الموضوع: في بيتنا مراهق

انا هحكيلكم شويه حاجات ممكن تفيدكم انا شاب عندي 20 سنه و كمان كام شهر هكمل 21 سنه الموضوع اللي بتتكلمو فيه ده مهم جدا جدا جدا اولا هنقسم الموضوع لجزئين الاول التربيه:
مفيش اب او ام في الدنيا ديه كلها مش عايز عياله يبقة احسن ناس في الدنيا و للاسف في ابهات و امهات يشد على عياله في التربيه جامد عشان يطلع مثلا احسن من ابن اخوه و يجبره على حاجات هوا مش حاببها و ديه كارثه لانك لغيت شخصيه ابنك لكن الصح انك تسيبه يعمل اللي هوا عايزه و عينك عليه

تاني جزء طريقه التعامل:
طريقه التعامل ديه كارثه لوحدها انا والد بيتعامل معايا بمبدا ان اي حاجه يقولها عليها لازم اعملها سواء عجباني او لا و لو معملتهاش ابقى وحش و مش بفهم و عيل يعني مثلا انا بحب العربيات و هوا عايز يتاجر في العربيات انا مش حابب كده لما طلب مني اني اتاجرله في العربيات و انا رفضت و فهمته ليه اتهزقت و طلعت انا عيل و غلطان..و هوا ده سبب الخلاف الدايم بين و بين بابا ان لو رفضت حاجه ابقى وحش و مش بفهم و عيل و غير كده موضوع الخروجات اللي مهم لكل شاب فينا تلاقي الاب او الام يخلي ابنه يخرج و يقوله متتاخرش عن الساعه 12 مثلا و متروحش المكان الفولاني و روح المكان الفولاني لا ده غلط كبير جدا سيبني اخرج براحتي و المكان اللي يعجبني و ارجع براحتي طالما مش بعمل حاجه غلط ليه اولياء الامور مش عايزين يفهمو ان احنا بكره هنكبر و هيبقى ورانا شغل و مسؤليات و مشاغل صحيح هيبقى في خروجات بس مش زي سننا دلوقتي...
و كمان حاجه اغلب الشباب بيحب يتعامل مع والدته اكتر من ولده و انا واحد من الناس ديه عشان الام بتكون احن من الاب لان الاب للاسف مش مصاحب ولاده و ديه برضو مشكله تانيه
خلاصه الكلام:
الاب و الام لازم تصاحبو ولادكم و تسيبوهم يعملو اللي هما عايزينه طالما مش غلط مينفعش انك تلغي شخصيته و تمشيه بمزاجك لان ده هياثر عليه في المستقبل كتير قوي و هيكون ضعيف الشخصيه في كل مكان سواء في شغله او مع مراته او مع اصحابه....كفايه بجد ارحمونا

المشاركة الأصلية كتبت بواسطة dedi

أختى الفاضلة أول مشكلة عدم المذاكرة بالرغم من ذكائة و فشل فكرة الجوائز و المكافئات و الفسح
ثانيا عدم الطاعة و التمرد ودة طبيعى و متقبل و لكن مشكلة المراهقة و دخولة على مواقع موش كويسة على النت ماهو العمل بافرض علية رقابة صارمة فى استعمال النت بس حاسس انة موش صح لانى مخونة و مافيش ثقة وجربت معة 3 مرات تقريبا ووثقت فية و فى كل مرة لم يكن اهلا للثقة و فتح مواقع موش كويسة يا ترى اية العمل يا ريت لو حد عندة اقتراح او حل يفيدنا بة

في برنامج جميل و مجاني للحماية من المواقع ده و هو برنامج k9 web protection و ده الموقع بتاعه
K9 Web Protection - Free Internet Filter and Parental Control Software | Free Internet Filtering and Parental Controls Software برنامح اكثر من رائع و مجانا كل المطلوب هو ايميل هيبعتولك عليه كلمة السر و يشتغل البرنامج و تبقى مطمن...................و برده ممكن تفعل خدمة parental control عن طريق شركة الانترنت اللي حضرتك مشترك فيها.........
و برده حضرتك ممكن تختار الحاجات اللي بيتفرج عليها في التفزيون و تلغي القنوات التي تثير الغرائز و قنوات الافلام و الذي منه و يبقى في القنوات الهافة و المفيدة.....



بالنسبة لموضوع التربية انا شايف ان من اهم الحاجات اللازمة في تربية الابناء هي الدعاء الدائم لهم بالهداية و السداد..............
ايضا أن يتق المربي الله و يخشاه حتى ينشأ الله له أولاده نشأة حسنة فالامر كله بيد الله لا بايدينا و لكنا يجب أن ناخذ بالاسباب...
و من الاخذ بالاسباب تربية الابناء منذ الصغر على التعلق بدين الله و بالله و تعليمه تالعقيدة الصحيحة للمسلم و تفهمه حكمة ربنا و رحمته و لو استفسر عن حاجة تفهمها له مش مجرد تلقين و يعرف ان في الاسلام لك حدود و حقوق يعني لك حق في ان تفعل كذا الى ان تصل للحد المسموح به و لا تتعداه و يفهم اضرار التعدي على هذه الحدود......

و من الحاجات اللي بتساعد في بناء شخصية سوية للطفل تعليمه السيرة و العبر اللي فيها و نحاول نختار البرامج اللي يتفرج عليها في التلفزيون.


و للاسف اغلب الاباء و الامهات دلوقت ما بقاش يهمهم تعليم اولادهم الدين اساسا و بقى المهم عندهم بس ان ابنهم يبقى متفوق في دراسته و حياته المهنية و الدنيوية فاصبحنا نجد كثير من الشباب لا يصلون و لا يعرفون كيف يصلو و لا يعرفون مبطلات الصلاة مثلا او الحاجات الواجب على كل مسلم معرفتها ده غير اصلا انه ما يعرفش عقيدته صح فاصبح هم هذا الشاب هو الدنيا فقط لا ينظر للاخرة بمعني ان كل اعماله الحياتية اصبح هذفه فيها الدنيا و الشهرة الخ لكن ما تلاقيهوش يعمل حاجة ابتغاء وجه الله او لرفعة الامة او ......و للاسف بقوا كتير اوي

والله انا شايف ان الحل فى الالهاء فى اى شىء يعنى انا دلوقتى عندى 19 سنة فى اولى نظم ومعلومات انا من ونا عندى 13 او 14 سنة كنت شغال معا جوز اختى فى مركز صيانة سامسونج لصيانة الشاشات والتلفزيونات وكدة شغال فيها لحد دلوقتى كنت بروح حتا الشغل ايام الدراسة لحد الان بروح الشغل لهانى عن كلدة وعديت المرحلة ديت عادى