الموضوع: هل اشترى الرينو فلوينس الفيس ليفت ولا اة

الميزه في رينو و ده عن تجربه انها بتديلك عربيه ماركه محترمه توكيلها كويس و اساسياتها و عوامل الامان ممتازه و كمان كمالياتها كويسه قوي مش هتلاقي حاجه زياده تركبها فيها و بالنسبه للسعر هو ارتفع زيه زي اسعار كل حاجه . يعني بتديلك حل وسط للي عايز امكانيات كويسه و امان و شكل انيق ووسع داخلي و شنطه كبيره و استهلاك جيد للبنزين و هي عربيه لداخل المدينه يعني مش سياره سباق علشان تجيب ال ١٠٠ في ٣ او ٤ ثواني مثلا و لو جئنا نفكر بطريقه عمليه هتلاقي ان نظرا لطبيعه الطرق و ازدحامها مفيش مجال قوي للجري إلا في الطرق السريعه وده بيبقي تدريجي و اي عربيه مش الفلوانس بس ممكن تجيب سرعات عاليه بالتدريج فاللي اقصده يا تري موضوع التسارع ده أهميته العمليه قد ايه؟ و كمان نقطه تانيه بتاعه توافر قطع الغيار بره التوكيل دي برضه من الاكليشيهات المحفوظه المضلله : يعني حد مشتري عربيه زيرو ب ٢٠٠ الف جنيه مثلا هيروح يصلحها في ورشه و الاسطي بليه يركبله فيها قطع غيار مضروبه و العربيه تخرج من الضمان؟ مش معقول علشان اوفر ٢٠٠ و لا ٣٠٠ جنيه أبوظ عربيه ب ٢٠٠ الف جنيه فاللي بيشتري زيرو بيعمل الصيانه في التوكيل و بيجيب قطع الغيار منه علشان العربيه تفضل بحالتها اكبر فتره ممكنه. بالنسبه للسؤال اشتري و لا أستني الموضوع يتوقف علي مدي احتياجك للعربيه فلو تقدر نستني و موضوع الشكل هيفرق مع حضرتك يبقي انتظر الشكل الجديد و حاول تنزل تتفرج علي الفلوانس في معرض تاني و يستحسن لو كان عنده بقيه الاختيارات علشان المقارنه تبقي علي الطبيعه و تقعد فيها او تطلب عمل تست درايف ليها

المشاركة الأصلية كتبت بواسطة dozo

النترا الهاى لاين 184500 و بعد الخصم اللى عامله غبور تخلص على 178000 فى بعض المعارض ..
نيجى للمهم :-
بما انك بتحب الجلوس و الدركسيون بعيد عنك و تحس بوسع العربيه ( زى حالاتى ) يبقى ما فيش فى الفئه السعريه دى غير السيراتو و النترا و فلوانس و خصوصا بعد السيراتو و النترا ما حجم الصالون زاد فى new shape بتاعهم و بصراحه التلاته كويسين و شوف انت عايز ايه:
- عايز تسارع و شد خوش على السيراتو و الانترا
- عايز ثبات و عوامل امان خوش على الفلوانس ( اعتقد ما فيهاش esp )
حاجه على حساب حاجه .. شوف مين اهم عندك لان الكماليات تقريبا واحده فى التلاته
و سيبك من اعاده البيع .. الواحد بيشترى عربيه عشان يتمتع بيها مش يفكر لما يجى يبيعها حيخسر فيها كام الا لو انت من هواه التغيير السريع دى حاجه تانيه .
ومش معنى ان الثبات فى الكورى اقل انه بيتقلب على 60 مثلا . لكنه بلا شك اقل من الاوروبى.
فيه حاجه اخيره عايز اقولهالك ( معلش طولت عليك ) :
نصيحه اوعى تشترى عربيه بالتمن ده و مافيهاش immobilizer .. خصوصا فى الايام الهباب دى ....
- السيراتو اساسى فى كل الفئات
- الفلوانس اساسى فى كل الفئات
- الانترا اعتقد اخر فئه فقط
وفى الاخر الحارس هو ربنا و ربنا يوفقك فى الاختيار .

اولا ياباشا انتا مطولتش عليا بالعكس انا بحب الناس الى زيك كدا بيظبطلوا الافكار فى دماغى وبيرتبولى الدنيا وبطريقة كلامك بتحببنى فى عربية بتبقى مستبعدة بالنسبة وتكاد تكون كرهتاها بسبب طريقة كلام الناس


انا اول حاجة بفكر فيها الوسع بعد كدا الامان بعد كدا الجرى وشوية الاوبشنات الذيذة مش اكتر يعنى

وربنا يوفق ان شاء الله