الموضوع: رد فعلك ايه تجاه رفع الدعم من علي البنزين ، ياريت كله يشارك برأيه

المشاركة الأصلية كتبت بواسطة mo7a_mo7a

على فكرة لازم نفكر بموضوعية
احنا المفروض ناس محترمين (صفوة المجتمع)
راكبين عربيات ومتعليمين وبنستخدم الانترنت


حقائق

1. لو كل واحد مننا راجع استهلاكه السنوي حيلاقي ان اغلبنا 90% وطالع ال 1800 لتر يكفوه وزيادة كمان
2. اي حد استهلاكه عاللي بيبقي نتيجة ان شغله فيه سفر كتير وطبعا ده قطاع خاص فمش من العدالة ابدا ان الحكومة تدعم القطاع الخاص
3. سعر البنزين الحر الحكومة بتدعمه للناس كلها من ضرايب الشعب يعني انا وانت بندفع الفرق اللي المفروض يتوجه لحجات تانية اهم زي التعليم والصحة والطرق
4. الدعم الحالي اجباري يعني لو فرضنا ان في واحد غني جدا ومش محتاج دعم بياخد الدعم بالعافية اجباريا لانه متاح لكل الناس
5. كل ما كانت عربيتك اكبر وبتستهلك بنزين اكتر كل ما كانت بتاخد دعم اكثر يعني المرسيدس بتدعم في السنة ب 7 اضعاف اللادا
6. البنزين علشان رخيص في ناس عمالة تلف طول اليوم بعربياتها عمال علي بطال - انما لما يبقي في حصة مقننة اكيد ده حينعكس ايجابيا علي سيولة المرور
7. تهريب البنزين والسولار اساسه عدم وجود رقابة علي الكميات المنصرفة من البنزينات وده حيتحل في المنظومة الجديدة لان العربية الفنطاس حتستلم الكمية بكارت وتسلمها للبنزينة بكارت والبنزينة تصرفها من ارصدة كروت المستهلكين واي تهرب حيبان ويندفع بالسعر الحر ساعتها مش حيكون في سوق سوداء
8. كل عربيات الجمرك والمنطقة الحرة وغير المرخصة والوافدين حتحاسب بالسعر الحر

بعد كل ده لسة معترض!!

انا واحد من الناس معترض تماما علي الحكومة الحالية ورئيسها ومرسي وبديع لكن ده ميمنعش اني اشوف ان المنظومة دي لو اديرت صح زي مهي مكتوبة حتكون خير للدولة وحتفيد المجتمع

والاختلاف في الراي لا يفسد للود قضية!!!

وجهت نظر حضرتك و تحترم طبعا ، بس انا ردي علي نقط حضرتك اللي ذكرتها

النقطه الاولي : ال ١٨٠٠ دول زي ما حضرتك عارف بتمثل حوالي ٥ لتر تقريبا يوميا ، ممكن مش كل الايام تنزل فيها بس لو افترضنا انك مش بتخرج في اجازتك يبقي مش هتنزل غير حوالي ٦ ايام في الاسبوع تقريبا هيزودوك دول بكام لتر هيبقي معاك حوالي ٠.٨ لتر زياده يوميا -لو حساباتي صح- ازاي بقي دول بيكفوا اليوم اصل مش معقول مش هيكفوا يوم و التوتال النهائي يكفي مش كده ؟

تاني نقطه : اللي شغله فيه سفر كتير حتي لو خاص مفيش اي ضمان ليه او اي بدل يكفيه بنزين و لو حتي كفاه بنزين -و انا مظنش برضه- يبقي كده البدل كله طار علشان الحكومه و هو ما نابه الا ضربة الشمس ، و طبعا في نوعيه ثانيه زي اللي كنت بحكي عليها في اخر تعليق ليا ناس زي بتوع ونش الانقاذ للطرق السريعه مثلا ،

تالت نقطه : طب اهو علي الاقل لقينا حاجه من بحر الفلوس اللي بندفعه للحكومه اتردلنا يعني هيبقي لا دعم و لا عيش ولا انابيب ولا تعليم ولا صحه و لا رصف طرق و لا صرف علي امن -طبعا ده خلاف قنابل الغاز- و ادفع مبالغ ضخمه علشان تجهيز المحطات بالماكينات و الكروت ..الخ ، هو ليه يا جماعه انتم متخيلين ان دعم المحروقات هي الغصه اللي واقفه في حلق الحكومه ما في فلوس تانيه كتير بتدخل للبلد كنا شفناهم عملوا بيها حاجه للتعليم ؟ ولا الصحه ؟ هتقولي ما الفلوس مش مكفيه و اصلهم بيصرفوا في حاجات تانيه احب اقولك ما هو ده اللي هيحصل برضه الفلوس مش هنلاقيها و مش هيبقي في اي تحسن في اي حاجه و الحكومه هتقول اصلنا مزنوقين برضه

