واضح اننا كل ما بنكبر و بتزداد خبرتنا في الحياة وبيزداد نضجنا الاجتماعي والفكري كل ما بنتعلم من غلطنا و بنحاول نصلحه
حضرتك وقعت في اخطاء مع ابنك الكبير وتلافيت جزء منها في التاي وبتحاول جاهدا انك تتلافاها كلها في الصغير
المشكلة ان احنا بنتفاجئ بأولادنا
ممكن حاجات احنا كنا بنعملها واحنا صغيرين بس بنستنكرها من اولادنا عشان احنا جربناها وعرفنا انها غلط
هما عاوزين يجربوا هما كمان رغم ان الموضوع بقى اخطر نظرا للتطور الرهيب اللي حصل في السنوات الاخيرة واللي غي مننا احنا ذات نفسنا فمابالك الاولاد
الكبير انت حاسس انك خسرته عشان كان اسلوبك معاه خاطئ
لكن لسة مفاتش الوقت
في كتير بيبقي في فجوة ما بينهم وبين اولادهم بيحصل ظروف معينة بيقربوا من بعض
اللي احنا نقطر عليه اننا نعمل اولادنا حقل تجارب
ازاي
بنجرب معاهم كذا اسلوب لحد ما ننجح بس المهم بلاش يأس
ابنك الكبير حاول تصاحبه
افتعل موضوع حصل معاك وحاول تقعد معاه تاخد رأيه
كبره حسسه انه مهم بالنسبة لك
بالنسبة لموضوع المظهر دي فترة بيمر بيها اغلب الشباب وبتعدي بعد كدة
خاصة انك كنت صارم معاه
والصرامة دي مش بتنفع مع كل الناس
لا تكن صلبا فتكسر ولا لينا فتعصر لازم نشد ونرخي
قول له مرة كدة تعالى انا عاوز اخرج معاك ما تخرجني توديني مكان من اللي بتروحه مع اصحابك
حاول تنزل لمستواه
تعالى على نفسك و اخرج من عباءة الاب
اتكلموا مع بعض بعيد عن الاوامر والنصايح
انا لحد دلوقتي وانا اولادي كدة كبار والدي ووالدتي ربنا يديهوم الصحة رغم انهم اب وام مفيش منهم كتير
الا انهم كل ما يقعدوا معايا مفيش غير وصلة النصايح لدرجة اني باتخنق
فمابالك بالشباب
واحب الفت نظر الاباء لموضوع
احنا قدوة لابناءنا
وهما نسخة مننا بيقلدونا في كل شئ
ما ينفعش نقولهم عالشئ غلط واحنا بنعمل الشئ دة
ما ينفعش الاب يبقى مدخن ويقول لابنه انت بتدخن ليه
ما ينفعش الاب يسهر برة للفجر و يقول لابنه ترجع البيت الساعة ٩
ما ينفعش الاب يبقى شره في الاكل ويقول لابنه خف الاكل شوية عشان ما تتخنش
احنا لازم نربي نفسنا قبل ما نربي ابناءنا
انا باحاول اربي نفسي
ساعات بيصدر ردة فعل من ولادي ابقى فيها على خطأ
باعترف واقولهم صح عندكوا حق انا فعلا غلطانة
دة ما يقللش من شأني ابطا بل بيتعودوا انهم يعترفوا بأخطاءهم وما يكابروش
اما بالنسبة للحبيب الوسطاني
وجهه للطريق الصح والبعد عن ما يغضب ربنا وسيبه بس وانت ملاحظه من بعيد والفت نظره من ان لاخر بالتلميح
وربنا يهدي الحال
المفضلات