رد فعلك ايه تجاه رفع الدعم من علي البنزين ، ياريت كله يشارك برأيه

**modo88** · 29-04-2013 07:56 PM

والله ياجماعه موضوع رفع الدعم دا مصيبه بكل المقاييس
ناس كتير بتتشغل مندوب وكل شغله بالعربية غير اللي جايب عربيه وشغال عليها بيطلع مشاوير وبيوصل مدارس وهكذا
غير الزحمة اللي موجوده في الشوارع اللي بتنسف البنزين
وطبعا موضوع نقل البضايع كله بالعربيات النقل اللي كل شغلها بالسولار فاطبيعي اسعار النقل هاتزيد اضعاف اضعاف ولازم احنا اللي هنتحمل الزياده دي علي اساس اننا متحملين يعني دلوقتي !
ما بدل مايلغوا الدعم يتقوا ربنا ويوزعوا صح يعني التوكتوك من يوم مانزل مصر وحصل ازمه في البنزين وازمه ف الاخلاق وازمه في الشوارع مايمنعوا التوكتوك خالص او يقللوا منه وبردو المتوسيكلات الصيني بقت لعبه في ايد كل طفل دلوقتي غير التروسيكلات والسزوكي الفان كل دا من يوم ما ظهر وحصلت ازمه فعلا ف البنزين طيب ماتقفوا ضد انتشار الحاجات دي اللي بتشرب البنزين كله بدل ماتغلوا الدعم !
ولو بيتحججوا بصندوق النقد يعملوا شوارع نضيفه مابتقفش ومش مكسرة ويوفروا مواصلات أدميه وبكتره لانهم نسيوا ان الناس هاتلجأ ليها بعد مايركنوا عربياتهم ...ال يعني الموصلات ناقصه زحمه اوي.
عموما انا توقعاتي ان لو مظبطوش الدنيا في الحوار دا البلد هايحصل فيها انتفاضه كبيرة واقرب مثل اللي حصل ف الاردن في الفتره اللي فاتت .

**rompo10** · 29-04-2013 08:41 PM

بوظتها يابديع انت والشاطر ولبستوها في مرسي

**تامر.محمد** · 29-04-2013 08:48 PM

المشاركة الأصلية كتبت بواسطة m.ayman

[color="rgb(65, 105, 225)"]يعني حضرتك معندكش اعتراض عليه كمبدأ و كمنظومه مش كده ، طب ممكن يتطبق غلط ازاي ؟[/color]
[/color]

ما عنديش اعتراض على المبدأ لسبب
اصل فكرة الدعم انها فلوس بتروح لغير القادرين
فإن الفلوس تروح لكل الناس غنيهم وفقيرهم ده غلط
فكده فعلا الدعم على كل حاجة بما فيها الوقود مفروض يروح للناس اللي على قدها بس
و المفترض ان دي سلعة لها سعر فالحكومة تصرف علينا في النقطة دي ما ينفعش في الظروف دي

ندخل في النقطة اللي بعدها
المقدار
ايه المقدار اللي كافي لواحد (مش مقتدر للدرجة) ؟
هما قدروها ب5 لترات يوميا يعني في عربية 1600 يبقوا 50 كيلومتر يوميا بما فيها الاجازات , يعني بيعمل بعربيته في الشهر 1500 كيلو يعني بيعمل بيها 18 الف كيلو في السنة
و الله ده مناسب خير و بركة , مش مناسب يبقى مفترض يبقى فيه كلام على المقدار مش على المبدأ
انا متهيأ لي 50 كيلو في اليوم معقول اوي , و ان كنت انا عن نفسي بامشي اكتر من كده , لكن في الحالة دي يبقى على حسابي بقى :)

الخوف من التطبيق نفسه اللي وارد جدا في ضوء المنظومة الخربانة اللي عندنا انه يبقى مليان بالثغرات زي اللي ذكرها بعض الاخوة في الموضوع هنا

طبعا كل الكلام ده على البنزين , السولار حسبته مختلفة تماما

**M.Ayman** · 29-04-2013 09:17 PM

المشاركة الأصلية كتبت بواسطة تامر.محمد

ما عنديش اعتراض على المبدأ لسبب
اصل فكرة الدعم انها فلوس بتروح لغير القادرين
فإن الفلوس تروح لكل الناس غنيهم وفقيرهم ده غلط
فكده فعلا الدعم على كل حاجة بما فيها الوقود مفروض يروح للناس اللي على قدها بس
و المفترض ان دي سلعة لها سعر فالحكومة تصرف علينا في النقطة دي ما ينفعش في الظروف دي