رابع نقطه : :) الحقيقه مش عارف اقولك ايه بس عموما كم الغلابه اكتر بكتير من الاغنيه ده غير ان في حسبه بسيطه كنت عاملها بتوضح الدعم بيتقسم ازاي و غالبيته رايحه للطبقه تحت المتوسطه و للناس اللي اكل عيشها معتمد علي الدعم ده زي السواقين -بكافة انواعهم- ده غير ان الطبقه اللي حضرتك بتتكلم عنهم ذوي الثراء الفاحش دي بنزين ٩٥ و ده بقي كله حر :)

خامس نقطه : و ممكن مازدا قديمه سبعينات تاخد اكتر من المرسيدس ده غير ان المرسيدس اللي حضرتك بتتكلم عنها دي برضه هتبقي موديلات تمانينات و اوائل تسعينات انما الجديد قوي ده طبعا موفر جدا للبنزين انما اللي معهوش غير انه يجيب قديم مفيهوش تكنولوجيا توفير البنزين يعمل ايه ؟ نضغطه كمان اكتر و نعصره بنزين ، طب عربيته هتترمي قدام بيته اسبوع -و تتسرق بعد كده- هيعمل ايه بقي مواصلات ؟ ده دلوقتي المواصلات بتتركب بالخناق اومال لما الدعم يتشال و كله يبقي الشارع هنعمل ايه لا و ايه ياريت بقي بعد كل ده و تركب و توفر انما طبعا الاجره هتغلي هبل من كل السواقين و شوف مين بقي يمنعهم

سادس نقطه : اهو كل اللي فات كوم و دي كوم تاني بقي يا جدعان بالله عليكم مين يعني بيموت في دباديب الشوارع و اللف في الزحمه و القرف اللي في الشارع من تكسير و حوادث و غباوه تحس ان حواليك سواقين مجانين او ركبوا عربياتهم غلط ، و علشان تعرف تنزل تكروز زي ما حضرتك بتقول كده مقدامكش الا باليل مين دلوقتي بقي بينزل بليل !!! ده في عز النهار و التثبيت علي ودنه و السرقه الله ينور


سابع نقطه : طب ميتعمل منظومه دعم شامل جديده و متراقب فيها كميات البنزين برضه و التاجر يشتري حر و نشوف طريقه نحسب بيها اللي وصل للناس و الحكومه تدعمه بيه برضه :) و اهو ده يبقي انجاز رائع للحكومه المزعومه

ثامن نقطه : كده كده اكتر من ٩٠ ٪ منهم بياخدوا ٩٥ و كلهم حر ، و ممكن نزود الجزء ده في الدعم الشامل يبقي العربيات دي تبقي بسعر حر مثلا من غير ما اسحل الشعب معايا :)

و طبعا احترامي الكامل لحضرتك و وجهت نظرك و اتمني متكنش زعلت مني في حاجه من ردي

المشاركة الأصلية كتبت بواسطة michohat

ايه الاصناف والمجالات التي تتأثر بالبنزين والسولار؟؟
يعني لو سعر البنزين والسولار غلي هيأثر على ايه؟؟

كل حاجه في البلد سعرها هيغلى
الا المرتبات

مش فاهم هما الحكومه فاكرانا ايه كل واحد بيغلي علينا الحكومه تغلي علينا و تشيل الدعم ، و اللي شغله يتضر من الدعم يشيلنا احنا برضه تاني ههههههههههههههههههههه طب ما هو كده اجبار علي تجويع الناس فعلا يعني انا كده مثلا عايش بالعافيه هغلي البنزين مش هعرف اعيش كمان اغلي كل حاجه معاه هنزل اقتل الناس في الشارع و اخد فلوسهم او ادور اشحت و ملاقيش اللي يديني فلوس ؟ .... و بالمناسبه لما اكون واقف بقي ساعتها بشحت و الاقي موكب مسئول معدي او الريس المواطن ده يقول ايه او يفكر في ايه يعني انا مبقتش لاقي اعيش و قدامي اهو الحكومه بتصرف عال العال ما شاء الله

على فكرة لازم نفكر بموضوعية
احنا المفروض ناس محترمين (صفوة المجتمع(
راكبين عربيات ومتعليمين وبنستخدم الانترنت

نفكر بموضوعية اه لكن انا اسف موضوع الدعم ده ملوش علاقة بصفوة المجتمع او غيره

حقائق

1. لو كل واحد مننا راجع استهلاكه السنوي حيلاقي ان اغلبنا 90% وطالع ال 1800 لتر يكفوه وزيادة كمان

مقياس نسبي يختلف من شخص لأخر ولا يخضع لكونه حقيقة او غيره

2. اي حد استهلاكه عاللي بيبقي نتيجة ان شغله فيه سفر كتير وطبعا ده قطاع خاص فمش من العدالة ابدا ان الحكومة تدعم القطاع الخاص

انا معاك ان معظم الشغل ده شخص قطاع خاص لكن ايه راي سيادتك في التجار الصغيرين اللي بيسافروا بعريباتهم الخاصة علشان يسوقوا لشغلهم طيب بلاش ده انا مثلا شغال في شركة ادوية ومناديب الشركة عندنا اللي شغلهم مرتبط بالسفر ما بين محافظتين زي الاسكندرية ومطروح مرعوبين من رفع الدعم وعن طريق شغلى في الحسابات والإدارة الماليه استطيع ان اؤكد ان الشركة مش حتصرف لهم بدل انتقال يتناسب مع الاسعار الجديده للبنزين فرفع الدعم هنا بتمثل كابوووووس ليهم رغم انهم قطاع خاص

