ارجو ابداء الرأي من مالكي الميجان..

**t4r3k** · 07-09-2008 04:16 PM

معلش هتقل عليكوا تاني
انا على العموم لسه متبهدل فى التدوير بس كنت عايز أسأل سؤال كدا فى السريع
انا عجبني اوي البانوراما
فانا مثلا بيبقى قدامي 2006 بس مش بانوراما بقول لأ اجيب بانوراما افضل حتي لو 2005
يعني لو قدامي عربيتين الحالتين نضاف زي بعض يعتبر 2006 عادية مش بانوراما و 2005 بانوراما ..
مع العلم اني معجب جدا بموضوع البانوراما وحاسس اني لما ابقى راكب هبقى مستمتع اوي بيه
ياريت الافادة من الوحوش اعمل ايه ؟

**Sharky** · 07-09-2008 04:47 PM

لو الإتنين نضاف و بنفس الحالة هات البانورما طبعا و مش حيفرق 2006 من 2005 لو نفس الفوانيس

**t4r3k** · 07-09-2008 05:49 PM

المشاركة الأصلية كتبت بواسطة sharky

لو الإتنين نضاف و بنفس الحالة هات البانورما طبعا و مش حيفرق 2006 من 2005 لو نفس الفوانيس

الف شكر ليك يا باشا .. انا برضه بقول كدا بس طبعا قولت لازم رأي الوحوش اللى طبعا عنهم خبره اكتر مني بكتير ..
والفوانيس الجديدة انا عارف انها نزلت فى 2007 ..
وياسيدي دي امرها سهل انها تتركب وانا ناوي على كدا ان شاء الله ..
لكن البانورمانا اكيد صعب اوي تتركب دي ..

**farahat** · 07-09-2008 08:27 PM

الفوانيس الجديدة موجودة من اواخر ٢٠٠٦ ، عشان كدة أحمد باشا Sharky بيقولك لو نفس الفوانيس (يعني نفس الشكل القديم ) يبقى مفيش فرق خالص و توكل على الله في ال-٢٠٠٥ بعد شرط الحالة طبعاً و دة رأي أنا كمان .
بالنسبة لتركيب الفوانيس الجديدة على الشكل السابق (pre-facelift ) هو سهل في الفوانيس الخلفية انما الفوانيس الأمامية هتكون صعبة لأن الإكصدام كمان اتغير ، و في الحالة دي محتاج تغير الإكصدام مع الفوانيس
و ربنا يسهل لك إن شاء الله

**t4r3k** · 07-09-2008 08:29 PM

اه انا مختش بالي من موضوع الاكصدام دا ..
يبقى مش مشكلة.. الفوانيس اصلا لوحدها تحفة ومش محتاجة ..
والف شكر ليك يا استاذ فرحات

**Ramy_Tantawi** · 07-09-2008 09:18 PM

السلام عليكم.

أعانك الله يا شيخ طارق ووفقك وتلاقي حاجه كويسه ان شاء الله.

أنا رأيي طبعاً لو لقيت اتنين وحالتهم كويسه ونفس السعر تختار البانوراما حتى لو موديل 2005 وزي ما شاركي باشا واستاذ فرحات شاروا عليك شرط الحاله الكويسه ....اما بخصوص الفوانيس فالاتنين تحفه والله والاختلاف مش كبير اوي في التصميم غير العدسات في ال2007 وفي دفعه نزلت أواخر 2006 فوانيس جديده لكن من جوه مختلفه شويه عن 2007 .....................مش عاوز اصدعك لاقي بس بنت الحلال انت وماتشيلش هم قولنا واحنا نعملك عليها كونسولتو وحوش ميجان والعربيه من نفسها هاتقول اللي فيها من غير ماحد مننا يمد ايده .....

تحياتي يا طارق باشا وربنا معاك ان شاء الله.

**Sharky** · 07-09-2008 09:59 PM

المشاركة الأصلية كتبت بواسطة farahat

الفوانيس الجديدة موجودة من اواخر ٢٠٠٦ ، عشان كدة أحمد باشا Sharky بيقولك لو نفس الفوانيس (يعني نفس الشكل القديم ) يبقى مفيش فرق خالص و توكل على الله في ال-٢٠٠٥ بعد شرط الحالة طبعاً و دة رأي أنا كمان .
بالنسبة لتركيب الفوانيس الجديدة على الشكل السابق (pre-facelift ) هو سهل في الفوانيس الخلفية انما الفوانيس الأمامية هتكون صعبة لأن الإكصدام كمان اتغير ، و في الحالة دي محتاج تغير الإكصدام مع الفوانيس
و ربنا يسهل لك إن شاء الله

كلام فرحات باشا مظبوط
الفوانيس الجديدة نزلت فى اواخر 2006 يعنى 2006 فيه موديلين الفوانيس القديمة و الفوانيس الجديدة
و علشان تغير الفوانيس الجديدة لازم تغير الإكصدام و الشبكة معاه