ماشي انا مع حضرتك ان المفروض لو في حد غير قادر او ميستاهلش الدعم اشيله من عليه ، بس انا لسه من شويه قايل علي تقسيمة الدعم عامله ازاي حضرتك ممكن تلاقيها في الرد بتاعي علي 4fun14 .... الخلاصه ان اكتر تلت ارباع الدعم رايح لناس محتاجاه اللي هما الناس اللي بتمون ٨٠ و ٩٠ و دي عربيات قديمه جدا او تاكسيات ...الخ نيجي بقي للربع الباقي بتاع ال ٩٢ ده بقي نبتدي نفنطه صح و نشوف مين محتاج و مين مش محتاج و اكييييد زي ما قلت قبل كده اللي معاه عربيه زيرو موديل السنادي ١٦٠٠ او ١٤٠٠ تربو سعرها معدي او في رينج ٢٥٠ - ٣٠٠ الف جنيه مش هيحتاج الدعم اكتر من بني ادم معاه عربيه موديل تمانينات متعديش ٤٠ - ٤٥ الف مثلا موتورها اكبر من ١٦٠٠ !! صح ولا ايه ... يبقي كده المنظومه غلط بس المبدأ متفق معاك عليه

ندخل في النقطة اللي بعدها
المقدار
ايه المقدار اللي كافي لواحد (مش مقتدر للدرجة) ؟
هما قدروها ب5 لترات يوميا يعني في عربية 1600 يبقوا 50 كيلومتر يوميا بما فيها الاجازات , يعني بيعمل بعربيته في الشهر 1500 كيلو يعني بيعمل بيها 18 الف كيلو في السنة
و الله ده مناسب خير و بركة , مش مناسب يبقى مفترض يبقى فيه كلام على المقدار مش على المبدأ
انا متهيأ لي 50 كيلو في اليوم معقول اوي , و ان كنت انا عن نفسي بامشي اكتر من كده , لكن في الحالة دي يبقى على حسابي بقى :)

هو مبدئيا ١٨٠٠ لتر في السنه بمعدل ٥ لتر يومي .... ٥ لتر دي تكفي ايه ولا ايه تكفي زحمة السير و انت رايح الشغل او الجامعه و لا تكفي زحمة السير برضه و انت راجع تاني بيتك :) ولا تكفي المسافه اللي بينك و بين شغلك او دراستك و كام واحد فينا يعني عارف يسكن جنب شغله او دراسته ... ده الشغل بطلوع الروح و الشقه متاخده بمبدأ اللي سكن سكن من زمان الواحد بيحمد ربنا انه لقي شقه يسكن فيها اكيد مش سهل انقل -ده ان مكانش مستحيل- معظمنا ساكن في نص البلد و شغله في النص التاني للاسف و بيلبس بقي في الدائري المحور كوبري اكتوبر ...الخ و عييييييييش بقي في اكل البنزين لو عربيتك قديمه او حتي جديده في الزحمه دي

الخوف من التطبيق نفسه اللي وارد جدا في ضوء المنظومة الخربانة اللي عندنا انه يبقى مليان بالثغرات زي اللي ذكرها بعض الاخوة في الموضوع هنا

ما اكيد طبعا لسوء التوزيع من الاول في ناس مش محتاجه البنزين ده هتبيعه و ناس كتير محتاجاه هتشتريه سوق سودا اقل من الحر بشويه و هكذا زود بقي لعب التجار و اصحاب البنزينات و تظبيط الرقابه و و و الخ :)

طبعا كل الكلام ده على البنزين , السولار حسبته مختلفة تماما

كل ده كوووووم و غلاء الاسعار في كل حاجه تانيه هيبقي كوم تاني

**ahmedsrs** · 29-04-2013 09:27 PM

انا مش مع رفع الدعم فى ظل وجود فوضى فى البلد عشان الفوضى هتزيد اكتر مع تطبيق منظومة الكروت او الكوبونات الى هتخلق مافيا جديدة للتجارة فى الكوبونات الاصلية والمزورة وكمان ممكن تلاقى بنزينة تقبل بيها وبنزينة متقبلش وهتبقى مسخرة طبعا هتلاقى فورة ارتفاع فى الاسعار والحجة معروفة الكوبونات مش لاقيينها يابيه

**rompo10** · 29-04-2013 09:48 PM

طيب انا من البحيره وبنزل القاهره كل اسبوه مرتين والاسكندريه مره وطنطا مره وباقي الاسبوع لف عادي بيني وبين القاهره 160ك اعمل ايه بقي انتحر ولا اتمشي ولا بلاش اتحرك خالص من البيت