3. سعر البنزين الحر الحكومة بتدعمه للناس كلها من ضرايب الشعب يعني انا وانت بندفع الفرق اللي المفروض يتوجه لحجات تانية اهم زي التعليم والصحة والطرق

جميل بس عارف حضرتك بتدفع كام نوع ضريبة علشان تركب عربية مبدئيا سيادتك بتشتري العربية بسعر يفوق سعرها من مصنعها اضعاف اضعاف بسبب الضرايب والجمارك وبعدين وانت بتشتري تدفع ضريبة مبيعات وبعدين تروح ترخص تدفع ضريبة بتاعة الترخيص من المفروض بقى عايز ترفع الدعم عن البنزين ارفع الضرايب ده كلها ااه في اوروبا مفيش دعم على البنزين بس في نفس الوقت العربية عندهم بسعر مصنعها والاهم من كده وجود شبكة مواصلات محترمة تغنيك عن ركوب عربية

4. الدعم الحالي اجباري يعني لو فرضنا ان في واحد غني جدا ومش محتاج دعم بياخد الدعم بالعافية اجباريا لانه متاح لكل الناس

اكيد المشكلة ده ليها حل بطريقة او بأخرى وليكن مثلا تعيين حد في محطات البنزين له المقدرة على تحديد موديل ونوع وقيمة كل عربية داخله البنزينه تمون ويبقى عارف الفرق ما بين واحد راكب s 500 وواحد راكب دايو وواحد راكب 127 فمش معنى انه في دعم بيستفيد منه الطبقة الغنية اللي في المجتمع اللي الحكومة بتقول عليهم دول 20 % اننا نسحل معاهم 80% فمش معنى ان فيه دعم اجباري ان الحل اللادعم الاجباري

5. كل ما كانت عربيتك اكبر وبتستهلك بنزين اكتر كل ما كانت بتاخد دعم اكثر يعني المرسيدس بتدعم في السنة ب 7 اضعاف اللادا

والمرسيدس بيدفع ضريبة 10 اضعاف اللادا وكمان في ناس ورثت عربيات قديمه وكبيرة وبتستهلك بنزين 7 اضعاف العربية اللادا انا شخصيا اعرف واحد ورث عن ابوه عربية شيفروليه موديل 80 وموتورها 8 سلندر ومش عايز يبيعها لأنها ذكرى من والده الله يرحمه

6. البنزين علشان رخيص في ناس عمالة تلف طول اليوم بعربياتها عمال علي بطال - انما لما يبقي في حصة مقننة اكيد ده حينعكس ايجابيا علي سيولة المرور

معتقدش في حد بيعمل كده ولو فيه حد بيعمل كده فأعتقد ان ده مشكلة اجتماعية قبل ما تكون ليها علاقة برخص او غلو سعر البنزين زي بالضبط السجاير عماله تغلى تفتكر في حد بطل سجاير علشان بقت غاليه ابدا ,,,,,, قلة قليلة اللي بطلت

7. تهريب البنزين والسولار اساسه عدم وجود رقابة علي الكميات المنصرفة من البنزينات وده حيتحل في المنظومة الجديدة لان العربية الفنطاس حتستلم الكمية بكارت وتسلمها للبنزينة بكارت والبنزينة تصرفها من ارصدة كروت المستهلكين واي تهرب حيبان ويندفع بالسعر الحر ساعتها مش حيكون في سوق سوداء

برده اعتقد ان ده مشكلة امنيه ملهاش علاقة بالدعم بدليل ان قبل الثورة نسبة التهريب و السوق السودا كانت ضعيفة جدا لأن كان في داخلية لو مسكت حد بيهرب بنزين ولا سولار بره مصر اكيد سيادتك عارف كان بحصل فيه ايه

بعد كل ده لسة معترض!!

انا عمري ماكنت معترض على رفع الدعم بل بالعكس انا من المؤيدين ليه جدا بس بشروط وقواعد الناس متحسش بعديها ان فيه دعم اترفع حسن شبكة المواصلات عندك الاول قلل الضرايب اللي الناس بتدفعها علشان يركبوا عربيات وحسن دخل الفرد وارفع بعد كده الدعم زي ماانت عايز

انا واحد من الناس معترض تماما علي الحكومة الحالية ورئيسها ومرسي وبديع لكن ده ميمنعش اني اشوف ان المنظومة دي لو اديرت صح زي مهي مكتوبة حتكون خير للدولة وحتفيد المجتمع

مؤيد لكلام سيادتك 1000%

والاختلاف في الراي لا يفسد للود قضية!!!

طبعا ورجاءا تتقبل مروري وابدائي للرايي
اسف على الرغي اللي انا عمال ارغيه وشاكر جدا سعت صدرك معايا