة نقطة :)

تحياتي
اتمنى اني اكون رديت بشكل وافي ومختصر فنفس الوقت

تحياتي