بصي حضرتك انا هحكيلك والدي و والدتي الله يباركلهم عملوا ايه معايا انا واخواتي
اهم حاجة انك زي ما قلتي تصاحبيه و ترخي الحبل بحيث انك تبقي شايفة اخره و تشدي وقت ماتلاقيه مناسب بس الفكرة كلها ان مش لازم وقت ماحس ان في غلط هيحصل اقوم شادد من قبل ما يحصل لأن ساعتها حضرتك بتبقي شايفه الغلط او المشكلة و هو لسة مش شايفها و من هنا بيجي موضوع الخنقة ده
فا في غلطات و مشاكل مش هتضر لو وقع فيها و سبته يقع فيها و استناه يجي يتكلم معايا و ساعتها هيتعلم درس عمره ما هيتعلمه لو مثلا حضرتك منعتيه من الغلط ده ... بس في نفس الوقت في حاجات مينفعش استنى انها تحصل و اسيبه يتعلم منها لأنه ساعتها هيتعلم عليه
لازم الاب يرخي و الام تشد و الم ترخي و الاب يشد و هكذا ميبقاش واحد شغلانته انو يبقى بيشد على طول و الثاني بيرخي على طول لأنه هيكره اللي بيشد ده و هيحب اللي بيرخي لحد ما يشد عليه يبقى النتيجة انو بقى مبيحبش الاب و الام و بالتالي مش هيبقى فيه سمعان للكلام بعد كدة حتى لو صح
في الفترة دي هيبقى صعب انو يبقى تحت عينك على طول بس في طريقة حلوة ممكن تخليكي عارفة كل حاجة فهو في المدرسة بيقضي من 7 الصبح لحد 3 ... المدة بتبقى من المدرسة للبيت معروفة لو اتأخر نص ساعة مثلا تتصلي انت فين و مجيتش ليه الخ ... بس مش بطريقة تحقيق و في نفس الوقت من وقت للثاني بدون ما يدرى يلاقي بتسألي عليه في المدرسة و تعرفيه انك هتعملي كدة
مع المدرسة تحاولي تشغليله وقت فراغه بحاجة هو بيحبها و تمارسيها معاه كمان زي مثلا تمرين في النادي لأي لعبة و تحضري التمرين تحاولي تتعلمي اللعبة نفسها و في يوم من الويك اند تقليله يلا نروح نلعب و بعدين نتغدى برة مثلا و فاكس مذاكرة النهاردة علشان انت كنت كويس الفترة اللي فاتت دي و حسيت انك تعبت و محتاج تفصل
عوديه يحكيلك مشاكله بدون خوف و خدي رأيه في كل حاجة من اول يحب ياخد ساندويتشات ايه لحد ابسط حاجة ممكن تتخيليها، و مفيش مشكلة لو دخلتيه في حوار كبير شوية عن سنه بتتكلمي فيه انتي و والده و تقليله ايه رأيك و تتناقشي معاه و اياكي تسفهي من رأييه
خليه يعتمد على نفسه في معظم الحاجات و متتدخليش في كل صغيرة و كبيرة.
من الاخر ارسمي الخطوط العريضة و سيبيه يمشي عليها
المفضلات